“Itokiše, se e ka ba Seo se Kwešago Bohloko”

NA O kile wa kwa mantšu ao? Mohlomongwe ngaka goba mooki ba a boletše pele ga ge ba ka nea kalafo e šišintšwego.

Mohlomongwe, ga se wa ka wa gana kalafo feela e le gore o pheme bohloko bjo bo tlago. Go e-na le moo, o ile wa kgotlelela bohloko e le gore o hwetše mehola ya bophelo bjo bobotse nakong e tlago. Maemong a šoro kudu, go amogela goba go gana kalafo e bohloko e ka ba taba ya bophelo le lehu.

Gaešita le ge e se ka mehla moo re ka nyakago tlhokomelo ya ngaka, ka moka ga rena re le batho ba sa phethagalago re ka se phele ka ntle le tayo goba phošollo, gaešita le yeo ka dinako tše dingwe e ka bago bohloko. (Jeremia 10:​23) Beibele ge e gatelela senyakwa se ka lehlakoreng la bana e re: “Bošilo xe bo xwêrana le pelo ya mošemanyana, bo rakwa ke kxati ya thsôlô.”—Diema 22:15.

Kgati mo tabeng ye, ke leswao la matla a taolo a batswadi. Ke therešo gore ke bana ba sego kae bao ba ratago tayo. Ge e ba e akaretša kotlo ya mohuta o itšego, ba ka no se e rate. Lega go le bjalo, batswadi ba lerato ba lebelela ka kua ga maikwelo a gobetšego a ngwana go bona seo a tlago go se buna mafelelong. Batswadi ba Bakriste ba a tseba gore Lentšu la Modimo le a rereša ge le re: “Xo laiwa xohle, xa xo thabiše xe motho à sa laiwa, xo byalo ka e ke ké xo hlokofatšwa; fêla, ka moraxo xo tšweletša seenywa sa tokô le leaxô xo bao ba tlwaetšwaxo xo laiwa.”—Ba-Hebere 12:​11; Diema 13:24.

Go ba gona, ga se bana ba nnoši bao ba nyakago tayo. Batho ba bagolo le bona ba a e nyaka. Beibele e bolela le batho ba bagolo ge e re: “Xomarêla thutô! Se e lahlê! E bolokê. Ké yôna bophelô bya xaxo.” (Diema 4:​13) Ee, batho ba bohlaleba banyenyane le ba bagoloba tla amogela tayo yeo e theilwego Lentšung la Modimo Beibele, ka gobane go dira bjalo go tla boloka bophelo bja bona mafelelong.