Go Ikwa o Šireletšegile Gona Bjale​—Go Šireletšega ka mo go sa Felego

KE KA baka la’ng gantši go le thata go hwetša tšhireletšego, gomme ge e hweditšwe e le ya nakwana fela? Na e ka ba e le gore maikwelo a rena a tšhireletšego a theilwe boikgopolelonggo seo re holofelago go se fihlelela go e na le seo se fihlelelegago? Go iphora mo go bjalo go ka bitšwa go phela lefaseng la ditoro.

Boikgopolelo bo dumelela monagano go phela bophelo bja kgonthe le go se šireletšege ga bjona gomme o tsene boemong bjo bobotse bja tšhireletšego, o hlokomologa selo le ge e le sefe seo se ka senyago toro yeo. Lega go le bjalo, gantši mathata a kgonthe bophelong kapejana a tsena gare lefase le la ditoro gomme ka go hloka kgaugelo a tloša maikwelo a go atlega, a phafošetša molori go ya go lebeletšana le maemo a kgonthe.

Anke re eleng hloko karolo e nngwe yeo go yona batho ba tsomago tšhireletšegolefelo. Ka mohlala, motse o mogolo o ka bonagala e le o holofetšago, o tšweletšago dipono tša lethabo, mogolo o mogolo kudu le mafelo a madulo a maemo a godimo. Ee, seo se ka bonagala se nea tšhireletšego yeo e lego kgale e letetšwe. Eupša na pono ye ke ya kgonthe?

LefeloMotse o Mogolo Goba Ditoro tše Kgolo?

Dinageng tšeo di hlabologago, melaba ya motse o mogolo e godišwa ke papatšo yeo e ka tanyago menagano yeo e fagahlago. Mekgatlo yeo e thekgago dipapatšo tše bjalo ga se gore e na le kgahlego ka tšhireletšego ya gago eupša go e na le moo e na le kgahlego ka dithekišo tša yona. E ntšha tsebišo ya mabapi le mathata ao a lego gona e le ka kgonthe bophelong, gomme ya bontšha fela maemo a katlego ao a bontšhago tšhireletšego. Ka gona, tšhireletšego e thoma go tswalanywa le dilo tša bona tšeo di bapatšwago le motse o mogolo.

Nagana ka mohlala o latelago. Balaodi ba motse o mongwe o mogolo wa kua Afrika Bodikela ba bea dipampiri tša papatšo tšeo di bontšhago gabotse gore go kgoga ge e le gabotse go swana le go fiša tšhelete yeo e hweditšwego ka thata. Yeo e be e le karolo ya lesolo la go lemoša badudi ba wona malebana le go kgoga. Batšweletši ba sekerete le barekiši ba ile ba lwantšha se ka go bea dipampiri tša papatšo tšeo di hlamilwego ka bohlale tšeo di bego di bontšha bakgogi ba le maemong a tanyago kgahlego a lethabo le a katlego. Go oketša moo, khamphani e nngwe ya sekerete e ile ya apeša ba bangwe ba bašomi ba yona diyunifomo tše botse kudu le dikepisi tše lego nakong tša baseball bakeng sa gore ba abe disekerete go bafsa setarateng, ba kgothaletša yo mongwe le yo mongwe go “se leka.” Ba bantši ba bafsa ba ba tšwa metseng e menyenyane gomme ka ge ba se ba tlwaelana le mekgwa ya bohlale ya papatšo, ba ile ba tanywa ke taletšo ye. E ile ya ba balemaledi ba go kgoga. Bafsa ba metseng e menyenyane ba tlile motseng o mogolo bakeng sa go tsoma tšhireletšego e le gore ba  fepe malapa a gabo bona goba gore ba tšwele pele ka tša ditšhelete. Go e-na le moo, ba be ba fiša bontši bja tšhelete yeo ba ka bego ba e dirišeditše merero e mekaone.

Dipapatšo tšeo di bontšhago bophelo bjo bo atlegilego motseng o mogolo ga se gantši e lego tšeo di hlamilwego ke babapatši. Di ka be di e-tšwa melomong ya batho bao ba hudugetšego motseng o mogolo le bao ba lewago ke dihlong tša go boela metsaneng ya gabo bona. Ka ge ba sa nyake go bonagala ba paletšwe, ba ikgantšha ka seo se bitšwago lehumo le dilo tšeo ba di fihleletšego tšeo ba di hweditšego motseng o mogolo. Lega go le bjalo, go lebeledišiša maemo ao ba bolelago gore ba na le ona go utolla gore mokgwa wa bona wa gona bjale wa bophelo ga se kaonefatšo bophelong bja bona bja nakong e fetilego metseng e menyenyane; ba goga ka kgara ka tša ditšhelete go swana le badudi ba bangwe ba bantši ba metseng e megolo.

Ke metseng e megolo kudu moo batho bao ba sa tšwago go fihla bao ba tsomago tšhireletšego e bago bahlaselwa ba go hloka ditekanyetšo tša boitshwaro. Ka baka la’ng? Ka kakaretšo, ga se ba ba le nako ya go aga segwera sa kgaufsi gomme ba kgole kudu le ditho tša lapa. Ka gona ga ba na baeletši bao ba ka ba thušago go phema mereo e mentši ya go rata dilo tše di bonagalago ya bophelo bja mafelong a ditoropong.

Josué ga se a ka a wela moreong wa go kgoga. Go oketša moo, o ile a lemoga gore dinyakwa tša bophelo bja motseng o mogolo di be di le kgole kudu le gore a ka di fihlelela ka katlego. Tabeng ya gagwe, ka tlase ga maemo a kaone kudu, selo se tee feela seo motse o mogolo o bego o ka mo nea sona, e be e le ditoro tše kgolo tšeo di sego tša phethagatšwa. O ile a lemoga gore ga se a ba le tšhireletšego ya kgonthe motseng o mogolo; e be e tloga e se wa fao. Maikwelo a go hloka mohola, bophagamo le go palelwa di ile tša mo fenya, gomme mafelelong o ile a ikokobetša gomme a boela motsaneng wa gabo.

O be a dutše a boifa gore o tla kwerwa. Go e na le moo, lapa la gabo le bagwera ba gagwe ba kgonthe ba ile ba mo amogela gae ka matsogo a bulegilego. Ka baka la borutho bja lapa la gabo, ditikologo tšeo a di tlwaetšego tša motse le lerato la bagwera ba gagwe ka phuthegong ya Bokriste, kapejana o ile a ikwa a šireletšegile kudu go feta motseng o mogolo, moo ditoro tša ba bantši di fetogago digateledi. O ile a makatšwa ke gore ka go šoma ka thata le tatagwe ka mašemong ge e le gabotse go mo tlišeditše ditseno tše dintši go feta mašaledi a bego a tla a hwetša motseng o mogolo.

TšheleteBothata bja Kgonthe ke Eng?

Na tšhelete e tla go nea maikwelo a tšhireletšego? Liz yo a tšwago Canada o re: “Bjalo ka mofsa, ke be ke dumela gore tšhelete e tliša tokologo dipelaelong.” O ile a ratana le monna yo a bego a humile. Kapejana ba ile ba nyalana. Na o ile a ikwa a šireletšegile? Liz o tšwela pele: “Ge ke be ke nyetšwe, re ile ra ba le legae le lebotse le dikoloi tše pedi, gomme boemo bja rena bja ditšhelete bo ile bja re dumelela tokologo ya go thabela mo e ka bago selo le ge e le sefe dilong tše di bonagalago, maeto le boitapološo. Ka mo go makatšago, ke be ke sa dutše ke tshwenyega ka tšhelete.” O hlalosa lebaka: “Re be re lahlegelwa ke mo gontši. Go bonagala gore ge o dutše o hwetša dilo tše oketšegilego, o ikwa o sa šireletšega ka mo go lekanego. Tšhelete ga se ya ka ya tliša tokologo go go tshwenyega goba pelaelo.”

Ge e ba o nagana gore ga o na tšhelete e lekanego bakeng sa gore o ka šireletšega, ipotšiše, ‘Bothata bja kgonthe ke eng? Na e tloga e le go hlokega ga tšhelete e le ka kgonthe, goba ke go hlokega ga go diriša tšhelete ka bohlale?’ Ge a nagana ka bophelo bja gagwe bja nakong e fetilego, Liz o re: “Ga bjale ke lemoga gore mothopo wa mathata a lapa la gešo ge ke be ke sa le ngwana e be e le go diriša tšhelete ka mo go sa swanelago. Re be re reka ka sekoloto, gomme ka go rialo ka mehla re be re dula re na le dikoloto tšeo di re imelago. Se se ile sa tliša pelaelo.”

Lega go le bjalo, lehono Liz le monna wa gagwe ba ikwa ba šireletšegile kudu gaešita le ge ba se na tšhelete e ntši. Ge ba be ba ithuta therešo ya Lentšu la Modimo, ba ile ba tlogela go theetša  dipolelo tšeo di forago ka tšhelete gomme ba thoma go theetša bohlale bja Modimo go akaretša le mantšu a: “Xe e le eo a kwaxo nna, ó tlo dula a iketla, ó ikaxêla à sa šie kotsi.” (Diema 1:​33) Ba be ba nyaka gore bophelo bja bona bo be le morero go feta woo akhaonto e kgolo ya panka e ka o neago. Ga bjale, e le baromiwa nageng ya kgole, Liz le monna wa gagwe ba ruta bahumi le badiidi ka mo go swanago gore kgaufsinyane Jehofa Modimo o tla tliša tšhireletšego ya kgonthe lefaseng ka bophara. Modiro wo o nea kgotsofalo e tseneletšego le go tia mo go theilwego morerong o phagamego le mehola e mentši, e sego go go hwetša mehola ya ditšhelete.

Gopola therešo ye ya motheo: Go huma ka Modimo go bohlokwa kudu go feta go ba le mahumo a dilo tše di bonagalago. Ka gare ga Mangwalo a Makgethwa, go gatelelwa go ba le boemo bjo bobotse le Jehofa e sego go ba le mahumo a dilo tše di bonagalago, ao re ka a hwetšago ka go tšwela pele re dira thato ya Modimo ka tumelo. Kriste Jesu o re kgothaleditše gore re “ruele  Modimong” le go kgoboketša ‘lehumo magodimong.’—Luka 12:​21, 33.

MaemoO ya Kae?

Ge e ba o lekega go nagana gore go fihlelela maemo a godimo setšhabeng ke tsela ya go šireletšega, ipotšiše: ‘Ke mang maemong ao yoo ge e le gabotse a fihleletšego tšhireletšego ya kgonthe? Ke swanetše go namelela gakaaka’ng gore ke a fihlelele?’ Mošomo o atlegilego o ka go nea maikwelo a fošagetšego a tšhireletšego, ao a lebišago go nyameng goba go feta moo go wa mo go lego kotsi.

Diphihlelo tša kgonthe di bontšha gore leina le lebotse le Modimo le nea tšhireletšego e kgolo go feta go ba le leina le lebotse le motho. Ke Jehofa a nnoši yo a ka neago batho mpho ya bophelo bjo bo sa felego. Seo se akaretša go ngwala maina a rena, e sego pukung ya setšhaba yeo e bontšhago maina a batho, eupša pukung ya Modimo ya bophelo.—Ekisodo 32:​32; Kutollo 3:5.

Ge o beela ka thoko go nagana ka dilo tše o di kganyogago, o lebelela bjang boemo bja gago bja gona bjale, gomme ke eng seo o ka se letelago ka potego bakeng sa bokamoso? Ga go na motho yo a nago le selo se sengwe le se sengwe. Bjalo ka ge Mokriste yo mongwe yo bohlale a hlalosa, “Ke ile ka swanela ke go ithuta gore le ka mohla bophelo ga se se LE sela eupša ke se GOBA sela.” Ema ganyenyane gomme o bale lepokisi le le rego “E Laodišitšwe Benin.”

Bjale araba dipotšišo tše: Morero wa bohlokwa goba pakane bophelong bja-ka ke eng? Tsela ya go lebanya kudu ya go fihla moo ke efe? Na e ka ba e le gore ke tseleng e telele, e sa šireletšago ya go rarela le gore seo ke tlogago ke se nyaka e le ka kgonthe le seo se kgonegago e le ka kgonthe se ka hwetšwa ka tsela e sa raraganago?

Ka morago ga ge a neile keletšo ka mohola wa dilo tše di bonagalago ge o bapišwa le mohola wa dilo tša moya, Jesu o itše boloka leihlo le “lokile.” (Mateo 6:​22) O dirile gore e be mo go kwagalago gore dilo tše kgolo bophelong ke mehola ya dilo tša moya le dipakane tšeo di theilwego leineng la Modimo le Mmušong wa gagwe. (Mateo 6:​9, 10) Dilo tše dingwe ga di bohlokwa kudu goba ga se tše go ka lebišwago tlhokomelo go tšona.

Dikhamera tše dintši lehono di lebiša tlhokomelo ka go itiragalela dilong tšeo di lego kgole le kgaufsi. Na o sekametše go ba bjalo? Na mo e ka bago selo se sengwe le se sengwe seo o se lebelelago ka go lebiša tlhokomelo go sonaseo se lego bohlokwa, se se kganyogegago le ka go nagana ka tšeo o di kganyogago ke seo se fihlelegago? Ge e ba se se bjalo ka boripana, selo sa bohlokwa bakeng sa Bakriste, Mmušo, se ka lahlega gabonolo tšhitišong ya diswantšho tše dingwe, se sengwe le se sengwe se lwela tlhokomelo ya gago. Keletšo ya Jesu e matla e be e le gore: “Sa pele Le tsomê mmušô wa Modimo le tokô ya wôna; ké mo Le tl’o xo ekeletšwa ka tšeo ka moka.”—Mateo 6:33.

Tšhireletšego Gona Bjale le ka mo go sa Felego

Ka moka ga rena re ka lora ka dilo tše kaone bakeng sa rena le baratiwa ba rena. Lega go le bjalo, taba ya gore ga se ra phethagala, re phela lefaseng le sa phethagalago e bile re na le bophelo bjo bo lekanyeditšwego e re gapeletša go lekanyetša dilo tšeo re ka holofelago go di fihlelela e le ka kgonthe. Nywaga e dikete e fetilego mongwadi wa Beibele o hlalositše gore: “Ka boêla ka bôna, xe fá tlase xa letšatši thšii è se mokitimi, mofenyi è se moxale, boxôbê é se bya yo bohlale, lehumô è se la wa thlaloxanyô, xo ratwa è se xa wa tsebô. [Ka gobane nako le ditiragalo tše di sa letelwago di ba wela bohle, NW].”—Mmoledi 9:11.

Ka dinako tše dingwe re swarega kudu ka mediro ya letšatši le letšatši e tšwafišago moo re  lebalago taba e bohlokwa kudu gore re bomang le gore ge e le gabotse re nyaka eng e le gore re ikwe re šireletšegile e le ka kgonthe. Nagana ka mantšu a a bogologolo a bohlale: “Mo menônô e ataxo, xo ata le ba e jaxo; ’me beng ba yôna ba holêxa ka’ng, xe e se xo e bôna ka mahlô? Xo na le bošula byo bobe byo ke bo bonexo fá tlase xa letšatši; ké lehumô leo mong wa lôna a le beetšexo xo ithsenya ka lôna.” (Mmoledi 5:​10, 12) Ee, tšhireletšego ya gago e theilwe kae?

Ge e ba boemo bja gago bo swana ka tsela e itšego le bja toro e sa kago ya phethagatšwa ya Josué, na o ka fetoša dithulaganyo tša gago? Bao ba go ratago e le ka kgonthe ba tla go thekga, bjalo ka ge lapa la gabo Josué le bagwera ka phuthegong ya Bokriste ba ile ba mo thekga. O ka hwetša tšhireletšego e kgolo tikologong e lego maemong a tlase e nago le bao ba go ratago go feta motseng o mogolo wo o nago le bao ba ka ratago go go diriša ka mo go sa swanelago.

Ge e ba o šetše o na le mo gontši, bjalo ka Liz le monna wa gagwe, na o ka dumelelanya mokgwa wa gago wa bophelo go lebiša nako e oketšegilego le matla go thušeng batho, e ka ba bahumi goba badiidi, goba go ithuta ka Mmušo, e lego selo seo re ka hwetšago tšhireletšego ya kgonthe ka sona?

Ge e ba o be o dutše o katanela go fihlelela maemo a godimo setšhabeng goba mošomong, o ka nyaka go lebiša tlhokomelo ka potego go seo se go tutuetšago. Ka mo go kgonthišeditšwego, dilo tše dingwe tšeo o di thabelago di ka tlaleletša lethabong la bophelo bja gago. Lega go le bjalo, na o kgona go boloka Mmušoselo seo ka sona o ka hwetšago tšhireletšego ya ka mo go sa felegoo lebišitše tlhokomelo go ona? Gopola mantšu a Jesu: “Lethabo la go nea le feta la go newa.” (Ditiro 20:​35, NW) Ge e ba o tšea karolo medirong e fapa-fapanego ka phuthegong ya Bokriste, o tla hwetša tšhireletšego e putsago.

Bao ba botago Jehofa le Mmušo wa gagwe ka mo go feletšego ba atlega tšhireletšegong e thabišago gona bjale gomme ba lebeletše pele tšhireletšegong e feletšego nakong e tlago. Mopsalme o itše: “Ke dula kè itebanya le Morêna, ó hleng xa-ka, nka se kê ka šutha. Pelo ya-ka e thabêla tšôna, le môya wa-ka o hlaletše, ’me mmele wa-ka o rôbala ò iketlile.”—Psalme 16:​8, 9.

[Lepokisi/Seswantšho go letlakala 6]

E Laodišitšwe Benin

Kanegelo ye e laodišitšwe ka makga a dikete ka mekgwa e mentši e fapa-fapanego. Morago bjale, modudi yo mongwe yo a godilego wa motseng wa kua Benin, Afrika Bodikela, o ile a laodišetša bana taba e latelago.

Morei wa dihlapi o boa gae ka seketswana sa gagwe gomme o gahlanetšwa ke setsebi sa motho o šele seo se hlankelago nageng ye e hlabologago. Setsebi se botšiša morei wa dihlapi lebaka leo ka lona a boilego kapejana gakaakaa. O araba ka gore a ka be a ile a dula lebaka le le teletšana eupša o reile dihlapi tše lekanego go ka fepa lapa la gagwe.

Setsebi se botšiša gore: “Bjale, go ba gona o dira’ng ka nako ya gago ka moka?”

Morei wa dihlapi o araba ka gore: “Go ba gona, ke rea dihlapi ka nako e nyenyane. Ke bapala le bana ba-ka. Ka moka ga rena re na le nako ya go khutša thapama ge go fiša. Mantšibua, re ja dijo tša go lalela gotee. Ka morago, ke kgobokana le bagwera ba-ka bakeng sa go theetša mmino le tše dingwe.”

Setsebi se mo tsena ganong ka gore: “Bona, ke na le degree ya yunibesithi gomme ke ithutile ditaba tše. Ke nyaka go go thuša. O swanetše go rea dihlapi lebaka le le teletšana. O tla hwetša tšhelete e oketšegilego gomme kgaufsinyane o tla kgona go reka sekepe se segolwanyane go feta seketswana se. Ka sekepe se segolwanyane, o tla hwetša tšhelete e oketšegilego gomme kgaufsinyane wa kgona go aga sehlopha sa dikepe tšeo di gogago malokwa.”

Morei wa dihlapi a botšiša gore: “Ka morago ga moo?

“Ke moka, go e na le go rekiša dihlapi ka mmaditsela, o ka boledišana ka go lebanya le feketori goba gaešita le go thoma lefelo la gago la go rekiša dihlapi. O tla kgona go tloga motsaneng wa geno gomme o hudugele Cotonou goba Paris goba New York gomme o sepediše kgwebo ka moka o le fao. O ka ba wa nagana le go bea kgwebo ya gago mo go ananywago ditšhelete gomme o be mohumi.”

Morei wa dihlapi o ile a botšiša gore: “Seo se tla tšea nako e kae?”

Setsebi se araba ka gore: “Mohlomongwe nywaga e 15 go ya go e 20.”

Morei wa dihlapi o tšwela pele: “Ka morago ga moo?”

Setsebi se hlalosa gore: “Ke moo bophelo bo kgahlišago gona. Ke moka o ka tlogela go šoma. O ka tloga lefelong leo le dulago le swaregile la toropong gomme o boele motsaneng o lego lekatana.”

Morei wa dihlapi o ile a botšiša gore: “Mafelelo e tla ba afe?”

“Ke moka o tla ba le nako ya go rea dihlapi ka lebakanyana fela, o bapale le bana ba gago, o be le nako ya go khutša thapama ge go fiša, o je dijo tša go lalela le lapa gomme o kgobokane le bagwera bakeng sa go theeletša mmino.”

[Diswantšho go letlakala 7]

Na go hlatlošwa go tliša tšhireletšego?

[Diswantšho go letlakala 8]

Bakriste-gotee le wena ba tloga ba na le kgahlego kudu ka tšhireletšego ya gago