Dipotšišo tše Tšwago go Babadi

Na ke mo go swanetšego go batamela Modimo ka thapelo ka ntle le go diriša polelwana ya gore “ka leina la Jesu”?

Beibele e bontšha gore Bakriste bao ba kganyogago go batamela Jehofa ka thapelo ba swanetše go dira seo ka leina la Jesu. Jesu o ile a botša barutiwa ba gagwe gore: “Xa xo e a tlaxo xo Tate xe e se ka Nna.” O okeditše ka gore: “Se Le se kxopêlaxo ka Leina la-ka, le xe e ka ba’ng, ke tlo se dira, xore Tate a bê le letaxô ka Morwa. Xe Le kxopêla selô ka Leina laka, e tlo ba Nna ke se diraxo.”—Johane 14:​6, 13, 14.

Ge e bolela ka boemo bja moswana-noši bja Jesu, Cyclopedia of Biblical, Theological, and Ecclesiastical Literature e re: “Ke Modimo a nnoši yo a swanetšego ke go rapelwa, ka Jesu Kriste e le Mmoelanyi. Ka gona, dithapelo ka moka, tše di išwago go bakgethwa goba barongwa ga se tšeo fela di se nago mohola, eupša ke tša thogako. Borapedi ka moka bja go rapela dibopiwa, go sa šetšwe gore sebopiwa seo ke se hlomphegago gakaakang, ke borapedi bja medimo ya diswantšho, gomme bo ileditšwe ka go tia ka molaong o mokgethwa wa Modimo.”

Go thwe’ng ge e ba motho yo mongwe ka morago ga tiragalo e kgotsofatšago kudu a re, “Ke a go leboga Jehofa” ntle le go oketša ka gore “ka leina la Jesu”? Na se e tla ba se se sa swanelago? Ga se gore go bjalo. A re re mohlomongwe Mokriste o welwa ke kotsi ya kapejana gomme o goeletša ka gore: “Jehofa nthuše!” Modimo a ka se gane go thuša ka gobane mohlanka wa gagwe a sa ka a bolela gore “ka leina la Jesu.”

Lega go le bjalo, go swanetše go gopolwa gore go fo bolelela godimo gaešita le go Modimo ga go bolele gore o a rapela. Ka mohlala, ka morago ga gore Kaine a ahlolwe ke Jehofa ka baka la gore a bolaile morwarragwe e lego Abele, o ile a re: “Molato wa-ka ké o moxolo; ó a mpalêla. Hleng lehono O ntêlêka mo naxeng yé; byalo ke tlo utama kè thšaba sefahloxô sa xaxo, ka ba mothšabi le moneneri mo lefaseng; ’me mang le mang e a kaxo nkhwetša, ó tlo mpolaya.” (Genesi 4:​13, 14) Gaešita le ge Kaine a ile a botša Jehofa mantšu a gagwe, go bolela ga gagwe ka maikwelo a ntwa e be e le pelaelo mabapi le mafelelo a bohloko a sebe.

Beibele e re botša gore: “Modimo ó lwa le baikxodiši; ba xo ikokobetša ó ba sétša ka dikxauxêlô.” Go bolela le Yo a Phagamego ka go hloka tlhompho e le ge eka ke motho fela ruri go be go tla bontšha go hlaelelwa ke boikokobetšo. (Jakobo 4:6; Psalme 47:2; Kutollo 14:7) Le gona e tla ba e le go hloka tlhompho ge e ba re tseba seo Lentšu la Modimo le se bolelago ka tema ya Jesu gomme ka maikemišetšo ra rapela ka ntle le go bolela ka Jesu Kriste.—Luka 1:​32, 33.

Se ga se bolele gore Jehofa o letetše mohuta o kgethegilego goba thulaganyo ge re rapela. Selo sa bohlokwa ke boemo bja motho bja pelo. (1 Samuele 16:7) Lekgolong la pele la nywaga C.E., mohlankedi wa madira wa mo-Roma yo a bitšwago Koronelio o be “a rapêla Modimo ka mehla.” Koronelio, e lego wa ba-Ntle yo a bego a sa bolla, o be a sa ineela go Jehofa. Gaešita le ge go bonagala gore a ka ba a sa ka a dira dithapelo tša gagwe ka leina Jesu, di “fihlile tša tsebya ke Modimo.” Ka baka la’ng? Ka gobane “mo-leka-pelo,” o ile a bona gore Koronelio “e be e le motho wa borapedi e a boifaxo Modimo.” (Ditiro 10:​2, 4; Diema 17:3) Ka morago ga go ba le tsebo ka “Jesu wa Natsaretha,” Koronelio o ile a hwetša moya o mokgethwa, gomme a ba morutiwa yo a kolobeditšwego wa Jesu.—Ditiro 10:​30-48.

Mafelelong, ga se batho bao ba phethago gore ke dithapelo dife tšeo Modimo a di kwago. Ge e ba Mokriste ka lebaka le lengwe a ka bolela le Modimo gomme a se diriše polelwana e swanago le “ka leina la Jesu,” ga go nyakege gore a ithweše molato. Jehofa o lemoga gabotse mafokodi a rena gomme o nyaka go re thuša. (Psalme 103:​12-​14) Re ka kgodišega gore ge e ba re bontšha tumelo go “Morwa wa Modimo . . . , re tseba xore ó a re kwa xe re kxopêla se se amanaxo le thatô ya xaxwe.” (1 Johane 5:​13, 14) Lega go le bjalo, kudu-kudu ge re emela ba bangwe ka thapelo ya phatlalatša, Bakriste ba therešo ba lemoga tema e bontšhitšwego ka Mangwalong yeo Jesu a e kgathago mererong ya Jehofa. Gomme ka go kwa ba leka go hlompha Jesu ka go lebiša dithapelo go Modimo ka yena.