Thuto ga e Golelwe

KSENIYA o belegwe ka 1897. O na le barwedi ba bararo, morwa, ditlogolo tše 15 gotee le ditlogolo-tlogolwana tše 25. Bophelong bja gagwe ka moka o dirile seo batswadi ba gagwe ba bego ba mo rutile go se dira. Le ge a be a ile a swanelwa ke go tla Moscow e le mofaladi go tšwa Repabliking ya Abkhaz yeo e hlagaditšwego ke ntwa, yeo e lego magareng ga Lewatle le Leso le Caucasus, o be a kgotsofetše e le ka kgonthe ka bophelo bja gagwe, kudu-kudu ka seo a bego a se bitša tumelo yeo a e hweditšego go bagologolo ba gagwe.

Ka 1993, morwedi wa Kseniya Meri o ile a ba yo mongwe wa Dihlatse tša Jehofa. Meri o ile a thoma go bolela le Kseniya ka Jehofa Modimo le ka Beibele, eupša o be a sa nyake go theetša. Kseniya o ile a tšwela pele a botša morwedi wa gagwe gore, “Ke šetše ke tšofetše kudu bakeng sa gore nka ithuta selo se itšego se sefsa.”

Lega go le bjalo, morwedi wa gagwe Meri; mosadi wa motlogolo wa gagwe, Londa gotee le ditlogolo-tlogolwana tša gagwe Nana le Zaza, bao ka moka e bilego Dihlatse tša Jehofa, ba ile ba tšwela pele ba bolela le yena ka Beibele. Bošegong bjo bongwe ka 1999, ba ile ba balela Kseniya lengwalo leo le ilego la mo kgoma pelo. Le be le na le mantšu a Jesu ao a tutuetšago ao a ilego a a botša barutiwa ba gagwe bao ba botegago ge a be a hloma Selalelo sa Morena. (Luka 22:​19, 20) Ge a be a e-na le nywaga e 102, Kseniya o ile a dira phetho bošegong bjoo ya go thoma go ithuta Beibele.

Kseniya o re: “Ka morago ga go phela nywaga e 102, mafelelong ke kwešišitše morero wa bophelo. Ga bjale ke lemoga gore ga go na selo se se kaone go feta go hlankela Modimo wa rena yo a kgahlišago le yo lerato, Jehofa. Ke sa dutše ke e-na le mafolofolo gomme ke phetše gabotse mmeleng. Ke kgona go bala ka ntle le digalase tša mahlo le go ba le dipokano le lapa la-ka ka mafolofolo.”

Ka November 5, 2000, Kseniya o ile a kolobetšwa. O re: “Bjale ke neela bophelo bja-ka go Jehofa bakeng sa go mo hlankela ka lerato. Ke sepediša dimakasine le dipampišana ke dutše boema-peseng kgaufsi le legae la-ka. Ba leloko gantši ba tla go eta gomme ke abelana le bona ka lethabo therešo ka Jehofa.”

Kseniya o lebeletše pele letšatšing leo ge ‘nama ya gagwe e e-ba e nanana go feta bofseng; gomme a boela matšatšing a matla a bofsa bja gagwe.’ (Jobo 33:​25, NW) Ge e ba motho yo a nago le nywaga e fetago lekgolo a sa ikwe a tšofetše bakeng sa go ithuta morero wa bophelo go tšwa Beibeleng, go thwe’ng ka wena?