Kamoo Morwa a Thušitšego Tatagwe ka Gona

JAMES wa go tšwa Engelane, yo a lego nywageng ya gagwe ya bo-30, o golofetše monaganong e bile o šarakane ganyenyane monaganong. Lega go le bjalo, o be a dutše a e-ba gona dibokeng tša Dihlatse tša Jehofa le mmagwe le kgaetšedi ya gagwe ka nywaga e mentši. Lega go le bjalo, tatagwe ga se a ka a bontšha kgahlego e kaalo ditumelong tša bona. Mantšiboeng a mangwe ka morago ga diboka tšeo di bilego le pontšho yeo e bego e bontšha kamoo go ka laletšwago motho yo o tlwaelanego le yena Segopotšong sa lehu la Kriste, James o ile a fetela ka phapošing ya gagwe ka lebelo. A rata go tseba gore go direga eng, mmagwe o ile a mo šala morago gomme a mo hwetša a kgetha gare ga dikgatišo tša kgale tša dimakasine tša Morokami le Phafoga! ka mahlo a mahwibidu. O ile a kgetha makasine wo o bego o na le seswantšho sa taletšo ya Segopotšo letlakaleng la ka morago gomme a kitimela go tatagwe. O ile a thoma ka go šupa seswantšho gomme ka morago a šupa tatagwe gomme a re “Wena!” Tatagwe le mmagwe ba ile ba lebelelana ka go makala ge ba be ba lemoga gore James o be a laletša tatagwe Segopotšong. Tatagwe o ile a re a ka no ba gona.

Mantšiboeng a Segopotšo, James o ile a ya ka phapošaneng ya tatagwe ya go bea diaparo, a kgetha borokgo, a bo iša go tatagwe, gomme a dira seka sa gore o swanetše go bo apara. Tatagwe o ile a araba ka gore a ka se kgone go ya sebokeng. Ka gona, James le mmagwe ba ile ba thoma go itokišetša go ya Holong ya Mmušo ba le noši.

Lega go le bjalo, nakwana ka morago, James o ile a thoma go se sa dirišana gabotse le mmagwe ka mo go oketšegilego ge a be a leka go mo lokišeletša go ya dibokeng tša phuthego, go e na le moo a kgetha go šala gae le tatagwe. Ke moka mesong e mengwe ya Sontaga, James o ile a gana gape go dirišana le mmagwe ge a be a leka go mo lokišeletša go ya dibokeng. Sa go makatša mmagwe kudu ke gore, tatago James o ile a retologela go yena gomme a re, “James, ge e ba ke e-ya dibokeng lehono, na le wena o tla ya?” Sefahlego sa James se ile sa bontšha lethabo. O ile a gokarela tatagwe gomme a re “Ee!” gomme boraro bja bona ba ile ba ya Holong ya Mmušo.

Go tloga letšatšing leo, tatago James o ile a tšwela pele a e-ba gona dibokeng ka moka tša Sontaga gomme go se go ye kae a bolela gore ge e ba a be a tla dira tšwelopele, o be a tla swanelwa ke go ba gona dibokeng tše dingwe ka mo go swanago. (Ba-Hebere 10:​24, 25) O ile a dira seo, gomme dikgwedi tše pedi ka morago o ile a thoma go ithuta Beibele ka mehla. O ile a dira tšwelopele ya kapejana, a dira diphetogo tše di nyakegago bophelong bja gagwe kapejana, gomme go se go ye kae o ile a thoma go ba le karolo modirong wa go bolela ka Mmušo. Ngwaga ka morago ga ge a thomile go ithuta Beibele, o ile a neela bophelo bja gagwe go Jehofa gomme a bontšha seo ka go kolobetšwa meetseng. Ga bjale o hlankela e le mohlanka wa bodiredi ka phuthegong ya gabo. Ga bjale ka moka ka lapeng ba hlankela Jehofa ba le gotee.