Bagoeledi Ba Mmušo Ba A Bega

“Ke be ke Nyaka go Hlankela Modimo”

“KHUDUXANG! lena ba sethšaba sa-ka.” Ye e be e le kgoeletšo ya morongwa yeo e kwelwego ke moapostola Johane lekgolong la pele la nywaga C.E. Mehleng ya rena dimilione tša batho ba dipelo tše ikokobeditšego ba arabetše le go tšhaba ‘Babele o Mogolo,’ mmušo wa lefase wa bodumedi bja maaka. (Kutollo 18:​1-⁠4) Gare ga bona ke Wilner yo a tšwago Haiti, yo a anegago phihlelo ya gagwe.

“Ke belegwe ka 1956 ka lapeng la Makatholika a ineetšego torotswaneng ya St. Marc, Haiti. Nagana lethabo la lapa lešo ge ke be ke kgethwa, gotee le ba bangwe ba babedi go tšwa toropong ya gešo, bakeng sa go tsenela seminare kua St. Michel de l’Atalaye, Haiti. Ke moka, ka 1980 re ile ra romelwa kua Stavelot, Belgium, bakeng sa tlwaetšo e oketšegilego. Gona moo re ile ra tsena gape yunibesithing ya Makatholika.

“Mathomong ke be ke fišegela go tsenela boruti. Ka letšatši le lengwe ka phapošing ya matena, moruti yo a bego a ikarabela ka sehlopha sa rena o ile a nkgopela gore ke šale ka metsotswana e sego kae ka gobane o be a na le seo a bego a rata go mpotša sona. Nagana letšhogo la-ka ge a bolela phatlalatša gore o nkgahlegela ka tša botona le botshadi! Ke ile ka gana tšhišinyo ya gagwe eupša ke ile ka nyama ka mo go feletšego. Ke ile ka ngwalela lapa lešo ka tiragalo ye gomme ka tlogela seminari dikgwedi tše sego kae ka morago, go sa šetšwe go se thabe ga bona. Ke ile ka hwetša bodulo motseng gomme ka tšwetša pele dithuto ka go ithutela mošomo o mongwe.

“Ge ke be ke boa St. Marc, ke be ke se sa na kgodišego le ge e le efe ka Kereke ya Katholika. Lega go le bjalo, ke be ke nyaka go hlankela Modimo, eupša ke be ke sa tsebe gore ke dire’ng. Ke ile ka ya kerekeng ya ma-Sabatha, kerekeng ya Ebenezer le kerekeng ya Mormon. Ke be ke akga-akgega moyeng.

“Ka gona ke ile ka gopola gore ge ke be ke tsena seminari kua Belgium, ke be ke tlwaetše go bala Beibele ya Crampon. Ka gare ga yona ke ile ka utolla gore Modimo o na le leina. Ka gona ke šomiša leina la gagwe, ke ile ka rapela ka phišego go Modimo gore a nthuše go hwetša bodumedi bja therešo.

“Kapejana ka morago ga moo, Dihlatse tša Jehofa tše pedi di ile tša hudugela tikologong ya-ka. Ba be ba homotše, ba hlomphega le go ba le seriti. Ke be ke kgahlišwa ke tsela ya bona ya bophelo. Ka letšatši le lengwe, yo mongwe wa Dihlatse tše pedi, o ile a ntaletša go ba gona Segopotšong sa ngwaga le ngwaga sa lehu la Kriste. Ke ile ka thabela seboka ka mo go feletšego gomme ka amogela thuto ya ka mehla ya Beibele le Dihlatse. Mo e ka bago dikgwedi tše tshela, ke ile ka kgodišega gore ke hweditše tsela e nepagetšego ya go hlankela Modimo. Ke ile ka neela bophelo bja-ka go Jehofa gomme ka kolobetšwa ka November 20, 1988.”

Ge nako e dutše e e-⁠ya, Wilner o ile a tsenela tirelo ya nako e tletšego. Lehono, o hlankela bjalo ka mogolo wa phuthego. Yena le mosadi wa gagwe, gotee le bana ba bona ba babedi, ba hlankela ka lethabo phuthegong.

[Seswantšho go letlakala 9]

Ka go bala Beibele, Wilner o ile a utolla gore leina la Modimo ke Jehofa