Dulang le Phafogile, Gatelang Pele ka Sebete! Pego ya Diboka tše Kgethegilego

KE MANG a ka ganago ka mo go swanetšego gore re phela ‘dinakong tše hlobaetšago tšeo go lego thata go lebeletšana le tšona’? Re le Dihlatse tša Jehofa, ga re bao ba sa hlaselwego ke dikgateletšego tša go phela “mehleng ya bofêlô.” (2 Timotheo 3:​1-5, bapiša le NW.) Eupša re lemoga gore batho ba nyaka thušo. Ga ba kwešiše seo se bolelwago ke ditiragalo tša lefase. Ba nyaka khomotšo le kholofelo. Ke eng seo e lego tema ya rena e kgolo go thušeng magagabo rena?

Re na le taelo yeo re e neilwego ke Modimo ya go aba ditaba tše dibotse tša Mmušo wa Modimo o hlomilwego. (Mateo 24:​14) Batho ba swanetše go tseba gore Mmušo wo wa legodimong ke kholofelo e nnoši bakeng sa batho. Lega go le bjalo, ga se gantši molaetša wa rena o amogelwago. Mafelong a mangwe mošomo wa rena o thibetšwe gomme bana babo rena ba dutše ba tlaišwa. Lega go le bjalo, ga re langwe. Ka go bota Jehofa ka mo go feletšego, re ikemišeditše go dula re phafogile le go tšwela pele re gatela pele ka sebete, re tsebatša ditaba tše dibotse re sa kgaotše.—Ditiro 5:42.

Boikemišetšo bjoo bo tiilego bo be bo le molaleng dibokeng tše di kgethegilego tšeo di bilego gona ka October 2001. Ka Sontaga, October 6, seboka sa ngwaga le ngwaga sa Watch Tower Bible and Tract Society of Pennsylvania se ile sa swarelwa Holong ya Kopano ya Dihlatse tša Jehofa ya Jersey City, New Jersey kua United States. * Letšatšing le le latelago, diboka tša tlaleletšo di ile tša swarelwa mafelong a mane, tše tharo United States gomme se tee kua Canada. *

Mantšung a gagwe a go bula sebokeng sa ngwaga le ngwaga, modula-setulo Samuel F. Herd e lego setho sa Sehlopha se Bušago sa Dihlatse tša Jehofa, o šupile go Psalme 92:​1, 4 ke moka a re: “Re nyaka go ipontšha re le ba lebogago.” Ka kgonthe, mabaka a go leboga a ile a newa ka dipego tše hlano tšeo di tšwago lefaseng ka bophara.

Dipego tša Kgole le Kgaufsi

Ngwanabo rena Alfred Kwakye o ile a bega ka tšwelopele ya modiro wa boboledi kua Ghana, yeo e bego e tsebja pele e le Gold Coast. Modiro wa rena nageng yeo o ile wa thibelwa ka nywaga e mentši. Batho ba be ba botšiša gore: “Ke ka baka  la’ng go na le thibelo? Le dirile’ng?” Ngwanabo rena Kwakye o ile a hlalosa gore se se ile sa bula dibaka tša go nea bohlatse. Ka 1991 ge thibelo e be e tlošwa, go be go na le Dihlatse tša Jehofa tše 34 421 kua Ghana. Ka August 2001, palo-moka e be e le 68 152koketšego ya 98 lekgolong. Dithulaganyo di tšwela pele bakeng sa go aga Holo ya Kopano ya go dudiša batho ba 10 000. Ka mo go lego molaleng, bana babo rena ba moya kua Ghana ba diriša tokologo ya bona ya bodumedi ka mo go tletšego.

Go sa šetšwe dikgaruru tša bopolitiki, bana babo rena kua Ireland ba tšea karolo ka mafolofolo bodireding, gomme ba hlompšha bakeng sa go se tšee lehlakore ga bona. Molomaganyi wa Komiti ya Lekala Peter Andrews o itše Ireland e na le diphuthego tše 115 le ditikologo tše 6. Ngwanabo rena Andrews o ile a laodiša phihlelo ya Liam, e lego mošemane wa nywaga e lesome yo a sa boifego go nea bohlatse sekolong. Liam o ile a sepedišetša barutwana-gotee le yena ba 25 gotee le morutišigadi Puku Ya-ka ya Ditaba tša Beibele, yeo e gatišitšwego ke Dihlatse tša Jehofa. Liam o be a nyaka go kolobetšwa, eupša motho yo mongwe o ile a mmotšiša ge e ba e be e se yo monyenyane kudu. Liam o ile a araba ka gore: “Ga se nywaga ya-ka eupša ke lerato la-ka la go rata Jehofa leo e swanetšego go ba lebaka la go dira phetho. Kolobetšo ya-ka e tla bontšha gore ke mo rata gakaakang.” Pakane ya Liam ke go ba moromiwa.

Ka 1968 go be go na le bagoeledi ba 5 400 ba ditaba tše dibotse kua Venezuela. Stefan Johansson yo e lego molomaganyi wa Komiti ya Lekala o boletše gore ga bjale go na le ba ka godimo ga 88 000. E bile go na le kgonagalo ya koketšego ka gobane ba ka godimo ga 296 000 ba bile gona Segopotšong ka 2001. Ka December ya 1999, dipula tša matloro-tloro di bakile go elela ga leraga mo go bolailego palo ya batho ba akanyetšwago go 50 000 go akaretša le Dihlatse tše mmalwa. Holo e nngwe ya Mmušo e be e tletše ka leraga go fihla bogodimo bja dimithara tše hlano go ya go siling. Ge motho yo mongwe a be a šišinya gore moago o tlogelwe, bana babo rena ba ile ba araba ka gore: “Le gatee-tee! Ye ke Holo ya rena ya Mmušo, gomme ga re nyake go e tlogela gona bjale.” Ba ile ba ya go šoma go yona, ba ntšha leraga le lentši-ntši, mafsika le ditšhila tše dingwe. Moago o ile wa lokišwa, gomme bana babo rena ba re ke o mobotse kudu gona bjale go feta kamoo o bego o le ka gona pele ga ge masetla-pelo a hlasela!

Ngwanabo rena Denton Hopkinson yo e lego molomaganyi wa Komiti ya Lekala o itše go na le maleme a 87 le mebolelwana yeo e bolelwago kua Philippines. Ngwageng o fetilego wa tirelo, New World Translation of the Holy Scriptures e feletšego e ile ya lokollwa ka maleme a mararo a  magolo a naga yeose-Cebuano, se-Iloko le se-​Tagalog. Ngwanabo rena Hopkinson o ile a laodiša phihlelo ya mošemane wa nywaga e senyane yo a badilego puku ya Good NewsTo Make You Happy, yeo e gatišitšwego ke Dihlatse tša Jehofa. O ile a hwetša dipuku tše dingwe go tšwa lekaleng tšeo le tšona a ilego a di bala, eupša lapa la gabo le be le mo ganetša. Nywaga ka morago ge a be a le sekolong sa tša kalafo, o ile a ikgokaganya le lekala gomme a kgopela thuto ya Beibele. O kolobeditšwe ka 1996 gomme kapejana ka morago ga moo a tsenela bodiredi bja nako e tletšego. Ga bjale o hlankela le mosadi wa gagwe ofising ya lekala.

Molomaganyi wa Komiti ya Lekala Ronald Parkin o hlalositše gore ‘Puerto Rico e kgwebong ya go “romela Dihlatse mafelong a mangwe.” ’ Go na le bagoeledi ba ka bago 25 000 sehlakahlakeng, gomme palo e bile bjalo ka nywaga e mentši. Ka baka la’ng? Ge e le gabotse, go šišinywa gore Puerto Rico e “romela” mo e ka bago bagoeledi ba 1 000 ka ngwaga United States, ba bantši ba bona ba huduga ka baka la mabaka a tša boiphedišo. Ngwanabo rena Parkin o ile a bolela ka phetho ya kgoro ya tsheko yeo e ilego ya fetoša dilo yeo e akaretšago Luis, Hlatse ya nywaga e 17 yeo e bego e na le bolwetši bja leukemia. Ka baka la gore Luis a ganne madi, molato wa gagwe o ile wa išwa kgorong ya tsheko. Moahlodi o ile a nyaka go bolela le yena ka go lebanya, ka gona o ile a mo etela sepetlele. Luis o ile a mmotšiša gore: “Ke ka baka la’ng ge e ba ke dirile bokebekwa bjo bošoro le tla nkahlola bjalo ka motho yo mogolo, eupša ge ke nyaka go kwa Modimo, le ntshwara bjalo ka ngwana?” Moahlodi o be a kgodišegile gore e be e le ngwana yo a godilego gomme o kgona go itirela diphetho.

Ka morago ga dipego tše di tšwago dinageng tša kgole, Harold Corkern, wa Komiti ya Lekala ya U.S. o ile a swara dipoledišano le bana babo rena bao e lego kgale ba hlankela Jehofa. Arthur Bonno o feditše nywaga e 51 a le tirelong ya nako e tletšego gomme ga bjale o hlankela Komiting ya Lekala ya Ecuador. Angelo Catanzaro o feditše nywaga e 59 a le tirelong ya nako e tletšego, bontši bja yona e le molebeledi wa mosepedi. Richard Abrahamson o alogile Sekolong sa Gilead ka 1953, gomme o bile le tokelo ya go okamela mošomo kua Denmark ka nywaga e 26 pele a boela Bethele ya Brooklyn. Mafelelong, ka moka ba ile ba thabišwa ke go kwa go tšwa go Carey W. Barber wa nywaga e 96. Ngwanabo rena Barber o kolobeditšwe ka 1921, o feditše nywaga e 78 a le bodireding bja nako e tletšego gomme o bile setho sa Sehlopha se Bušago ga e sa le go tloga ka 1978.

Dipolelo Tšeo di Tutuetšago

Seboka sa ngwaga le ngwaga se ile sa akaretša lelokelelo la dipolelo tšeo di šišinyago kgopolo. Ngwanabo rena Robert W. Wallen o ile a bolela ka sehlogo se se rego “Batho ba Leina la Gagwe.” Re batho ba leina la Modimo, gomme re ka hwetšwa dinageng tše fetago 230. Jehofa o re neile “bokamoso le kholofelo.” (Jeremia 29:​11, NW) Re swanetše go tšwela pele re godiša Mmušo wa Modimo, re abelana molaetša o kgahlišago wa khomotšo. (Jesaya 61:1) Ngwanabo rena Wallen o phethile ka gore: “Anke letšatši le letšatši re tšwele pele go phela ka go dumelelana le leina leo re bitšwago ka lona, Dihlatse tša Jehofa.”Jesaya 43:10.

Karolo ya mafelelo ya lenaneo e be e le tšhiedišano ka ditho tše tharo tša Sehlopha se Bušago. E be e e-na le sehlogo se se rego “Ga Bjale ke Nako ya go Dula re Phafogile, re Eme ka go Tia le go Tia Matla.”1 Ba-Korinthe 16:13.

Sa pele, Ngwanabo rena Stephen Lett o boletše ka sehlogo se se rego “Dulang le Phafogile Iring ye ya Mafelelo.” Ngwanabo rena Lett o hlalositše gore boroko bja kgonthe ke mpho. Bo a re matlafatša. Lega go le bjalo, boroko bja moya le ka mohla ga se bjo bo lokilego. (1 Ba-Thesalonika 5:6) Ka gona, ke bjang re ka dulago re phafogile moyeng? Ngwanabo rena Lett o ile a bolela ka “dipilisi” tše tharo tša moya: (1) E ba le mo gontši mo o ka go dirago modirong wa Morena. (1 Ba-Korinthe 15:​58, NW) (2) Lemoga senyakwa sa gago sa moya. (Mateo 5:3, NW) (3) Arabela keletšong e theilwego Beibeleng e le gore o kgone go dira dilo ka bohlale.—Diema 13:20.

Ngwanabo rena Theodore Jaracz o ile a nea polelo e tutuetšago e nago le sehlogo se se rego “Ema ka go Tia ka Tlase ga Teko.” Ge a bolela ka Kutollo 3:​10, Ngwanabo rena Jaracz o botšišitše gore: “ ‘Nako ya moleko’ ke eng?” Moleko woo o tla ka “letšatši la Morêna,” moo re ikhwetšago re le gona. (Kutollo 1:​10) Teko e dikologile taba ya  bohlokwana re ba Mmušo wa Modimo o hlomilwego goba re ba tshepedišo e kgopo ya dilo ya Sathane? Go fihla nako yeo ya moleko e fela, re swanetše go lebeletšana le diteko goba mathata. Na re tla dula re botegela Jehofa le mokgatlo wa gagwe ka go se kwanantšhe? Ngwanabo rena Jaracz o itše ‘re tla swanela ke go bontšha potego e bjalo e sa kwanantšhego re le motho ka o tee ka o tee.’

Mafelelong, Ngwanabo rena John E. Barr o boletše ka sehlogo se se rego “Tia Matla Bjalo ka Motho yo a Sekametšego Dilong tša Moya.” A šupa go Luka 13:​23-25, o bontšhitše gore re swanetše go katana e le gore re “tsênê ka mojakô o pitlaxanexo.” Ba bantši ba palelwa ka gobane ba se ba tia ka mo go lekanego go gola matleng. Gore re be Bakriste bao ba gotšego ka mo go lekanego, re swanetše go ithuta go diriša melao ya motheo ya Beibele dibopegong ka moka tša bophelo. Ngwanabo rena Barr o kgothaditše gore: “Ke kgodišegile gore le tla dumela gore ga bjale ke nako ya go (1) bea Jehofa pele-pele; (2) go tia matla; gomme re (3) katanele go dira thato ya Jehofa. Ka tsela ye re tla kgona go tsena ka kgoro e pitlaganego yeo e lebišago bophelong bjo bo kgahlišago ka ntle le mafelelo.”

Ge seboka sa ngwaga le ngwaga se batamela go fela, go be go na le potšišo yeo e sego ya arabja: Temana ya ngwaga ya ngwaga wa 2002 ke efe? Potšišo yeo e ile ya arabja letšatšing le le latelago.

Seboka sa Tlaleletšo

Ditebelelo di be di phagame ka Sontaga mesong ge lenaneo la seboka sa tlaleletšo le be le thoma. Le thomile ka kakaretšo ya thuto ya Morokami bakeng sa beke yeo, gomme gwa latela kakaretšo e kopana ya seboka sa ngwaga le ngwaga. Sa go latela, bohle ba be ba thabetše go kwa polelo ka temana ya ngwaga bakeng sa 2002: “E-tlang go nna, . . . gomme nna ke tla le lapološa.” (Mateo 11:​28, NW) Polelo e be e theilwe dihlogong tša go ithuta tšeo di ilego tša gatišwa ka morago ka go tokollo ya Morokami wa December 15, 2001.

Ka morago ga moo, ba bangwe bao e bego e le baemedi Dikopanong tše kgethegilego tša “Barutiši ba Lentšu la Modimo” kua Fora le Italy ka August 2001 ba ile ba abelana maikwelo a bona. * Mafelelong, e le ntlha e kgolo ya lenaneo la letšatši, dipolelo tše pedi tša mafelelo di ile tša newa ke diboledi tša baeng go tšwa Bethele ya Brooklyn.

Polelo ya pele e be e e-na le sehlogo se se rego, “Botang Jehofa ka Matla Dinakong tše tše Hlobaetšago.” Seboledi se ile sa bolela ka dintlha tše tše kgolo tše di latelago: (1) Go bota Jehofa ka sebete e be e dutše e le ga bohlokwa bakeng sa batho ba Modimo. Beibele e na le mehlala e mentši ya bao ba ilego ba bontšha sebete le tumelo nakong ya kganetšo. (Ba-Hebere 11:1–12:3) (2) Jehofa o nea mabaka a kwagalago gore re mmote ka mo go feletšego. Mediro ya gagwe le Lentšu la gagwe di kgonthišetša gore o hlokomela bahlanka ba gagwe le gore le ka mohla a ka se ke a ba lebala. (Ba-Hebere 6:​10) (3) Sebete le kholofelo di nyakega ka mo go kgethegilego lehono. Bjalo ka ge Jesu a ile a bolela e sa le pele, re “ba xo hloiwa.” (Mateo 24:9) Bakeng sa gore re kgotlelele, re swanetše go ithekga ka Lentšu la Modimo, re kgodišege gore moya wa gagwe o na le rena le sebete sa go tšwela pele re tsebatša ditaba tše dibotse. (4) Mehlala e bontšha gore re lebeletšane le kganetšo gona bjale. Bohle ba be ba kgomegile maikwelong ge seboledi se be se laodiša seo bana babo rena ba ilego ba se kgotlelela kua Armenia, Fora, Georgia, Kazakhstan, Russia le Turkmenistan. Ka kgonthe, ga bjale ke nako ya go bontšha sebete le go bota Jehofa!

Seboledi sa mafelelo se ile sa bolela ka sehlogo se se rego “Go Gatela Pele ka Botee le Mokgatlo wa Jehofa.” Polelo e ile ya akaretša dintlha tše mmalwa tšeo di lego nakong. (1) Go tšwela pele ga batho ba Jehofa go bonwa lefaseng ka bophara. Modiro wa rena wa boboledi le dikopano di re  gogela mahlo a setšhaba. (2) Jehofa o hlomile mokgatlo wo o kopanego. Ka 29 C.E., Jesu o ile a tlotšwa ka moya o mokgethwa ka morero wa go tliša ga gagwe “dilô tšohle”bao ba nago le tebelelo ya legodimong gotee le bao ba nago le kholofelo ya lefasenglapeng la Modimo leo le kopanego. (Ba-Efeso 1:​8-10) (3) Dikopano ke pontšho e bonagalago kudu ya botee bja ditšhaba-tšhaba. Se se be se bonagala gabotse dikopanong tše di kgethegilego tšeo di swaretšwego Fora le Italy ka August e fetilego. (4) Setlamo seo se tutuetšago se ile sa dirwa kua Fora le Italy. Seboledi se ile sa bolela ditsopolo tše sego kae go tšwa setlamong se se tutuetšago. Temana e feletšego ya setlamo e tšwelela ka mo tlase.

Mafelelong a polelo ya mafelelo, seboledi sa moeng se ile sa bala tsebišo e kgomago yeo e lokišeleditšwego ke Sehlopha se Bušago. Ka boripana se itše: “Ga bjale ke nako ya go dula re phafogile le go dula re lebeletše, re lemoga kamoo ditiragalo tša lefase di diregago ka gona. . . . Re nyaka go le fetišetša go kgomega ga lerato moo Sehlopha se Bušago se nago le gona ka lena le ka batho ba Modimo ka moka. Anke a le šegofatše ka mo go humilego ka go dira thato ya gagwe ka moya ka moka.” Batho ba Jehofa kae le kae ba ikemišeditše go dula ba phafogile dinakong tše tše hlobaetšago le go tšwela pele ba gatela pele ka sebete le mokgatlo wa Jehofa wo o kopanego.

[Mengwalo ya ka tlase]

[Lepokisi/Seswantšho go letlakala 29-31]

Setlamo

Ka August 2001, Dikopano tše di kgethegilego tša “Barutiši ba Lentšu la Modimo” di ile tša swarwa kua Fora le Italy. Dikopanong tšeo, go ile gwa newa setlamo se se tutuetšago. Mantšu a latelago ke a setlamo seo.

“RE LE DIHLATSE TŠA JEHOFA, ka moka ga rena re bokane mo Kopanong ya ‘Barutiši ba Lentšu la Modimo’ re hlahlilwe ke thuto yeo e nago le mohola kudu. Mothopo wa thuto ye o bontšhitšwe gabotse. Thuto ga se e tšwago go batho. E tšwa go Yo a hlalositšwego ke moporofeta wa bogologolo Jesaya e le ‘Mohlahli yo Mogolo.’ (Jesaya 30:​20, NW) Ela hloko kgopotšo ya Jehofa bjalo ka ge e boletšwe go Jesaya 48:​17: ‘Nna Morêna Modimo wa xaxo ke Xo ruta tše di Xo holaxo; ke Xo sepediša mo tseleng ye O swanetšexo xo e swara.’ O phethagatša se bjang? Tsela e kgolo ke ka puku yeo e fetoletšwego le go abja kudu lefaseng ka bophara, Beibele, go yona re botšwa ka mantšu a a sa belaetšego gore: ‘Xobane Mangwalô ka moka ké ma-hebetšwa-ke-Modimo, le xôna a [a] hola.’—2 Timotheo 3:16.

“Lehono, batho ba nyaka kudu thuto e bjalo e holago. Ke ka baka la’ng se se ka bolelwa? Ge o nagana ka boemo bja lefase le bjo bo fetogago le bjo bo gakantšhago, ke eng seo batho bao ba nago le temogo ba se dumelago? Ka ntle le pelaelo ba dumela se: Gaešita le ge batho ba dimilione ba rutilwe ka thuto ya tshepedišo ya lefase, go na le go hlaelelwa mo go golo ga mehola ya kgonthe le go palelwa ke go hlaola magareng ga se se lokilego le se se fošagetšego. (Jesaya 5:​20, 21) Go hlaelelwa ke tsebo ya Beibele le dikagare tša yona go atile. Le ge thekinolotši e nea tsebišo e ntši ka go dirišwa ga di-computer, di kae dikarabo tša dipotšišo tše bohlokwa tše bjalo ka, Morero wa bophelo ke ofe? Re swanetše go kwešiša bjang ditiragalo tša mehla ya rena? Na go na le kholofelo e tiilego bakeng sa bokamoso? Na khutšo le tšhireletšego di tla ka tša ba gona e le ka kgonthe? Go oketša moo, dirakeng tša bokgoba-puku go hwetšwa matlakala a dimilione a dipuku tša ditšhupetšo tšeo di akaretšago selo se sengwe le se sengwe seo batho ba se lekilego. Go dutše go le bjalo, batho ba bušeletša diphošo tša nakong e fetilego. Bosenyi bo atile. Malwetši ao ka nako e nngwe go ilego gwa bolelwa gore a tla fedišwa a tsoga gape, mola a mangwe a bjalo ka AIDS a phatlalala ka mo go boifišago. Bophelo bja lapa  bo thubega ka tekanyo ye e makatšago. Tšhilafalo e senya tikologo. Botšhošetši le dibetša tša go fediša batho ka bontši di tšhošetša khutšo le tšhireletšego. Mathata a se nago ditharollo a tšwela pele go kgobelana. Tema ya rena e swanetšego ke efe bakeng sa go thuša magagabo rena dinakong tše tše hlobaetšago? Na go na le thuto yeo e hlalosago sebaki sa tlalelo ya batho gomme e sa bontšhe feela tsela ya bophelo bjo bokaone gona bjale eupša gape le go nea bokamoso bjo bo kgahlišago le kholofelo e kgonthišeditšwego?

“Taelo ya rena ya Mangwalo ke gore, ‘yang Le dirê dithšaba ka moka barutiwa ka xo ba kolobetša Leineng la Tate le la Morwa le la Môya o mokxêthwa, le ka xo ba ruta xo boloka tšohle tše ke Le laetšexo tšôna.’ (Mateo 28:​19, 20) Taelo ye e neilwe ke Jesu Kriste ka morago ga lehu la gagwe le tsogo, ge a be a newa matla ka moka legodimong le lefaseng. E feta mediro ka moka yeo e kgothaletšwago ke batho. Go ya ka pono ya Modimo, taelo ya rena yeo e lebišago tlhokomelo go dinyakwa tša moya tša bao ba swerwego ke tlala ya go loka, e tla pele. Re na le mabaka a Mangwalo ao a kwagalago bakeng sa go tšeela godimo taelo yeo.

“Se se bolela go bea modiro o bjalo ka pele maphelong a rena. Ka tšhegofatšo ya Modimo le thušo, modiro o tla dirwa go sa šetšwe ditutuetšo tše dintši tšeo di šitišago, mapheko le dikganetšo go tšwa bodumeding le go ditho tša bopolitiki, tšeo di diretšwego go šitiša tšwelopele ya lenaneo le la thuto ya lefase ka bophara. Re kgodišegile e bile re na le tumelo ya gore modiro wo o tla tšwela pele go atlega le go fihlelela phetho ya ona e kgolo. Ke ka baka la’ng re ka kgodišega gakaakaa? Ka gobane Morena Jesu Kriste o holofeditše gore o tla ba le rena bodireding bja rena bjo re bo neilwego ke Modimo go fihla bofelong bja tshepedišo ye ya dilo.

“Nako ke ya mafelelo bakeng sa batho bao ba gateletšegilego. Taelo ya rena ya gona bjale e swanetše go phethagatšwa pele bofelo bo fihla. Ka gona, rena bjalo ka Dihlatse tša Jehofa re itlama gore:

“Sa pele: Bjalo ka badiredi bao ba ineetšego, re ikemišeditše go boloka dikgahlego tša Mmušo pele maphelong a rena le go tšwela pele re gola moyeng. Go fihlelela pakane yeo, thapelo ya rena e dumelelana le mantšu a Psalme 143:​10: ‘Nthutê xo dira se se Xo kxahlaxo, xobane O Modimo wa-ka.’ Se se nyaka gore re be barutwana ba babotse, re katanele go bala Beibele letšatši le letšatši, re ineele thutong ya motho ka noši le go dira nyakišišo. Bakeng sa go dira gore tšwelopele ya rena e bonagale go batho ka moka, re tla dira boiteko bjo bongwe le bjo bongwe bjo bo leka-lekanego bakeng sa go lokišeletša le go holega thutong ya pušo ya Modimo e newago dibokeng tša phuthego, dikopanong tše nyenyane tša tikologo, tše kgolo tša selete, tša ditšhaba le tša ditšhaba-tšhaba.—1 Timotheo 4:​15; Ba-Hebere 10:​23-25.

“Sa bobedi: Bakeng sa gore re rutwe ke Modimo, re tla iphepa ka mo go feletšego tafoleng ya gagwe gomme re ela hloko temošo ya Beibele mabapi le dithuto tše di arošago tša botemona. (1 Ba-Korinthe 10:​21; 1 Timotheo 4:1) Re tla ela hloko ka mo go kgethegilego go phema dilo tše di gobatšago, go akaretša maaka a bodumedi, mabaka a lefeela, kgobogo ya tša botona le botshadi yeo e lešago dihlong, leuba la diswantšho tšeo di kgothaletšago bootswa, boithabišo bjo bo gobogilego le selo se sengwe le se sengwe seo ‘se sa dumelelanego le mantšu a phedišago.’ (Ba-Roma 1:​26, 27; 1 Ba-Korinthe 3:​20; 1 Timotheo 6:3; 2 Timotheo 1:​13, NW) Ka go hlompha ‘dimpho tše e lego banna,’ bao ba swanelegago go ruta seo se agago, re tla hlompha e le ka kgonthe maiteko a bona le go dirišana le bona ka pelo ka moka bakeng sa go boloka ditekanyetšo tša moya tše di hlwekilego le tša go loka tša Lentšu la Modimo.Ba-Efeso 4:​7, 8, 11, 12, bapiša le NW; 1 Ba-Thesalonika 5:​12, 13; Tito 1:9.“Sa boraro: Bjalo ka batswadi ba Bakriste, re tla katana ka pelo ka moka go ruta bana ba rena e sego feela ka lentšu eupša gape le ka mohlala. Selo seo re tshwenyegilego kudu ka sona ke go ba thuša go tloga bjaneng bja bona go ‘ithuta mangwalo a makgethwa gobane a hlalefišetša phologo.’ (2 Timotheo 3:​15) Re tla dula re gopola gore go ba godiša ga rena ka tayo le tlhahlo ya monagano ya Jehofa go tla ba nea sebaka se se kaone kudu sa go bona kholofetšo ya Modimo  yeo ya gore ‘ba be le mahlatse, ba phele galelele lefaseng.’—Ba-Efeso 6:​1-4, bapiša le NW.

“Sa bone: Ge re lebeletšana le dipelaelo goba mathata a šoro, sa pele re tla ‘tsebiša Modimo se re se nyakago,’ re kgodišegile gore ‘khutšô ya Modimo, ye e fetaxo thlaoloxanyô yohle’ e tla re šireletša. (Ba-Filipi 4:​6, 7) Ka ge re le ka tlase ga joko ya Kriste, re tla hwetša tapologo. Ka go tseba gore Modimo o na le taba le rena, re ka se dika-dike go lahlela dipelaelo tša rena go yena.—Mateo 11:​28-30; 1 Petro 5:​6, 7.

“Sa bohlano: Go bontšheng ga rena go leboga Jehofa bakeng sa tokelo ya go ba barutiši ba Lentšu la gagwe, re tla tsošološa maiteko a rena a go ‘ratha Lentšu la therešo re sa kgopamiše’ le go ‘phetha bodiredi bja rena ka botlalo.’ (2 Timotheo 2:​15; 4:5) Ka gobane re hlokometše gabotse seo se akaretšwago, kganyogo ya rena e tšwago pelong ke go tsoma bao ba swanelegago le go hlagolela peu yeo e bjetšwego. Go feta moo, re tla kaonefatša thuto ya rena ka go swara dithuto tše oketšegilego tša magae tša Beibele ka mafolofolo. Se se tla re dumelelanya kudu le thato ya Modimo e lego gore ‘batho bohle ba phološwê ba fihlêlê tsebô Ya therešô.’—1 Timotheo 2:​3, 4.

“Sa botshelela: Go theoša le ngwaga-kgolo o fetilego le go fihla go wo, Dihlatse tša Jehofa dinageng tše dintši di ile tša lebeletšana le mehuta e fapa-fapanego ya kganetšo le tlaišo. Eupša Jehofa o itlhatsetše go ba le rena. (Ba-Roma 8:​31) Lentšu la gagwe le le sa fošego le re kgonthišetša gore ‘ga go na marumo a rulelwago rena’ bakeng sa go šitiša, go diegiša goba go emiša modiro wa rena wa go bolela Mmušo le modiro wa go ruta a tlago go atlega. (Jesaya 54:​17) E ka ba ka lebaka la gona goba e se la gona, re ka se kgone go emiša go bolela therešo. Boikemišetšo bja rena ke go phethagatša taelo ya rena ya go bolela le go ruta kapejana. (2 Timotheo 4:​1, 2) Pakane ya rena ke go abelana ka botlalo ka mo go ka kgonegago ka gona ditaba tše dibotse tša Mmušo wa Modimo le batho ba ditšhaba ka moka. Ka gona, ba tla tšwela pele go ba le sebaka sa go ithuta ka tokišetšo ya go hwetša bophelo bjo bo sa felego lefaseng le lefsa la go loka. Bjalo ka lešaba leo le kopanego la barutiši ba Lentšu la Modimo, boikemišetšo bja rena ke go tšwela pele re latela mohlala wa Morutiši yo Mogolo, Jesu Kriste le go bontšha dika tša gagwe tša go boifa Modimo. Tše ka moka re tla di dira bakeng sa go tliša tlhompho le tumišo go Mohlahli wa rena yo Mogolo le Monei wa Bophelo, Jehofa Modimo.

“Ka moka bao le lego gona kopanong ye bao le dumelelanago le setlamo se, hle anke le re EE!”

Ge potšišo ya mafelelo ya setlamo e be e botšišwa ba 160 000 bao ba bego ba bokane dikopanong tše tharo kua Fora le ba 289 000 mafelong a senyane kua Italy, “Ee” ya modumo o matla e ile ya goeletšwa ka maleme a mantši a fapa-fapanego ao a bolelwago ke batla-kopanong.