Go Dumelelana le Dinyakwa tša Modimo go Godiša Jehofa

‘Ke tla mo godiša ka go Mo leboga.’—PSALME 69:30.

1. (a) Ke ka baka la’ng Jehofa a swanelwa ke go godišwa? (b) Re mo godiša bjang ka ditebogo?

JEHOFA ke Modimo ra-matla-ohle, Mmuši wa Legohle, Mmopi. Ka go rialo, leina la gagwe le merero ya gagwe di swanelwa ke go godišwa. Go godiša Jehofa go bolela go mo swara ka tlhompho ya godimo kudu, go mo reta le go mo phagamiša ka mantšu le ditiro. Go dira bjalo “ka xo Mo leboxa” go nyaka gore ka mehla re dule re leboga seo a re direlago sona gona bjale le seo a tlago go re direla sona nakong e tlago. Boemo bja kgopolo bjo re swanetšego go ba le bjona bo bontšhitšwe go Kutollo 4:​11, moo dibopiwa tše di botegago tša moya legodimong di tsebatšago gore: “E a swanetšwexo ke letaxô le thêtô le matla ke Wene Morêna Modimo wa rena, xobane ke Wene O hlodilexo dilô tšé; xe di tšwêlêla di hlolexile, ké ka xobane O ratile fao.” Re godiša Jehofa bjang? Ka go ithuta ka yena gomme ra dira seo a se nyakago go rena. Re swanetše go ikwa kamoo mopsalme a ilego a ikwa ka gona ge a be a re: “Nthutê xo dira se se Xo kxahlaxo, xobane O Modimo wa-ka.”—Psalme 143:10.

2. Jehofa o dirišana bjang le bao ba mo godišago le bao ba sa mo godišego?

² Jehofa o tšeela godimo bao ba mo godišago. Ke ka baka leo ‘a putsago bao ba mo nyakago.’ (Ba-Hebere 11:6) Moputso ke eng? Jesu ge a be a rapela Tatagwe wa legodimong o itše: “Bophelô byo bo sa felexo ké xe ba Xo tseba, Wene Modimo-dimo Ò le nnoši. Ba tsebê le Moromiwa wa xaxo Jesu Kriste.” (Johane 17:3) Ee, bao ba ‘godišago Jehofa ka go mo leboga’ e tla ba “beng ba naxa, ba dula mo xo yôna ka mehla le ka mehla.” (Psalme 37:​29) Ka lehlakoreng le lengwe, “ka mosô e mobe a ka se tšwe le selô.” (Diema 24:​20) Gomme mehleng ye ya bofelo, go nyakega ga go godiša Jehofa go akgofile ka gobane kgaufsinyane o tla fediša bakgopo gomme a boloke baloki. “Xomme lefase le a feta, le yôna kxanyoxô ya lôna. E a tl’o xo dula à le xôna xo ya xo ile, ké eo a diraxo tše Modimo a di rataxo.”—1 Johane 2:​17; Diema 2:​21, 22.

3. Ke ka baka la’ng re swanetše go ela hloko puku ya Maleaki?

³ Thato ya Jehofa e hwetšwa ka Beibeleng, ka gobane “Mangwalô ka moka ké ma-hebetšwa-ke-Modimo.” (2 Timotheo 3:​16) Lentšu leo la Modimo le na le dipego tše dintši tša kamoo Jehofa a šegofatšago bao ba mo godišago le seo se diragalelago bao ba sa mo godišego. E nngwe ya dipego tšeo di mabapi le seo se diragetšego kua Isiraele nakong ya moporofeta Maleaki. Mo e ka bago ka ngwaga wa 443 B.C.E., nakong ya pušo ya Nehemia wa Juda, Maleaki o ile a ngwala puku ye e bitšwago ka leina la gagwe. Puku ye e matla le e kgahlišago e na le tsebišo le diporofeto tšeo “di ngwadilwe[go] xore e bê xo eletša rena ba re fihletšwexo  ke bofêlô bya mabaka.” (1 Ba-Korinthe 10:​11) Go ela hloko mantšu a Maleaki go ka re thuša go re lokišeletša “ ’tšatši leo le lexolo le le šiišaxo la Morêna,” ge A fediša tshepedišo ye e kgopo.Maleaki 4:5.

4. Re hlokomedišwa dintlha dife tše tshela go Maleaki kgaolo 1?

⁴ Puku ya Maleaki yeo e ngwadilwego nywaga e fetago 2 400 e fetilego, e re thuša bjang lekgolong le la nywaga la bo-21 bakeng sa go lokišeletša letšatši leo le legolo leo le boifišago la Jehofa? Kgaolo ya mathomo e lebiša tlhokomelo go bonyenyane dintlha tše tshela tše bohlokwa bakeng sa go godiša ga rena Jehofa ka go mo leboga e le gore re amogelwe ke yena le go hwetša bophelo bjo bo sa felego: (1) Jehofa o rata batho ba gagwe. (2) Re swanetše go bontšha tebogo dilong tše kgethwa. (3) Jehofa o letetše gore re mo nee sohle seo se lego matleng a rena. (4) Borapedi bja therešo bo tutuetšwa ke lerato leo le se nago boithati, e sego megabaru. (5) Tirelo e amogelegago go Modimo ga se morwalo o boima. (6) Yo mongwe le yo mongwe wa rena o swanetše go ikarabela go Modimo. Ka gona, sehlogong se sa mathomo go tše tharo tša dihlogo tšeo di lego mabapi le puku ya Maleaki, anke re ahla-ahleng e nngwe le e nngwe ya dintlha tšeo ge re hlahloba Maleaki kgaolo 1.

Jehofa o Rata Batho ba Gagwe

5, 6. (a) Ke ka baka la’ng Jehofa a ile a rata Jakobo? (b) Ge e ba re ekiša go botega ga Jakobo, re ka letela’ng?

⁵ Lerato la Jehofa le hlalositšwe ka mo go kwagalago ditemaneng tša mathomo tša Maleaki. Puku e bula ka mantšu a rego: “Porofeto e boletšwego ke lentšu la Jehofa go Isiraele ka Maleaki.” (PK) Go oketša moo, Modimo o re: “Ke le ratile.” Ge a tsopola mohlala, temaneng yona yeo Jehofa o re: ‘Ke ratile Jakobo.’ Jakobo e be e le monna yo a bego a na le tumelo go Jehofa. Ge nako e dutše e tšwela pele, Jehofa o ile a fetoša leina la Jakobo go ba Isiraele, gomme o ile a fetoga rakgolokhukhu wa setšhaba sa Isiraele. Ke ka gobane Jakobo e be e le monna wa tumelo moo Jehofa a ilego a mo rata. Bao ba lego gare ga batho bao ba ilego ba bontšha boemo bja kgopolo bja go swana le bja Jakobo malebana le Jehofa le bona ba ile ba ratwa ke Yena.—Maleaki 1:​1, 2.

⁶ Ge e ba re rata Jehofa gomme re kgomarela batho ba gagwe ka potego e sa kwanantšhego, re ka hwetša khomotšo tabeng e lego go 1 Samuele 12:​22: “Morêna Yêna a ka se kê a lahla sethšaba sa xaxwe ka ’baka la boxolo bya leina la xaxwe.” Jehofa o rata batho ba gagwe gomme o a ba putsa, mafelelong ka bophelo bjo bo sa felego. Ka gona re bala gore: “Bôta Morêna, O dirê tše di botse; itulêlê mo naxeng ya xeno, O tlwaêlanê le pôtêxô. O thabêlê Morêna, ’me Yena ó tlo Xo nea tše pelo y’axo e di kxopêlaxo.” (Psalme 37:​3, 4) Go rata ga rena Jehofa go akaretša ntlha ya bobedi yeo re hlokomedišwago yona go Maleaki kgaolo 1.

Bontšhang Tebogo Dilong tše Kgethwa

7. Ke ka baka la’ng Jehofa a ile a hloya Esau?

⁷ Bjalo ka ge re bala go Maleaki 1:​2, 3, ka morago ga gore Jehofa a re, ‘ke rata Jakobo,’ o re, ‘ke hloile Esau.’ Ke ka baka la’ng go na le phapano? Jakobo o ile a godiša Jehofa, eupša lefahla la gagwe Esau ga se a dira bjalo. Le gona Esau o ile a bitšwa Edomo. Go Maleaki 1:4, naga ya Edomo e bitšwa selete sa banyatši gomme badudi ba gona ba a kgalemelwa. Leina Edomo (leo le bolelago “Hwibidu”) le neilwe Esau ka morago ga ge a rekišitše tokelo ya gagwe e bohlokwa ya matswalo go Jakobo ka sopo ya dinawa tše khwibidu. Genesi  25:​34 e re: “Ké xôna-moo Esau a nyaditšexo boxolo bya xaxwe.” Moapostola Paulo o kgothaleditše badumedi-gotee le yena gore ba hlokomele gore “xo se bê le wa seotswa, le xe e le monyatši bo-ka Esau e a rekišitšexo boxolo bya xaxwe ka sejô se tee fêla.”—Ba-Hebere 12:​14-16.

8. Ke eng seo se dirilego gore Paulo a swantšhe Esau le seotswa?

⁸ Ke ka baka la’ng Paulo a ile a swantšha ditiro tša Esau le bootswa? Ka baka la gore go ba le boemo bja kgopolo bja Esau go ka bakela go palelwa ke go leboga dilo tše kgethwa. Gape, se se ka feleletša ka dibe tše dikgolo tše bjalo ka bootswa. Ka gona, yo mongwe le yo mongwe wa rena a ka ipotšiša gore: ‘Na ka dinako tše dingwe ke lekega go rekiša bohwa bja-ka bja Bokristebophelo bjo bo sa felegoka selo sa nakonyana se bjalo ka sebjana sa sopo ya dinawa? Na ke nyatša dilo tše kgethwa ke sa lemoge?’ Esau o be a kganyoga ka go fela pelo go kgotsofatša kganyogo ya gagwe ya nama. O itše go Jakobo: “Kapejana hle, mphe ke je bohwibidu.” (Genesi 25:​30, NW) Ka manyami, ba bangwe ba bahlanka ba Modimo ge e le gabotse ba itše: “Kapejana! Ke ka baka la’ng ke emela lenyalo le le hlomphegago?” Tlhologelo ya go kgotsofatša kganyogo ya botona le botshadi ka tsela le ge e le efe e fetogile sebjana sa bona sa sopo ya dinawa.

9. Re ka boloka bjang poifo ya rena ya borapedi ya go boifa Jehofa?

⁹ Le ka mohla anke re se ke ra nyatša dilo tše kgethwa ka go se hlomphe bohlweki, potego le bohwa bja rena bja moya. Go e na le go ba bjalo ka Esau, a re beng bjalo ka Jakobo yo a botegago gomme re bolokeng poifo ya rena ya borapedi ya go boifa Modimo ka go bontšha tebogo e tseneletšego bakeng sa dilo tše kgethwa. Re ka dira se bjang? Ka go ela hloko go fihlelela dinyakwa tša Jehofa. Se ka mo go kwagalago se re lebiša ntlheng ya boraro yeo e bontšhwago go Maleaki kgaolo 1. Ntlha yeo ke efe?

Go Nea Jehofa Sohle Seo se Lego Matleng a Rena

10. Baperisita ba nyaditše tafola ya Jehofa ka tsela efe?

¹⁰ Baperisita ba Juda bao ba bego ba hlankela tempeleng kua Jerusalema mehleng ya Maleaki ba be ba sa nee Jehofa dihlabelo tše kaone. Maleaki 1:​6-8 e re: “Morwa ó xodiša rr’axwe; molata ó boifa mong wa xaxwe. Byale, Nna kè le tata-weno, ke xodišwa kae? Kè le Mong wa lena, ke boifya kae?Ó r’yalo Morêna wa mašaba à e-ra lena baperisita ba Le nyatšišaxo ’ina la-ka.” Baperisita ba ile ba botšiša gore: “Leina la xaxo re le nyatšiša ka’ng?” Jehofa o ile a araba ka gore: “Ka xo tliša boxôbê bya dithšila aletareng.” Baperisita ba ile ba botšiša gore: “Re Xo nyaditše ka’ng?” Ka gona, Jehofa o ile a ba botša gore: “Mola Le re: Merufsi [“tafola,” PK] ya Morêna e ka no nyatšêxa!” Baperisita bao ba kgopo ba nyaditše tafola ya Jehofa nako e nngwe le e nngwe ge ba tliša sehlabelo se se fokolago ka gore: “Xa se bobe.”

11. (a) Jehofa o ile a re’ng mabapi le dihlabelo tšeo di sa amogelegego? (b) Ke ka tsela efe batho ka kakaretšo ba bego ba le molato?

¹¹ Ka gona Jehofa o ile a nea mabaka mabapi le dihlabelo tše di sa amogelegego: “O k’O di išê xo mokxôma; a di ka mo kxahla? A a ka Xo iša mahlo?” Aowa, mokgoma wa bona a ka se thabele mpho e bjalo. Ka ntle le pelaelo Mmuši wa Legohle a ka se amogele dihlabelo tše di fokolago tšeo di tšwago diatleng tša bona tše tletšego bobe! E be e se feela baperisita bao ba bego ba le phošo. Ke therešo gore ba be ba nyatša Jehofa ka go dira dihlabelo. Eupša na batho ka kakaretšo  ba be ba se na molato? Ga go bjalo le gatee! E be e le bona bao ba ilego ba kgetha diphoofolo tša difofu, tša digole le tša go babja le bao ba di tlišitšego go baperisita gore ba dire dihlabelo ka tšona. A bokgopo bjo bokaakang!

12. Re thušwa bjang go nea Jehofa sohle seo se lego matleng a rena?

¹² Go nea Jehofa seo se lego matleng a rena ke tsela ya go bontšha gore re tloga re mo rata e le ka kgonthe. (Mateo 22:​37, 38) Ka go se swane le baperisita ba marabele ba mehleng ya Maleaki, mokgatlo wa Jehofa lehono o nea keletšo e botse ya Mangwalo yeo e re thušago go godiša Jehofa ka go mo leboga ka go fihlelela dinyakwa tša Modimo. Ntlha yeo e tswalanago le ye ke ntlha ya bone e bohlokwa yeo e hwetšwago go Maleaki kgaolo 1.

Borapedi bja Therešo bo Tutuetšwa

ke Lerato, e Sego Megabaru

13. Baperisita ba ile ba dira’ng seo se bego se bontšha gore ba be ba tutuetšwa ke megabaru?

¹³ Baperisita ba mehleng ya Maleaki ba be ba e-na le boithati, ba se na lerato e bile ba e-na le megabaru. Re tseba bjang seo? Maleaki 1:​10 (NW) e re: “ ‘Ke mang yo mongwe gape yo a lego gona magareng ga lena yo a tlago go tswalela mejako ya-ka? Gomme banna ke lena le ka se ke la gotša mollo aletareng ya-kaka lefeela. Ga ke kgahlwe ke lena,’ go bolela Jehofa wa madira, ‘le sehlabelo sa mpho se se tšwago diatleng tša lena ga ke se thabele.’” Ee, baperisita bao ba megabaru ba be ba nyaka tefo bakeng sa ditirelo tše bonolo kudu tša tempele, ba nyaka tefo bakeng sa go tswalela mejako le go gotša mello ya aletare! Ga go makatše gore Jehofa o ile a se thabele dibego tšeo di tšwago diatleng tša bona!

14. Ke ka baka la’ng re ka re Dihlatse tša Jehofa di tutuetšwa ke lerato?

¹⁴ Megabaru le boithati tša baperisita ba babe ba Jerusalema ya bogologolo ge e le gabotse di ka re gopotša gabotse gore go ya ka Lentšu la Modimo, batho ba megabaru ba ka se be le kabelo Mmušong wa Modimo. (1 Ba-Korinthe 6:​9, 10) Go nagana ka ditsela tša go hlankela ka go ikhola tša baperisita bao go godiša tebogo ya rena bakeng sa modiro wa boboledi wa lefaseng ka bophara wo o dirwago ke Dihlatse tša Jehofa. Ke wa go ithapa; gomme le ka mohla ga re nyake tefo bakeng sa karolo le ge e le efe ya bodiredi bja rena. Aowa, “xa re etše bao ba ba retollaxo [“ba bapatšago,” NW] Lentšu la Modimo.” (2 Ba-Korinthe 2:​17) Ka go swana le Paulo, yo mongwe le yo mongwe wa rena a ka bolela ka go rereša gore: “Kè bolêla Ebangedi ya Modimo kè sa boêlwe ke selô.” (2 Ba-Korinthe 11:7) Ela hloko gore Paulo ‘o boletše ditaba tše dibotse ka lethabo.’ Seo se re lebiša ntlheng ya bohlano yeo re e hlokomedišwago go Maleaki kgaolo 1.

Go Direla Modimo ga se Morwalo o Boima

15, 16. (a) Baperisita ba bile le boemo bofe bja kgopolo malebana le go nea dihlabelo? (b) Dihlatse tša Jehofa di nea bjang dihlabelo tša tšona?

¹⁵ Baperisita bao ba se nago tumelo ba Jerusalema ya bogologolo ba ile ba lebelela go newa ga dihlabelo e le tirelo e lapišago. E be e le morwalo go bona. Bjalo ka ge go bontšhitšwe go Maleaki 1:​13, Modimo o ba boditše gore: “Le re: Ši-di! E fo ba xo itapiša! Ya ba xo di nyatša.” Baperisita bao ba ile ba kwera goba go nyatša dilo tše kgethwa tša Modimo. Anke re rapelele gore rena ka noši le ka mohla re se ke ra ba bjalo ka bona. Go e na le moo, eka ka mehla re ka bontšha moya  o bonagalago mantšung ao a lego go 1 Johane 5:3, ao a rego: “Leratô la xo rata Modimo ké xe re e-ya ka melaô ya xaxwe; xomme melaô ya xaxwe xa se e thata.”

¹⁶ Anke re thabele go nea dihlabelo tša moya go Modimo, le ka mohla re se ke ra lebelela se e le morwalo o lapišago. Anke re ele hloko mantšu a a boporofeta: “Tlang le ditaba tša lena, Le boêlê xo Modimo Lè re: Re lebalêlê molato ka moka, O re dirê ka botho; re tlê re Xo leboxê ka dibexô tša molomo.” (Hosea 14:3) Polelwana “dibexô tša molomo” e bolela dihlabelo tša moya, mantšu ao re a bolelago go tumiša Jehofa le ao re a bolelago mabapi le merero ya gagwe. Ba-Hebere 13:​15 e re: “Ké xôna a re ipexeng xo Modimo [ka Jesu Kriste] ka sedimo sa thêtô, e lexo sôna seenywa sa melomo ye e ipolêlaxo ka Leina la xaxwe.” Re thaba gakaakang gore dihlabelo tša rena tša moya ga e fo ba morwalo feela, eupša ke dipontšho tše di tšwago pelong tša lerato la rena la go rata Modimo! Se se lebiša ntlheng ya botshelela yeo e ka hwetšwago go Maleaki kgaolo 1.

Yo Mongwe le yo Mongwe o Swanetše go Ikarabela

17, 18. (a) Ke ka baka la’ng Jehofa a ile a rogaka “mofori”? (b) Ke eng seo bao ba ilego ba dira ka bofora ba sa kago ba se ela hloko?

¹⁷ Batho bao ba bego ba phela mehleng ya Maleaki ba be ba ikarabela bakeng sa ditiro tša bona, gomme le rena re a ikarabela. (Ba-Roma 14:​12; Ba-Galatia 6:5) Ka mo go swanelegago, Maleaki 1:​14 e re: “Mofori ké mo-ithlôlêla-kotsi, yo a naxo le pôwana [e se nago bosodi] mohlapeng wa xaxwe, ye a e enetšexo Morêna, ’me a hlabêla Mong ’a bohle ya senyalô.” Motho yo a bego a e-na le mohlape o be a sa rua phoofolo e tee feelaa re re, nku e tee feelamoo a bego a se na kgetho e nngwe ge e se yona feela. Ge a be a kgetha phoofolo bakeng sa sehlabelo, o be a sa gapeletšege go kgetha yeo e foufetšego, ya segole goba yeo e babjago. Ge a be a kgethile sebopiwa se bjalo sa segole, seo se be se ka bontšha gore o be a nyatša tokišetšo ya Jehofa ya sehlabelo, ka gore motho yo a bego a e-na le mohlape wa diphoofolo ka ntle le pelaelo o be a ka hwetša yeo e se nago magole a bjalo!

¹⁸ Ka gona, ke ka lebaka le lebotse ge Jehofa a rogaka mofori yo a bego a e-na le phoofolo e swanelegago ya pholo eupša a tlišamohlomongwe a swanela ke go gogasebopiwa seo se foufetšego, sa go hlotša goba seo se babjago go moperisita bakeng sa sehlabelo. Lega go le bjalo, ga go na tšhupetšo le e tee moo moperisita le ge e le ofe a ilego a tsopola molao wa Modimo gomme a hlalosa gore diphoofolo tše golofetšego di be di sa amogelege. (Lefitiko 22:​17-20) Batho bao ba naganago ba tsebile gore dilo di be di ka se ba sepelele gabotse ge nkabe ba ile ba leka go nea mmuši wa bona mpho e bjalo. Eupša ge e le gabotse ba be ba dirišana le Mmuši wa Legohle, Jehofa, yo a fetago kgole kudu mmušiši le ge e le ofe yo e lego motho. Maleaki 1:​14 e bea ditaba ka mokgwa wo: “Nna ke Kxoši e kxolo,ó r’yalo Morena wa mašaba,’me leina la-ka le boifya dithšabeng.”

19. Re hlologetšwe’ng, gomme ke eng seo re swanetšego go ba re se dira?

¹⁹ Bjalo ka bahlanka ba botegago ba Modimo, re hlologetšwe letšatši la ge Kgoši e Kgolo Jehofa, a tla godišwa ke batho bohle. Ka nako yeo, “xo tseba Morêna xo tlo tlala ’fase lohle bo-ka meetse xe a nabile lewatleng.” (Jesaya 11:9) Go sa dutše go le bjalo, anke re kataneleng go fihlelela dinyakwa tša Jehofa ka go ekiša mopsalme yo a itšego: ‘Ke tla mo godiša ka go Mo leboga.’ (Psalme 69:​30) E le go fihlelela seo, boporofeta bja Maleaki bo na le keletšo e tšwelago pele yeo e ka re holago kudu. Dihlogong tše pedi tše di latelago, anke re hlahlobišišeng ka kelohloko dikarolo tše dingwe tša puku ya Maleaki.

Na o a Gopola?

• Ke ka baka la’ng re swanetše go godiša Jehofa?

• Ke ka baka la’ng dihlabelo tša baperisita mehleng ya Maleaki di be di sa amogelege go Jehofa?

• Re nea Jehofa bjang sehlabelo sa tumišo?

• Ke eng seo e swanetšego go ba tutuetšo ya borapedi bja therešo?

[Dipotšišo tša Thuto]

[Seswantšho go letlakala 9]

Boporofeta bja Maleaki bo ile bja šupa pele mehleng ya rena

[Seswantšho go letlakala 10]

Esau ga se a ka a bontšha tebogo bakeng sa dilo tše kgethwa

[Seswantšho go letlakala 11]

Baperisita le batho ba ile ba nea dihlabelo tše di sa amogelegego

[Seswantšho go letlakala 12]

Lefaseng ka bophara Dihlatse tša Jehofa di neela dihlabelo tša tumišo ka ntle le tefo