Ge e le ga Bohlale go Tšhaba

LEFASE la lehono le bonagala ka moya wa bogale le wa bonaba goba le go lebeletšana le diteko. Motho yoo a tšhabago boemong bjo itšego gantši o lebelelwa e le yo a fokolago goba e le lešilo. E ka ba ya ba mohlaselwa wa go kwerwa.

Lega go le bjalo, Beibele e bolela ka mo go kwagalago gore go na le dinako tšeo ka tšona go tšhaba e lego ga bohlale e bile go bontšhago go ba le sebete. A naganne ka seo, pele a romela barutiwa ba gagwe go ya bodireding, Jesu Kriste o ba boditše gore: “E re xe ba Le tlaiša motseng o mongwê, Le thšabêlê xo o mongwê.” (Mateo 10:​23) Ee, barutiwa ba Jesu ba be ba tla swanela go leka go tšhabela batlaiši ba bona. Ba be ba se ba swanela go tsenela ntwa ya bodumedi, ba leka go sokolla ba bangwe ka kgang. Ba be ba rwele molaetša wa khutšo. (Mateo 10:​11-14; Ditiro 10:​34-37) Ka gona go e na le go dumelela go befelwa, Bakriste ba be ba swanetše go tšhaba, ba tloge go bao ba bego ba ba bakela matshwenyego. Ka tsela ye, ba ile ba boloka letswalo le lebotse gotee le tswalano ya bona e bohlokwa le Jehofa.—2 Ba-Korinthe 4:​1, 2.

Mohlala o fapanego o hwetšwa ka pukung ya Beibele ya Diema. E bolela ka lesogana leo go e na le gore le tšhabe ge le lebeletšane le teko, le ilego la latela mogweba-ka-mmele “bo-ka pholo è išwa thlabong.” Ka mafelelo afe? Madimabe ka baka la go ineela tekong yeo e bego e akaretša bophelo bja lona.Diema 7:​5-8, 21-23.

Go thwe’ng ge e ba o tla lebeletšana le teko ya go tsenela boitshwaro bjo bo gobogilego bja botona le botshadi goba wa lebeletšana le dilo tše dingwe tšeo di ka tlišago kotsi? Go ya ka Lentšu la Modimo, mogato o swanetšego e ka ba go tšhaba, go tšhaba tiragalong yeo kapejana.—Diema 4:​14, 15; 1 Ba-Korinthe 6:​18; 2 Timotheo 2:22.