Seetša sa Modimo se Raka Lefsifsi!

“Ka Morêna ’fsifsi la-ka e ba s’etša.”—2 SAMUELE 22:29.

1. Seetša se tswalana bjang le bophelo?

“MODIMO a re: Seetša a se bê xôna! Seetša sa na sa ba xôna.” (Genesi 1:3) Ka mantšu ao a bohlokwa, pego ya tlholo go Genesi e hlaola Jehofa e le mothopo wa seetša, seo ka ntle le sona bophelo bo bego bo ka se kgonege lefaseng. Le gona Jehofa ke mothopo wa seetša sa moya, seo se lego bohlokwa bakeng sa go re hlahla maphelong a rena. (Psalme 43:3) Kgoši Dafida o ile a bontšha tswalano ya kgaufsi magareng ga seetša sa moya le bophelo ge a be a ngwala gore: “Xo Wene go mothôpô wa bophelô; seetša re se bôna rè le seetšeng sa xaxo.”—Psalme 36:9.

2. Bjale ka ge Paulo a bontšhitše, seetša se tswalana kgaufsi le eng?

² Nywaga e ka bago 1 000 ka morago ga mehla ya Dafida, moapostola Paulo o ile a bolela ka pego ya tlholo. Ge a be a ngwalela phuthego ya Bakriste ya Korinthe o itše: “Ké Yêna Modimo e a itšexo: Seetša a se bônêxê mo xo lexo lefsifsi.” Ke moka Paulo o bontšhitše gore seetša sa moya se tswalana kgaufsi le tsebo e tšwago go Jehofa ge a be a tlaleletša ka gore: “Ké Yêna a bonexetšexo dipelo tša rena, ya ba xo edišwa ka xo tseba letaxô la Modimo ka sefahloxô sa Jesu Kriste.” (2 Ba-Korinthe 4:6) Seetša se se re fihlelela bjang?

Beibele Sefetiši sa Seetša

3. Ke seetša sefe seo Jehofa a se neago ka Beibele?

³ Jehofa o nea seetša sa moya kudu ka Lentšu la gagwe leo le buduletšwego, Beibele. Ka gona ge re ithuta Beibele le go monya tsebo e tšwago go Modimo, re dumelela seetša sa gagwe go re phadimela. Jehofa o hlabiša seetša ka merero ya gagwe gomme a re botša kamoo re ka dirago thato ya gagwe ka gona ka Beibele. Se se re nea morero maphelong a rena gomme se thuša go kgotsofatša dinyakwa tša rena tša moya. (Mmoledi 12:1; Mateo 5:3) Jesu o gateletše gore re swanetše go hlokomela dinyakwa tša rena tša moya ge a be a tsopola Molao wa Moše, o itše: “Xo ngwadilwe xore motho xa a phele ka boxôbê fêla; ó phela ka mantšu ohle a a tšwaxo molomong wa Modimo.”—Mateo 4:4; Doiteronomio 8:3.

4. Ke ka tsela efe Jesu e lego “seetša sa lefase”?

⁴ Jesu o tswalanywa kgaufsi le seetša sa moya. Ka kgonthe, o ipoletše e le “seetša sa lefase” gomme a re: “E a ntatêlaxo a ka se kê a sepela lefsifsing; ó tlo ba le seetša sa bophelô.” (Johane 8:​12) Polelwana ye e re thuša go kwešiša karolo ya bohlokwa yeo Jesu a nago le yona go neeng batho therešo ya Jehofa. Ge e ba re tla phema lefsifsi gomme ra sepela seetšeng sa Modimo,  re swanetše go theetša sohle seo Jesu a se bolelago gomme re latele mohlala le dithuto tša gagwe kgaufsi bjale ka ge di begilwe ka Beibeleng.

5. Ke boikarabelo bofe bjo balatedi ba Jesu ba bilego le bjona ka morago ga lehu la gagwe?

⁵ Matšatši a mmalwa pele ga lehu la gagwe, ge Jesu a itšhupa e le seetša o boditše barutiwa ba gagwe gore: “Seetša se sa tlo fetša lebakanyana e sexo lekae sè le mo xo lena. Sepelang byale Lè sa na le sôna seetša, xore Le se tlo wêlwa ke lefsifsi. Xomme e a sepelaxo lefsifsing xa a tsebe mo a yaxo. Xe Le sa na le seetša, dumêlang sôna seetša.” (Johane 12:​35, 36) Bao e bilego barwa ba seetša ba ithutile “mantšu ao a se naxo senyalô” a Beibele. (2 Timotheo 1:​13, 14) Gomme ba ile ba diriša mantšu a a se nago senyalo go goga batho ba bangwe ba dipelo tše di botegago lefsifsing go ba iša seetšeng sa Modimo.

6. Ke therešo efe ya motheo mabapi le seetša le lefsifsi yeo re e hwetšago go 1 Johane 1:5?

⁶ Moapostola Johane o ngwadile gore: “Modimo ké Seetša; xomme mo xo Yêna xa xo se e ka baxo lefsifsi.” (1 Johane 1:5) Ela hloko phapano e lego gona magareng ga seetša le lefsifsi. Seetša sa moya se tšwa go Jehofa, gomme lefsifsi la moya le ka se tswalanywe le yena. Ka gona, mothopo wa lefsifsi ke mang?

Mothopo wa Lefsifsi la Moya

7. Ke mang a ikarabelago ka lefsifsi la moya la lefase, gomme o na le tutuetšo efe?

⁷ Moapostola Paulo o boletše ka “modimo wa lefase lé.” Ka polelo yeo, o be a bolela ka Sathane Diabolo. O tšwetše pele gore ke yo a “foufaditšexo dipelo tša bôná, xore ba se bônêxêlwê ke lebônê la Ebangedi ya letaxô la Kriste, Yêna seswanthšô sa Modimo.” (2 Ba-Korinthe 4:4) Ba bantši ba ipolela gore ba dumela go Modimo; lega go le bjalo, palo e golago ya bona ga e dumele gore Diabolo o gona. Ka baka la’ng? Ga ba nyake go amogela gore matla a itšego a mabe, a lego ka godimo ga a motho a ka ba a le gona gomme a tutuetša tsela yeo ba naganago ka yona. Lega go le bjalo, bjalo ka ge Paulo a bontšha, Diabolo o gona gomme o tutuetša batho e le gore ba se kgone go bona seetša sa therešo. Matla a Sathane a go tutuetša kgopolo tša batho a bonala tlhalosong yeo e lego mabapi le yena ya boporofeta e le “motimetši wa lefase ka moka la batho.” (Kutollo 12:9) E le mafelelo a mediro ya Sathane, boemo bjo bo boletšwego e sa le pele ke moporofeta Jesaya ga bjale bo šupa go batho ka moka ka ntle le bao ba hlankelago Jehofa: “Lefsifsi le khurumeditše lefase, boso bo thibile dithšabeng.”—Jesaya 60:2.

8. Ke ka ditsela dife bao ba lego lefsifsing la moya ba bontšhago gore ba gakanegile?

⁸ Lefsifsing le leso ga go kgonege go bona selo. Motho a ka timela gabonolo goba a gakanega. Ka mo go swanago, bao ba lego lefsifsing la moya ba hlaelelwa ke temogo gomme go se go ye kae ba gakanega ka mo go feletšego ka kgopolo ya moya. Ba ka lahlegelwa ke bokgoni bja go hlaola therešo go maaka, botse go bobe. Moporofeta Jesaya o boletše ka bao ba lego lefsifsing le bjalo ge a be a ngwala gore: “Kotsi e tlo wêla ba ba rexo bobe ba re ké botse, ’me botse ba re ké bobe; ba ba beaxo lefsifsi ba re ké seetša; seetša ba re ké lefsifsi; se se xalakaxo ba re ké se bose, se bose ba re se a xalaka.” (Jesaya 5:​20) Bao ba dulago lefsifsing la moya ba tutuetšwa ke modimo wa lefsifsi, Sathane Diabolo, gomme ka baka la seo ba arotšwe mothopong wa seetša le bophelo.—Ba-Efeso 4:​17-19.

Tlhohlo ya go Tloga Lefsifsing go ya Seetšeng

9. Hlalosa kamoo badira-dibe ba nago le kgogedi le lefsifsi bobedi ka kgopolo ya kgonthe le ya moya.

⁹ Jobo yo a botegago o ile a šupa kgogedi yeo badira-dibe ba nago le yona le lefsifsi la kgonthe ge a re: “Leihlô la seotswa le letêla lesothwana; ó re ke se bônwê ke leihlô, a pipetša sefahloxô ka lešela.” (Jobo 24:​15) Badira-dibe le bona ba lefsifsing la moya, gomme lefsifsi le bjalo le ka ba leo le fetšago matla. Moapostola Paulo o boletše gore boitshwaro bjo bo gobogilego bja dikopano tša botona le botshadi, bohodu, megabaru, botagwa, maroga le bohlakodi ke dilo tšeo di tlwaelegilego go bao ba tantšwego lefsifsing leo. Eupša mang le mang yo a tlago seetšeng sa Lentšu la Modimo a ka fetoga. Paulo o bontšha gabotse lengwalong la gagwe le  le yago go ba-Korinthe gore phetogo e bjalo e a kgonega. Bontši bja Bakriste ba Korinthe ba be ba dira mediro ya lefsifsi, lega go le bjalo Paulo o ba boditše gore: “Fêla, Le hlatswitšwe, Le kxethexile, Le lokafaditšwe ka Leina la Morêna Jesu le ka Môya wa Modimo wa rena.”—1 Ba-Korinthe 6:​9-11.

10, 11. (a) Jesu o ile a bontšha bjang go naganela monna yo a ilego a mo foufolla? (b) Ke ka baka la’ng ba bantši ba sa kgethe seetša?

¹⁰ Ge motho a e-tšwa lefsifsing le legolo a e-tla seetšeng, mahlo a gagwe a tla tšea nakonyana go tlwaelana le seetša. Kua Betsaida, Jesu o ile a fodiša monna wa sefofu eupša ka botho o ile a dira seo ka megato. “A swara motho eo wa sefofu ka seatla, a tšwa naê’ mo motseng, a mo thswêla mahlong, a mmea diatla, a mmotšiša a re: A O a bôna? Motho eo a xadia a re: Ke bôna batho, e ke ké dihlare bà dikoloxa. A buša a mmea diatla mahlong, a re a xadiê. Motho eo a fôlêla ruri, a bôna tšohle xa-botse.” (Mareka 8:​23-25) Go bonala Jesu a ile a buša go bona ga monna ganyenyane-ganyenyane e le gore monna a ka itlwaetša seetša se se phadimago. Re ka akanya lethabo la monna yoo ge a be a kgona go bona.

¹¹ Lega go le bjalo, lethabo leo monna yoo a ilego a le kwa le fetwa ke lethabo la bao ba thušwago go tšwa lefsifsing la moya go ya seetšeng sa therešo mogato ka mogato. Ge re bona lethabo la bona, re ka ipotšiša lebaka leo ka lona ba bantši ba sa gogelwego ke therešo. Jesu o nea lebaka: “Kahlolô yôna šé: Seetša se tlile lefaseng; xomme batho ba rata lefsifsi xa-xolo, ba nyatša seetša xobane medirô ya bôná e le e mebe. Xobane mo-dira-tše-mpe mang le mang ó hloile seetša, xa a tle xo sôna, xore medirô ya xaxwe e se kê ya kxalwa.” (Johane 3:​19, 20) Ee, ba bantši ba rata go dira ‘dilo tše mpe’tše bjalo ka boitshwaro bjo bo gobogilego, kgatelelo, go bolela maaka, bomenetša le go utswagomme lefsifsi la moya la Sathane ke tikologo e kaone bakeng sa bona go dira kamoo ba ratago ka gona.

Go Dira Tšwelopele Seetšeng

12. Re holegile ka ditsela dife ka go tla seetšeng?

¹² E sa le mola re tlago tsebong ya seetša, ke diphetogo dife tšeo re di bonego go rena? Ka dinako tše dingwe ke mo go botse go lebelela morago gomme re hlahlobe tšwelopele ya moya yeo re e dirilego. Ke mekgwa efe e mebe yeo re e lahlilego? Ke mathata afe maphelong a rena ao re kgonnego go a lokiša? Dithulaganyo tša rena tša bokamoso di fetogile bjang? Ka matla a Jehofa le ka thušo ya moya wa gagwe o mokgethwa, re ka tšwela pele re dira diphetogo semelong sa rena le tseleng ya rena ya go nagana e lego tšeo di tla bontšhago gore re arabela seetšeng. (Ba-Efeso 4:​23, 24) Paulo o e bea ka tsela ye: “Kxalê Le be Le le lefsifsi; byale xomme Le seetša Moreneng. Swarang tsela bo-ka bana ba seetša. Xobane seenywa sa seetša se mo bothakxeng ka moka le xo lokeng le therešong.” (Ba-Efeso 5:​8, 9) Go itumelela gore re hlahlwe ke seetša sa Jehofa go re nea kholofelo le morero gotee le go oketša lethabo maphelong a bao ba re dikologilego. Gomme go tliša lethabo gakaakang pelong ya Jehofa ge re dira diphetogo tše bjalo!—Diema 27:11.

13. Re ka bontšha bjang tebogo bakeng sa seetša sa Jehofa, gomme ke eng seo se nyakegago bakeng sa tsela yeo?

¹³ Re bontšha tebogo ya rena bakeng sa bophelo bja lethabo bjo re bo thabelago  ka go bonagatša seetša sa Jehofare abelana seo re ithutilego sona ka Beibeleng le ditho tša malapa a rena, bagwera le baagišani. (Mateo 5:​12-​16; 24:​14) Go bao ba ganago go theetša, boboledi bja rena le tsela ya rena ya bophelo ya mohlala ya Bokriste e ba kgalemelo. Paulo o a hlalosa: “Lekang xo hlatha se se kxahlaxo Morêna. Le se kê la xwêrana le ba medirô ya lefsifsi ye e sa tšweletšexo dienywa tša selô; sa lena a e bê xo e sôla.” (Ba-Efeso 5:​10, 11) Go thuša ba bangwe gore ba lahle lefsifsi gomme ba kgethe seetša go nyaka sebete ka lehlakoreng la rena. Sa bohlokwa kudu, go nyaka kwelobohloko le go kgomega ka ba bangwe le kganyogo e tšwago pelong ya go ba abela seetša sa therešo e le gore ba holege ka mo go sa felego.—Mateo 28:​19, 20.

Hlokomela Dietša tša Bofora!

14. Ke tlhokomedišo efe yeo re swanetšego go e ela hloko mabapi le seetša?

¹⁴ Go bao ba lego lewatleng bošego, seetša se sengwe le se sengwe se ba nea lethabo. Mehleng e fetilego, go be go gotetšwa mello magageng a tletšego mafsika a Engelane e le go bontšha moo go ka tšhabelwago madimo gona. Basesiši ba dikepe ba be ba thabela go hlahlwa ke dietša tše go ya maema-kepeng a bolokegilego. Lega go le bjalo, mello e mengwe e be e le ya bofora. Go e na le go hwetša boema-kepe, dikepe tše dintši di be di timetšwa gomme di pšhatlagana mafsikeng a lego lebopong, moo dithoto tša bona di bego di utswiwa. Lefaseng le le timetšago, re swanetše go ba šedi gore re se gogwe ke dietša tša bofora tšeo di ka re gogelago go robegelweng ke sekepe sa moya. Re botšwa gore: “Le yêna Sathane ó ikxanthša a itira Morongwa wa seetša.” Ka mo go swanago, bahlanka ba gagwe go akaretša le bahlanogi, ke “ba xo dira ka maanô” bao ‘le bona ba itirago bahlanka ba toko.’ Ge e ba re dula re nagana ka dithuto tša maaka tša batho ba bjalo, kholofelo ya rena Lentšung la Jehofa la therešo, Beibele, e ka fokola gomme tumelo ya rena e ka hwa.—2 Ba-Korinthe 11:​13-15; 1 Timotheo 1:19.

15. Ke eng seo se tlago go re thuša go dula re le tseleng e išago bophelong?

¹⁵ Mopsalme o ngwadile gore: “ ’Ntšu la xaxo ké lebônê la dinaô tša-ka, ké seetša tseleng ya-ka.” (Psalme 119:​105) Ee, ‘tsela e pitlaganego e išago bophelong’ e bonegetšwe gabotse ke Modimo wa rena yo lerato, Jehofa, “Yêna a rataxo xore batho bohle ba phološwê ba fihlêlê tsebô ya therešô.” (Mateo 7:​14, bapiša le NW; 1 Timotheo 2:4.) Go diriša melao ya motheo ya Beibele go tla re šireletša gore re se fapoge tseleng  e pitlaganego ra ya ditseleng tša lefsifsi. Paulo o ngwadile gore: “Xobane Mangwalô ka moka ké ma-hebetšwa-ke-Modimo, le xôna a hola batho ka xo ruta, le ka xo kxodiša le xo sokolla, le ka xo iša tokong.” (2 Timotheo 3:​16) Ge re dutše re gola moyeng, re rutwa ka Lentšu la Modimo. Seetšeng sa Lentšu la Modimo, re ka kgona go ikgalema, goba ge e ba go nyakega, re solwe ke bagolo ba lerato ka phuthegong. Ka mo go swanago, re ka lokiša ditaba gomme ka boikokobetšo ra amogela tayo ka go loka e le gore re tšwele pele re sepela tseleng ya bophelo.

Go Sepela Seetšeng ka Tebogo

16. Re ka bontšha bjang tebogo bakeng sa mpho e kgahlišago ya Jehofa ya seetša?

¹⁶ Re ka bontšha bjang tebogo bakeng sa mpho e kgahlišago ya Jehofa ya seetša? Johane kgaolo 9 e re botša gore ge Jesu a fodišitše monna yo a bego a belegwe e le sefofu, monna o ile a tutueletšega go bontšha tebogo. Bjang? O ile a bontšha tumelo go Jesu e le Morwa wa Modimo gomme a mmolela phatlalatša gore ke “moporofeta.” Go feta moo, o ile a bolela ka sebete malebana le bao ba ilego ba leka go tšeela mohlolo wa Jesu fase. (Johane 9:​17, 30-​34) Moapostola Petro o bitša ditho tše tloditšwego tša phuthego ya Bokriste gore ke “selete se Yêna a lexo Mong wa sôna.” Ka baka la’ng? Ka gobane ba na le moya wa go bontšha tebogo wo o swanago le wa monna yo a ilego a belegwa e le sefofu gomme a fodišwa. Ba bontšha tebogo go Jehofa, Monei wa bona wa dimpho, ka go ‘tsebatša mabothakga a eo a ba biditšego lefsifsing, a ba biletša seetšeng sa gagwe se se tlabago.’ (1 Petro 2:9; Ba-Kolose 1:​13) Bao ba nago le kholofelo ya go phela lefaseng ba na le moya o swanago wa go leboga, gomme ba thekga bana babo bona ba tloditšwego go tsebatšeng phatlalatša “mabothakxa” a Jehofa. A tokelo e sa lekanywego le selo gakaakang yeo Modimo a e neago batho ba sa phethagalago!

17, 18. (a) Ke boikarabelo bofe bjoo yo mongwe le yo mongwe wa rena a nago le bjona? (b) E le go ekiša Timotheo, ke eng seo Mokriste yo mongwe le yo mongwe a kgothaletšwago go se phema?

¹⁷ Go ba le tebogo e tšwago pelong ya go leboga seetša sa therešo go bohlokwa. Gopola, ga go le o tee wa rena yo a belegwago a tseba therešo. Ba bangwe ba ithuta yona e le batho ba bagolo, gomme ba kgona go bona kapejana go phagama ga seetša ka godimo ga lefsifsi. Ba bangwe ba na le tokelo e kgolo ya go godišwa ke batswadi bao ba boifago Modimo. Go ba bjalo, go ka ba bonolo gore ba tšeele seetša fase. Hlatse e nngwe yeo batswadi ba yona ba bego ba dutše ba hlankela Jehofa pele ga ge e belegwa e dumela gore go ile gwa e tšea nako e ntši le boiteko gore e hwetše bohlokwa bjo bo feletšego bja ditherešo tšeo e bego e di rutilwe go tloga boseeng. (2 Timotheo 3:​15) Re ka ba re le ba banyenyane goba ba bagolo, yo mongwe le yo mongwe wa rena o swanetše go hlagolela tebogo e tseneletšego bakeng sa therešo yeo Jehofa a e utollotšego.

¹⁸ Timotheo wa lesogana o be a rutilwe “Mangwalô a makxêthwa” go tloga boseeng, eupša e be e le feela ka go katana bodireding bja gagwe mo a ilego a hwetša kgolo e le Mokriste. (2 Timotheo 3:​15) O be a le boemong bja go ka thuša Paulo, yo a ilego a mo kgothaletša gore: “Se O swanetšexo xo se phêxêlêla ké xore Modimo a bônê O le mmotexi, O le modiri e a se naxo bosodi, e a tsebaxo xo ratha Lentšu la therešô à sa kxopamiše.” Ka go swana le Timotheo, eka ka moka re ka phema go dira selo le ge e le sefe seo se ka re dirago gore re lewe ke dihlonggoba sa dira gore Jehofa a lewe ke dihlong ka baka la rena!—2 Timotheo 2:15.

19. (a) Ka go swana le Dafida, ka moka ga rena re na le mabaka a go bolela’ng? (b) Ke eng seo se tlago go ahla-ahlwa sehlogong se se latelago?

¹⁹ Re na le mabaka ka moka a go tumiša Jehofa, yo a re filego seetša sa therešo ya gagwe. Ka go swana le Kgoši Dafida, re re: “Wene Morêna, O lebônê la-ka. Ka Morêna ’fsifsi la-ka e ba s’etša.” (2 Samuele 22:​29) Go sa dutše go le bjalo, ga re nyake go ba bao ba iketlilego, ka ge seo se ka lebiša go boeleng morago lefsifsing leo re phološitšwego go lona. Ka gona, sehlogo se se latelago se tla re thuša go lekola bohlokwa bjo re bo neago therešo ya Modimo maphelong a rena.

O Ithutile’ng?

• Jehofa o aba bjang seetša sa moya?

• Ke tlhohlo efe yeo lefsifsi la moya leo le re dikologilego le re swaretšego yona?

• Ke dikotsi dife tšeo re swanetšego go di phema?

• Re ka bontšha bjang tebogo ya rena bakeng sa seetša sa therešo?

[Dipotšišo tša Thuto]

[Seswantšho go letlakala 8]

Jehofa ke mothopo wa seetša sa kgonthe le sa moya

[Seswantšho go letlakala 10]

Go swana le ge Jesu a fodišitše monna wa sefofu ganyenyane-ganyenyane, ka mo go swanago o re thuša go tšwa lefsifsing la moya

[Seswantšho go letlakala 11]

Go timetšwa ke dietša tša bofora tša Sathane go feleletša ka go senyegelwa ke sekepe sa moya