Tsoma Modimo ka Pelo ya Gago le Monagano wa Gago

Bokriste bja therešo bo kgothaletša go dirišwa ga bobedi pelo le monagano go ageng tumelo yeo e kgahlišago Modimo.

GE E le gabotse, mothomi wa Bokriste, Jesu Kriste, o rutile gore re swanetše go rata Modimo ka ‘tlhaologanyo ya rena ka moka,’ goba monagano, go tlaleletša go ‘pelo ya rena ka moka’ le ‘moya wa rena ka moka.’ (Mateo 22:​37) Ee, matla a rena a monagano a swanetše go kgatha tema e bohlokwa borapeding bja rena.

Ge a be a laletša batheetši ba gagwe go naganišiša ka thuto ya gagwe, Jesu gantši o be a fela a re: “Le nagana’ng?” (Mateo 17:​25, NW; 18:​12, NW; 21:​28, NW; 22:​42, NW) Ka mo go swanago, moapostola Petro o ile a ngwalela badumedi-gotee le yena e le gore a ‘tsoše kgopolo-tshekegi ya bona.’ (2 Petro 3:⁠1) Moromiwa wa mehleng ya pele yo a sepetšego kudu, e lego moapostola Paulo, o ile a kgothaletša Bakriste go diriša ‘matla a bona a go nagana’ le go ‘hlaologanya se e lego thato ya Modimo, e lego se botse le se se kgahlišago, se e lego sa botlalo.’ (Ba-Roma 12:​1, 2, bapiša le NW.) Ke fela ka mokgwa wo bjalo o tseneletšego, le wa go ba šedi ka ditumelo tša bona moo Bakriste ba ka agago tumelo ya bona ye e thabišago Modimo yeo e ba thušago go lebeletšana ka katlego le diteko tšeo di tšwelelago bophelong.—Ba-Hebere 11:​1, 6.

Go thuša ba bangwe gore ba age tumelo e bjalo, baebangedi ba pele ba Bakriste ba ile ba ‘botšana le bona tša mangwalo, ba ba hlathollela le go ba bontšha’ dilo tšeo di rutilwego. (Ditiro 17:​1-⁠3) Tsela e bjalo ya go dira dilo e ile ya tsoša kgahlego e botse go ba dipelo tše di botegago. Ka mohlala, batho ba bantši motseng wa Matsedonia wa Berea ba “amoxetše Lentšu [la Modimo] ka xo rata; ba hlwa bà bala mangwalô ka mehla bà nyaka mo a kwanaxo le tšeo [di hlalositšwego ke Paulo le badirišani ba gagwe] ba  bexo ba di kwa.” (Ditiro 17:​11) Go na le dilo tše pedi lengwalong le tšeo di swanetšego go elwa hloko. Sa pele, ba-Berea ba be ba fišegela go theetša Lentšu la Modimo; sa bobedi, ga se ba ka ba fo amogela gore seo ba bego ba se kwele e be e le se se nepagetšego ka ntle le go nagana, eupša ba ile ba kgonthišetša seo ba bego ba se kwele ka go bala Mangwalo. Moromiwa wa Mokriste Luka o ile a reta ba-Berea ka tlhompho ka seo, a ba bitša “batho ba mohuta o lexo kaone.” Na o bontšha moya o bjalo wa go ba kaone ka mokgwa wo o lebelelago ditaba tša moya ka gona?

Monagano le Pelo di a Dirišana

Bjalo ka ge go bontšhitšwe pele, borapedi bja therešo bo akaretša bobedi monagano le pelo. (Mareka 12:​30) Nagana ka seswantšho sa sehlogong se se fetilego sa mapentane yo a thwetšwego yo a dirišitšego mebala e fošagetšego ge a penta ntlo. Ge nkabe a ile a theetša ka kelohloko ditaelo tša mothwadi wa gagwe, nkabe a ile a dira modiro wa gagwe ka pelo ka moka gomme a ba le kholofelo ya gore modiro wa gagwe o tla thabelwa ke mong wa ntlo. Ke se se swanago ka borapedi bja rena.

Jesu o itše: “Barapedi ba makxonthe ba tl’o . . . rapêla Tate ka Môya le ka therešô.” (Johane 4:​23, mongwalo o sekamego ke wa rena.) Le gona, moapostola Paulo o ngwadile gore: “Byale le rena . . . xa re kxaotše xo Le rapêlêla le xo Le kxopêlêla xore Le tlatšwê tsebô [“e nepagetšego,” NW] ya xo tseba thatô ya xaxwe, Le bê le bohlale ka moka le thlaoloxanyô ya Môya. Re Le rapêlêla xore Le swarê ka tsela ye e loketšexo ba Morêna, e bê xo mo kxahla xohle.” (Ba-Kolose 1:​9, 10) ‘Tsebo e bjalo e nepagetšego’ e thuša batho ba botegago go bea pelo le moya borapeding bja bona ka kholofelo e feletšego ka gobane ba ‘rapela se ba se tsebago.”—Johane 4:⁠22.

Ka baka la mabaka a, Dihlatse tša Jehofa ga di kolobetše masea goba batho ba sa tšwago go thabela bao ba sego ba hlwa ba ithuta Mangwalo ka šedi. Jesu o ile a laela barutiwa ba gagwe gore: “Le dirê dithšaba ka moka barutiwa . . . ka xo ba ruta xo boloka tšohle tše ke Le laetšexo tšôna.” (Mateo 28:​19, 20) Ke fela ka morago ga go hwetša tsebo e nepagetšego ya thato ya Modimo moo morutwana yo a botegago wa Beibele a ka dirago phetho yeo e theilwego tsebong e nepagetšego mabapi le taba ya borapedi. Na o katanela go hwetša tsebo e bjalo e nepagetšego?

Go Kwešiša Thapelo ya Morena

Go bona phapano magareng ga go ba le tsebo e nepagetšego ya Beibele le seo se bolelwago ke go ba le tsebo e lekaneditšwego ka seo e se bolelago, anke re eleng hloko seo ka mo go tlwaetšwego se bitšwago Tata-wešo goba Thapelo ya Morena, e begilwego go Mateo 6:​9-​13.

Batho ba dimilione ka mehla ba rapela ka hlogo thapelo ya Jesu ya mohlala ka kerekeng. Eupša ke ba bakae bao ba rutilwego seo e se bolelago, kudu-kudu karolo ya mathomo yeo e bolelago ka leina la Modimo le Mmušo wa gagwe? Ditaba tše ke tše bohlokwa kudu mo e lego gore Jesu o di beile pele thapelong.

E thoma ka gore: “Tata-wešo wa maxodimong! Leina la xaxo a le kxêthwê,” seo se bolelago gore le kgethagatšwe. Ela hloko gore Jesu o itše go rapelwe bakeng sa gore leina la Modimo le kgethagatšwe. Go batho ba bantši, seo se rotoša bonyenyane dipotšišo tše pedi. Ya pele, leina la Modimo ke mang? Ya bobedi, ke ka baka la’ng le swanetše go kgethagatšwa?

Karabo ya potšišo ya mathomo e ka hwetšwa mafelong a 7 000 ka Beibeleng ka malemeng a yona a mathomo. Le lengwe la ona ke go Psalme 83:​19: “Gore ba tsebe gobane ke wena o nnoši, o bitšwago Jehofa, Yo godimo-dimo, godimo ga lefase ka moka.” (PK, mongwalo o sekamego ke wa rena) Ekisodo 3:​15 (PK) e bolela mabapi le leina la Modimo, Jehofa gore: “Ke lona leina la-ka ka go sa felego, gomme ke tlo bitšwa ka lona ditlogolong tša ditlogolwana.” * Eupša ke ka baka la’ng leina la Modimo, leo e lego modu wa tshekego le bokgethwa le swanetše go kgethagatšwa? Ka baka la gore le ile la gobošwa le  go senywa go tloga mathomong a histori ya motho.

Kua Edene, Modimo o boditše Adama le Efa gore ba be ba tla hwa ge e ba ba ka ja seenywa seo se ileditšwego. (Genesi 2:​17) Sathane o ile a ganetša Modimo phatlalatša ge a botša Efa gore: “Le ka se kê la hwa lehu.” Ka gona, Sathane o ile a thomeletša Modimo ka gore o bolela maaka. Le gona, ga se a felele fao. O ile a kgobelela kgobogo e oketšegilego leineng la Modimo, ka go botša Efa gore Modimo o be a mo utela tsebo e bohlokwa ka tsela e sa swanelago. “Xe e le Modimo, yêna ó tseba xore mohla Lè se jaxo mahlô a lena a tlo buduloxa la ba byalo ka Modimo, la tseba botse le bobe.” A go thomeletša mo go kaakang!—Genesi 3:​4, 5.

Ka go ja sehlare seo se bego se ileditšwe, Adama le Efa ba ile ba ema le Sathane. Batho ba bantši ga e sa le go tloga ka nako yeo, ba tseba goba ba sa tsebe, ba ile ba oketša kgobogong yeo ya mathomong ka go gana ditekanyetšo tša Modimo tša go loka. (1 Johane 5:​19) Batho ba sa phara Modimo molato ka baka la go tlaišega ga bonagaešita le ge e le ka baka la ditsela tša bona tše mpe. Diema 19:⁠3, (The New English Bible) e re: “Bošilo bja motho bo senya bophelo bja gagwe, ke moka a befelela Morena.” Na o kgona go bona lebaka leo ka lona Jesu, yo a bego a rata Tatagwe e le ka kgonthe, a ilego a rapelela gore leina la Gagwe le kgethagatšwe?

“Mmušô wa Xaxo a o tlê”

Ka morago ga go rapelela gore leina la Modimo le kgethagatšwe, Jesu o itše: “Mmušô wa xaxo a o tlê; thatô ya xaxo a e dirwê mono lefaseng byalo ka xe e dirwa lexodimong.” (Mateo 6:​10) Re ka botšiša mabapi le karolo yeo gore: ‘Mmušo wa Modimo ke eng? Le gona go tla ga wona go sepelelana bjang le go dirwa ga thato ya Modimo lefaseng?’

Ka Beibeleng, lentšu “mmušô” le bolela gore “pušo ka kgoši.” Ka gona, ka mo go kwagalago, Mmušo wa Modimo o tla bolela pušo, goba mmušo ka Modimo, ka kgoši yeo a ikgethetšego yona. Kgoši yeo ga se e nngwe ge e se Jesu Kriste yo a tsošitšwego“Kxoši ya maxoši, Morêna wa marêna.” (Kutollo 19:​16; Daniele 7:​13, 14) Moporofeta Daniele o ile a ngwala mabapi le Mmušo wa Modimo wa Mesia ka diatleng tša Jesu Kriste gore: “Mehleng ya dikxoši tšeo [mebušo ya batho e bušago ga bjale], ké mo Modimo a tl’o xo tsoša mmušô wo o ka se kexo wa šwalalanywa neng le neng, wo o ka se kexo wa selêla xo sethšaba se sengwê. O tlo phšatla mebušô e mengwê ka moka wa e fediša; ge e le wôna, o tlo êma xo ya xo ile,” seo se bolelago gore, ka mo go sa felego.—Daniele 2:⁠44.

Ee, Mmušo wa Modimo o tla laola lefase ka mo go feletšego, o fediše bokgopo ka moka go lona gomme o buše “xo ya xo ile,” seo se bolelago gore, ka mo go sa felego. Ka tsela ye, Mmušo wa Modimo ke tsela yeo ka yona Jehofa a kgethagatšago leina la gagwe, a tloša kgobogo ka moka ya maaka yeo Sathane le batho ba babe ba e dirilego leineng la gagwe.—Hesekiele 36:⁠23.

Go swana le mebušo ka moka, Mmušo wa Modimo o na le balata ba ona. Ke bomang? Beibele e a araba: “Ba bolêta e tlo ba bôná beng ba naxa ba tlo thaba ka botlalô bya moláô.” (Psalme 37:​11) Ka mo go swanago, Jesu o itše: “Ba lehlôxônôlô ké ba bolêta, xobane bôná-bao ba tlo tšea lefase ya ba kabêlô ya bôná.” Ka kgonthe, ba ba na le tsebo e nepagetšego ya go tseba Modimo, e lego senyakwa bakeng sa bophelo.—Mateo 5:⁠5; Johane 17:⁠3.

Na o ka nagana lefase ka moka le tletše ka batho ba boleta, batho bao ba ratago Modimo e le ka kgonthe le go ratana? (1 Johane 4:​7, 8) Ke sona se Jesu a se rapeletšego ge a be a re: “Mmušô wa xaxo a o tlê; thatô ya xaxo a e dirwê mono lefaseng byalo ka xe e dirwa lexodimong.” Na o kwešiša lebaka leo ka lona Jesu a ilego a ruta balatedi ba gagwe gore ba rapele ka tsela yeo? Se bohlokwa le go feta, na o bona kamoo go phethagala ga thapelo yeo go ka go kgomago ka gona?

Batho ba Dimilione ga Bjale ba Boledišana ka Mangwalo

Jesu o ile a bolelela e sa le pele modiro wa lefase ka bophara wa thuto ya moya wo o bego o tla tsebatša go tla ga Mmušo wa Modimo. O itše: “Ditaba tše tše dibotse tša mmušo di tla bolelwa  lefaseng ka moka leo go agilwego go lona gore e be bohlatse go ditšhaba ka moka; gomme e tla ba gona bofelo [bja lefase la gona bjale goba tshepedišo] bo fihlago.”—Mateo 24:​14, NW.

Lefaseng ka bophara Dihlatse tša Jehofa tše ka bago dimilione tše tshela di abelana ditaba tšeo tše dibotse le baagišani ba tšona. Di go laletša gore o ithute ka mo go oketšegilego ka Modimo le Mmušo wa gagwe ka go “bala mangwalô,” o diriša matla a gago a go nagana. Go dira bjalo go tla matlafatša tumelo ya gago gomme gwa dira gore o thabe ge o dutše o nagana ka kholofelo ya bophelo lefaseng la paradeise, leo le tla bego le ‘tletše go tseba Morena bjalo ka meetse ge a nabile lewatleng.’—Jesaya 11:​6-⁠9.

[Mengwalo ya ka tlase]

 [Lepokisi/Seswantšho go letlakala 8]

EKIŠA MORUTIŠI YO MOGOLO

Jesu gantši o be a ruta ka go lebiša tlhokomelo dihlogong tše itšego tša Beibele. Ka mohlala, ka morago ga tsogo ya gagwe o ile a hlalosetša barutiwa ba gagwe ba babedi bao ba bego ba makaditšwe ke lehu la gagwe, tema ya gagwe morerong wa Modimo. Luka 24:​27 e re: “A thôma ka Mošê, a iša xo Baporofeta ka moka, a ba hlathollêla tša mo mangwalong ka moka, tše a boletšwexo ka tšôna.”

Ela hloko gore Jesu o kgethile sehlogo se se kgethegilego“le yena” (NW) Mesiale gore poledišanong ya gagwe o tsopotše go tšwa “mangwalong ka moka.” Ge e le gabotse, Jesu o ile a bea mangwalo a nyalelanago a Beibele felo gotee bjalo ka dikarolwana tša papadi ya go aga seswantšho, ao a ilego a thuša barutiwa ba gagwe go bona mohlala o kwalago wa therešo ya moya. (2 Timotheo 1:​13) Ka baka la seo, ba be ba sa fo sedimošetšwa fela eupša ba tutueletšega ka mo go tseneletšego. Pego e re botša gore: “Ba šala ba botšana ba re: Dipelo tša rena a xa tša ka tša fsa ka mo xo rena mola a bolêla le rena tseleng, xe a re hlathollêla mangwalô?”—Luka 24:⁠32.

Dihlatse tša Jehofa di katanela go ekiša mekgwa ya Jesu bodireding bja tšona. Dithušo tša tšona tša go ithuta tša motheo ke poroutšha ya Ke Eng Seo Modimo a se Nyakago go Rena? le puku ya Tsebo e Išago Bophelong bjo bo sa Felego. Tše di bolela ka dihlogo tše mmalwa tše di kgahlišago tša Beibele, tše bjalo ka: “Modimo ke Mang?,” “Ke ka Baka La’ng Modimo a Dumelela Tlaišego?,” “O ka Tseba Bjang Bodumedi bja Therešo?,” “Ye ke Mehla ya Bofelo!” le “Go Aga Lapa le le Godišago Modimo.” Thuto e nngwe le e nngwe e na le mangwalo a mmalwa.

O laletšwa go ikopanya le Dihlatse tša Jehofa lefelong la geno goba o ngwalele atereseng e lego go letlakala 2 la makasine wo bakeng sa thuto e sa lefelelwego ya legae ya Beibele ya dihlogo tše le tše dingwe.

[Seswantšho]

Fihlelela pelo ya morutwana wa gago ka go lebiša tlhokomelo dihlogong tše kgethegilego tša Beibele

[Diswantšho go letlakala 7]

Na o kwešiša seo se bolelwago ke thapelo ya Jesu ya mohlala?

“Tata-wešo wa maxodimong! Leina la xaxo a le kxêthwê . . . ”

“Mmušô wa xaxo [ka Mesia] a o tlê . . . ”

“Thatô ya a xaxo a e dirwê mono lefaseng byalo ka xe e dirwa lexodimong”