Magole ga a na Mollwane

CHRISTIAN yo a dulago nageng ya Afrika, o ile a gapša ke mašole ao a bego a leka go mo gapeletša gore a tsenele tša bohlabani, eupša o ile a gana go dumelelana le seo ka baka la letswalo la gagwe leo le tlwaeditšwego ka Beibele. Ka gona, mašole a ile a mo iša kampeng moo, ka morago ga gore a bethwe ka matšatši a mane, yo mongwe wa bona o ile a mo thuntšha mo leotong. Christian o ile a kgona go ya sepetlele, eupša leoto la gagwe le ile la swanelwa ke go ripša ka tlase ga letolo. Nageng e nngwe ya Afrika, gaešita le bana ba banyenyane ba ile ba segwa maoto le matsogo a bona ke marabele a itlhamilego. Gomme go tloga Cambodia go ya Balkans, go tloga Afghanistan go ya Angola, dithuthupi di tšwela pele go golofatša batho ba bagolo le ba banyenyane ka go se kgetholle.

Tše dingwe tšeo di oketšegago ke dikotsi le malwetši, a bjalo ka bolwetši bja swikiri. Gaešita le mpholo wo o lego tikologong o ka golofatša. Ka mohlala, ditšhabeng tšeo di bapelanego ditoropong tša ka Bohlabela bja Yuropa, bana ba bantši ba belegwe letsogo la go ja goba la ntsogošo le e na le karolo ya go fihla sejabaneng. Ba na le sekonana ka morago ga sejabana. Bohlatse bo šupa tshenyong ya leabela e bakilwego ke tšhilafalo ya dikhemikhale. Batho ba bangwe ba bantši ba sa dutše ba e-na le maoto le matsogo a bona a feletšego eupša lega go le bjalo ba golofetše ka baka la go repha ditho goba ditlaišego tše dingwe. Ka kgonthe, magole ga a na mollwane.

Go sa šetšwe gore a bakwa ke’ng, magole e ka ba a nolago moko. Junior o ile a lahlegelwa ke karolo ya leoto la gagwe ge a be a e-na le nywaga e 20. Ka morago o itše: “Ke bile le mathata a mantši a maikwelo. Ke ile ka lla kudu ka baka la gore ke tseba gore nka se tsoge ke bile le leoto la-ka gape. Ke be ke sa tsebe seo nka se dirago. Ke be ke gakanegile.” Lega go le bjalo, ge nako e dutše e tšwela pele, boemo bja kgopolo bja Junior bo ile bja fetoga ka mo go lemogegago. O ile a thoma go ithuta Beibele gomme a ithuta dilo tšeo di ilego tša se mo thuše fela go lebeletšana ka katlego le bogole bja gagwe eupša gape di mo file kholofelo e botse ya bokamoso bja lethabo gona mo lefaseng. Ge e ba o golofetše, na o tla rata go ba le kholofelo yeo?

Ge e ba go le bjalo, gona hle bala sehlogo se se latelago. Re go kgothaletša gore o bale ditšhupetšo tša Mangwalo ka Beibeleng ya gago e le gore o ka iponela ka noši seo Mmopi a se boloketšego bao ba ithutago ka merero ya gagwe le go dumelelanya maphelo a bona le yona.