Kriste o Eta Pele Phuthego ya Gagwe

“Xomme tsebang, ke na le lena ka mehla xo fihla bofelong bya lefase.”—Mateo 28:20.

1, 2. (a) Jesu yo a tsošitšwego o ile a holofetša balatedi ba gagwe eng ge a be a nea taelo ya go dira barutiwa? (b) Jesu o ile a eta pele bjang phuthego ya pele ya Bokriste ka mafolofolo?

PELE ga ge a ka rotogela legodimong, Jesu Kriste Moetapele wa rena yo a tsošitšwego o ile a tšwelela pela ga barutiwa ba gagwe gomme a re: “Ke neilwe matla ka moka lexodimong le lefaseng. Ké xôna yang Le dirê dithšaba ka moka barutiwa ka xo ba kolobetša Leineng la Tate le la Morwa le la Môya o mokxêthwa, le ka xo ba ruta xo boloka tšohle tše ke Le laetšexo tšôna. Xomme tsebang, ke na le lena ka mehla xo fihla bofelong bya lefase.”—Mateo 23:​10; 28:​18-20.

² Jesu ga se a fo abela barutiwa ba gagwe modiro wa go phološa bophelo wa go dira barutiwa ba oketšegilego eupša gape le go ba le bona. Histori ya Bokriste bja pele, bjalo ka ge e begilwe ka pukung ya Beibele ya Ditiro, e bontšha e le ka kgonthe gore Kriste o dirišitše matla a gagwe a taolo ao a a neilwego go eta pele phuthego ye e bego e sa tšwa go thewa. O ile a romela “molwedi” yo a holofeditšwegomoya o mokgethwago matlafatša balatedi ba gagwe le go hlahla maiteko a bona. (Johane 16:7; Ditiro 2:​4, 33; 13:​2-4; 16:​6-10) Jesu yo a tsošitšwego o dirišitše barongwa taelong ya gagwe ya go thekga barutiwa ba gagwe. (Ditiro 5:​19; 8:​26; 10:​3-8, 22; 12:​7-11; 27:​23, 24; 1 Petro 3:​22) Go feta moo, Moetapele wa rena o neile tlhahlo ka phuthegong ka go lokišeletša gore banna bao ba swanelegago ba hlankele e le sehlopha se se bušago.—Ditiro 1:​20, 24-26; 6:​1-6; 8:​5, 14-17.

3. Ke dipotšišo dife tšeo di tlago go ahla-ahlwa sehlogong se?

³ Lega go le bjalo, go thwe’ng ka mehla ya rena, ‘bofelo bja lefase’? Jesu Kriste o etelela pele phuthego ya Bokriste bjang lehono? Gomme re ka bontšha bjang gore re amogela boetapele bjo?

Mong o na le Molaki yo a Botegago

4. (a) Ke bomang bao ba bopago “molaki e a bôtêxaxo yo bohlale”? (b) Ke eng seo Mong a se neilego molaki gore a se hlokomele?

⁴ Ge a be a nea boporofeta mabapi le pontšho  ya go ba gona ga gagwe, Jesu o itše: “Byale ké mang molaki e a bôtêxaxo yo bohlale, yo mong wa xaxwe a mmeilexo xo laka bahlanka ba xaxwe le xo ba fa dijô ka lebaka la xôna? Wa lehlôxônôlô e tlo ba molaki eo, mong wa xaxwe xe a e-tla, a mo hwetša a dira tšôna tšeo. Ruri, ke a Le botša, ó tlo mmea a laka dilô tša xaxwe ka moka.” (Mateo 24:​45-47) “Mong” ke Moetapele wa rena Jesu Kriste, gomme o beile “molaki e a bôtêxaxo yo bohlale”sehlopha sa Bakriste ba ba tloditšwego mo lefasenggo hlokomela dilo ka moka tša lefaseng.

5, 6. (a) Ponong yeo moapostola Johane a e amogetšego, “di-hlôma-pônê tše šupaxo tša xauta” le “dinaledi tše di šupaxo” di swantšhetša’ng? (b) Ke eng seo se bontšhwago ke taba ya gore “dinaledi tše di šupaxo” di ka letsogong le letona la Jesu?

⁵ Puku ya Beibele ya Kutollo e bontšha gore molaki e a botegago yo bohlale o ka tlase ga taolo ya Jesu Kriste ka go lebanya. Ponong ya “letšatši la Morêna,” moapostola Johane o bone “di-hlôma-pônê tše šupaxo tša xauta. Mo xare xa tšôna di-hlôma-pônê tšeo ka bôna Mo-ka-Morwa-motho” yoo “ka seatla sa xaxwe se setona [a bego] a swere dinaledi tše di šupaxo.” Ge Jesu a be a hlalosetša Johane pono o itše: “Tša thopa ya dinaledi tše šupaxo tša mo seatleng sa-ka se setona, le tša di-hlôma-pônê tše šupaxo tša xauta. Dinaledi tšeo tše šupaxo ké batseta ba diphuthêxô tše šupaxo. Di-hlôma-pônê tše šupaxo tše O di bonexo, ké diphuthêxô tše šupaxo.”—Kutollo 1:​1, 10-20.

⁶ “Di-hlôma-pônê tše šupaxo tša xauta” di swantšhetša diphuthego ka moka tša Bokriste bja therešo tšeo di lego gona ka “letšatši la Morêna” leo le thomilego ka 1914. Eupša go thwe’ng ka “dinaledi tše di šupaxo”? Mathomong, di be di swantšhetša balebeledi ka moka bao ba tloditšwego ka moya bao ba bego ba hlokomela diphuthego tše tša lekgolong la pele la nywaga. * Balebeledi ba be ba le ka letsogong le letona la Jesuka tlase ga taolo le tlhahlo ya gagwe. Ee, Kriste Jesu o ile a eta pele sehlopha sa molaki seo se bopaganego. Lega go le bjalo, gona bjale balebeledi bao ba tloditšwego ke ba sego kae ka palo. Boetapele bja Kriste bo fihlelela bjang diphuthego tše fetago 93 000 tša Dihlatse tša Jehofa lefaseng ka bophara?

7. (a) Jesu o diriša bjang Sehlopha se Bušago go nea boetapele ka diphuthegong lefaseng ka bophara? (b) Ke ka baka la’ng go ka thwe balebeledi ba Bakriste ba kgethwa ke moya o mokgethwa?

⁷ Bjalo ka lekgolong la pele la nywaga, sehlopha se senyenyane sa banna bao ba swanelegago gare ga balebeledi bao ba tloditšwego ga bjale se hlankela e le Sehlopha se Bušago, se emela molaki yo a botegago yo bohlale yo a bopaganego. Moetapele wa rena o diriša Sehlopha se se se Bušago go kgetha banna bao ba swanelegagoe ka ba bao ba tloditšwego ka moya goba go se bjalogo ba bagolo ka diphuthegong tša gabo rena. Mabapi le se, moya o mokgethwa wo Jehofa a neilego Jesu matla a go o diriša o kgatha tema e bohlokwa kudu. (Ditiro 2:​32, 33) Sa pele, balebeledi ba ba swanetše go fihlelela dinyakwa tšeo di boletšwego ka Lentšung la Modimo, leo le buduletšwego ke moya o mokgethwa. (1 Timotheo 3:​1-7; Tito 1:​5-9; 2 Petro 1:​20, 21) Dipolelelo le go kgethwa di dirwa ka morago ga thapelo le ka tlase ga tlhahlo ya moya o mokgethwa. Go oketša moo, batho bao ba kgethilwego ba nea bohlatse bja go bontšha dienywa tša moya woo. (Ba-Galatia 5:​22, 23) Ka gona, keletšo ya Paulo e šoma ka mo go lekanago go bagolo ka moka, go sa šetšwe gore ke batlotšwa goba go se bjalo: “Itoteng-xê; Le lôtôlê le mohlape ka moka wo Môya o mokxêthwa o Le xafetšexo wôna, la ba badiši ba wôna.” (Ditiro 20:​28) Banna ba ba kgethilwego ba amogela tlhahlo go tšwa go Sehlopha se Bušago gomme ba diša phuthego ka go rata. Ka tsela ye, Kriste o na le rena ga bjale gomme o eta pele phuthego ka mafolofolo.

8. Kriste o diriša bjang barongwa go etelela pele balatedi ba gagwe?

⁸ Jesu gape o diriša barongwa ba kgonthe go eta pele balatedi ba gagwe lehono. Go ya ka seswantšho sa mabele le mefoka, nako ya puno e be e tla tla “bofelong bya lebaka leno.” Mong o  tla diriša mang bakeng sa go buna? Kriste o itše: “Babuni ké Barongwa.” O okeditše ka gore: “Morwa-motho ó tlo roma Barongwa ba xaxwe, ba y’o hlaola dikxopišô ka moka ba di nthša mmušong wa xaxwe, ba hlaola ba-dira-bokxôpô.” (Mateo 13:​37-41) Go feta moo, bjalo ka ge morongwa a ile a hlahla megato ya Filipi go hwetša molaki wa Ethiopia, ka gona go na le bohlatse bjo bogolo lehono bja gore Kriste o diriša barongwa ba gagwe go hlahla modiro wa Bakriste bakeng sa go hwetša batho ba dipelo tše di botegago.—Ditiro 8:​26, 27; Kutollo 14:6.

9. (a) Ke ka mokgwa ofe Kriste a etelelago pele phuthego ya Bokriste lehono? (b) Ke potšišo efe yeo re swanetšego go e ela hloko ge e ba re nyaka go holwa ke boetapele bja Kriste?

⁹ Ke mo go kgodišago gakaakang go tseba gore Jesu Kriste o nea boetapele go barutiwa ba gagwe lehono ka Sehlopha se Bušago, moya o mokgethwa le barongwa! Gaešita le ge ba bangwe ba barapedi ba Jehofa ba be ba tla swanela ke go aroganywa ka nakwana le Sehlopha se Bušago ka baka la tlaišo goba ka mabaka a swanago, Kriste o be a sa dutše a tla nea boetapele ka moya o mokgethwa le ka thekgo ya barongwa. Lega go le bjalo, re holwa ke boetapele bja gagwe ge feela re bo amogela. Re ka bontšha bjang gore re amogela boetapele bja Kriste?

‘E-bang ba Kwago le ba Ikokobeditšego’

10. Re ka bontšha bjang tlhompho bakeng sa bagolo bao ba kgethilwego ka phuthegong?

¹⁰ Moetapele wa rena o neile diphuthego “dimpho tše e lego banna” (NW)“ba bangwê ya ba Baxoeledi, ba bangwê ya ba Badiši le Baruti[ši].” (Ba-Efeso 4:​8, 11, 12) Boemo bja rena bja kgopolo le ditiro tšeo re ba direlago tšona di bontšha gabotse ge e ba re amogela boetapele bja Kriste. Ke mo go swanetšego gore re ‘ipontšhe re le balebogi’ bakeng sa banna bao ba swanelegago moyeng bao Kriste a fanego ka bona. (Ba-Kolose 3:​15) Gape ba swanelwa ke tlhompho ya rena. Moapostola Paulo o ngwadile gore: “Ba baxolo ba xo êmêla phuthêxô xa-botse, a ba xodišwê xobedi.” (1 Timotheo 5:​17) Re ka bontšha bjang tebogo ya rena le go tšeela godimo banna ba bagolobagolo goba balebeledika phuthegong? Paulo o araba ka gore: ‘Kwang bao ba le etelelago pele, le ikokobeletše bona.’ (Ba-Hebere 13:​17, bapiša le NW.) Ee, re swanetše go ba kwa le go ikokobeletša bona, go širela go bona.

11. Ke ka baka la’ng go hlompha tokišetšo ya bagolo e le taba ya go phela ka go dumelelana le kolobetšo ya rena?

¹¹ Moetapele wa rena o phethagetše. Banna bao a ba neilego bjalo ka dimpho ga se ba phethagala. Ka gona, ka dinako tše dingwe ba ka dira diphošo. Lega go le bjalo, go bohlokwa gore re dule re botegela tokišetšo ya Kriste ka go se kwanantšhe. Ge e le gabotse, go phela ka go dumelelana le boineelo bja rena le kolobetšo go bolela gore re lemoga go nepagala ga matla a taolo a batlotšwa ka phuthegong le go ba kwa ka go rata. Go kolobetšwa ga rena ‘leineng la moya o mokgethwa’ ke boipolelo bja phatlalatša bja gore re dumela tema yeo e o kgathago mererong ya Jehofa. (Mateo 28:​19) Kolobetšo e bjalo e bontšha gore re dirišana le moya gomme ga re dire selo seo se tlago go šitiša go šoma ga ona gare ga balatedi ba Kriste. Ka ge moya o mokgethwa o kgatha tema e bohlokwa go boleleleng le go kgetheng bagolo, na re ka ba bao ba botegago e le ka kgonthe boineelong bja rena ge e ba re palelwa ke go dirišana le tokišetšo ya bagolo ka phuthegong?

12. Ke mehlala efe mabapi le go se hlomphe matla a taolo yeo Juda a e tsopolago, gomme e re ruta’ng?

¹² Mangwalo a na le mehlala yeo e re rutago bohlokwa bja go kwa le go ikokobetša. Morutiwa Juda ge a be a bolela ka bao ba ilego ba bolela gampe ka banna bao ba kgethilwego ka phuthegong o ile a šupa mehlaleng e meraro ya temošo, ka gore: “Kôtlô e tlo ba wêla, xobane ba ile ka tsela ya Kaine, ba itahletše xo forwa ke moputsô wa Bileama, ba lôba ka bonganga bya Kora.” (Juda 11) Kaine o ile a hlokomologa keletšo e lerato ya Jehofa gomme ka go ikemišetša a phegelela tsela ya gagwe ya lehloyo le le bolayago. (Genesi 4:​4-8) Ka ntle le go amogela leboelela ditemošo tša Modimo, Bileama o ile a leka go roga batho ba Modimo bakeng sa go hwetša moputso wa tšhelete. (Numeri 22:​5-28, 32-34; Doiteronomio 23:5) Kora o be a na le boikarabelo bja gagwe bjo bobotse Isiraeleng, eupša o be a sa bo kgotsofalela. O ile a hlohleletša borabele malebana le mohlanka wa Modimo Moše, monna yo a ikokobeditšego kudu lefaseng. (Numeri 12:3; 16:​1-3, 32, 33) Masetla-pelo a ile a wela Kaine, Bileama le Kora. Mehlala ye e re ruta ka mo go kwagalago gakaakang go theetša keletšo ya bao Jehofa a ba dirišago maemong a boikarabelo le go ba hlompha!

13. Ke ditšhegofatšo dife tšeo moporofeta Jesaya a ilego a di bolela e sa le pele bakeng sa bao ba ikokobeletšago tokišetšo ya bagolo?

¹³ Ke mang yo a ka se nyakego go holega tokišetšong e kgolo ya bolebeledi yeo Moetapele wa rena a e hlomilego ka phuthegong ya Bokriste? Moporofeta Jesaya o ile a bolela e sa le pele ditšhegofatšo tša yona ka gore: “Bonang, kgoši e tlo buša ka go loka, le dikgošana di tlo ahlola ka go loka. E mongwe le e mongwe o tlo ba bjalo ka [lefelo la, NW] tšhirelo ge phefo e foka, le setšhabelo sa go tšhabela pula; o tlo ba bjalo ka noka ya metse nageng e omilego, le bjalo ka moriti wa lefsika le legolo nageng e nyorilwego.” (Jesaya 32:​1, 2, PK) Mogolo yo mongwe le yo mongwe o swanetše go ba “lefelo” le bjalo la tšhirelo le polokego. Gaešita le ge go ikokobeletša  bolaodi go le thata go rena, anke re ineeleng ka thapelo go ba bao ba kwago le bao ba ikokobeletšago bolaodi bjo bo beilwego ke Modimo ka phuthegong.

Kamoo Bagolo ba Ikokobeletšago Boetapele bja Kriste ka Gona

14, 15. Ke bjang bao ba etelelago pele ka phuthegong ba bontšhago gore ba ikokobeletša boetapele bja Kriste?

¹⁴ Mokriste yo mongwe le yo mongwekudu-kudu bagoloo swanetše go latela boetapele bja Kriste. Balebeledi goba bagolo ba na le tekanyo ya matla a taolo ka phuthegong. Eupša ga ba nyake go ba ‘babuši ba tumelo ya badumedi-gotee le bona’ ka go leka go laola maphelo a bona. (2 Ba-Korinthe 1:​24, bapiša le NW.) Bagolo ba ela hloko mantšu a Jesu a rego: “Le a tseba; marêna a dithšaba sa bôná ké xo buša, ’me sa ba baxolo ké xo dira batho ka matla. Xo lena xo se kê xwa ba byalo.” (Mateo 20:​25-27) Ge bagolo ba phethagatša boikarabelo bja bona, ba leka go hlankela ba bangwe e le ka kgonthe.

¹⁵ Bakriste ba kgothaletšwa gore: “Xopolang [bao ba le etelelago pele, NW] . . . Le bônê pheletšô ya tsela ya bôná, Le etšê bôná ka tumêlô.” (Ba-Hebere 13:7) Se ga se nyakege ka gobane bagolo e le baetapele. Jesu o itše: “Xobane wa lena Mo-êta-pele ké o tee ké Kriste.” (Mateo 23:​10) Ke tumelo ya bagolo yeo e swanetšego go ekišwa ka gobane ke baekiši ba Moetapele wa rena wa kgonthe, Kriste. (1 Ba-Korinthe 11:1) Ela hloko ditsela tše dingwe tšeo ka tšona bagolo ba katanelago go ba bjalo ka Kriste tswalanong ya bona le ba bangwe ka phuthegong.

16. Jesu o ile a swara balatedi ba gagwe bjang go sa šetšwe matla a taolo ao a bego a na le ona?

¹⁶ Gaešita le ge Jesu a be a phagametše batho ba sa phethagalago ka tsela e nngwe le e nngwe gomme a be a na le matla a sa lekanywego a taolo go tšwa go Tatagwe, e be e le yo a leka-lekanego ditirišanong tša gagwe le barutiwa ba gagwe. Ga se a ka a imetša batheetši ba gagwe ka go ba kgantšhetša tsebo e ntši. Jesu o ile a bontšha go kgomega le kwelobohloko ka balatedi ba gagwe, a naganela dinyakwa tša bona tša batho. (Mateo 15:​32; 26:​40, 41; Mareka 6:​31) Le ka mohla ga se a ka a nyaka mo gontši go barutiwa ba gagwe go feta kamoo ba bego ba ka mo nea, gomme le ka mohla ga se a ka a ba rweša seo se fetago seo ba bego ba ka se rwala. (Johane 16:​12) Jesu e be e le “yo boló le wa pelo e kokobetšexo.” Ka gona, ga se mo go makatšago gore ba bantši ba ile ba hwetša e le yo a lapološago.—Mateo 11:​28-30.

17. Bagolo ba swanetše go bontšha bjang boipoetšo bjo bjalo ka bja Kriste tswalanong ya bona le ba bangwe ka phuthegong?

¹⁷ Ge e ba Kriste Moetapele a ile a bontšha boikokobetšo, go swanetše go ba bjalo gakaakang ka bao ba etelelago pele ka phuthegong! Ee, ba ela hloko gore ba se ke ba diriša gampe matla le ge e le afe a taolo ao ba a neilwego. Gomme ga ba ‘tle ka bonatla bja polelo,’ go leka go kgahliša ba bangwe. (1 Ba-Korinthe 2:​1, 2) Go e na moo, ba katanela go bolela mantšu a therešo ya Mangwalo ka bonolo le ka go rereša. Go feta moo, bagolo ba katanela go ba bao ba leka-lekanego dilong tšeo ba di letetšego go ba bangwe le go ba bao ba naganelago dinyakwa tša bona. (Ba-Filipi 4:5, bapiša le NW.) Ba hlokometše gore yo mongwe le yo mongwe o na le mafokodi, ka lerato ba naganela mafokodi a, ge ba dirišana le bana babo bona. (1 Petro 4:8) Gomme na bagolo bao ba ikokobeditšego le ba boleta ga se bao ba lapološago e le ka kgonthe? Ba bjalo e le ka kgonthe.

18. Bagolo ba ka ithuta’ng tseleng yeo Jesu a ilego a swara bana ka yona?

¹⁸ Jesu e be e le yo a batamelegago gaešita le  go ba banyenyane. Ela hloko karabo ya gagwe ge barutiwa ba gagwe ba be ba kgalemela batho ge ba “tliša bana xo [yena].” Jesu o itše: “Lesang bana ba tlê xo Nna; Le se kê la ba thibêla, xobane mmušô wa Modimo ké wa ba byalo.” Ke moka “a ba xokara, a ba bea diatla a ba šexofatša.” (Mareka 10:​13-16) Jesu e be e le yo borutho le yo botho, gomme ba bangwe ba ile ba gogelwa go yena. Batho ba be ba sa boife Jesu. Gaešita le bana ba be ba lokologa ge a le gona. Bagolo le bona ba a batamelega, gomme bjalo ka ge ba bontšha go kgomega ka borutho le botho, ba bangwegaešita le banaba ikwa ba lokologile ge ba na le bona.

19. Ke eng seo se akaretšwago go beng le “kelêlô ya Kriste,” gomme se se nyaka maiteko afe?

¹⁹ Bokgole bjoo bagolo ba ka ekišago Kriste Jesu bo ithekgile godimo ga gore ba mo tseba gabotse gakaakang. Paulo o ile a botšiša gore: “Kêlêlô ya Morêna e tsebilwe ke mang?” Ke moka a oketša ka gore: “Xomme rena re na le kêlêlô ya Kriste.” (1 Ba-Korinthe 2:​16) Go ba le monagano wa Kriste go akaretša go tseba mokgwa wa go nagana ga gagwe le dibopego ka moka tša botho bja gagwe e le gore re tsebe seo a ka se dirago boemong bjo itšego. Nagana o tseba Moetapele wa rena gabotse gakaakaa! Ee, se se nyaka go lebeledišiša ka kelohloko dipego tša Ebangedi le gore ka mehla re fepe menagano ya rena ka kwešišo ya bophelo bja Jesu le mohlala. Ge bagolo ba dira maiteko a go latela boetapele bja Kriste go fihla bokgoleng bjoo, bao ba lego ka phuthegong ba sekamela kudu go ekiša tumelo ya bona. Gomme bagolo ba na le kgotsofalo ya go bona ba bangwe ba latela mehlala ya Moetapele ka lethabo.

Tšwelang Pele ka Tlase ga Boetapele bja Kriste

20, 21. Ge re lebelela pele lefaseng le lefsa leo le holofeditšwego, re swanetše go ikemišetša go dira’ng?

²⁰ Go bohlokwa gore ka moka ga rena re dule re ikokobeletša boetapele bja Kriste. Ge re dutše re batamela bofelo bja tshepedišo ye ya dilo, boemo bja rena bo swantšhwa le bjola bja ba-Isiraele kua Melaleng ya Moaba ka 1473 B.C.E. Ba be ba le mollwaneng wa Naga ya Kholofetšo gomme Modimo o ile a tsebatša ka moporofeta Moše gore: “Ké wêna [Jošua] O tl’o xo xoroša sethšaba naxeng ye Morêna a enetšexo bô-tat’abô a re ó tlo ba nea yôna.” (Doiteronomio 31:​7, 8) Jošua e be e le moetapele yo a kgethilwego. Bakeng sa go tsena Nageng ya Kholofetšo, ba-Isiraele ba be ba swanetše go ikokobeletša boetapele bja Jošua.

²¹ Beibele e re go rena: “Wa lena Mo-êta-pele ké o tee ké Kriste.” Ke Kriste feela yo a tla re etago pele go ya lefaseng le lefsa la kholofetšo leo go lona go agilego toka. (2 Petro 3:​13) Ka gona anke re ikemišetšeng go kwa boetapele bja gagwe dikarolong ka moka tša bophelo.

[Mengwalo ya ka tlase]

Na o a Gopola?

• Kriste o ile a etelela pele bjang phuthego ya pele?

• Kriste o etelela pele bjang phuthego ya gagwe lehono?

• Ke ka baka la’ng re swanetše go kwa bao ba re etelelago pele ka phuthegong?

• Ke ka ditsela dife bagolo ba ka bontšhago gore Kriste ke Moetapele wa bona?

[Dipotšišo tša Thuto]

[Seswantšho go letlakala 15]

Kriste o eta pele phuthego ya gagwe gomme o swere balebeledi ka letsogong la gagwe le letona

 [Diswantšho go letlakala 16]

‘E-kwang bao ba le etelelago pele le ikokobeletše bona’

[Seswantšho go letlakala 18]

Jesu o be a le borutho le yo a batamelegago. Bagolo ba Bakriste ba katanela go swana le yena