Ke Bomang ba Tlago go Phologa Letšatši la Jehofa?

“Tšatši leo le fišaxo wa lerêtha le e’tla.”—MALEAKI 4:1.

1. Maleaki o hlalosa bjang bofelo bja tshepedišo ye ya dilo?

MOPOROFETA Maleaki o ile a budulelwa ke Modimo go bega ditiragalo tše di boifišago tšeo di tlago go direga nakong e tlago e lego kgaufsi. Ditiragalo tše di tla kgoma motho yo mongwe le yo mongwe lefaseng. Maleaki 4:1 e bolela e sa le pele gore: “Tsebang, xobane ’tšatši leo le fišaxo wa lerêtha le e’tla. Ka lôna tšatši leo baipoti bohle le ba-dira-bobe ba tlo ba makobi; ’tšatši leo le tlaxo le tlo ba thšuma,ó r’yalo Morêna,le se ba šadiše modu le lekala.” Phedišo ya tshepedišo ye e kgopo ya dilo e tla ba e feletšego gakaaka’ng? E tla ba bjalo ka medu ya sehlare yeo e fedišitšwego e le gore le ka mohla se se ke sa mela.

2. Mangwalo a itšego a hlalosa letšatši la Jehofa bjang?

² O ka botšiša gore, ‘Maleaki o bolela e sa le pele ka “letšatši” lefe?’ Ke letšatši le le swanago le leo go bolelwago ka lona go Jesaya 13:9, yeo e rego: “Še-leo ’tšatši la Morêna, lè e-tla è le la sehloxo, la sehutla le boxale bo tukaxo, la xore naxa e šalê è le marope, xo fedišwê disenyi mo xo yôna.” Tsefanya 1:​15 e nea tlhaloso ye: “ ’Tšatši leo e tlo ba letšatši la kxalefô, ’tšatši la tlalêlô le la pitlaxanô, ’tšatši la xo senyêxêlwa le la xo šwalalanywa, ’tšatši la lefsifsi, la ’fsifsi le lexolo, ’tšatši la maru, la maru a maso.”

 ‘Masetla-pelo a Magolo’

3. “Letšatši la Jehofa” ke eng?

³ Phethagatšong e kgolo ya boporofeta bja Maleaki “letšatši la Jehofa” (NW) ke lebaka la nako leo le tsebjago ka ‘masetla-pelo a magolo.’ Jesu o boletše e sa le pele gore: “Xobane ma-setla-pelo a mohla woo e tlo ba a maxolo, a a sešoxo a bônwa xo tloxa mola lefase lè thôma xo ba xôna, a a ka se kexo a ba xôna le ka mohla o mongwê.” (Mateo 24:​21) Nagana ka kgateletšego yeo lefase le šetšego le e bone, kudu-kudu ga e sa le go tloga ka 1914. (Mateo 24:​7-12) Go ba gona, Ntwa ya II ya Lefase e nnoši e bolaile batho ba ka godimo ga dimilione tše 50! Lega go le bjalo, ‘masetla-pelo a magolo’ a tla dira gore mathata ao a bonagale e le a manyenyane. Tiragalo yeo, e swanago le ya letšatši la Jehofa, e felelela ka Haramagedone, e lego yeo e fihlišago matšatši a bofelo a tshepedišo ye e kgopo bofelong.—2 Timotheo 3:​1-5, 13; Kutollo 7:​14; 16:​14, 16.

4. Ge letšatši la Jehofa le fela, go tla be go diragetše’ng?

⁴ Bofelong bja letšatši leo la Jehofa, lefase la Sathane le bathekgi ba lona ba tlo fedišwa. Bodumedi bja maaka ka moka bo tla fedišwa pele. Ke moka kahlolo ya Jehofa e tla wela ditshepedišo tša Sathane tša kgwebo le tša dipolitiki. (Kutollo 17:​12-14; 19:​17, 18) Hesekiele o porofeta ka gore: “Silifêra ya bôna ba tlo e lahlêla mekxobeng; xauta ya bôná e tlo ba maudi; xobane mohla wa boxale bya Morêna silifêra ya bôná le xauta ya bôná di ka se hlakodiše.” (Hesekiele 7:​19) Mabapi le letšatši leo Tsefanya 1:​14 e re: “Le kxaufsi, ’tšatši le lexolo la Morêna! Le kxaufsi! Le tla ka lebelô le lexolo!” Mabapi le seo Beibele e se bolelago ka letšatši la Jehofa, re swanetše go ikemišetša go gata mogato ka go dumelelana le dinyakwa tša Modimo tša go loka.

5. Ke eng seo se bonwago ke bao ba boifago leina la Jehofa?

⁵ Ka morago ga go bolela e sa le pele seo letšatši la Jehofa le tlago go se dira lefaseng la Sathane, Maleaki 4:2 e bega Jehofa a re: “Xe e le lena ba Le boifaxo ’ina la-ka, Le tlo hlabêlwa ke ’tšatši la tokô, la phodišô diphexong tša lôna, la tlo tšwa Lè kxarama wa mamane a nonnexo.” “ ’Tšatši la toko” ke Jesu Kriste. Ke “seetša sa lefase” sa moya. (Johane 8:​12) Jesu o bonega ka phodišo, ya mathomo ke phodišo ya moya, yeo re e bonago lehono, ke moka go be le phodišo ya mmele e feletšego lefaseng le lefsa. Go etša ge Jehofa a bolela, bao ba fodišitšwego ba tlo “kxarama wa mamane a nonnexo” ao a thabetšego go lokollwa kgolegong.

6. Ke monyanya ofe wa phenyo woo bahlanka ba Jehofa ba tlago go o thabela?

⁶ Go thwe’ng ka bao ba sa šetšego dinyakwa tša Jehofa? Maleaki 4:3 e re: “Babe ba tlo xatakêlwa [ke bahlanka ba Modimo], ka xobane ba tlo etša mobú ka tlase xa dinaô tša lena, ka ’tšatši leo Nna ke le beilexo.Ó r’yalo Morêna wa mašaba.” Batho bao e lego barapedi ba Modimo ba ka se tšee karolo go fedišeng lefase la Sathane. Go e na le moo, ka mokgwa wa seswantšhetšo ba ‘gatakela ba babe’ ka go ba le karolo monyanyeng wa phenyo wo o latelago letšatši la Jehofa. Monyanya o mogolo o ile wa ba gona ka morago ga phedišo ya madira a Farao Lewatleng le Lehwibidu. (Ekisodo 15:​1-21) Ka mo go swanago, go fedišwa ga Sathane le lefase la gagwe masetla-pelong a magolo go tla latelwa ke monyanya wa phenyo. Baphologi ba botegago ba letšatši la Jehofa ba tla goeletša ka gore: “A re hlalaleng re thabêlê phološô ya xaxwe.” (Jesaya 25:9) A lethabo le le kaakang leo e tlago ba lona ge bogoši bja Jehofa bo godišwa gomme lefase le hlwekišwa bakeng sa go ba bodulo bja khutšo!

Bojakane bo Ekiša Isiraele

7, 8. Hlalosa boemo bja moya bja Isiraele mehleng ya Maleaki.

⁷ Bao ba lego boemong bjo bo amogelegago le Jehofa ke bao ba mo hlankelago, ka ge ba fapanywa le bao ba sa mo hlankelego. Boemo e be e le bjo bo swanago ge Maleaki a be a ngwala puku ya gagwe. Ka 537 B.C.E., mašaledi a Isiraele a ile a tsošološwa ka morago ga nywaga e 70 ya bokgoba kua Babele. Lega go le bjalo, ka morago ga nywaga e fetago e lekgolo e latetšego, setšhaba seo se tsošološitšwego se ile sa thoma go kekela bohlanoging le bokgopong. Batho ba bantši ba be ba hlompholla leina la  Jehofa; ba hlokomologa melao ya gagwe ya go loka; ba šilafatša tempele ya gagwe ka go tliša diphoofolo tše di foufetšego, tše di golofetšego le tše di babjago bakeng sa dihlabelo; e bile ba hlala basadi ba bofseng bja bona.

⁸ Mafelelong, Jehofa o ile a ba botša gore: “Ké mo ke tl’o xo Le sekiša sekxaufsi, ka napa kè e-ba hlatse ya xo tšwa baloi, le diotswa, le ba-êna-maaká, le ba xo pata mohlanka, ba xo hlakiša mohlôlôxadi le thšuana, ba xo senya ’taba tša modiiledi, bà dira bà sa mpoife, . . . xobane Nna Morêna xa ke thiše [“fetoge,” NW].” (Maleaki 3:​5, 6) Lega go le bjalo, Jehofa o ile a laletša bohle bao ba ka bego ba arogile ditseleng tša bona tše mpe gore: “Boêlang xo Nna, ke tseb’o boêla xo lena!”—Maleaki 3:7.

9. Ke bjang diporofeto tša Maleaki di ilego tša phethagala la mathomo?

⁹ Mantšu ao gape a ile a phethagala lekgolong la pele la nywaga C.E. Mašaledi a ba-Juda a ile a hlankela Jehofa gomme a ba karolo ya “setšhaba” se sefsa sa Bakriste ba tloditšwego ka moya, seo se ilego sa akaretša ba-Ntle. Eupša bontši bja Isiraele ya tlhago bo ile bja gana Jesu. Ka gona Jesu o boditše setšhaba seo sa Isiraele gore: “Le tlo di bôna; ngwakô wa lena o tlo Le tloxêlêlwa è le lešope.” (Mateo 23:​38; 1 Ba-Korinthe 16:​22) Ka 70 C.E., bjalo ka ge go boletšwe e sa le pele go Maleaki 4:1, “ ’tšatši leo le fišaxo wa lerêtha” le ile la tlela Isiraele ya nama. Jerusalema le tempele ya yona di ile tša fedišwa gomme go begilwe gore batho ba ka godimo ga milione ba ile ba hwa ka baka la tlala, go lwela pušo le ditlhaselo tša madira a ba-Roma. Lega go le bjalo, bao ba bego ba hlankela Jehofa ba ile ba phologa tlaišo yeo.—Mareka 13:​14-20.

10. Ke ka tsela efe batho ka kakaretšo le baruti ba ekišago Isiraele ya lekgolong la pele la nywaga?

¹⁰ Batho, Bojakane ka mo go kgethegilego, ba ekišitše setšhaba sa lekgolong la pele la nywaga sa Isiraele. Baetapele le batho ka kakaretšo Bojakaneng ba kgetha ditumelo tša bodumedi bja bona go e-na le ditherešo tša Modimo tšeo Jesu a di rutilego. Baruti ke bona ba nago le molato ka mo go kgethegilego. Ba gana go diriša leina la Jehofa, e bile ba le ntšhitše ka diphetolelong tša Dibeibele tša bona. Ba hlompholla Jehofa ka dithuto tšeo e sego tša Mangwalo, tše bjalo ka dithuto tša boheitene tša tlhokofatšo ya ka mo go sa felego mollong wa dihele, Boraro botee, go se hwe ga moya le tlhagelelo. Ka go rialo ba amoga Jehofa tumišo ya gagwe e mo swanetšego, bjalo ka ge baperisita ba dirile mehleng ya Maleaki.

11. Madumedi a lefase a bontšha bjang yoo ba mo hlankelago e le ka kgonthe?

¹¹ Ka 1914, ge mehla ya bofelo e be e thoma,  madumedi a lefase le, a etelelwa pele ke bao ba ipitšago Bakriste, a bontšhitše gabotse yo ba bego ba mo hlankela. Dintweng ka bobedi tša lefase, ba ile ba kgothaletša ditho tša ona go ya ntweng ka baka la diphapano tša setšhaba, le ge se se be se bolela go bolaya batho gaešita le ba bodumedi bja bona ka noši. Lentšu la Modimo le hlaola gabotse bao ba kwago Jehofa le bao ba sa mo kwego: “Ké xôna moo xo bônaxalaxo ba e lexo bana ba Modimo, le ba e lexo bana ba Diabolo. E a sa yexo ka tokô, xa a’ tswalwa ke Modimo, bo-ka le eo a sa ratexo ngwan’abô. Ké yôna taba ye Le e kwilexo xo tloxa mathomong, yé ya xore re ratanê. Re se etšê Kaine e a tswetšwexo ke E-mobe, a bolaya ngwan’abô.”—1 Johane 3:​10-12.

Go Phethagatša Boporofeta

12, 13. Ke diporofeto dife tšeo bahlanka ba Modimo ba di phethagaditšego mehleng ya rena?

¹² Mafelelong a Ntwa ya I ya Lefase ka 1918, bahlanka ba Jehofa ba be ba ka bona gore Modimo o be a ahlotše Bojakane gotee le madumedi ka moka a maaka. Go tloga ka nako yeo go ya pele, pitšo e ile ya ya go ba dipelo tše di lokilego: “Khuduxang! lena ba sethšaba sa-ka, xore Le se tlo xwêrana le dibe tša motse woo, la tlo wêlwa ke ’kôtlô tša wôna. Xobane dibe tša wôna di fihla xodimong, ’me Modimo ó xopola makxôpô a wôna.” (Kutollo 18:​4, 5) Bao ba bego ba kganyoga go hlankela Jehofa ba ile ba thoma go hlwekišwa mešaletšeng ya bodumedi bja maaka gomme ba tšwela pele ba phethagatša go bolela ditaba tše dibotse tša Mmušo o hlomilwego lefaseng ka bophara, modiro o swanetšego go phethagatšwa pele ga bofelo bja tshepedišo ye e kgopo ya dilo.Mateo 24:14.

¹³ Se e be e le bakeng sa go phethagatša boporofeta bja Maleaki 4:5, moo Jehofa a itšego: “Tsebang xore Nna ke tlo roma Eliya moporofeta, a tlo tla xo lena, xò sešo xwa fihla ’tšatši leo le lexolo le le šiišaxo la Morêna.” Boporofeta bjoo bo ile bja phethagala la mathomo modirong wa Johane Mokolobetši, yo a ilego a swantšhetšwa ke Eliya. Johane o dirile mošomo o swanago le wa Eliya ge a be a kolobetša ba-Juda bao ba sokologilego dibeng tša bona mabapi le go dira dibe kgahlanong le Molao wa kgwerano. Sa bohlokwa kudu, Johane e be e le ketapele ya Mesia. Lega go le bjalo, mošomo wa Johane e be e le feela phethagalo ya mathomo ya boporofeta bja Maleaki. Le ge Jesu a bolela ka Johane e le Eliya wa bobedi, o bontšhiše gore go be go tla ba le mošomo wa “Eliya” nakong e tlago.—Mateo 17:​11, 12.

14. Ke mošomo ofe o bohlokwa wo o swanetšego go dirwa pele tshepedišo ye e fela?

¹⁴ Boporofeta bja Maleaki bo bontšhitše gore mošomo wo o mogolo wa Eliya o be o tla dirwa pele ga “ ’tšatši leo le lexolo le le šiišaxo la Morena.” Letšatši leo le phetha ka ntwa yeo e tlago ka lebelo ya letšatši le legolo la Modimo Ra-matla-ohle, ya Haramagedone. Se se bolela gore bofelo bja tshepedišo ye e kgopo ya dilo le Pušo ya Nywaga e Sekete ya Mmušo wa Modimo wa legodimong e tla etwa pele ke mošomo o swanago le wa Eliya. Ka go dumelelana le boporofeta bjoo, pele Jehofa a fediša tshepedišo ye e kgopo, sehlopha sa Eliya wa mehleng yeno, se thekgwa ke Bakriste-gotee ba dimilione bao ba nago le kholofelo ya lefaseng, ka phišego ba dira mošomo wa go tsošološa borapedi bjo bo sekilego, ba phagamiša leina la Jehofa le go ruta batho ba bjalo ka dinku ditherešo tša Beibele.

Jehofa o Šegofatša Bahlanka ba Gagwe

15. Jehofa o gopola bjang bahlanka ba gagwe?

¹⁵ Jehofa o šegofatša bao ba mo hlankelago. Maleaki 3:​16 e re: “Ba-šia-Modimo, xe bôná ba boledišana, Morêna ó a theetša, ó a di kwa; ’me ba ba mmoifaxo ba ngwaletšwe puku ya kxopotšô pel’a xaxwe, ya ba sa lebalexo ’ina l’axwe.” Go tloga ka Abele go ya pele, Modimo o be a dutše a ngwala ka pukung, go le bjalo ka ge eka o ngwala maina a bao ba tlago go gopolwa ka tebelelo ya bophelo bjo bo sa felego. Jehofa o bolela le batho ba bjalo gore: “Tlišang karolô ya lesome la ruri ngwakong wa polokêlô, xore Ntlong ya-ka xo bê le diphepi. Napang Le ntekê ka xo dira byalo;o r’yalo Morêna wa mašaba,—​Le bônê xe ke bula nthoba tša lexodimo ka  Le thšollêla thšexofatšô wa xo tlo Le xolêla.”—Maleaki 3:10.

16, 17. Jehofa o šegofaditše bjang batho ba gagwe le mošomo wa bona?

¹⁶ Ka kgonthe Jehofa o šegofaditše bao ba mo hlankelago. Bjang? Tsela e nngwe ke ka kwešišo e oketšegilego ya merero ya gagwe. (Diema 4:​18; Daniele 12:​10) E nngwe ke ka go tšweletša dienywa tše di makatšago modirong wa bona wa boboledi. Batho ba bantši ba dipelo tše di lokilego ba ba tladitše borapeding bja therešo, gomme ba ka moka ke “lešaba le lexolo la batho . . . ba dithšaba ka moka, le meloko ka moka, le merafô ka moka, le maleme ka moka; . . . ba hlaboša mantšu xa-xolo ba re: Xo phološa ké xa Modimo wa rena e a dutšexo sedulong sa boxoši, ké xa Kwana.” (Kutollo 7:​9, 10) Lešaba le le legolo le ile la bonagala ka tsela e makatšago, gomme bao ba hlankelago Jehofa ka mafolofolo ga bjale ba balelwa go dimilione tše fetago tše tshela diphuthegong tše fetago 93 000 lefaseng ka bophara!

¹⁷ Tšhegofatšo ya Jehofa gape e bonwa ka gore Dihlatse tša Jehofa di gatiša dikgatišo tše di theilwego Beibeleng tšeo di abjago kudu historing. Gona bjale, kgwedi e nngwe le e nngwe go tšweletšwa dikopi tše dimilione tše 90 tša Morokami le Phafoga!, Morokami ka maleme a 144, Phafoga! a 87. Puku ya go ithuta Beibele ya Therešo ye Išago Bophelong bjo bo sa Felego, yeo e gatišitšwego ka 1968, e ile ya abja ka dikopi tše fetago dimilione tše 107 ka maleme a 117. O ka Phela ka mo go sa Felego Paradeiseng mo Lefaseng, e lokolotšwego ka 1982, e fihleletše ka godimo ga dimilione tše 81 ka maleme a 131. Puku ya Tsebo e Išago Bophelong bjo bo sa Felego, e lokolotšwego ka 1995, e šetše e gatišitšwe ka dikopi tše fetago dimilione tše 85 ka maleme a 154. Poroutšha ya Ke Eng Seo Modimo a se Nyakago go Rena?, yeo e gatišitšwego ka 1996, e abilwe ka dikopi tše dimilione tše 150 ka maleme a 244 go fihla ga bjale.

18. Ke ka baka la’ng re thabela katlego ya moya go sa šetšwe kganetšo?

¹⁸ Katlego ye ya moya e be e dutše e thabelwa  go sa šetšwe kganetšo e šoro kudu le e telele go tšwa lefaseng la Sathane. Se se bontšha go nepagala ga Jesaya 54:​17: “Marumô ka moka a rulêlwaxo xo lwa naxô’, a ka se kxône selo. Maleme ka moka a a Xo pharaxo O tlo a fenya thsekong. Ké byôna bohwa bya balata ba Morêna; ké tšôna di tl’o xo ba lokêla di e-tšwa xo Nna Ó r’yalo Morêna.” Ke mo go homotšago gakaakang go tseba gore Maleaki 3:​17 e na le phethagalo e kgolo go bona: “E tlo ba batho ba-ka!Ó r’yalo Morêna.Ka lôna ’tšatši leo ke le beilexo ba tlo ba lehumô la-ka.”

Go Hlankela Jehofa ka Lethabo

19. Bao ba hlankelago Jehofa ba fapane bjang le bao ba sa mo hlankelego?

¹⁹ Phapano magareng ga bahlanka ba Jehofa ba botegago le bao ba lego lefaseng la Sathane ke e bonagalago kudu ge nako e dutše e feta. Maleaki 3:​18 e boletše e sa le pele gore: “Xôna Le tlo buša Lè hlatha moloki le e a sa lokaxo, Lè hlaoloxanya mo-dirêla-Morêna le e a sa Mo direlexo.” Phapano e nngwe ya tše dintši ke gore bao ba hlankelago Jehofa ba mo hlankela ka lethabo le legolo. Gare ga mabaka a, se ke kholofelo e kgahlišago yeo ba nago le yona. Ba kgodišegile ka mo go feletšego go Jehofa ge a re: “Le tsebê xore ke tlo hlôla maxodimo a mafsa le lefase le lefsa, tša kxalê di ka se hlwê di tsebywa, le mo pelong ya motho di ka se hlwê di rotoxa. ’Me lena hlalalang Le fêlê Lè thabêla tše Nna ke tl’o xo di hlôla.”—Jesaya 65:​17, 18; Psalme 37:​10, 11, 29; Kutollo 21:​4, 5.

20. Ke ka baka la’ng re le batho bao ba thabilego?

²⁰ Re dumela kholofetšo ya Jehofa ya gore batho ba gagwe bao ba botegago ka go se kwanantšhe ba tla phologa letšatši la gagwe le legolo gomme ba tlišwe lefaseng le lefsa. (Tsefanya 2:3; Kutollo 7:​13, 14) Gomme ge ba bangwe ka baka la botšofadi, bolwetši goba kotsi ba ka hwa pele ga moo, Jehofa o nea lentšu la gagwe gore o tla ba tsoša ka tebelelo ya bophelo bjo bo sa felego. (Johane 5:​28, 29; Tito 1:2) Ka gona ge ka moka ga rena re na le mathata a rena le ditlhohlo, ge re dutše re letetše letšatši la Jehofa, re na le mabaka ka moka a go ba batho bao ba thabilego kudu lefaseng.

O Araba Bjang?

• “Letšatši la Jehofa” ke eng?

• Madumedi a lefase a ekiša Isiraele ya bogologolo bjang?

• Ke diporofeto dife tšeo bahlanka ba Jehofa ba di phethagatšago?

• Jehofa o šegofaditše batho ba gagwe bjang?

[Dipotšišo tša Thuto]

[Seswantšho go letlakala 21]

Jerusalema ya lekgolong la pele la nywaga ‘e ile ya fišwa wa leretha’

[Diswantšho go letlakala 23]

Jehofa o hlokomela bao ba mo hlankelago

[Diswantšho go letlakala 24]

Ka baka la kholofelo ya bona e kgahlišago, bahlanka ba Jehofa ba thabile e le ka kgonthe