Dipotšišo tše Tšwago go Babadi

Ge Johane a be a bona “lešaba le lexolo” le neelana ka tirelo e kgethwa ka tempeleng ya Jehofa, le be le neelana ka yona le le ka karolong efe ya tempele?—Kutollo 7:​9-15.

Ke mo go kwagalago go bolela gore lešaba le legolo le rapela Jehofa go le lengwe la malapa a lefaseng a tempele ya gagwe e kgolo ya moya, kudu-kudu leo le swanago le lapa la ka ntle la tempele ya Salomo.

Nakong e fetilego, go boletšwe gore lešaba le legolo le boemong bjo bo lekanago bja moya, goba bja seswantšhetšo, le Lapa la ba-Ntle leo le bego le le gona mehleng ya Jesu. Lega go le bjalo, nyakišišo e oketšegilego e utollotše bonyenyane mabaka a mahlano a gore ke ka baka la’ng seo se se bjalo. La pele, ga se dibopego ka moka tša tempele ya Heroda tšeo di nago le tshwantšhetšo tempeleng e kgolo ya Jehofa ya moya. Ka mohlala, tempele ya Heroda e be e na le Lapa la Basadi le Lapa la Isiraele. Banna le basadi ba be ba ka tsena ka Lapeng la Basadi, eupša ke banna fela bao ba bego ba dumeletšwe go tsena ka Lapeng la Isiraele. Lapeng la lefaseng la tempele e kgolo ya Jehofa ya moya, banna le basadi ga ba aroganywe borapeding bja bona. (Ba-Galatia 3:​28, 29) Ka gona, ga go na seo se swanago le Lapa la Basadi le Lapa la Isiraele tempeleng ya moya.

La bobedi, go be go se na Lapa la ba-Ntle dithulaganyong tša moago tšeo di bego di neilwe ke Modimo bakeng sa tempele ya Salomo goba tempele ya ponong ya Hesekiele; goba le go tempele yeo e ilego ya tsošološwa ke Serubabele. Ka gona, ga go na lebaka la go phetha ka gore Lapa la ba-Ntle le swanetše go ba le go swana ga moya thulaganyong ya tempele e kgolo ya Jehofa ya moya, kudu-kudu ge re tlo ahla-ahla lebaka la boraro.

La boraro, Lapa la ba-Ntle le agilwe ke Kgoši Heroda wa mo-Edomo bakeng sa go itumiša le go nyaka go amogelwa ke Roma. Heroda o thomile go mpshafatša tempele ya Serubabele mohlomongwe ka 18 goba 17 B.C.E. The Anchor Bible Dictionary e a hlalosa: “Dikganyogo tša bogologolo tša matla a bogoši a ka Bodikela [Roma] . . . di be di nyaka tempele e bego e le e kgolo go feta tšeo di bego di bapetšwa le yona tša ditoropong tša ka bohlabela.” Lega go le bjalo, meelo ya tempele ka boyona e be e šetše e hlomilwe. Pukuntšu e hlalosa gore: “Ka ge tempele ka boyona e be e swanetše go ba le meelo ya go swana le ya tšeo di bilego gona pele ga yona [ya Salomo le ya Serubabele], kgonagalo ya bogolo bja Tempele ya Thabeng bo be bo sa lekanetšwa.” Ka gona, Heroda o ile a katološa karolo ya tempele ka go oketša ka seo mehleng ya lehono se bitšwago Lapa la ba-Ntle. Moago o nago le setlogo se bjalo o ka swantšhetša bjang thulaganyo ya tempele ya Jehofa ya moya?

La bone, mo e ka bago motho yo mongwe le yo mongwedifofu, digole le ba-Ntle bao ba sa bollagoba ka tsena Lapeng la ba-Ntle. (Mateo 21:​14, 15) Ka kgonthe, lapa le bile le morero bakeng sa ba-Ntle ba bantši ba sa bollago ba bego ba nyaka go direla Modimo dihlabelo. Gomme ke gona moo mo Jesu ka dinako tše dingwe a boletšego le mašaba gomme a raka baananyi ba tšhelete le barekiši ka makga a mabedi, a bolela gore ba nyaditše ntlo ya Tatagwe. (Mateo 21:​12, 13; Johane 2:​14-16) Go sa dutše go le bjalo, The Jewish Encyclopedia e re: “Lapa le la ka ntle ge re bolela ka go lebanya, e be e se karolo ya Tempele. Mobu wa lona o be o sa kgethega, gomme le be le ka tsenwa ke yo mongwe le yo mongwe.”

La bohlano, lentšu la Segerika (hi·e·ron’) leo le fetoletšwego e le “tempele” leo le dirišitšwego le lebišitšwe go Lapa la ba-Ntle, puku ya A Handbook  on the Gospel of Matthew, ka Barclay M. Newman le Philip C. Stine e re “le bolela ka moago ka moka ga ona, go e na le moago wa Tempele ka boyona ka go lebanya.” Ka mo go fapanego, lentšu la Segerika (na·os’) leo le fetoletšwego e le “tempele” ponong ya Johane ke leo le lebanyago kudu. Tabeng ya tempele ya Jerusalema, gantši le šupa go Sekgethwa-kgethwa, goba moago wa tempele goba tikologo ya tempele. Ka dinako tše dingwe le fetolelwa e le “Ngwakong wa Modimo.”—Mateo 27:​5, 51; Luka 1:​9, 21; Johane 2:20.Ba lešaba le legolo ba bontšha tumelo sehlabelong sa Jesu sa topollo. Ba hlwekile moyeng, ka ge “ba hlatswitše mašela a bôná ba a taxafatša mading a Kwana.” Ka gona, ba bolelwa e le baloki ka tlhologelo ya go ba bagwera ba Modimo le go phologa masetlapelo a magolo. (Jakobo 2:​23, 25) Ka ditsela tše dintši, ba swana le basokologi ba Isiraele bao ba ilego ba kwa Molao wa kgwerano gomme ba rapela gotee le ba-Isiraele.Go ba gona, basokologi bao ga se ba ka ba hlankela ka lapeng la ka gare, moo baperisita ba bego ba dira mediro ya bona. Gomme ba lešaba le legolo ga ba ka gare ga lapa la tempele e kgolo ya Jehofa ya moya, e lego lapa leo le emelago boemo bja barwa ba batho ba ba lokilego, bao ba phethagetšego ba ditho tša “boperisita byo bokxêthwa” bja Jehofa ge ba sa le mo lefaseng. (1 Petro 2:5) Eupša, bjalo ka ge mogolo wa legodimong a boditše Johane, lešaba le legolo ruri le ka tempeleng, e sego ka ntle ga tempele ka boyona lefelong leo le tsebjago e le Lapa la ba-Ntle la moya. A boemo bja moya bjo bo hlwekilego, bja go loka bjo bo ilego bja swantšhwa e sa le pele ke lapa la ka ntle la tempele ya Salomo! Yeo ke tokelo e kgolo gakaakang! Le kamoo e bontšhago go nyakega mo go kaakang ga gore yo mongwe le yo mongwe a boloke bohlweki bja moya le bja boitshwaro ka dinako tšohle!

[Seswantšho go letlakala 31]

(Bakeng sa mongwalo o beakantšwego ka mokgwa wa kgatišo, bona kgatišo ka boyona)

Tempele ya Salomo

1. Moago wa Tempele

2. Lapa la ka Gare

3. Lapa la ka Ntle

4. Manamelo a go ya Lapeng la Tempele