Ke ka Baka La’ng Lefase Leo la Bogologolo le Ile la Fedišwa?

MEETSE-FULA a lefaseng ka bophara e be e se kotsi ya tlhago. E be e le kahlolo e tšwago go Modimo. Temošo e ile ya newa, eupša batho ba bantši ba ile ba e hlokomologa. Ka baka la’ng? Jesu o hlalositše gore: “Mola meetse-fula à sešo a tla, xe [batho ba be] ba-e-ja, bà e-nwa, bà nyala, bà nyadiša, xwa bá xwa tla ’tšatši le Noaxe a tsenexo polokelong ka lôna. Ba be ba sa šetše selô; meetse-fula a bá a tla, a ba tšea ka moka.” (Mongwalo o sekamego ke wa rena.)—Mateo 24:​38, 39.

Setšhaba Seo se Atlegilego

Mabakeng a itšego, setšhaba sa mehleng ya pele ga Meetse-fula se ile sa thabela mehola yeo re se nago yona lehono. Ka mohlala, batho ka moka ba be ba bolela leleme le tee. (Genesi 11:1) Se se be se tla tutuetša dilo tše di fihlelelwago go tša bokgabo le thutamahlale tšeo di nyakago boiteko bjo bo kopanetšwego bja batho ba bantši bao ba nago le bokgoni bjo bo fapa-fapanego. Gape, nako ya bophelo e telele yeo bontši bja batho ka nako yeo ba bego ba e thabela e be e bolela gore ba be ba ka tšwela pele go aga go seo ba ithutilego sona go theoša le nywaga-kgolo.

Ba bangwe ba bolela gore bophelo bja motho e be e se bjo botelele gakaalo morago nakong yeo le gore nywaga yeo e boletšwego ka pegong ya Beibele ge e le gabotse e be e le dikgwedi. Na seo ke therešo? Gona, nagana ka taba ya Mahalalele. Beibele e re: “Mahalalele yêna ó feditše nywaxa e masome a selêlaxo le nywaxa e mehlano, xwa bêlêxwa Jarede. . . . Mehla ka  moka ye Mahalalele a e feditšexo ya tseb’o ba makxolo a seswai le masome a senyane le nywaxa e mehlano; ya ba xôna a hwaxo.” (Genesi 5:​15-17) Ge e ba ngwaga e le kgwedi, Mahalalele o bile le morwa ge a be a na le nywaga e mehlano feela! Ngwaga e be e se kgwedi, batho ka nako yeo ba be ba le kgaufsi le bophelo bjo bo phethagetšego bja motho wa mathomo, Adama. Ba ile ba phela ka nywaga-kgolo e le ka kgonthe. Ba fihleletše eng?

Nywaga-kgolo e mentši pele ga Meetse-fula, badudi ba lefaseng ba atlegile go fihla bokgoleng bja gore morwa wa Adama Kaine a kgone go aga motse o mogolo, woo a ilego a o bitša Hanoge. (Genesi 4:​17) Mehleng ya pele ga Meetse-fula, go ile gwa hlongwa diintaseteri tše di fapa-fapanego. Go be go na le barudi ba go “rula dilô ka moka tša mphiri le thsipi.” (Genesi 4:​22) Ka ntle le pelaelo didirišwa tše di be di dirišetšwa go aga, go betla, go roka le tša temo. Mediro ye ka moka go bolelwa ka yona dipegong tša lefase la pele la badudi ba batho.

Tsebo yeo ba e kgobokeditšego e be e tla dira gore go kgonege gore meloko e tlago e be le bokgoni bjo bo kgethegilego bjo bjalo ka thutamahlale, botsebi bja mmu, go godiša dinku le dikgomo, go ngwala le bokgabo bja dilo tše dibotse. Ka mohlala, Jubale e be e le “[“mohlami,” NW] tata xó bao ba xo letša lekope le naka.” (Genesi 4:​21) Setšhaba se ile sa ata kudu. Lega go le bjalo, dilo ka moka di ile tša fela ka go panya ga leihlo. Go diragetše’ng?

Go Senyegile Kae?

Ka mehola ya sona ka moka, setšhaba sa pele ga Meetse-fula se ile sa ba le mathomo a mabe. Mothomi wa sona Adama, e be e le lerabele malebana le Modimo. Kaine e lego moagi wa motse o mogolo wa mathomo woo go begilwego ka wona, o ile a bolaya ngwanabo. Ga go makatše gore bobe bo ile bja gola ka lebelo! Mafelelo a bohwa bjo bo nago le bosodi bjoo Adama a bo tlogeletšego bana ba gagwe bo be bo oketšega.—Ba-Roma 5:12.

Dilo di swanetše go ba di be di fihla sehloeng ge Jehofa a be a ikemišetša gore o tla dumelela boemo go tšwela pele ka nywaga e mengwe e 120 feela. (Genesi 6:3) Beibele e re: “Bokxôpô bya batho bò xodile mo lefaseng, le tirô ka moka tša diakanyô tša dipelô tša bôná è le bobe fêla ka mehla. . . . Lefase lè tletše tša sehloxo.”—Genesi 6:​5, 11.

Mafelelong, Noage o ile a botšwa ka go lebanya gore Modimo o tlo fediša nama ka moka ka meetse-fula. (Genesi 6:​13, 17) Gaešita le ge Noage a ile a ba “sexoeledi sa tokô,” go bonagala go be go le thata gore batho ba dumele gore selo se sengwe le se sengwe seo se ba dikologilego se be se tlo fedišwa. (2 Petro 2:5) Ke batho ba seswai feela bao ba ilego ba kwa temošo gomme ba phologa. (1 Petro 3:​20) Ke ka baka la’ng se se le bohlokwa go rena lehono?

Se se na le Bohlokwa Bofe Bakeng sa Rena?

Re phela mehleng e swanago le ya Noage. Ka mehla re kwa ka ditiro tše di boifišago tša botšhošetši, masolo a polao ya molokwana-rite, dipolao tša batho ka bontši ke banna bao ba itlhamilego ka dithunya bao ba se nago boikemišetšo bjo bo lego molaleng le bošoro bja ka gae ka tekanyo e boifišago kudu. Lefase gape le tladitšwe ka bošoro, gomme bjalo ka pele lefase le lemošitšwe ka kahlolo yeo e tlago. Jesu ka noši o itše o tla tla bjalo ka Moahlodi yo a beilwego ke Modimo gomme a aroganya batho bjalo ka modiši a aroganya dinku go dipudi. Jesu o itše bao ba tla hwetšwago ba sa swanelege, “ba tlo ya thlokofatšong ye e sa felexo.” (Mateo 25:​31-33, 46) Lega go le bjalo, Beibele e bolela gore mo nakong ye go tlo ba le baphologi ba dimilionelešaba le legolo leo le rapelago Modimo a nnoši wa therešo. Lefaseng le le tlago, ba ba tla thabela bophelo khutšong ya ka mo go sa felego le tšhireletšego e sa kago ya bonwa pele.Mika 4:​3, 4; Kutollo 7:​9-17.

Ba bantši ba nyatša dipolelo tše bjalo tša Beibele le ditemošo tša mabapi le tiro ya kahlolo tšeo di tla bontšhago gore dipolelo tše bjalo ke tša kgonthe. Eupša moapostola Petro o ile a hlalosa gore bakweri ba bjalo ba hlokomologa ditherešo. O ngwadile gore: “Mehleng ya bofêlô xo tlo tsoxa bakweri . . . E tlo ba ba ba rexo: Di kae tša xe xo thwe Morêna ó tlo boa? . . . Batho bao ba dira ka boomo xe ba sa hlathe xore xo tloxa kxaleng xo dutše xò na le maxodimo, le lefase la xo tšwêlêla lè e-tšwa meetseng ka matla a meetse, ka  Lentšu la Modimo. Meetse ao a buša a apeša lefase la mehla yela, ’me la lôba. Maxodimo a mehla yeno le lefase la mehla yeno di thekxilwe ke lôna Lentšu leo, di sa lôtôlwa xwa tlo bá xwa tla mollô wa letšatši la kahlolô la xo tlo lôba xa batho ba banyatši.”—2 Petro 3:​3-7.

Temošo ya lefase ka bophara mabapi le letšatši le la kahlolo leo le tlago le molaetša wa ditaba tše dibotse mabapi le khutšo yeo e tlago go latela lehono di bolelwa ka mafolofolo ka go kwa taelo ya Jesu ya boporofeta. (Mateo 24:​14) Temošo ye ga se ya swanela go tšewa ga bohwefo. Modimo o phethagatša dikholofetšo tša gagwe.

Lefase Leo le Tlago

Bokamoso bja batho ke bofe mabapi le phetogo e tlago e bohlokwa? Matsenong a Thuto ya gagwe e tumilego ya Thabeng, Jesu o holofeditše gore: “Ba lehlôxônôlô ké ba bolêta, xobane bôná-bao ba tlo tšea lefase ya ba kabêlô ya bôná.” Ke moka o ile a tšwela pele go ruta barutiwa ba gagwe go rapela Modimo ka gore: “Thatô ya xaxo a e dirwê mono lefaseng byalo ka xe e dirwa lexodimong.” (Mateo 5:5; 6:​10) Ee, Jesu ka noši o rutile gore bokamoso bjo bo kgahlišago bjo bo boloketšwego batho ba botegago bo gona mo lefaseng. O ile a bolela ka bjona e le “xo mphsafala.”—Mateo 19:28.

Ka gona ge o dutše o naganišiša ka bokamoso, o se ke wa dumelela bakweri ba go dira gore o be le pelaelo ka temošo ya Modimo. Ke therešo gore tikologo ya rena e ka bonagala e le e šireletšegilego, gomme lefase la gona bjale le bile gona ka nako e telele. Lega go le bjalo, ga se ra swanela go bea kholofelo ya rena go lona. Lefase la batho le ahlotšwe. Ka gona, kgothatšwa ke phetho ya lengwalo la moapostola Petro:

“Byalo xe dilô tše e le tša xo tlo xašanywa, xo swanetše ruri-ruri xe Le le ba xo swara ka tsela e kxêthwa ya borapedi, Lè le ba xo letêla le xo phafoxêla xo tla xa letšatši leo la Modimo . . . xe Le letetše tšeo, phêxêlêlang xo tlo hwetšwa kè Yêna Lè se na bosodi le senyalô, Lè le ba moláô. . . . [Le] tšwêlêla pele Lè le ba xo xauxêlwa le ba xo tseba Mong wa rena Mophološi Jesu Kriste.” (2 Petro 3:​11, 12, 14, 18) Lega go le bjalo, ithute go seo se diragetšego morago kua mehleng ya Noage. Batamela kgaufsi le Modimo. Gola tsebong ya go tseba Jesu Kriste. Hlagolela boineelo go Modimo, gomme o be gare ga ba dimilione bao ba kgethago go phologela bofelo bja lefase le lefaseng la khutšo leo le tlago.

[Seswantšho go letlakala 5]

Go šoma ka tšhipi go be go tsebja pele ga Meetse-fula

[Seswantšho go letlakala 7]

Go bolokilwe bokamoso bjo bo kgahlišago