Phihlelo

Go Bjala Lerato la go Rata Jehofa ka Dipelong tša Bana ba Rena

KA GE GO ANEGA WERNER MATZEN

Nywageng e sego kae e fetilego morwa wa-ka wa pele, Hans Werner, o ile a mpha Beibele. O ile a ngwala ka gare ga letlakala la ka ntle gore: “Tate yo a rategago, Eka Lentšu la Jehofa le ka tšwela pele le re hlahla re le lapa tseleng ya bophelo. Ka tebogo, morwa wa gago wa pele.” Batswadi ba tla kwešiša tsela yeo mantšu ao a ilego a tlatša pelo ya-ka ka tebogo le lethabo. Ke be ke sa tsebe ka nako yeo gore ke ditlhohlo tša mohuta ofe tšeo rena re le lapa re bego re sa dutše re swanetše ke go lebeletšana le tšona.

KE BELEGWE ka 1924 kua Halstenbek, dikhilomithara tše ka bago 20 go tloga boema-kepeng bja Jeremane bja Hamburg, gomme ke ile ka godišwa ke mma le rakgolo. Ka ge ke ile ka šomela molokiši ke le modiri wa didirišwa, ka 1942 ke ile ka ngwadišetšwa go Wehrmacht, e lego madira a tša bohlabani. Seo ke ilego ka lebeletšana le sona nakong ya Ntwa ya II ya Lefase mollwaneng wa ntwa wa Russia ga se hlalosege. Ke ile ka swarwa ke bolwetši bja teng-kgolo eupša ka romelwa morago mollwaneng ka morago ga kalafo. Ka January 1945, ke be ke le kua Lodz, Poland, moo ke ilego ka gobala kudu gomme ka bewa sepetleleng sa bahlabani. Ke be ke sa dutše ke le moo ge ntwa e fela. Ke ile ka ba le nako ya go naganišiša ge ke be ke le sepetlele gomme ka morago ke le kampeng ya kgolego kua Neuengamme. Dipotšišo tše di be di ntlhora boroko, Na Modimo o gona e le ka kgonthe? Ge e ba go le bjalo, ke ka baka la’ng a dumelela bošoro bjo bo kaakaa?

Kapejana ka morago ga go lokollwa kampeng ya kgolego, ka September 1947, ke ile ka nyala Karla. Re goletše toropong e tee, eupša le ge Karla e be e le Mokatholika, bodumedi ga se bja ka bja  kgatha tema le ge e le efe go godišweng ga-ka. Moperisita yo a re nyadišitšego o ile a šišinya gore bonyenyane re rapele Thapelo ya Morena re le gotee bošegong bjo bongwe le bjo bongwe. Re ile ra dira bjalo ka ge a boletše, le ge re be re sa tsebe e le ka kgonthe gore re rapelela eng.

Ngwaga ka morago Hans Werner o ile a belegwa. Mo e nyakilego go ba ka nako yeo, Wilhelm Ahrens, mošomi-gotee le nna mošomong, o ile a ntsebiša Dihlatse tša Jehofa. O ile a mpontšha go tšwa Beibeleng gore dintwa ka letšatši le lengwe di tla fedišwa. (Psalme 46:9) Ka lehlabula la 1950, ke ile ka neela bophelo bja-ka go Jehofa gomme ke ile ka kolobetšwa. Ke ile ka thaba gakaakang ge ngwaga ka morago mosadi wa-ka yo a rategago le yena a kolobetšwa!

Go Godiša Bana Ditseleng tša Jehofa

Ke ile ka bala ka Beibeleng gore lenyalo le thomilwe ke Jehofa. (Genesi 1:​26-28; 2:​22-24) Go ba gona nakong ya go belegwa ga bana ba renaHans Werner, Karl-Heinz, Michael, Gabriele le Thomasgo ile gwa tiiša boitlamo bja-ka bja go ba monna yo a lokilego le tate. Nna le Karla re be re thabile nakong ya go belegwa ga yo mongwe le yo mongwe wa bana ba rena.

Kopano ya Dihlatse tša Jehofa ya 1953 kua Nuremberg e be e le tiragalo e bohlokwa bakeng sa lapa la rena. Thapameng ya Labohlano, nakong ya polelo ye e rego “Go Godiša Bana Lekokong la Lefase le Lefsa,” seboledi se ile sa bolela selo se sengwe seo re ilego ra se ke ra se lebala le ka mohla: “Lefa le legolo kudu leo re ka le neago bana ba rena ke kganyogo ya go ba bahlanka ba Modimo.” Ka thušo ya Jehofa, nna le Karla re be re nyaka go dira sona seo. Eupša bjang?

Sa pele, re ile ra dira gore e be tlwaelo go rapela gotee re le lapa letšatši le lengwe le le lengwe. Se se ile sa gatelela bohlokwa bja thapelo baneng. Ngwana yo mongwe le yo mongwe o ile a ithuta go tloga bjaneng gore ka dinako tšohle re rapela pele re e-ja. Gaešita le ge e be e le masea, ka pela-pela ge ba bona lepotlelo la bona, ba be ba inamiša dihlogo ba phutha le matsogo a bona a manyenyane. Tiragalong e nngwe, re be re laleditšwe lenyalong la yo mongwe wa ba leloko la gabo mosadi wa-ka, bao e bego e se Dihlatse. Ka morago ga moletlo, batswadi ba monyadi ba ile ba laletša baeti go ya ka gae bakeng sa dilapološi tše bofefo. Batho bohle ba be ba nyaka go thoma go ja ka pela-pela. Eupša ngwana wa rena wa nywaga e mehlano Karl-Heinz o ile a bona se e se seo se swanetšego. O itše: “Ke kgopela gore re rapele pele.” Baeti ba ile ba mo lebelela, gomme ka morago ba re lebelela gomme mafelelong ba lebelela mong-gae. Bakeng sa go efoga go lewa ke dihlong le ge e le gofe, ke ile ka ithapela go rapela bakeng sa go leboga dijo, e lego seo mong-gae a ilego a dumelelana le sona.

Tiragalo ye e ile ya nkgopotša mantšu a Jesu: “O itheetše thêtô ka melomo ya bana ba masea.” (Mateo 21:​16) Re ikwa re kgodišegile gore dithapelo  tša rena tša ka mehla le tšeo di tšwago pelong di thušitše bana gore ba lebelele Jehofa e le Tatago bona yo lerato wa legodimong.

Boikarabelo bja Rena go Jehofa

Go ruta bana go rata Modimo gape go nyaka gore o bale ka mehla le go ithuta Lentšu la gagwe. Re naganne se, re be re e-ba le thuto ya lapa bekeng e nngwe le e nngwe, gantši bošegong bja Mošupologo. Bjale ka ge ngwana yo mogolo le yo monyenyane ba tlogelana ka nywaga e senyane, ba be ba na le dinyakwa tšeo di fapanego kudu, ka gona ga se ka mehla moo re bego re kgona go akaretša taba e swanago le bona ka moka.

Ka mohlala, bakeng sa bana bao ba lego nywageng ya go tsena sekolo sa bo-mapimpana, re ile ra boloka dithuto e le tše bonolo. Karla o be a bala temana e tee feela ya Beibele le bona goba o be a šomiša diswantšho tšeo di lego ka gare ga dikgatišo tšeo di theilwego Beibeleng. Ke sa dutše ke na le dikgopolo tšeo di rategago tša go tsošwa e sa le mesong ke bana ba banyenyane ba namela malaong a rena bakeng sa go re bontšha diswantšho tša bona tšeo ba di ratago kudu ka pukung ya The New World. *

Karla o ile a hlagolela bokgoni bja go ruta bana ka go se fele pelo mabaka a mantši ao ka ona ka moka ga rena re swanetšego go rata Jehofa. Se se ka kwagala e le se bonolo gotee le seo se lebanyago, eupša, ge e le gabotse mmeleng le maikwelong e be e nyakile go ba mošomo wa-ka le Karla wa nako e tletšego. Lega go le bjalo, ga se ra ka ra langwa. Re be re nyaka go nweletša ka dipelong tša bona tše bonolo lerato la go rata Jehofa pele batho ba bangwe bao ba sa tsebego Jehofa ba ka thoma go ba tutuetša. Ka lebaka le re ile ra phegelela gore bana ba rena ba be gona bakeng sa thuto ya lapa kapejana ge ba šetše ba kgona go dula.

Bjalo ka batswadi, nna le Karla re ile ra lemoga bohlokwa bja go beela bana ba rena mohlala o mobotse tabeng ya borapedi. Go sa šetšwe gore re be re e-ja, re hlokomela serapana goba re sepe-sepela, re ile ra leka go tiiša tswalano ya ngwana yo mongwe le yo mongwe le Jehofa. (Doiteronomio 6:​6, 7) Re ile ra kgonthišetša gore ngwana yo mongwe le yo mongwe o na le Beibele ya gagwe go tloga bjaneng. Go oketša moo, ge re se na go amogela dimakasine, ke be ke ngwala leina la yo mongwe le yo mongwe koping ya gagwe ya motho ka noši. Ka gona bana ba ile ba ithuta go tseba dipuku tša bona. Re ile ra tla le kgopolo ya go abela bana dihlogo tše itšego tša Phafoga! gore ba di bale. Ka morago ga dijo tša rena tša mosegare ka Sontaga, ba be ba re hlalosetša kamoo ba kwešišitšego taba.

Go Nea Bana Tlhokomelo Yeo ba e Nyakago

Ke therešo gore e be e se ka dinako tšohle moo dilo di bego di sepela gabotse. Ge bana ba gola, re ile ra utolla gore go bjala lerato dipelong tša bona go be go re nyaka gore re tsebe seo se bego se šetše se le ka dipelong tša bona. Seo se be se bolela go ba theetša. Bana ba rena ka dinako tše dingwe ba be ba ikwa gore ba na le seo ba nyakago go belaela ka sona, ka gona nna le Karla re be re tla dula fase gomme re boledišane ka taba yeo le bona. Re ile ra tsenya seripa sa iri seo se kgethegilego mafelelong a thuto ya lapa. Bohle ba be ba dumeletšwe go bolela ka go lokologa selo le ge e le sefe seo ba bego ba se nagana.

Ka mohlala, Thomas le Gabriele, bana ba rena ba babedi ba banyenyane, ba be ba nagana gore rena batswadi re be re rata ngwanabo bona yo mogolo kudu. Thutong e nngwe, ba ile ba bolela ka bolokologi gomme ba re: “Tate, re nagana gore wena le mma ka dinako tšohle le dumelela Hans Werner a dira seo a se ratago.” Mathomong, ga se nka ka kgolwa seo ditsebe tša-ka di se kwago. Lega go le bjalo, ka morago ga go naganišiša ka taba ka ntle le go tšea lehlakore, nna le Karla re ile ra swanelwa ke go dumela gore bana ba be ba rerešitše. Ka gona re ile ra dira maiteko ao a oketšegilego bakeng sa go swara bana ka moka ka tsela yeo e swanago.

Ka dinako tše dingwe, ke ile ka otla bana ka go akgofa goba ka mo go sa swanelago. Ditiragalong tše di bjalo rena bjalo ka batswadi re ile ra swanelwa ke go ithuta go kgopela tshwarelo. Ka morago ga moo, re be re batamela Jehofa ka thapelo. E be e le ga bohlokwa gore bana ba lemoge gore tatago bona o be a ikemišeditše go kgopela tshwarelo go Jehofa gotee le go kgopela tshwarelo go bona, bana ba rena. Ka baka la se, re ile ra ba le tswalano e borutho le ya bogwera le bona.  Gantši ba be ba re go rena, “Le bagwera ba rena ba potego.” Se se ile sa re thabiša kudu.

Go šoma gotee re le lapa go tliša botee. Go fihla bokgoleng bjo, yo mongwe le yo mongwe o be a na le mešomo ya gagwe ya ka mehla. Hans Werner o be a abetšwe go ya mabenkeleng le go reka dijo gatee ka beke, seo ka tlwaelo se bego se bolela gore o be a newa tšhelete gotee le lelokelelo la dilo tšeo a swanetšego go di reka. Bekeng e nngwe, ga se ra mo nea lelokelelo la dilo tšeo a swanetšego go di reka goba tšhelete. O ile a botšiša mmagwe ka taba ye, gomme o ile a mmotša gore re be re se ra hlwa re e ba le tšhelete. Ka gona, bana ba ile ba thoma go sebelana, ke moka yo mongwe le yo mongwe o ile a tšea sekhwama sa gagwe sa tšhelete gomme a se tšhollela godimo ga tafola. Ka moka ba ile ba re: “Mma, re ka ya go reka gona bjale!” Ee, bana ba ile ba ithuta go thuša nakong ya tšhoganetšo gomme seo se ile sa dira gore lapa le batamelane kgaufsi kudu.

Ge ba dutše ba gola, bašemane ba ile ba thoma go ba le kganyogo banenyaneng. Ka mohlala, Thomas o ile a gapa maikwelo ke ngwanenyana wa nywaga e 16 yo e lego Hlatse-gotee le yena. Ke ile ka mo hlalosetša gore ge e ba a be a ikemišeditše ka ngwanenyana yo, o be a swanetše go itokišetša go mo nyala gotee le go rwala boikarabelo bakeng sa mosadi le bana. Thomas o ile a lemoga gore o be a se a lokela lenyalo, ka ge a be a na le nywaga e 18 feela.

Go Dira Tšwelopele re le Lapa

Ge e be e sa le ba banyenyane kudu, bana ba ile ba latelana go ingwadišeng Sekolong sa Bodiredi sa Pušo ya Modimo. Re ile ra theetša ka šedi dikabelo tša bona gomme re ile ra kgothatšega ka gobane re ile ra bona lerato leo le tšwago pelong la bana la go rata Modimo. Balebeledi ba tikologo le ba selete bao ka dinako tše dingwe ba bego ba dula le rena ba ile ba anega diphihlelo tša bona ka noši goba go re balela go tšwa Beibeleng. Banna ba gotee le basadi ba bona ba ile ba thuša go hlagolela lerato la tirelo ya nako e tletšego ka dipelong tša lapa la rena.

Re be re lebelela pele dikopanong. E be e le senotlelo se segolo maitekong a rena a go bjala ka baneng ba rena kganyogo ya go ba bahlanka ba Modimo. Bakeng sa bana, e be e le motsotso wo o kgethegilego ge ba hloma dipetšhe tša bona pele re sepela go ya mabaleng a kopano. Re ile ra kgongwa maikwelong ge Hans Werner a be a kolobetšwa a na le nywaga e lesome. Ba bantšinyana ba be ba nagana gore ke yo monyenyane kudu go ka ineela go Jehofa, eupša ge a na le nywaga e 50, o ile a mpotša kamoo a lebogago ka gona gore o be a dutše a hlankela Jehofa ka nywaga e 40.

Re ile ra bontšha bana ba rena gore tswalano ya motho ka noši le Jehofa ke ya bohlokwa, eupša ga se ra ka ra ba gapeletša go ineela. Lega go le bjalo, re be re thabile ge ba bangwe le bona ba ile ba dira tšwelopele go fihla ba kolobetšwa ka nako ya bona yeo e swanetšego.

Go Ithuta go Lahlela Merwalo ya Rena go Jehofa

Re be re thabile kudu ge ka 1971, Hans Werner a be a aloga e le setho sa sehlopha sa bo-51 sa Sekolo sa Beibele sa Watchtower sa Gilead gomme o ile a abelwa go hlankela e le moromiwa kua Sepania. Ka o tee ka o tee, bana ba bangwe le bona ba ile ba diriša nako e itšego e le badiredi  ba nako e tletšego, e lego seo se ilego sa re thabiša kudu bjalo ka batswadi. Mo e ka bago ka nako ye, Hans Werner o ile a mpha Beibele yeo go boletšwego ka yona mathomong a sehlogo se. Lethabo la rena re le lapa le ile la bonagala le feletše.

Ka gona re ile ra lemoga gore re be re swanetše go itshwarelela kgaufsi-ufsi le Jehofa go feta pele. Ka baka la’ng? Ka gobane re bone ba bangwe ba bana ba rena bao ba gotšego ba gahlana le mathata ao a bego a leka tumelo ya bona e le ka kgonthe. Ka mohlala, morwedi wa rena yo a rategago Gabriele le yena o ile a lebeletšana le mathata. Ka 1976 o ile a nyalana le Lothar. O ile a babja kapejana ka morago ga lenyalo. Ge a dutše a tšwela pele a fela matla, Gabriele o ile a mo hlokomela go ba go fihlela a e-hwa. Go bona setho sa lapa seo se phetšego gabotse se thoma go babja le go hwa go ile gwa re gopotša ka tsela yeo re nyakago seatla se lerato sa Jehofa.—Jesaya 33:2.

Ditokelo ka Mokgatlong wa Jehofa

Ge ke be ke kgethwa go ba mohlanka wa phuthego (yoo lehono a bitšwago molebeledi yo a okamelago) ka 1955, ke be ke sa ikwe ke swanelega bakeng sa boikarabelo bjoo. Go be go na le dilo tše dintši tšeo ke bego ke swanetše go di dira, gomme tsela e nnoši ya go phethagatša boikarabelo bja phuthego e be e le go tsoga ka iri ya bone mesong e itšego. Mosadi wa-ka le bana e be e le thekgo e kgolo, ba kgonthišetša gore ga ke šitišwe mantšiboa ge e ba go be go sa dutše go e-na le dilo tšeo ke bego ke swanetše go di dira.

Lega go le bjalo, re le lapa, re ile ra diriša nako e ntši ya boikhutšo re le gotee ka mo go kgonegago. Ka dinako tše dingwe mothwadi wa-ka o be a ntumelela gore ke diriše koloi ya gagwe gore ke kgone go ntšha lapa bakeng sa letšatši. Bana ba ile ba thabela dinako tša ge re be re ithuta Morokami sethokgweng. Re ile ra ya go sepela gotee, ka dinako tše dingwe re opela dikopelo ka go hlabelelwa ke harmonica ya-ka ge re dutše re sepela ka sethokgweng.

Ka 1978, ke ile ka kgethwa go ba moemedi wa molebeledi wa tikologo (modiredi wa mosepedi). Ke maketše, ke ile ka rapela: “Jehofa, ga ke nagane gore nka kgona go dira se. Eupša ge e ba o nyaka gore ke leke, gona ke tla dira sohle seo nka se kgonago.” Nywaga e mebedi ka morago, ge ke na le nywaga e 54, ke ile ka fetišetša kgwebo ya-ka e nyenyane go morwa wa rena yo monyenyane, Thomas.

Bana ba rena ka moka ba be ba gotše, seo se ilego sa nea nna le Karla sebaka sa go direla Jehofa ka mo go oketšegilego. Ngwageng wona woo, ke ile ka kgethwa go ba molebeledi wa tikologo gomme ka abelwa karolong ya Hamburg gotee le Schleswig-Holstein ka moka ga yona. Ka baka la phihlelo ya rena ya go godiša lapa, re ile ra kgona go bontšha kwešišo yeo e kgethegilego go batswadi le baneng ba bona. Bana babo rena ba bantši ba ile ba re bitša batswadi ba bona ba tikologo.Ka morago ga nywaga e lesome ya go sepela le nna modirong wa tikologo, Karla o ile a swanelwa ke go buiwa. Ngwageng wona woo, dingaka di ile tša utolla gore ke be ke e-na le serurugi sa bjoko. Ka gona, ke ile ka tlogela tirelo ya-ka ya go ba molebeledi wa tikologo gomme ka ya go buiwa bjoko. Go tšere nywaga e meraro pele nka kgona go šoma ke le moemedi wa molebeledi wa tikologo gape. Nna le Karla ga bjale re nywageng ya rena ya bo-70, gomme ga re sa le mošomong wa bosepedi. Jehofa o re thušitše go bona gore go be go se na morero go itshwarelela ka tokelo yeo ke bego ke se sa kgona go e phetha.

Ge re lebelela morago, nna le Karla re leboga Jehofa bakeng sa thušo ya gagwe go bjaleng lerato la go rata therešo ka dipelong tša bana ba rena. (Diema 22:6) Nywageng ka moka, Jehofa o ile a re hlahla le go re ruta, gomme a re thuša go phetha boikarabelo bja rena. Le ge re ka ba re tšofetše le go fokola, lerato la rena la go rata Jehofa ke le lefsa le leo le phelago go feta le ge e le neng.—Ba-Roma 12:​10, 11.

[Mengwalo ya ka tlase]

[Seswantšho go letlakala 26]

Lapa la rena, re sepela go bapa le Noka ya Elbe, Hamburg, ka 1965

[Seswantšho go letlakala 28]

Ditho tše dingwe tša lapa kopanong ya ditšhaba-tšhaba kua Berlin ka 1998

[Seswantšho go letlakala 29]

Ke e-na le mosadi wa-ka, Karla