O ka Fenya go Lewa ke Bodutu

KE MANG yo a ka bolelago gore ga se a ka a lebeletšana le manyami ao a tlišwago ke bodutu? Go na le mabaka a mantši ao a ka re dirago gore re ikwe re lewa ke bodutu. Lega go le bjalo, selo se se šoro kudu-kudu e ka ba bodutu bja mosadi yo a se a kago a nyalwa goba bja bao e lego bahlologadi goba bao ba hladilwego.

Ka mohlala, mosadi yo mofsa wa Mokriste yo a bitšwago Frances o hlalosa gore: “Ge ke be ke na le nywaga e 23, go ile gwa bonagala gore bagwera ba-ka ka moka ba nyetšwe gomme ke be ke šetše ke nnoši.” * Maikwelo a go ba lekatana a ka gola ge nywaga e dutše e feta gomme dikholofelo tša lenyalo e ba tšeo di lekanyeditšwego kudu. Sandra yo a lego nywageng ya gagwe ya bo-40 o dumela ka gore: “Ga se ka ka ka ikemišetša go dula ke sa nyalwa gomme ke sa dutše ke tla rata go nyalwa ge e ba sebaka se bulega.” Angela yo a lego nywageng ya gagwe ya bo-50, o bontšha gore: “Ga se ka dira phetho e naganišišitšwego ya go dula ke sa nyalwa, eupša yeo ke tsela ye dilo di ilego tša sepela ka yona. Go be go na le bana bešo bao ba sego kae lefelong leo ke bego ke abetšwe go lona bjalo ka mmulamadibogo yo a kgethegilego.”

Ka mo go retwago kudu, basadi ba bantši ba Bakriste ba kgetha go se nyalwe ka gobane ka potego ba hlokomela keletšo ya Jehofa ya go nyala “feela Moreneng.” (1 Ba-Korinthe 7:​39, NW) Ba bangwe ba tlwaelana gabotse le go dula ba sa nyalwa, eupša ba bangwe ba hwetša gore kganyogo ya go nyalwa le go ba le bana e gola ge nywaga e dutše e e-ya. Sandra o dumela ka gore: “Maikwelo ao a se nago selo, ao a tlišwago ke go hloka molekane wa lenyalo, ke mogwera wa-ka wa ka mehla.”

Mabaka a mangwe, a bjalo ka go hlokomela batswadi bao ba tšofetšego a ka godiša maikwelo a go lewa ke bodutu. Sandra o re: “Ka ge ke se ka nyalwa, ba lelapa ba lebeletše go nna go hlokomela batswadi ba rena bao ba tšofetšego. Ka nywaga e 20 ke ile ka rwala boikarabelo bjo ka botlalo, gaešita le ge ke le yo mongwe wa bana ba tshela. Bophelo bo be bo tla ba bonolo ge ke be ke e-na le monna yoo a bego a tla nthekga.”

Frances o bolela ka sebopego se sengwe seo se godišago go lewa ga gagwe ke bodutu. O hlalosa ka gore: “Ka dinako tše dingwe batho ba mpotšiša ka go lebanya gore, ‘Ke ka baka la’ng o se wa nyalwa?’ Polelo e bjalo e ntira gore ke ikwe eka boemo bja-ka bja go se nyalwe ka tsela e itšego ke phošo ya-ka. Mo e ka bago manyalong ka moka ao ke yago go ona, motho yo mongwe o mpotšiša potšišo e sa rategego, ‘Ka gona na wena o tla nyalwa neng?’ Ke thoma go nagana gore, ‘Ge e ba bana bešo bao ba sekametšego dilong tša moya ba se na kgahlego go nna, mohlomongwe ga ke na dika tšeo di nyakegago bakeng sa Mokriste goba mohlomongwe ga ke kgahliše.’”

 Maikwelo a go ba lekatana le a bodutu a ka fenywa bjang? Ge e ba ka kgonthe go na le se sengwe, ke eng seo ba bangwe ba ka se dirago go thuša?

Ithekge ka Jehofa

Mopsalme o ile a opela ka gore: “Lahlêla Morêna morwalô wa xaxo; Yêna ó tlo Xo babalêla; a ka se kê a bá a lesa moloki xe a ka šuthišwa.” (Psalme 55:​22) Lentšu “morwalô” ka mongwalong wa Sehebere ka go lebanya le bolela “boemo,” gomme le šupa dipelaelong tšeo di ka bago di re tlaiša ka baka la morwalo wa rena bophelong. Jehofa o lemoga kudu merwalo ye go feta motho le ge e le ofe yo mongwe gomme a ka re nea matla a go lebeletšana le yona. Go ithekga ka Jehofa Modimo ke seo se thušitšego Angela go lebeletšana le maikwelo a go lewa ke bodutu. Ge a bolela ka bodiredi bja gagwe bja nako e tletšego, o gopola ka gore: “Ge ke be ke thoma go bula madibogo, nna le modirišani wa-ka re be re dula kgole le phuthego yeo e bego e le kgaufsi. Re ile ra ithuta go ithekga ka mo go feletšego ka Jehofa gomme go ithekga ka yena mo go ile gwa nthuša bophelong bja-ka ka moka. Ge ke na le dikgopolo tše sa lokago, ke bolela le Jehofa gomme o a nthuša. Psalme 23 e be e le khomotšo ya-ka e kgolo ka mehla gomme ke be ke e bala leboelela.”

Moapostola Paulo o ile a ba le morwalo woo o bego o bonagala e le o mogolo bakeng sa go ka o rwala. Bonyenyane mo e ka bago ka makga a mararo, o ‘rapetše Morena gore phatša ye e lego nameng e mo tlogele.’ Paulo ga se a thušwa ka mohlolo, eupša o ile a amogela kholofetšo ya gore kgaugelo e sa swanelago ya Modimo e tla mo thekga. (2 Ba-Korinthe 12:​7-9) Paulo gape o ile a utolla sephiri sa kgotsofalo. O ile a ngwala ka morago gore: “Ke tlwaetše tšohle, e ka ba xo hora le xo kwa tlala; e ka ba xo tlalêlwa ke dilô, e ka ba xo di hlôka. Ke kxôna tšohle ka Eo a mphaxo matla, Yêna Kriste.”—Ba-Filipi 4:​12, 13.

Motho a ka hwetša bjang matla a Modimo ge a ikwa a nolegile moko goba a lewa ke bodutu? Paulo o ngwadile gore: “A Le se kê la belaêla selô. Mo xo kaxo ba le tše Le di nyakaxo, Le di tlišê pele xa Modimo ka kxopêlô le ka thapêlô e naxo le teboxô. Xomme khutšô ya Modimo, ye e fetaxo thlaoloxanyô yohle, a e bolokê dipelo tša lena le ’kxopolô tša lena xo Kriste Jesu.” (Ba-Filipi 4:​6, 7) Sandra o šomiša keletšo ye. O a hlalosa: “Ka gobane ke sa nyalwa, ke fetša nako e ntši ke le noši. Se se nnea sebaka se se botse sa go rapela Jehofa. Ke ikwa ke le kgaufsi kudu le yena gomme nka bolela le yena ka bolokologi ka mathata a-ka le ka lethabo la-ka.” Frances o re: “Go lwantšhana le dikgopolo tšeo di fošagetšego ke nnoši ke ntwa ya ka mehla. Eupša go abelana maikwelo a-ka ka go lebanya le Jehofa go ile gwa nthuša kudu. Ke kgodišegile gore Jehofa o na le kgahlego ka se sengwe le se sengwe seo se ka kgomago bophelo bja-ka bjo bo botse bja moya le bja maikwelo.”—1 Timotheo 5:5.

“Hlatlolanang Merwalô”

Borwarreng bja Bokriste, motho ga se a swanela go rwala merwalo a nnoši. Moapostola Paulo o eleditše ka gore: “Hlatlolanang merwalô; ké wôna mokxwa wo Le tl’o xo phêtha molaô wa Kriste ka wôna.” (Ba-Galatia 6:2) Ka bogwera bja rena le Bakriste-gotee le rena, re ka hwetša “lentšu la botho” la kgothatšo leo le ka fokotšago morwalo wa go lewa ke bodutu.—Diema 12:25.

Nagana gape ka seo Mangwalo a se bolelago ka morwedi wa Moahlodi wa Isiraele Jefeta. Pele a fenya madira a manaba a Amoni, Jefeta o ile a ena gore o tla nea Jehofa motho wa pele yo a tšwago ngwakong wa gagwe go mo lebogela. Yo e bile morwedi wa gagwe. (Baahlodi 11:​30, 31, 34-36) Le ge se se be se bolela gore o be a tla dula a sa nyalwa le go neela boikemišetšo bja gagwe bja tlhago bja go ba le lapa, morwedi wa Jefeta ka go rata o ile a ikokobeletša keno ye gomme o ile a hlankela sekgethweng kua Silo bophelo bja gagwe ka moka. Na sehlabelo sa gagwe se ile sa hlokomologwa? Ka mo go fapanego: “Ka ngwaxa o mongwe le o mongwê basetsana ba Isiraele ba ya ba fetša matšatši a manê ba tlotla morwedi wa Jefeta monna wa xa Gileada.” (Baahlodi 11:​40) Ee, theto e ka kgothatša bao ba e amogelago. Ka gona, anke re se ke ra palelwa ke go reta bao ba swanetšwego ke theto.

Re dira gabotse gape ka go nagana ka mohlala wa Jesu. Le ge e be e se mokgwa wa ba-Juda  gore banna ba boledišane le basadi, Jesu o ile a tšea nako le Maria le Mareta. Mohlomongwe, e be e le bahlologadi goba basadi bao ba bego ba se ba nyalwa. Jesu o be a nyaka gore bobedi bja bona ba thabele mehola ya moya ya segwera sa gagwe. (Luka 10:​38-42) Re ka ekiša mohlala wa Jesu ka go akaretša dikgaetšedi tša rena tša moya tšeo di sa nyalwago dipokanong tša segwera le ka go dira ditokišetšo tša go tšea karolo modirong wa boboledi le tšona. (Ba-Roma 12:​13) Na ba leboga tlhokomelo e bjalo? Kgaetšedi yo mongwe o itše: “Ke a tseba gore bana bešo ba a nthata le go ntebelela ke le yo bohlokwa, eupša ke leboga ge ba e-ba le kgahlego ya motho ka noši go nna.”

Sandra o hlalosa ka gore: “Bjale ka ge re se na lapa leo e lego la rena re na le senyakwa se segolo sa go ratwa, go ikwa re le karolo ya lapa la moya la bana babo rena le dikgaetšedi.” Go molaleng gore, Jehofa o šetša batho ba bjalo gomme re dirišana le yena ge re ba dira gore ba ikwe ba nyakega le go ratwa. (1 Petro 5:​6, 7) Go tshwenyega mo go bjalo go ka se ke gwa hlokomologwa, ka gobane “Thlalla-badiidi ó adima Morêna; ’me Yêna [Jehofa Modimo] ó tlo mmušetša tše a di neilexo bála.”—Diema 19:17.

‘O Mongwe le o Mongwe o tlo Rwala Morwalo wa Gagwe’

Le ge batho ba bangwe ba ka thuša gomme thekgo ya bona e ka ba yeo e kgothatšago kudu, ‘o mongwe le o mongwe o tlo rwala morwalo wa gagwe.’ (Ba-Galatia 6:5, NW) Lega go le bjalo, bakeng sa go rwala morwalo wa go lewa ke bodutu, re swanetše go ela hloko dikotsi tše itšego. Ka mohlala, go lewa ke bodutu go ka re fenya ge e ba re thoma go se rate go bolela. Ka lehlakoreng le lengwe, re ka fenya go lewa ke bodutu ka lerato. (1 Ba-Korinthe 13:​7, 8) Go nea le go abela ke tsela e kaone kudu ya go hwetša lethabogo sa šetšwe boemo bja rena. (Ditiro 20:​35) Kgaetšedi yo mongwe wa mmulamadibogo yo a šomago ka thata o re: “Ga ke na nako e ntši ya go nagana ka go lewa ke bodutu. Ge ke ikwa ke na le mohola le go ba yo a swaregilego, ga ke ikwe ke lewa ke bodutu.”

Gape re swanetše go ela hloko gore go lewa ke bodutu ga go re gapele ditswalanong tša lerato tšeo e sego tša bohlale. Ka mohlala, ke mo go nyamišago gakaakang go dumelela dikganyogo tša lenyalo di re foufaletša mathata a mantši ao a bakwago ke go nyalana le motho yo a sa dumelego gomme kudu-kudu keletšong ya Mangwalo ya go efoga joko e bjalo! (2 Ba-Korinthe 6:​14) Mosadi wa Mokriste yo a hladilwego o itše: “Go na le selo se tee seo se lego bohloko kudu go feta go hloka molekane. Ke go nyalana le motho yo a sa swanelago.”

Bothata bjoo bo sa kgonego go rarollwa bo ka swanelwa ke go kgotlelelwa, bonyenyane ka nakwana. Ka thušo ya Modimo, maikwelo a go lewa ke bodutu a ka kgotlelelwa. Ge re dutše re tšwela pele go hlankela Jehofa, anke re kgodišegeng gore ka letšatši le lengwe dinyakwa tša rena di tla kgotsofatšwa ka tsela e kaone ka mo go kgonegago.—Psalme 145:16.

[Mengwalo ya ka tlase]

[Diswantšho go letlakala 28]

Go lewa ke bodutu go ka fenywa ka go nea le go abela