“Etlang go Nna, . . . Gomme ke tla le Lapološa”

Dikoketšego tše Dikgolo di Dira Gore go Nyakege Katološo ya Kapejana

JESU KRISTE o itše: “Etlang go nna, . . . gomme ke tla le lapološa.” (Mateo 11:​28, NW) A taletšo e thabišago gakaakang e tšwago go Hlogo ya phuthego ya Bokriste! (Ba-Efeso 5:​23) Ge re naganišiša ka mantšu ao, re ka se palelwe ke go thabela mothopo o bohlokwa wa tapološogo kopanela le bana babo rena le dikgaetšedi ba moya dibokeng tša Bokriste. Ka ntle le pelaelo re dumelelana le mopsalme yo a opetšego ka gore: “A botse le thatêxô! xe bana ba motho bà dula bà kwana!”—Psalme 133:1.

Ka kgonthe, bagwera ba rena dibokeng tše bjalo tša borapedi ke ba ba kaone, gomme tikologo ya moya ke e bolokegilego le e thabišago. Ka gona, ke ka lebaka le lebotse, ge mofsa yo mongwe wa Mokriste a itše: “Ke ya sekolong mosegare ka moka, gomme se se mphetša matla. Eupša diboka di bjalo ka tapološo leganateng, moo ke lapološwago e le gore ke kgone go lebeletšana le letšatši le le latelago la sekolo.” Mofsa wa mo-Nigeria o itše: “Ke hweditše gore go tlwaelana kgaufsi le ba bangwe bao ba ratago Jehofa go nthuša go dula ke le kgaufsi le yena.”

Holo ya Mmušo ya lefelong la geno e kgotsofatša senyakwa se segolo e le lefelo la borapedi bja therešo setšhabeng. Mafelong a mantši, diboka di swarelwa Holong ya Mmušo bonyenyane gabedi ka beke, gomme barutwana ba Beibele ba kgothaletšwa go ba gona kapejana ka mo go ka kgonega e le gore ba holwe ke bogwera bjo bo agago fao.—Ba-Hebere 10:​24, 25.

 Senyakwa se se Akgofilego

Lega go le bjalo, ke mo go lemogegago gore ga se Dihlatse tša Jehofa ka moka tšeo di nago le Holo ya Mmušo e swanetšego. Kgolo e makatšago dipalong tša bagoeledi ba Mmušo lefaseng ka bophara e bakile go nyakega ga thušo e akgofilego. Diholo tša Mmušo tše dikete di sa dutše di nyakega, kudu-kudu dinageng tšeo di hlabologago.—Jesaya 54:2; 60:22.

Go bontšha se: Go be go na le Diholo tša Mmušo tše lesome fela bakeng sa diphuthego tše 290 motse-mošate wa Democratic Republic of Congo. Naga yeo e nyaka Diholo tša Mmušo tše dintši ka mo go akgofilego. Kua Angola diphuthego tše dintši di swarela diboka ka ntle ka gobane go na le palo e lekanyeditšwego fela ya Diholo tša Mmušo. Dinyakwa tše di swanago di gona dinageng tše dingwe tše dintši.

Ka gona, ga e sa le go tloga ka 1999, maiteko a mohlakanelwa a ile a dirwa bakeng sa go thuša ka go agwa ga Diholo tša Mmušo moo go nago le ditlabakelo tše di lekanyeditšwego. Bakeng sa go thuša ka ditlabakelo tša go aga dinageng tše bjalo Dihlatse tšeo di nago le phihlelo di ile tša ithapela go diriša ditlabakelo tša tšona. Ge maiteko a bjalo a kopantšwe le moya wa go rata le go hwetšagala ga baithapi ba lefelong leo, mafelelo ke ao a kgothatšago kudu. Go feta moo, Dihlatse tša lefelong leo di holwa ke tlwaetšo yeo di e hwetšago. Tše ka moka di thuša go fihlelela go nyakega ga go agwa ga Diholo tša Mmušo dinageng tša gabo tšona.

Thušo e šomago e newa ka mokgwa o feto-fetogago go agweng ga Holo ya Mmušo go dirišwa mekgwa le ditlabakelo tša lefelong leo. Pakane ga se fela go fihlelela go nyakega mo go golo ga Diholo tša Mmušo eupša gape le go ba le lenaneo la go lokiša leo le tla dumelelanago le maemo a lefelong leo.—2 Ba-Korinthe 8:​14, 15.

Ditiragalo tše di Lapološago

Mafelelo a maiteko a a go nea mafelo a borapedi ke afe? Mathomong a 2001, pego e tšwago Malawi e itše: “Selo seo se šetšego se dirilwe mo nageng ye e tloga e le se se kgahlišago kudu. Dikgwedi tše pedi tše di latelago, re tlo feleletša Diholo tša Mmušo tše di oketšegilego.” (Diswantšho 1 le 2) Kua Togo baithapi ba ile ba kgona go aga Diholo tša Mmušo tše bonolo tše mmalwa dikgweding tša morago bjale. (Seswantšho 3) Modiro o mobotse wo o dirwago ke baithapi bao ba ratago le wona o thuša go nea Diholo tša Mmušo tše di swanelegago kua Mexico, Brazil le dinageng tše dingwe.

Diphuthego di hwetša gore ge go agilwe Holo ya Mmušo, batho ba tikologong ba lemoga gore Dihlatse tša Jehofa ga go na mo di yago gona. Go bonagala ba bantši ba be ba dika-dika go kopanela le Dihlatse go fihlela lefelo le le swanelegago la  borapedi le be le hwetšagala. Phuthego ya Nafisi kua Malawi e bega gore: “Ga bjale ka ge re na le Holo ya Mmušo e swanelegago, se se feleletša ka bohlatse bjo bobotse. Ka gona, go bonolo go thoma dithuto tša Beibele.”

Ditho tša Phuthego ya Krake kua Benin di ile tša kgotlelela go kwerwa mo gogolo nakong e fetilego ka gobane Holo ya tšona ya Mmušo ya pele e be e le ya kgale ge e bapišwa le dikereke tše dingwe. (Seswantšho 4) Ga bjale phuthego e na le Holo ya Mmušo e botse yeo e bontšhago borapedi bja therešo ka mokgwa wa bothakga e bile e le wa seriti. (Seswantšho 5) Phuthego ye e be e na le bagoeledi ba Mmušo ba 34 ka palo-moka ya ba bago dibokeng tša Sontaga ba 73, eupša ba 651 ba bile gona ge Holo ya Mmušo e be e neelwa. Bontši bja bona e be e le batho ba lefelong leo  bao ba bego ba kgahlišitšwe ka mo go swanetšego ke go bona gore Dihlatse di be di kgona go aga holo ka lebaka le lekopana fela. Lekala la Zimbabwe ge le naganišiša ka mediro ya nakong e fetilego tabeng ye, le ngwadile gore: “Ka kgwedi e tee feela ya go aga Holo ya Mmušo e mpsha, gantši palo ya bao ba bago gona e oketšega gabedi.”—Diswantšho 6 le 7.

Ka ntle le pelaelo, Diholo tša Mmušo tše dintši tše difsa di thuša bakeng sa go nea mafelo a tapološo ya moya bakeng sa Bakriste ba ineetšego gotee le batho ba thabelago. Hlatse e nngwe kua Ukraine ka morago ga ge phuthego ya lefelong la gabo e thomile go diriša Holo ya yona ya Mmušo e mpsha e itše: “Re ikwa re thabile kudu. Re iponetše ka mahlo a rena kamoo Jehofa a thušago batho ba gagwe.”

[Lepokisi/Diswantšho go letlakala 10, 11]

Thekgo ya go Fana Kudu e a Lebogwa

Dihlatse tša Jehofa di thabišwa ke go bona tšwelopele ya lebelo yeo e dirilwego go fihlelela go nyakega ga kapejana ga Diholo tša Mmušo tše difsa go dikologa lefase. Go oketšega ka lebelo ga palo ya barapedi ba Jehofa dinageng tše di fapa-fapanego go nyaka gore go agwe Diholo tša Mmušo tše dintši tše difsa nakong e tlago. Ka gore, ka kakaretšo, ngwageng wa tirelo wa 2001 diphuthego tše difsa tše 32 di ile tša hlongwa beke e nngwe le e nngwe! Diphuthego tše bjalo di nyaka mafelo a go kopanela le a borapedi.

Potšišo e ka rotoga, ‘Re lefelela bjang mediro e bjalo ka go agwa ga Diholo tša Mmušo tše difsa, kudu-kudu dinageng tšeo bana babo rena ba nago le thušo e lekanyeditšwego ya tša ditšhelete?’ Karabo e akaretša thekgo ya Modimo gotee le go fana kudu ga batho.

Ka go dumelelana le kholofetšo ya gagwe, Jehofa o tšhollela moya wa gagwe o mokgethwa go bahlanka ba gagwe, a ba dira gore ba “humê medirô e boló, ba ratê xo nea, ba abêlê ba bangwê.” (1 Timotheo 6:​18) Moya wa Modimo o tutuetša Dihlatse tša Jehofa go thekga modiro wa go bolela ka Mmušo ka ditsela ka mokago neela nako ya tšona, matla, mošomo wa tšona le ditlabakelo tše dingwe medirong ya Bokriste.

Moya wa go fana kudu o tutuetša Dihlatse le batho ba bangwe bao ba thušago ka modiro wa go katološwa le go agwa ka tša ditšhelete. Go tlaleletša go thušeng go lefelela ditshenyagalelo tša ka mehla tša phuthego ya lefelong leo, di neela bakeng sa modiro wa go aga dikarolong tše dingwe tša lefase.

Phuthegong e nngwe le e nngwe, go na le mapokisi ao a ngwadilwego gabotse gore “Meneelo Bakeng sa Modiro wa Lefase ka BopharaMateo 24:​14.” Batho ba ka tsenya meneelo ya boithatelo ka fao ge e ba ba nyaka. (2 Dikxoši 12:9) Meneelo ka moka, e megolo le e menyenyane, e a lebogwa. (Mareka 12:​42-44) Ditšhelete tše di dirišwa ka mekgwa e fapa-fapanego go ya ka dinyakwa, go akaretša le go agwa ga Diholo tša Mmušo. Ditšhelete tše bjalo ga di dirišetšwe go lefelela balaodi bao ba golago ka gobane Dihlatse tša Jehofa ga di nabo.

Na meneelo e yago go modiro wa lefase ka bophara e phetha morero wa yona? Ee, e a o phetha. Lekala la kua Liberianaga yeo e sentšwego ke ntwa ya selegaele bega gore bontši bja Dihlatse tša lefelong leo di lebeletšana le go hloka mošomo le mathata a tša ditšhelete. Batho ba Jehofa lefelong le ba ka hwetša bjang mafelo a swanelegago a borapedi? Ofisi ya lekala e re: “Meneelo ya go fana kudu ya bana babo rena dinageng tše dingwe e tla dirišetšwa go lefelela modiro. A tokišetšo e bohlale le e lerato gakaakang!”

Bana babo rena ba lefelong leo le bona ba ntšha meneelo, go sa šetšwe go ipalela ga bona. Naga ya Afrika ya Sierra Leone e bega gore: “Bana babo rena ba lefelong leo ba thekga maiteko e bile ba thabela go nea mošomo wa bona le meneelo le ge e le efe ya tša ditšhelete yeo ba ka e kgonago go thekga go agwa ga Diholo tša Mmušo.”

Mafelelong, maiteko a a go aga a tliša tumišo go Jehofa. Bana babo rena ba Liberia ba bolela ka mafolofolo gore: “Go agwa ga mafelo a swanelegago a borapedi nageng ka moka go tla bontšha batho gore borapedi bja therešo bo tla dula bo le gona e bile bo tla nea seriti le go thakga leina la Modimo wa rena le legolo.”