Jehofa o Hloile Tsela ya Boradia

‘Le se ke la swarana ka boradia.’—MALEAKI 2:​10, NW.

1. Ke eng seo Modimo a se nyakago go rena ge e ba re tla amogela bophelo bjo bo sa felego?

NA O nyaka bophelo bjo bo sa felego? Ge e ba o dumela kholofelong yeo bjalo ka ge e holofeditšwe ka Beibeleng, ka ntle le pelaelo o tla re, ‘Ee ke a bo nyaka.’ Eupša ge e ba o kganyoga gore Modimo a go gaugele ka bophelo bjo bo sa felego lefaseng la gagwe le lefsa, o tla swanelwa ke go fihlelela dinyakwa tša gagwe. (Mmoledi 12:​13; Johane 17:3) Na ke mo go sa kwagalego go letela gore batho bao ba sa phethagalago ba dire seo? Aowa, ka gobane Jehofa o bolela kgothatšo ye: “Se se kaxo nkxahla ké leratô, xa se didimo; xo tseba Modimo xo nkxahla xo fetiša sehlabelô.” (Hosea 6:6) Ka gona, gaešita le batho bao ba dirago diphošo ba ka fihlelela dinyakwa tša Modimo.

2. Ba-Isiraele ba bantši ba ile ba radia Jehofa bjang?

² Lega go le bjalo, ga se motho yo mongwe le yo mongwe yo a nyakago go dira thato ya Jehofa. Hosea o utolla gore gaešita le ba-Isiraele ba bantši ga se ba ka ba nyaka go dira thato ya Jehofa. E le setšhaba, ba ile ba dumela go dira kgwerano, tumelelano ya go kwa melao ya Modimo. (Ekisodo 24:​1-8) Lega go le bjalo, go se go ye kae ba be ba “senya kxwêranô” ka go roba melao ya gagwe. Ka gona, Jehofa o itše ba-Isiraele bao ‘ba ile ba mo radia.’ (Hosea 6:7, NW) Gomme batho ba bantši ba dirile bjalo ga e sa le go tloga ka nako yeo. Eupša Jehofa o hloile tsela ya boradia, go sa šetšwe gore e lebišitšwe go yena goba go bao ba mo ratago le go mo hlankela.

3. Ke tlhahlobo efe yeo e tlago go dirwa thutong ye?

³ Hosea e be e se moporofeta a nnoši yo a ilego a gatelela pono ya Modimo ka boradia, pono yeo re swanetšego go e amogela ge e ba re holofela go thabela bophelo bjo bo thabišago. Sehlogong se se fetilego, re thomile tsheka-tsheko ya bogolo bja molaetša wa boporofeta wa Maleaki, go thoma ka kgaolo ya mathomo ya puku ya gagwe. Ga bjale anke re buleng kgaolo ya bobedi ya puku yeo gomme re bone kamoo pono ya Modimo ka boradia e newago šedi e oketšegilego. Gaešita le ge Maleaki a be a bolela ka boemo bjo bo bego bo le gona gare ga batho ba Modimo nywaga-some ka morago ga ge ba boile bothopja Babele, kgaolo yeo ya bobedi e na le seo e se bolelago e le ka kgonthe bakeng sa rena lehono.

Baperisita ba Solegago

4. Ke temošo efe yeo Jehofa a e neilego baperisita?

⁴ Kgaolo ya bobedi e thoma ka go kgalemela ga Jehofa baperisita ba ba-Juda bakeng sa go tlogela ditsela tša gagwe tša go loka. Ge e ba ba sa ele hloko keletšo ya gagwe gomme ba lokiša ditsela tša bona, ka ntle le pelaelo ba tlo ba le mafelelo a šoro. Ela hloko ditemana tše pedi tša mathomo: “Lena baperisita, taêlô e Le lebanexo šé: Xe Le sa theetše, Lè sa êle hlôkô xore ’ina la-ka le xodišwê,ó r’Yalo Morêna wa mašaba,xôna ke tlo Le lahlêla la ma-hlôla-kotsi; dithšexofatšô tša lena ke tlo di phekxola.” Ge nkabe baperisita ba ile ba ruta batho melao ya Modimo gomme ba e boloka, ba ka be ba ile ba šegofatšwa. Eupša ka lebaka la go hlokomologa thato ya Modimo, thogako e tla ba tlela. Gaešita le ditšhegofatšo tšeo baperisita ba ilego ba di tsebatša di be di tla fetoga thogako.

5, 6. (a) Ke ka baka la’ng baperisita e be e le ba solegago ka mo go kgethegilego? (b) Jehofa o ile a bontšha bjang go nyatša baperisita?

⁵ Ke ka baka la’ng baperisita ka mo go kgethegilego ba be ba solega? Temana 7 e nea tšhupetšo e kwagalago gore: “Xobane molomo wa moperisita ké wa xo lôta tsebô; thutô batho ba  e nyaka molomong wa xaxwe, xobane ké yêna motseta wa Morêna wa mašaba.” Nywaga e fetago e sekete pejana, melao ya Modimo yeo e ilego ya newa Isiraele ka Moše e be e bolela gore baperisita ba na le mošomo wa gore ba “rutê Ba-lsiraele melaô ye Morêna a ba boditšexo yôna.” (Lefitiko 10:​11) Ka manyami, mafelelong, mongwadi wa 2 Koronika 15:3 o begile gore: “Ba feditše matšatši a mantši bà se na Modimo é wa ruri, bà se na moperisita e a ba rutaxo, bà se na Molaô.”

⁶ Mehleng ya Maleaki, lekgolong la bohlano la nywaga B.C.E., boemo ka boperisita e be e le bjo bo swanago. Ba be ba palelwa ke go ruta batho Molao wa Modimo. Ka gona baperisita bao ba be ba swanetše ke go sekišwa. Ela hloko mantšu a matla ao Jehofa a a lebišago malebana le bona. Maleaki 2:3 e tsebatša gore: “Difahloxô tša lena ke di xaša [mešwang, NW], [mešwang ya] menyanya ya lena.” A kotlo e bohloko gakaakang! Mešwang ya diphoofolo tša sehlabelo e be e swanetše go išwa ka ntle ga mešaša gomme ya fišwa. (Lefitiko 16:​27) Eupša ge Jehofa a ba botša gore mešwang e tla tšhelwa difahlegong tša bona, se se bontšha gabotse gore o be a nyatša le go se amogele dihlabelo tša bona le bao ba di neago.

7. Ke ka baka la’ng Jehofa a be a befeletše barutiši ba Molao?

⁷ Nywaga-kgolo pele ga mehla ya Maleaki, Jehofa o be a abetše ba-Lefi go hlokomela tabarenakele yeo ka morago e ilego ya bitšwa tempele le bodiredi bjo bokgethwa. E be e le barutiši setšhabeng sa Isiraele. Go phethagatša kabelo ya bona go be go tla bolela bophelo le khutšo bakeng sa bona le setšhaba. (Numeri 3:​5-8) Lega go le bjalo, ba-Lefi ba ile ba lahlegelwa ke poifo ya go boifa Modimo yeo ba bego ba e-na le yona mathomong. Ka gona, Jehofa o ile a ba botša gore: “Le kxopišitše ba bantši ka ya lena thutô, la senya kxwêranô ya Lefi . . . ka xobane Lè sa ka la šetša ’tsela tša-ka.” (Maleaki 2:​8, 9) Ka go palelwa ga bona ke go ruta therešo le ka mohlala wa bona o fokolago, baperisita ba ile ba aroša ba-Isiraele ba bantši, ka gona Jehofa o be a ba befeletše ka mo go swanetšego.

Go Boloka Ditekanyetšo tša Modimo

8. Na ke mo gontši kudu go letela batho go boloka ditekanyetšo tša Modimo? Hlalosa.

⁸ Anke re se ke ra nagana gore baperisita bao ba be ba swanetšwe ke go kwelwa bohloko le go swarelwa ka gobane e be e le batho feela ba sa phethagalago gomme ba ka be ba sa letelwa go boloka ditekanyetšo tša Modimo. Therešo ke gore batho ba ka kgona go boloka ditaelo tša Modimo, ka gobane Jehofa ga se a letela seo ba ka se kgonego go se dira. Mohlomongwe, baperisita ba bangwe morago nakong yeo ba ile ba boloka ditekanyetšo tša Modimo, gomme ga go na pelaelo ge e le mabapi le moperisita yoo ka morago a ilego a di bolokae lego Jesu “moperisita e moxolo.” (Ba-Hebere 3:1) Go ka bolelwa ka yena e le ka kgonthe gore: “Molomong wa xaxwe xo be xo le thutô ya therešo; molomong wa xaxwe xo be xo sa hwetšwe la xo fora; ó be a sepela le Nna a iketlile, à swere tsela ya xo loka, ’me a xomiša ba bantši bokxopong.”—Maleaki 2:6.

9. Ke bomang bao ba abilego therešo ka potego mehleng ya rena?

⁹ Ge re bapiša, ka lebaka le fetago ngwaga-kgolo ga bjale bana babo Kriste ba tloditšwego, bao ba nago le kholofelo ya legodimong ba hlanketše e le “boperisita byo bokxêthwa, bja xo tliša didimo [“dihlabelo,” NW] tša môya tše di kxahlišaxo Modimo.” (1 Petro 2:5) Ba eteletše pele go abeng ditherešo tša Beibele go ba bangwe. Ka ge o ithutile ditherešo tšeo ba di rutago, na ga se wa hwetša go tšwa phihlelong gore molao wa therešo o itlhatsetše go ba melomong ya bona? Ba thušitše go gomiša ba bantši phošong ya bodumedi, mo e lego gore gona bjale go na le ba dimilione lefaseng ka bophara bao ba ithutilego ditherešo tša Beibele gomme ba nago le kholofelo ya bophelo bjo bo sa felego. Ba, ka morago, ba na le tokelo ya go ruta molao wa therešo go ba bangwe ba dimilione.—Johane 10:​16; Kutollo 7:9.

 Lebaka la go Šetša

10. Ke ka baka la’ng re na le lebaka la go šetša polelo tša rena?

¹⁰ Lega go le bjalo, re na le lebaka la go šetša. Re ka palelwa ke go kwešiša dithuto tšeo di bontšhwago go Maleaki 2:​1-9. Na rena ka noši re phafogetše gore melomong ya rena go se hwetšwe bofora? Ka mohlala, na ditho tša rena tša lapa di ka holofela e le ka kgonthe seo re se bolelago? Na bana babo rena le dikgaetšedi ba moya ka phuthegong ba ka re bota kamoo go swanago? Go ka ba bonolo go ba le mokgwa wa go bolela mantšu ka tsela yeo a kwagalago a nepagetše eupša ge e le gabotse a lahletša ba bangwe ka boomo. Goba yo mongwe a ka feteletša goba a uta ditaba tabeng ya kgwebo. Na Jehofa a ka se bone seo? Le gona, ge e ba re latetše mekgwa e bjalo, na o tla amogela dihlabelo tša tumišo melomong ya rena?

11. Ke bomang bao ka mo go kgethegilego ba swanetšego go ba šedi?

¹¹ Mabapi le bao ba nago le tokelo ya go ruta Lentšu la Modimo ka diphuthegong lehono, Maleaki 2:7 e swanetše go ba temošo. E re melomo ya bona ‘e swanetše go lota tsebo, gomme thuto batho ba e nyaka’ melomong ya bona. Boikarabelo bjo bogolo bo tlela barutiši ba bjalo, ka gobane Jakobo 3:1 e bontšha gore ba tlo “sekišwa xo fetiša ba bangwê.” Le ge ba swanetše go ruta ka mafolofolo le phišego, thuto ya bona e swanetše go thewa ka go tia Lentšung la Modimo leo le ngwadilwego le tlhahlo e tlago ka mokgatlo wa Jehofa. Ka tsela yeo ba tla “swanelega ka mo go lekanego go ruta ba bangwe” (NW). Ka gona, ba eletšwa gore: “Se O swanetšexo xo se phêxêlêla ké xore Modimo a bônê Ò le mmotexi, Ò le modiri e a se naxo bosodi, e a tsebaxo xo ratha Lentšu la therešô à sa kxopamiše.”—2 Timotheo 2:​2, 15.

12. Bao ba rutago ba swanetše go ela hloko eng?

¹² Ge e ba re sa ele hloko, re ka lekega go akaretša dikgetho tša motho ka noši goba dikgopolo tša motho ka noši dithutong tša rena. Yeo e tla ba kotsi kudu ge motho a na le tshekamelo ya go holofela diphetho tša gagwe kudu gaešita le ge tše di thulana le seo mokgatlo wa Jehofa o se rutago. Eupša Maleaki kgaolo 2 e bontšha gore re swanetše go letela gore barutiši ba phuthego ba kgomarele tsebo e tšwago go Modimo e sego dikgopolong tša bona tša motho ka noši, tšeo di ka gobatšago nku. Jesu o itše: “E a kxopišaxo e mongwê wa ba banyenyane bá, xo ka ba kaone lwala la xo šila xe le ka tlêmêlwa molaléng wa xaxwe, ’me a tekesetšwa bodibeng bya lewatlê.”—Mateo 18:6.

 Go Nyala Motho yo a sa Dumelego

13, 14. Ke tsela efe e nngwe ya boradia yeo Maleaki a e gateletšego?

¹³ Go tloga go temana 10 go ya pele, Maleaki kgaolo 2 e gatelela boradia ka go lebanya kudu. Maleaki o lebiša tlhokomelo ditseleng tše pedi tšeo di swanago, tšeo mabapi le tšona a dirišago lentšu ‘boradia’ leboelela. Sa pele, ela hloko gore Maleaki o rotše keletšo ya gagwe ka dipotšišo tše: “Na ka moka ga rena ga re na tate o tee? Na ga se ra bopša ke Modimo o tee? Ke ka baka la’ng re swarana ka boradia, ka go goboša kgwerano ya bagologolo ba rena?” (NW) Ke moka temana 11 e oketša ka gore tsela ya boradia ya Isiraele e tlaleleditše tabeng ya go goboša “bokgethwa bja Jehofa” (NW). Ke eng se se segolo gakaakaa seo ba bego ba se dira? Temana yeo e bontšha e nngwe ya ditsela tše fošagetšego: Ba be ba “tšere morwedi wa modimo o šele ya ba monyadiwa” (NW).

¹⁴ Ka mantšu a mangwe, ba-Isiraele ba bangwe bao ba bego ba ineetše go Jehofa, ba be ba nyetše bao ba bego ba sa mo rapele. Taba e dikologilego e re thuša go bona lebaka leo ka lona se e bego e le se segolo. Temana 10 e re ba be ba na le tate o tee. Se se be se sa bolele ka Jakobo (yo a ilego a reelwa gape Isiraele) goba Aborahama goba gaešita le Adama. Maleaki 1:6 e bontšha gore Jehofa e be e le “tate o tee” yoo. Setšhaba sa Isiraele se be se le tswalanong le yena, karolo ya kgwerano yeo e dirilwego le bagologolo ba bona. O mongwe wa melao kgweranong yeo e be e le gore: “Le se kê la tšeana nabô’; Le se kê la ba nea barwedi ba lena ya ba basadi ba barwa ba bôná; xomme Le se kê la tšeiša barwa ba bôná barwedi ba lena.”—Doiteronomio 7:3.

15. (a) Ba bangwe ba ka leka go lokafatša go nyala motho yo a sa dumelego bjang? (b) Jehofa o ipolela bjang tabeng ya lenyalo?

¹⁵ Ba bangwe lehono mohlomongwe ba ka bea mabaka ka gore: ‘Motho yo a nkgapilego maikwelo o tloga a na le dika tše dibotse kudu. Ge nako e dutše e tšwela pele, ka ntle le pelaelo o tla amogela borapedi bja therešo.’ Kgopolo e bjalo ge e le gabotse e fo kgonthišetša temošo e buduletšwego e rego: “Pelo ké yôna mmata-mâno-mabe, ké yôna lešaedi.” (Jeremia 17:9) Pono ya Modimo ka go nyala motho yo a sa dumelego e ile ya bontšhwa go Maleaki 2:​12 “Morêna ó tlo mo (“kgaola,” NW) hlokiša wa xo mo dumediša le xo mo araba.” Ka gona, Bakriste ba kgothaletšwa go nyala “feela Moreneng.” (1 Ba-Korinthe 7:​39, NW) Ka tlase ga tshepedišo ya Bokriste ya dilo, modumedi ga a ‘kgaolwe’ ka baka la go nyala motho yo a sa dumelego. Lega go le bjalo, ge e ba motho yo a sa dumelego a dula a sa dumele, go tla direga’ng go motho yoo a sa dumelego ge Modimo kgaufsinyana a fediša tshepedišo ye ya dilo?—Psalme 37:​37, 38.

Go Swara Molekane wa Motho Gampe

16, 17. Ke tsela efe ya boradia yeo ba bangwe ba ilego ba e tšea?

¹⁶ Maleaki o ahla-ahla boradia bja bobedi: go swara gampe molekane wa motho, kudu-kudu ka go mo hlala mo e sego ga toka. Temana 14 (PK) ya kgaolo ya bobedi e re: “Ka gobane Jehofa ke hlatse gare ga wena le mosadi wa bofsa bja gago, yo o mo hlanogetšego [“yo o mo swerego ka boradia,” NW]; e tšwe e le mogwera wa gago, e le mosadi wa kgwerano ya gago.” Ka go dirišana le basadi ba bona ka boradia, banna ba ba-Juda ba ile ba dira gore aletare ya Jehofa e ‘apešwe ke megokgo.’ (Maleaki 2:​13) Banna bao ba be ba hlala ka mabaka a sego molaong, ba tlogela ka phošo basadi ba bofseng bja bona mohlomongwe ba nyala basadi ba bafsa goba ba  baheitene. Gomme baperisita bao ba gobogilego ba ile ba dumelela seo! Lega go le bjalo, Maleaki 2:​16 e re: “Morêna Modimo wa Isiraele Ó re: Thlalô ke e hloile.” Ka morago, Jesu o bontšhitše gore boitshwaro bjo bo gobogilego ke lebaka le nnoši bakeng sa go hlala leo le tla lokollago molekane yo a se nago molato go nyala gape.Mateo 19:9.

¹⁷ Naganišiša ka mantšu a Maleaki, gomme o bone kamoo a kgomago pelo le maikwelo a botho. O bolela ka ‘mogwera wa gago le mosadi wa kgwerano ya gago.’ Monna yo mongwe le yo mongwe yo a bego a akaretšwa o be a nyetše modumedi-gotee le yena, mosadi wa mo-Isiraele, a mo kgetha bjalo ka mogwera yo a rategago, molekane wa bophelo ka moka. Le ge ba nyalane ge bobedi bja bona e be e sa le ba bafsa, go feta ga nako le go thoma ga botšofadi ga se gwa fediša kgwerano yeo ba tsenego go yona, e lego kwano ya lenyalo.

18. Ke ka ditsela dife keletšo ya Maleaki ya mabapi le boradia e šomago lehono?

¹⁸ Keletšo e lego mabapi le ditaba tšeo e šoma ka mo go lekanago lehono. Ke mo go nyamišago gore ba bangwe ba nyatša keletšo ya Modimo ya mabapi le go nyala feela Moreneng. E bile ke mo go nyamišago gore ba bangwe ga ba tšwele pele ba šomela go boloka lenyalo la bona le tiile. Go e na le moo, ba nea mabaka gomme ba tšwela pele tseleng yeo Modimo a e hloilego ka go hlala mo go sa dumelelwego ke mangwalo e le gore ba nyale motho yo mongwe. Ka go dira dilo tše bjalo, ba ‘lapiša Jehofa.’ Morago kua mehleng ya Maleaki, bao ba ilego ba hlokomologa keletšo ya Modimo gape ba bile le sebete sa go nagana gore Jehofa ga a na toka diponong tša gagwe. Ge e le gabotse ba itše: “Modimo wa toka o kae?” A kgopolo e kgopo gakaakang! Anke re se ke ra wela molabeng woo.—Maleaki 2:17.

19. Banna le basadi ba ka amogela bjang moya wa Modimo?

¹⁹ Ka lehlakoreng leo le kgothatšago, Maleaki o bontšha gore banna ba bangwe ba be ba sa radie basadi ba bona. Ba ‘be ba šaletšwe ke moya o mokgethwa wa Modimo.’ (Temana 15) Ka mo go thabišago, mokgatlo wa Modimo lehono o tletše ka banna ba bjalo bao ba ‘godišago basadi ba bona.’ (1 Petro 3:7) Ga ba goboše basadi ba bona mmeleng goba ka polelo, ga ba gapeletše mekgwa ya dikopano tša botona le botshadi e gobogilego, e bile ga ba hlompholle basadi ba bona ka go bapala ka lerato le basadi ba bangwe goba ka go bogela diswantšho tšeo di kgothaletšago bootswa. Mokgatlo wa Jehofa gape o šegofaditšwe ka go ba le basadi ba bantši ba Bakriste bao ba botegelago Modimo le melao ya gagwe ka go se kwanantšhe. Banna ba bjalo le basadi ka moka ba tseba seo Modimo a se hloilego, gomme ba nagana le go dira dilo ka mo go swanetšego. Tšwela pele go ba bjalo ka bona, ‘o e-kwa Modimo e le mmuši’ le go šegofatšwa ka moya o mokgethwa.—Ditiro 5:29.

20. Ke nako efe e lego kgaufsi bakeng sa batho ka moka?

²⁰ Kgaufsinyane, Jehofa o tla ahlola lefase ka moka. Motho yo mongwe le yo mongwe o tla swanelwa ke go ikarabela go yena ka baka la ditumelo goba ditiro tša gagwe. “Motho mang le mang wa rena ó tlo iphetolêla pele xa Modimo.” (Ba-Roma 14:​12) Ka gona potšišo e kgahlišago mo nakong ye ke ya gore: Ke bomang ba tlago go phologa letšatši la Jehofa? Sehlogo sa boraro seo e bilego e le sa mafelelo lelokelelong le la dihlogo se tla ahla-ahla taba yeo.

Na o ka Hlalosa?

• Ke ka lebaka lefe la motheo leo Jehofa a ilego a kgalemela baperisita kua Isiraele?

• Ke ka baka la’ng ditekanyetšo tša Modimo e se tše phagamego kudu gore batho ba ka di boloka?

• Ke ka baka la’ng re swanetše go ba šedi dithutong tša rena lehono?

• Ke mekgwa efe e mebedi yeo ka mo go kgethegilego Jehofa a ilego a e iletša?

[Dipotšišo tša Thuto]

[Seswantšho go letlakala 15]

Mehleng ya Maleaki baperisita ba ile ba kgalemelwa ka baka la go se boloke ditsela tša Jehofa

[Seswantšho go letlakala 16]

Re swanetše go ela hloko go ruta ditsela tša Jehofa, e seo ka go tšwetša pele dilo tšeo re di ratago

[Diswantšho go letlakala 18]

Jehofa o ile a ahlola ba-Isiraele bao ba ilego ba hlala basadi ba bona ka mabaka ao e sego a molao gomme ba nyala basadi ba baheitene

[Seswantšho go letlakala 18]

Bakriste lehono ba hlompha kgwerano ya bona ya lenyalo