O ka Phologa Bjang Bofelo bja Lefase le?

BEIBELE e hlalosa bofelo bja tshepedišo ya gona bjale ya dilo e le “letšatši la kxalefô, ’tšatši la tlalêlô le la pitlaxanô, ’tšatši la xo senyêxêlwa le la xo šwalalanywa, ’tšatši la lefsifsi, la ’fsifsi le lexolo, ’tšatši la maru, la maru a maso.” (Tsefanya 1:​15) Ka ntle le pelaelo le ga se mohuta wa letšatši leo ka tlwaelo o le fagahlelelago! Lega go le bjalo, moapostola Petro o eleditše Bakriste-gotee le yena go “letêla le xo phafoxêla xo tla xa letšatši leo la Modimo, la xe maxodimo a tlo fedišwa à thšumilwe, le tše lefase le bopilwexo ka tšôna tša tlo fsa tša toloxa. Se re se letetšexo ka xo kwa dikholofedišô tša xaxwe ké maxodimo a mafsa le lefase le lefsa, moo xo axilexo tokô.”—2 Petro 3:​12, 13.

Petro mo o be a sa bolele ka phedišo ya magodimo le lefase tša kgonthe. “Maxodimo” le “lefase” tšeo Petro a bego a bolela ka tšona mo tabeng e dikologilego ke diswantšhetšo tša mebušo ya gona bjale e gobogilego ya batho le lekgotla la batho bao ba sa boifego Modimo. ‘Letšatši la Jehofa’ le ka se ke la fediša lefase ka bolona eupša le tla ‘fediša disenyi mo go lona.’ (Jesaya 13:9) Bakeng sa bao ba ‘llago ba hlokofetše’ bao ba tlaišwago ke lekoko le kgopo la batho la lehono, letšatši la Jehofa e tla ba letšatši la phološo.—Hesekiele 9:4.

Ka gona, ke bjang motho a ka phološwago ‘letšatšing le legolo le le tšhabegago la Jehofa’? “Lentšu la Jehofa” leo le utolletšwego yo mongwe wa baporofeta ba gagwe le nea karabo potšišong yeo: ‘E mongwe le e mongwe yo a bitšago leina la Jehofa o tlo phološwa.’ (Joele 1:​1, PK; 2:​31, 32, PK) Dihlatse tša Jehofa di tla thabela go go thuša go ithuta seo se bolelwago ke go bitša leina la Jehofa.