Tšwelang Pele le Hlankela Jehofa ka Pelo e Tiilego
Tšwelang Pele le Hlankela Jehofa ka Pelo e Tiilego
“Modimo, pelo ya-ka e tiile. Pelo ya-ka e tiile.”—PSALME 57:7.
1. Ke ka baka la’ng re ka ba le kgodišego e swanago le ya Dafida?
JEHOFA a ka re dira gore re tie tumelong ya Bokriste, e le gore re ka kgomarela Bokriste bja therešo re le bahlanka ba gagwe ba ineetšego. (Ba-Roma 14:4) Ka gona, re ka ba le kgodišego e swanago le ya mopsalme Dafida yo a ilego a tutueletšega go opela gore: “Modimo, ke tlemile pelo.” (Psalme 108:1) Ge e ba dipelo tša rena di tiile, re tla tutueletšega go phethagatša boineelo bja rena go Modimo. Gomme ka go lebelela go yena bakeng sa tlhahlo le matla, re ka ipontšha re le ba sa šišinyegego, re tiile kgodišegong le tumelong bjalo ka babotegi, ‘re dula re na le go gontši mo re swanetšego go go dira modirong wa Morena.’—1 Ba-Korinthe 15:58, NW.
2, 3. Bohlokwa bja dikgothatšo tša Paulo tše di begilwego go 1 Ba-Korinthe 16:13 ke bofe?
2 Dikgothatšong tšeo di ilego tša botšwa balatedi ba Jesu kua Korinthe ya bogologolo eupša tšeo ka ntle le pelaelo di šomago le go Bakriste ba mehleng yeno, moapostola Paulo o itše: “Phakxamang le êmê tumêlong, Le dirê senna, Le tiê matla.” (1 Ba-Korinthe 16:13) Ka Segerika e nngwe le e nngwe ya ditaelo tše e ka lebaka la bjale, ka gona di kgothaletša tiro e tšwelago pele. Bohlokwa bja kgothatšo ye ke bofe?
3 Re ka ‘phakgama’ moyeng ka go ganetša Diabolo le ka go dula re le kgaufsi le Modimo. (Jakobo 4:7, 8) Go ithekga ka Jehofa go dira gore re kgone go dula re le boteeng le go ‘ema re tiile tumelong ya Bokriste.’ Renago akaretša le basadi ba bantši gare ga renare ‘dira senna’ ka go hlankela Modimo ka sebete re le bagoeledi ba Mmušo. (Psalme 68:11, NW) Re ‘tia matla’ ka go tšwela pele re lebelela go Tatago rena wa legodimong bakeng sa matla a go dira thato ya gagwe.—Ba-Filipi 4:13.
4. Ke eng seo se lebišitšego kolobetšong ya rena re le Bakriste?
4 Re emela tumelo ya therešo ge re dirile boineelo bjo bo feletšego go Jehofa gomme ra bo bontšha ka go kolobetšwa meetseng. Eupša ke eng seo se lebišitšego kolobetšong ya rena? Sa pele re monya tsebo e nepagetšego ya Lentšu la Modimo. (Johane 17:3) Se se tšweleditše tumelo gomme sa re tutueletša go itshola, ra bontšha manyami a kgonthe ka diphošo tša nakong e fetilego. (Ditiro 3:19; Ba-Hebere 11:6) Ke moka gwa latela go sokologa ga rena, ka gobane re ile ra furalela mekgwa e fošagetšego bakeng sa go phela bophelo bjo bo dumelelanago le thato ya Modimo. (Ba-Roma 12:2; Ba-Efeso 4:23, 24) Se se ile sa latelwa ke boineelo bja pelo ka moka go Jehofa ka thapelo. (Mateo 16:24; 1 Petro 2:21) Re ile ra kgopela Modimo letswalo le lebotse gomme ra kolobetšwa e le leswao la boineelo bja rena go yena. (1 Petro 3:21) Go naganišiša ka megato ye go tla re thuša go dula re lebišitše tlhokomelo senyakweng sa boiteko bjo bo tšwelago pele bja go phela ka go dumelelana le boineelo bja rena le ka go tšwela pele re hlankela Jehofa ka pelo e tiilego.
Tšwela Pele ka go Tsoma ga Gago Tsebo e Nepagetšego
5. Ke ka baka la’ng re swanetše go tšwela pele re monya tsebo ya Mangwalo?
5 Bakeng sa go phela ka go dumelelana le boineelo bja rena go Modimo, re swanetše go tšwela pele re hwetša tsebo ya Mangwalo yeo e agago tumelo. E be e le mo go thabišago gakaakang go ja dijo tša moya ge re be re thoma go tlwaelana le therešo ya Modimo! (Mateo 24:45-47) “Dijo” tšeo di be di rothiša maregomme di ile tša re fepa gabotse moyeng. Bjale go bohlokwa gore re tšwele pele re e-ja dijo tše di nago le phepo tša moya e le gore re boloke pelo e tiilego bjalo ka bahlanka ba ineetšego ba Jehofa.
6. O ka ba o thušitšwe bjang go hlagolela tebogo e tšwago pelong bakeng sa therešo ya Beibele?
6 Go nyakega boiteko bakeng sa go tšwela pele re hwetša tsebo e oketšegilego ya Mangwalo. Go bjalo ka go tsoma mahumo a fihlilwegoselo seo se nyakago go katanelwa. Eupša ke mo go putsago gakaakang go hwetša ‘tsebo ya Modimo’! (Diema 2:1-6) Ge mogoeledi wa Mmušo a be a thoma go ithuta Beibele le wena, a ka be a ile a diriša puku ya Tsebo e Išago Bophelong bjo bo sa Felego. Le ka be le ile la tšea nako e itšego le ahla-ahla kgaolo e nngwe le e nngwe, mohlomongwe karolong e fetago e tee. O ile wa holega ge mangwalo a tsopotšwego a be a balwa le go ahla-ahlwa. Ge e ba ntlha e be e le thata go kwešišwa, e be e hlaloswa. Motho yo a bego a go swarela thuto ya Beibele o be a lokišeletša gabotse, a rapelela moya wa Modimo le go go thuša go ba le tebogo e tšwago pelong bakeng sa therešo.
7. Ke eng seo se dirago gore motho a swanelege go ruta ba bangwe therešo ya Modimo?
7 Boiteko bjo e be e le bjo bo swanetšego, ka gobane Paulo o ngwadile gore: “E a rutwaxo Lentšu, a a fêlê a nthša xo tše botse ka moka, à abêla eo a mo rutaxo.” (Ba-Galatia 6:6) Mo temana ya Segerika e bontšha gore dithuto tša Lentšu la Modimo di be di tsenywa ka monaganong le pelong ya yo a “rutwaxo Lentšu.” Go rutwa ga gago ka tsela e bjalo go dira gore o swanelege go ba morutiši wa ba bangwe. (Ditiro 18:25) Bakeng sa go botegela boineelo bja gago, o swanetše go boloka bophelo bja gago bja moya le go tia ka thuto e tšwelago pele ya Lentšu la Modimo.—1 Timotheo 4:13; Tito 1:13; 2:2.
Gopola go Itshola le go Sokologa ga Gago
8. Go boloka boitshwaro bja go kwa Modimo go kgonega bjang?
8 Na o gopola kimologo ye o e kwelego ge o be o thoma go ithuta ka therešo, o itshola gomme o e-kwa tebalelo ya Modimo ye e theilwego tumelong ya sehlabelo sa topollo sa Jesu? (Psalme 32:1-5; Ba-Roma 5:8; 1 Petro 3:18) Ka ntle le pelaelo ga o nyake go boela bophelong bja sebe. (2 Petro 2:20-22) Gare ga dilo tše dingwe, go rapela Jehofa ka mehla go tla go thuša go boloka boitshwaro bja gago bja go kwa Modimo, go phela ka go dumelelana le boineelo bja gago le go tšwela pele o hlankela Jehofa ka potego.—2 Petro 3:11, 12.
9. Ka ge re furaletše mekgwa ya sebe, ke tsela efe yeo re swanetšego go e phegelela?
9 Ka ge o sokologile ka go furalela mekgwa ya sebe, tšwela pele o tsoma thušo ya Modimo ka go boloka pelo ya gago e tiile. Ge e le gabotse, o be o sepela ka tsela e fošagetšego eupša wa lebelela mmapa o ka botwago gomme wa thoma go sepela tseleng e nepagetšego. O se ke wa fapoga tseleng ya gago gona bjale. Dula o ithekgile ka tlhahlo ya Modimo, gomme o ikemišetše go dula tseleng ya bophelo.—Jesaya 30:20, 21; Mateo 7:13, 14.
Le ka Mohla o se ke wa Lebala Boineelo bja Gago le Kolobetšo
10. Ke dintlha dife tšeo re swanetšego go dula re di gopola mabapi le boineelo bja rena go Modimo?
10 Dula o gopola gore o dirile boineelo go Jehofa ka thapelo, o e-na le ponelo-pele ya tirelo ya potego e sa felego. (Juda 20, 21) Boineelo bo swaya go beela ka thoko goba go hlaola bakeng sa morero o mokgethwa. (Lefitiko 15:31; 22:2) Boineelo bja gago e be e se tumelelano ya nakwana goba go ineela go batho. E be e le boineelo bja ka mo go sa felego go Mmuši wa Legohle, gomme go phela ka go dumelelana le bjona go nyaka gore o botegele Modimo ka go se kwanantšhe bophelo ka moka. Ee, ‘re phela goba re e-hwa, re ba Jehofa.’ (Ba-Roma 14:7, 8) Lethabo la rena le ithekgile ka go ikokobeletša ga rena thato ya gagwe le go tšwela pele re mo hlankela ka pelo e tiilego.
11. Ke ka baka la’ng o swanetše go gopola kolobetšo ya gago le seo e se bolelago?
11 Dula o gopola kolobetšo ya gago e le leswao la go ineela ka pelo ka moka go Modimo. E be e se kolobetšo ya kgapeletšo, ka gobane o dirile phetho ka noši. Na ga bjale o ikemišeditše go dira thato ya gago ka go dumelelana le thato ya Modimo bophelo bja gago ka moka? O kgopetše Modimo letswalo le lebotse gomme wa kolobetšwa e le leswao la boineelo bja gago go yena. Boloka letswalo leo le lebotse ka go phethagatša boineelo bja gago, gomme ditšhegofatšo tše di humilego tša Jehofa di tla go tlela.—Diema 10:22.
Thato ya Gago e Kgatha Tema
12, 13. Thato ya rena e tswalana bjang le boineelo le kolobetšo?
12 Ka kgonthe, boineelo le kolobetšo di tlišitše ditšhegofatšo tše kgolo go dimilione tša batho lefaseng ka bophara. Ge re bontšha boineelo bja rena go Modimo ka go kolobetšwa meetseng, re hwa ka kgopolo ya tsela ya rena e fetilego ya bophelo eupša e sego ka go neela thato ya rena. Bjalo ka badumedi bao ba hlahlilwego ka mo go swanetšego, ge e le gabotse re bontšhitše thato ya rena ka noši ge re be re ineela go Modimo ka thapelo gomme re kolobetšwa. Tsela ya boineelo le kolobetšo e nyaka gore re tsebe gore thato ya Modimo ke eng gomme re kgethe go e dira ka go rata. (Ba-Efeso 5:17) Ka go rialo re ekiša Jesu, yo a ilego a dira thato ya gagwe ge a be a beela ka thoko ditlabakelo tša gagwe tša go betla, a kolobetšwa gomme a ineela ka mo go tletšego go dira thato ya Tatagwe wa legodimong.—Psalme 40:7, 8; Johane 6:38-40.
13 Jehofa Modimo o rerile gore Morwa wa gagwe o be a tla ba yo “bolo-ka-tlalô ka xo tlaišêxa.” Ka gona Jesu o ile a swanela ke go dira thato ya gagwe bakeng sa go kgotlelela ditlaišego tše bjalo ka potego. Go fihla fao, o ile a neela “didimo tša dithapêlô le ditôpô le dillô tše thata le ka mexôkxô, . . . ’me a kwewa a hlakodišwa poifong.” (Ba-Hebere 2:10, 18; 5:7, 8) Ge e ba re bontšha poifo e swanago ya tlhompho ya go boifa Modimo, le rena ka mo go swanago re kgodišegile gore re tla “kwewa,” gomme re ka kgodišega gore Jehofa o tla re tiiša bjalo ka Dihlatse tša gagwe tše ineetšego.—Jesaya 43:10.
O ka Boloka Pelo e Tiilego
14. Ke ka baka la’ng re swanetše go bala Beibele ka mehla?
14 Ke eng seo se tlago go go thuša go boloka pelo e tiilego gomme wa phela ka go dumelelana le boineelo bja gago go Modimo? Ka morero wa go monya tsebo e oketšegago ya Lentšu la Modimo ka mehla, bala Beibele ka mehla. Se ke selo seo “molaki e a bôtêxaxo yo bohlale” a re kgothaletšago sona ka mehla. Keletšo e bjalo e newa ka gobane go phela ka go dumelelana le boineelo bja rena go nyaka gore re tšwele pele re sepela therešong ya Modimo. Ge e ba mokgatlo wa Jehofa ka go tseba o dumelela dithuto tša maaka, keletšo ya go bala Beibele le ka mohla e ka se newe Dihlatse tša Jehofa le bao di bolelago le bona.
15. (a) Ke eng seo se swanetšego go naganwa ge re dira diphetho? (b) Ke ka baka la’ng go ka bolelwa gore mošomo wa boiphedišo ke mošomo wa bobedi go Bakriste?
15 Ka mehla ge o dira diphetho, nagana kamoo di tlago go kgoma go phethagala ga boineelo bja gago go Jehofa. Se se ka tswalana le mošomo wa gago wa boiphedišo. Na o katanela go o dira gore o go thuše go tšwetša pele borapedi bja therešo? Gaešita le ge bathwadi ka kakaretšo ba hwetša gore Bakriste bao ba ineetšego ke bao ba ka botwago le bao ba nago le bokgoni, gape ba lemoga gore Dihlatse tša Jehofa ga se tšeo di katanelago go ba pele lefaseng gomme ga di phadišane le ba bangwe bakeng sa go hwetša maemo ao a lefago tšhelete e ntši kudu. Se ke ka gobane pakane ya Dihlatse ga se go fihlelela lehumo, botumo, maemo goba matla. Go bao ba phelago ka go dumelelana le boineelo bja bona go Modimo, selo sa bohlokwa kudu ke go dira thato ya Modimo. Mošomo wa boiphedišo wo o dirago gore ba kgone go hwetša dinyakwa tša bophelo ke selo sa bobedi, mošomo wa bohlokwa bja bobedi. Bjalo ka moapostola Paulo, mošomo wa bona o mogolo ke bodiredi bja Bokriste. (Ditiro 18:3, 4; 2 Ba-Thesalonika 3:7, 8; 1 Timotheo 5:8) Na o boloka dikgahlego tša Mmušo pele bophelong bja gago?—Mateo 6:25-33.
16. Re ka dira’ng ge e ba pelaelo e sa swanelago e dira gore go be thata go phela ka go dumelelana le boineelo bja rena go Modimo?
16 Ba bangwe ba ka be ba be ba imelwa ke dipelaelo tše di fapa-fapanego pele ba ithuta therešo. Eupša dipelo tša bona di ile tša phophoma gakaakang ka lethabo, tebogo le lerato bakeng sa Modimo ge ba be ba amogela kholofelo ya Mmušo! Ge ba nagana ka ditšhegofatšo tšeo ba di thabetšego ga e sa le go tloga ka nako yeo go ka ba thuša gabotse go phela ka go dumelelana le boineelo bja bona go Jehofa. Ka lehlakoreng le lengwe, go thwe’ng ge e ba pelaelo e sa swanelago mathateng a tlwaelegilego bophelong tshepedišong ye ya dilo ga bjale e leka go bipa “Lentšu la Modimo,” bjalo ka ge meetlwa e ka thibela dimela tše nyenyane go gola ka mo go feletšego go ka tšweletša dienywa? (Luka 8:7, 11, 14; Mateo 13:22; Mareka 4:18, 19) Ge e ba o nagana gore se se thoma go go diragalela goba go diragalela lapa la gago, lahlela pelaelo ya gago go Jehofa gomme o rapelele gore a go thuše go gola leratong le go ba le tebogo. Ge e ba o lahlela morwalo wa gago go yena, o tla go phološa gomme a go nea matla a go tšwela pele o mo hlankela ka lethabo le ka pelo e tiilego.—Psalme 55:22; Ba-Filipi 4:6, 7; Kutollo 2:4.
17. Go kgonega bjang go lebeletšana le diteko tše šoro?
17 Tšwela pele o rapela Jehofa Modimo ka mehla, bjalo ka ge o ile wa rapela ge o dira boineelo bja gago go yena. (Psalme 65:2) Ge o lekega go dira se se fošagetšego goba ge o lebeletšane le teko e šoro, tsoma tlhahlo ya Modimo le thušo ya gagwe bakeng sa go e latela. Dula o gopola go nyakega ga tumelo, ka gobane morutiwa Jakobo o ngwadile gore: “Xe mo xo lena xo ka ba le e a hlaêlwaxo ke bohlale, a a bo kxopêlê xo Modimo, Yêna wa xo nea bohle ka xo rata, à sa nyatše motho. A a kxopêlê a fiwê. A a kxopêlê ka tumêlô, a se dika-dikê; xobane e a dikadikaxo ó swana le lephoto la lewatlê, le le tsošwaxo ke phefô la akxa-akxwa ke yôna. Motho yo byalo a se kê a re ó tlo fiwa selô ke Morêna; Monna wa pelo-pedi, ditseleng tša xaxwe xa a loke.” (Jakobo 1:5-8) Ge teko e bonagala e le e imelago, re ka kgodišega ka se: “Xa L’ešo la hlohlwa ke molekô o kaxo pala batho. Modimo ké Mmotexi; a ka se kê a lesa la lekwa ka tše di kaxo Le palêla; xotee le molekô ó tlo fêla a bea sebaka sa xo tlo efoxa, xore Le kxônê xo kxôtlêlêla.”—1 Ba-Korinthe 10:13.
18. Re ka dira’ng ge e ba sebe seo se utilwego se fokodiša boikemišetšo bja rena bja go phela ka go dumelelana le boineelo bja rena go Jehofa?
18 Go thwe’ng ge e ba sebe seo o se utilego se tshwenya letswalo la gago le go fokodiša boikemišetšo bja gago bja go phela ka go dumelelana le boineelo bja gago go Modimo? Ge e ba o itshola, o ka homotšwa ke go tseba gore Jehofa ‘a ka se nyatše pelo e robegilego le e setlegilego.’ (Psalme 51:17) Tsoma thušo ya bagolo ba lerato ba Bakriste, o tseba goreka go ekiša Jehofaba ka se bebofatše kganyogo ya gago ya go tsošološa tswalano e botse le Tatago wa legodimong. (Psalme 103:10-14; Jakobo 5:13-15) Ke moka ka go mpshafatša matla a moya le pelo e tiilego, o tla kgona go dira ditsela tše di bulegilego bakeng sa maoto a gago gomme wa hwetša e le mo go kgonegago go phela ka go dumelelana le boineelo bja gago go Modimo.—Ba-Hebere 12:12, 13.
Tšwelang Pele le Hlankela ka Pelo e Tiilego
19, 20. Ke ka baka la’ng go le bohlokwa gore re tšwele pele re phela ka go dumelelana le boineelo bja rena?
19 Dinakong tše tše hlobaetšago, re swanetše go šoma ka thata bakeng sa go phela ka go dumelelana le boineelo bja rena gomme re tšwele pele re hlankela Modimo ka pelo e tiilego. Jesu o itše: “E a tl’o xo tiišetša xo fihla bofelong, ké yêna a tl’o xo phološwa.” (Mateo 24:13) Ka ge re phela “mehleng ya bofêlô,” bofelo bo ka fo tla nako e nngwe le e nngwe. (2 Timotheo 3:1) Go feta moo, ga go le o tee wa rena yo a ka kgonthišegago gore re tla be re phela ka moso. (Jakobo 4:13, 14) Ka gona, ke ga bohlokwa gore re tšwele pele re phela ka go dumelelana le boineelo bja rena lehono!
20 Moapostola Petro o gateletše se lengwalong la gagwe la bobedi. O ile a bontšha gore gaešita le ge batho bao ba sa boifego Modimo ba ile ba fedišwa ka Meetse-fula, ka gona lefase la seswantšhetšo goba lekoko le kgopo la batho le tla fedišwa ‘letšatšing la Jehofa.’ Ka gona Petro o ile a goeletša ka gore: “Xo swanetše ruri-ruri xe Le le ba xo swara ka tsela e kxêthwa ya borapedi”! Gape o ile a ba kgothatša gore: “Baratexi, ka xe Lè le ba xo tseba, Le itôtê xore batimedi bao ba xo se tsebe molaô ba se kê ba Le xôxa la tloxa moo xo lexo mothêô wa lena wo o tiilexo.” (2 Petro 3:5-17) E tla ba mo go nyamišago gakaakang ge e ba motho yo a kolobeditšwego a be a tla aroga gomme a fihla bofelong bja bophelo bja gagwe e le yo mongwe wa bao ba paletšwego ke go boloka pelo e tiilego!
21, 22. Mantšu a Psalme 57:7 a ile a ipontšha e le a therešo bjang tabeng ya Dafida le Bakriste ba therešo?
21 Boikemišetšo bja gago bja go phela ka go dumelelana le boineelo bja gago go Modimo bo ka matlafatšwa ge e ba o dula o gopola letšatši le thabišago la kolobetšo ya gago gomme o tsoma thušo go Modimo e le gore mantšu a gago le ditiro di thabiše pelo ya gagwe. (Diema 27:11) Jehofa le ka mohla ga a ke a nyamiša batho ba gagwe, gomme ka ntle le pelaelo re swanetše go mmotegela. (Psalme 94:14) O ile a bontšha kgaugelo le kwelobohloko ka go thatafatša maano a manaba le go phološa Dafida. A leboga se, Dafida o ile a bolela ka go tia, go se šuthe ga lerato la gagwe bakeng sa Molopolodi wa gagwe. Ka maikwelo a tseneletšego, o ile a opela ka gore: “Pelo ya-ka e tiile; ’me ke a ôpêla, ke hlaba sefela.”—Psalme 57:7.
22 Ka go swana le Dafida, Bakriste ba therešo ga se ba dika-dika boineelong bja bona go Modimo. Ka dipelo tše di tiilego, ba nea phološo ya bona le tšhireletšego go Jehofa, yoo ba mo opelelago ditumišo ka lethabo. Ge e ba pelo ya gago e tiile, e tla ithekga ka Modimo gomme ka thušo ya gagwe o tla kgona go phethagatša boineelo bja gago. Ee, o ka ba bjalo ka “moloki” yoo mopsalme a ilego a opela ka yena gore: “Xa a boife ’thsêlê tša ba babe; pelo ya xaxwe e tiile à botile Morêna.” (Psalme 112:6, 7) Ka go ba le tumelo go Modimo le ka go ithekga ka mo go feletšego ka yena, o ka phela ka go dumelelana le boineelo bja gago gomme wa tšwela pele o hlankela Jehofa ka pelo e tiilego.
Na o a Gopola?
• Ke ka baka la’ng re swanetše go tšwela pele re monya tsebo e nepagetšego ya Beibele?
• Ke ka baka la’ng re swanetše go dula re gopola go itshola le go sokologa ga rena?
• Re holega bjang ka go gopola boineelo le kolobetšo ya rena?
• Ke eng seo se tlago go re thuša go tšwela pele re hlankela Jehofa ka pelo e tiilego?
[Dipotšišo tša Thuto]
[Diswantšho go letlakala 18]
Na o boloka bophelo bja gago bja moya ka go bala Lentšu la Modimo letšatši le letšatši?
[Seswantšho go letlakala 18]
Go dira bodiredi bja Bokriste mošomo o mogolo go re thuša go tšwela pele re hlankela Jehofa ka pelo e tiilego