Dipotšišo tše Tšwago go Babadi

Na e tla ba ga bohlale gore Mokriste wa therešo a be gona polokong goba lenyalong leo le swaretšwego ka kerekeng?

Go tšea karolo sebopegong le ge e le sefe sa borapedi bja maaka ga go kgahliše Jehofa gomme go swanetše go phengwa. (2 Ba-Korinthe 6:​14-17; Kutollo 18:4) Poloko yeo e swaretšwego ka kerekeng ke tirelo ya bodumedi yeo gantši e akaretšago thero yeo e phatlalatšago dikgopolo tšeo e sego tša mangwalo tše bjalo ka go se hwe ga moya le moputso wa go ya legodimong bakeng sa batho ka moka ba go loka. Le gona, e ka akaretša ditiro tše bjalo ka go dira pontšho ya sefapano le go kopanela thapelong yeo e rapelwago ke moruti. Dithapelo le ditiro tše dingwe tša bodumedi tšeo di sa dumelelanego le thuto ya Beibele le tšona di ka ba karolo ya tirelo ya bodumedi ya lenyalo yeo e swaretšwego ka kerekeng goba lefelong le lengwe. Go ka ba thata gore Mokriste a ganetše kgateletšo ya go akaretšwa ge e ba a le gare ga sehlopha seo yo mongwe le yo mongwe a tšeago karolo tirong ya bodumedi bja maaka. Ke ga bošilo gakaakang go ipea kotsing ya kgateletšo e bjalo!

Go thwe’ng ge e ba Mokriste a ikwa a gapeletšega go ba gona polokong goba lenyalong leo le swaretšwego ka kerekeng? Ka mohlala, monna yo a sa dumelego a ka opeletša mosadi wa gagwe yo e lego Mokriste gore a be le yena tiragalong e bjalo. Na a ka ba le yena e le mmogedi yo a ikhomoletšego? Ka go hlompha dikgahlego tša monna wa gagwe, mosadi a ka phetha ka go ya le yena, a ikemišeditše gore a se ke a tšea karolo ditirelong le ge e le dife tša bodumedi. Ka lehlakoreng le lengwe, a ka phetha ka go se ye a naganne ka gore kgateletšo ya maikwelo ya tirelo e ka mo imela, mohlomongwe ya mo dira gore a kwanantšhe melao ya motheo ya Modimo. Ke yena yo a tla swanelago ke go itirela phetho. Ka ntle le pelaelo o tla nyaka go ikwa a se na molato, a na le letswalo le le hlwekilego.1 Timotheo 1:19.Go sa šetšwe gore boemo ke bofe, mosadi o tla holega ka go hlalosetša monna wa gagwe gore ka baka la letswalo a ka se kgone go tšea karolo tirelong le ge e le efe ya bodumedi goba go kopanela go opeleng difela goba go inamiša hlogo ya gagwe ge go rapelwa. Motheong wa tlhaloso ya gagwe, a ka phetha ka gore go ba gona ga mosadi wa gagwe go ka tšweletša boemo bjo bo ka se mo thabišego. A ka kgetha go ya a nnoši ka baka la lerato la go rata mosadi wa gagwe, go hlompha ditumelo tša gagwe goba kganyogo ya go phema go lešwa dihlong le ge e le gofe. Eupša ge e ba a gapeletša gore mosadi wa gagwe a sepele le yena, a ka fo ya e le mmogedi feela.

Nagana ka mafelelo ao go ba gona ga rena tirelong moagong wa bodumedi go ka bago le ona go badumedi-gotee le rena. Na go ka gobatša matswalo a ba bangwe? Na go gana ga bona go phema go akaretšwa borapeding bja medimo ya diswantšho go ka fokodišwa? Moapostola Paulo o eletša ka gore: “Le tsebê xo hlaoloxanya boló le bobe, xore Le bê basekexi ba-ila-bosodi, xo bê xo tlê letšatši la Kriste.”—Ba-Filipi 1:10.

Ge e ba tiragalo e akaretša wa leloko la kgaufsi, go ka ba le dikgateletšo tše oketšegilego tša lapa. Go sa šetšwe gore boemo ke bofe, Mokriste o swanetše go hlahloba ka kelohloko maemo ka moka ao a akaretšwago. Ka tlase ga maemo a mangwe, a ka phetha ka gore go ka se be le mathata ao a ka tsogago ka go ba gona polokong goba lenyalong leo le swaretšwego ka kerekeng e le mmogedi. Lega go le bjalo, maemo e ka ba gore ka go ba gona ga gagwe, go ka ba le kgonagalo ya gore letswalo la gagwe goba la ba bangwe le gobale kudu go feta mehola ye e ka hwetšwago ka go ba gona. Boemong le ge e le bofe, Mokriste o swanetše go kgonthišetša gore phetho yeo a e tšeago e ka se mo thibele gore a boloke letswalo le lebotse pele ga Modimo le batho.