Modimo ke Mang?

THE Encyclopedia Americana e re: “Modimo ke leina leo ka mo go tlwaelegilego le newago mothopo o mogolo wa matla a legohle le yo boineelo bja borapedi bo lebišwago go yena.” Pukuntšu e hlalosa lentšu “Modimo” e le “mo-ba-gona yo a phagamego.” Sebopego sa mo-ba-gona yo ke sefe?

Na Modimo ke matla a sa bonagalego goba ke motho wa kgonthe? Na o na le leina? Na ke modimo wa dikarolo tše tharo, Boraro botee bjalo ka ge ba bantši ba dumela? Re ka tseba Modimo bjang? Beibele e nea dikarabo tše di nepagetšego le tše kgotsofatšago tša dipotšišo tše. Ge e le gabotse, e re kgothaletša go tsoma Modimo, e re: “Xa a kxolê, ó kxaufsi le e mongwê le e mongwê wa ba re lexo fá.”—Ditiro 17:27.

Matla a sa Bonagalego Goba Motho wa Kgonthe?

Ba bantši bao ba dumelago go Modimo ba nagana ka yena e le matla, e sego motho. Ka mohlala, ditlogong tše itšego, medimo e tswalanywa le matla a tlhago. Ba bangwe bao ba hlahlobilego bohlatse bjo bo kgobokeditšwego ka nyakišišo ya thutamahlale ka sebopego sa legohle le mokgwa wa bophelo lefaseng ba phethile ka gore go swanetše go ba le Sebaki sa Mathomo. Lega go le bjalo, ba dika-dika go tswalanya semelo le Sebaki se.

Lega go le bjalo, na go raragana ga tlholo ga go bontšhe gore Sebaki sa Mathomo se swanetše go ba se na le bohlale bjo bogolo? Bohlale bo nyaka monagano. Monagano o mogolo wo o ikarabelago ka tlholo ka moka ke wa Modimo. Ee, Modimo o na le mmele, e sego wa nama go etša wa rena, eupša mmele wa moya. Beibele e re: “Byalo ka xe xo na le mmele wa nama, le mmele wa môya o xôna.” (1 Ba-Korinthe 15:​44) Beibele ge e hlalosa sebopego sa Modimo e bontšha gabotse gore: “Modimo ké Môya.” (Johane 4:​24) Moya o na le mohuta wa bophelo wo o fapanego kudu le wa rena gomme batho ba ka se kgone go o bona. (Johane 1:​18) Gape go na le dibopiwa tša moya tše di sa bonagalego. Ke barongwa“barwa ba Modimo.”Jobo 1:6; 2:1.

Ka ge Modimo e le motho yo a sa bopjago yo a nago le mmele wa moya, ka mo go kwagalago o na le lefelo la bodulo. Ge e bolela ka lefelo la moya, Beibele e re botša gore magodimo ke ‘bodulo bjo bo tiilego’ bja Modimo. (1 Dikxoši 8:​43) Gape mongwadi wa Beibele Paulo o re: ‘Kriste  o tsene gona kwa magodimong, gomme bjale o bonala pele ga sefahlogo sa Modimo ka lebaka la rena.’—Ba-Hebere 9:24.

Lentšu “moya” gape le dirišwa ka Beibeleng ka kgopolo e nngwe. Ge a bolela le Modimo ka thapelo, mopsalme o itše: “ ’Me xe O roma môya wa xaxo, di a bopêxa.” (Psalme 104:​30) Moya wo ga se Modimo ka boyena eupša ke matla ao Modimo a a romelago, goba a a dirišago go phethagatša selo le ge e le sefe seo a ratago go se phetha. Ka moya wo, Modimo o bopile magodimo a kgonthe, lefase le dilo tšohle tšeo di phelago. (Genesi 1:2; Psalme 33:6) Moya wa gagwe o bitšwa moya o mokgethwa. Modimo o dirišitše moya wa gagwe o mokgethwa go budulela banna bao ba ngwadilego Beibele. (2 Petro 1:​20, 21) Ka gona, moya o mokgethwa ke matla a šomago a sa bonagalego ao Modimo a a dirišago go phethagatša merero ya gagwe.

Modimo o na le Leina la Moswana-noši

Mongwadi wa Beibele Aguri o botšišitše gore: “Ké mang a kaxo khuparetša phefô ka diatla? Mawatlê, ké mang a kaxo a phuthêla mo kobong? Ké mang a beilexo morumô wa lefase?Leina la xaxwe ké mang?Le Morwa wa xaxwe, leina la xaxwe ké mang?” (Diema 30:4) Ge e le gabotse, Aguri o be a botšiša gore, ‘Na o tseba leina goba lešika la motho le ge e le ofe yo a dirilego dilo tše?’ Ke Modimo fela yo a nago le matla a go laola matla a tlhago. Le ge tlholo e nea bohlatse bjo matla bja go ba gona ga Modimo, ga e bolele selo ka leina la Modimo. Ge e le gabotse, re ka se tsoge ra tseba leina la Modimo ka ntle le ge Modimo ka boyena a ka re utollela lona. Gomme o le utollotše. Mmopi o re: “Ke Nna Jehofa, ke lona leina la-ka.”—Jesaya 42:​8, PK.

Leina la Modimo la moswana-noši, Jehofa, le tšwelela mo e ka bago ka makga a 7 000 ka Mangwalong a Sehebere fela. Jesu Kriste o ile a tsebiša ba bangwe leina le gomme a le tumiša pele ga bona. (Johane 17:​6, 26) Leina leo le hwetšwa ka pukung ya mafelelo ya Beibele e le karolo ya lentšu “Haleluya,” leo le bolelago gore “retang Jah.” Gomme “Jah” ke mokgwa wa go kgaoletšwa ga “Jehofa.” (Kutollo 19:​1-6, bapiša le NW.) Lega go le bjalo, Dibeibele tše dintši tša mehleng yeno di diriša leina leo ka sewelo. Malemeng a mangwe gantši di diriša lentšu “MORENA” goba “MODIMO,” le ngwadilwe ka ditlhaka tše dikgolo bakeng sa go le hlaola gare ga direto “Morena” le “Modimo.” Diithuti tše dingwe di šišinya gore  leina la Modimo le ka be le ile la bitšwa ka gore Yahweh.

Ke ka baka la’ng go na le dipono tše bjalo tše di fapanego ka leina la Motho yo mogolo kudu legohleng? Bothata bo thomile nywaga-kgolo e fetilego ge ba-Juda ka ditumela-khwele ba be ba kgaotša go bitša leina la Modimo gomme ba thoma go diriša lentšu la Sehebere “Morena yo a Phagamego” le ge e le kae ge ba gahlana le leina la Modimo ge ba bala Mangwalo. Ka ge Sehebere sa Beibele se be se ngwadilwe se se na ditumanoši, ga go kgonege go tseba tsela yeo ka yona Moše, Dafida le batho ba bangwe ba mehleng ya bogologolo ba bego ba bitša ditlhaka tšeo di bopago leina la Modimo. Lega go le bjalo, mmiletšo wa Seisemane, wa Jehofa, o be o dutše o dirišwa ka nywaga-kgolo, gomme go dumelelana ga lona ka maleme a mantši ke mo go tsebjago kudu lehono.—Ekisodo 6:3; Jesaya 26:​4, PK.

Gaešita le ge go na le go se kgonthišege mabapi le kamoo leina la Modimo le bego le bitšwa ka gona ka Sehebere sa bogologolo, seo le se bolelago ga se sephiri. Leina la gagwe le bolela gore “Yo a Bakago go ba Gona.” Ka go rialo Jehofa Modimo o ipontšha e le Mophethi yo Mogolo wa Merero. Ka mehla o dira gore merero ya gagwe le dikholofetšo di phethagale. Ke fela Modimo wa therešo, yo a nago le matla a go dira se, yo ka mo go swanetšego a ka bago le leina le.—Jesaya 55:11.

Ka ntle le pelaelo, leina Jehofa le šoma go hlaola Modimo Ra-matla-ohle go medimo e mengwe. Ke ka baka leo leina leo le tšwelelago gantši ka tsela ye ka Beibeleng. Gaešita le ge diphetolelo tše dintši di sa diriše leina la Modimo, Psalme 68:4 e bontšha gabotse gore: “Leina la xaxwe ké Jehofa. Pele xa xaxwe Le xobê mexobô.” Nakong ya bodiredi bja gagwe, Jesu Kriste o rutile balatedi ba gagwe gore: “Xe Le rapêla, Le re: Tata-wešo wa maxodimong! Leina la xaxo a le kxêthwê.” (Mateo 6:9) Ka gona, re swanetše go diriša leina la Modimo ge re rapela, ge re bolela ka yena le go mo tumiša pele ga ba bangwe.

Na Jesu ke Modimo?

Jehofa Modimo ka boyena o bontšha gabotse gore Morwa wa gagwe ke mang. Pego ya Ebangedi ya Mateo e bolela gore ka morago ga ge Jesu a kolobeditšwe, “xwa tloxa xò kwala lentšu le le tšwaxo lexodimong lè re: Yêna-yo ké Yêna Morwa-moratwa wa-ka, yo ke kxahlwaxo ke Yêna.” (Mateo 3:​16, 17) Jesu Kriste ke Morwa wa Modimo.

Lega go le bjalo, batho ba bangwe ba bodumedi ba bolela gore Jesu ke Modimo. Ba bangwe ba re Modimo ke Boraro botee. Go ya ka thuto ye, “Tate ke Modimo, Morwa ke Modimo le Moya o Mokgethwa ke Modimo, eupša ga go na Medimo e meraro eupša ke Modimo o tee.” Go dumelwa gore boraro bjo “ke bja ka mo go sa felego e bile bo a lekana.” (The Catholic Encyclopedia) Na dipono tše bjalo di nepagetše?

Go ya ka Jehofa, Mangwalo a buduletšwego a re: “Wa mehla e se naxo mathômô, e se naxo mafêlô; O Modimo.” (Psalme 90:2) Ke “Kxoši Ra-mabaka-a-neng-le-neng”yo a se nago mathomo goba mafelelo. (1 Timotheo 1:​17) Ka lehlakoreng le lengwe, Jesu ke “tháka-letswálô yá dibopya tšohle,” “Yêna Mo-thôma-hlôlô-ya-Modimo.” (Ba-Kolose 1:​13-15; Kutollo 3:​14) A bolela ka Modimo e le Tatagwe, Jesu o itše: “Tate ó mpheta ka boxolo.” (Johane 14:​28) Jesu gape o hlalositše gore go be go na le dilo tše dingwe tšeo yena goba barongwa ba bego ba sa di tsebe tšeo di bego di tsebja ke Modimo a nnoši. (Mareka 13:​32) Go feta moo, Jesu o ile a rapela Tatagwe ka gore: “Xo se dirwê thatô ya-ka, xo dirwê ya xaxo.” (Luka 22:​42) O be a rapela mang ge e se Motho yo a mo phagametšego? E bile ke Modimo yo a tsošitšego Jesu bahung, ga se a itsoša.—Ditiro 2:32.

Ka gona, go ya ka Mangwalo, Jehofa ke Modimo Ra-matla-ohle, gomme Jesu ke Morwa wa gagwe. Bobedi bja bona ba be ba sa lekane pele ga ge Jesu a ka tla lefaseng goba nakong ya bophelo bja gagwe bja mo lefaseng; le gona Jesu ga se a ka a lekana le Tatagwe ka morago ga go tsošetšwa legodimong. (1 Ba-Korinthe 11:3; 15:​28) Bjalo ka ge re bone, motho yo a bitšwago wa boraro go Boraro botee, moya o mokgethwa, ga se motho. Go e na le moo, ke matla ao Modimo a a dirišago go phethagatša selo le ge e le sefe seo a ratago go se phetha. Ka gona, Boraro botee ga se thuto ya Mangwalo. * Beibele e re: “Jehofa Modimo wa rena ke Jehofa a nnoši.”—Doiteronomio 6:4, NW.

 Tseba Modimo Gakaone

Bakeng sa go rata Modimo le go mo nea boineelo bjo bo feletšego bjoo bo mo swanetšego, re swanetše go mo tseba e le ka kgonthe kamoo a lego ka gona. Re ka tseba bjang Modimo gakaone? Beibele e re: “Hleng tše di sa bonwexo tša xaxwe, e lexo matla a neng le neng, le bomodimo bya xaxwe, le tšôna xo tloxa thlolong ya lexohle, ba ka di hlatha ka xo bôna ditirô tša xaxwe.” (Ba-Roma 1:​20) Tsela e nngwe ya go tseba Modimo gakaone ke ka go lebelela le go lebiša tlhokomelo ka tebogo dilong tšeo a di bopilego.

Lega go le bjalo, tlholo ga e re botše tšohle tšeo re swanetšego go di tseba ka Modimo. Ka mohlala, go kwešiša gore ke Motho wa kgonthe wa moya yo a nago le leina la moswana-noši, re swanetše go lebelela ka Beibeleng. Ge e le gabotse, go ithuta Beibele ke tsela e kaone ya go tseba Modimo gakaone. Ka Mangwalong, Jehofa o re botša mo gontši mabapi le mohuta wa Modimo yo a lego yena. Gape o re utollela merero ya gagwe le go re ruta ditseleng tša gagwe. (Amosi 3:7; 2 Timotheo 3:​16, 17) Re ka thaba gakaakang gore Modimo o nyaka gore re “fihlêlê tsebô ya therešô,” e le gore re ka holwa ke ditokišetšo tša gagwe tše lerato! (1 Timotheo 2:4) Ka gona, anke re direng boiteko bjo bongwe le bjo bongwe bja go ithuta sohle seo re ka se kgonago ka Jehofa.

[Mengwalo ya ka tlase]

[Diswantšho go letlakala 5]

Modimo o dirišitše moya wa gagwe o mokgethwa go bopa lefase le go budulela batho go ngwala Beibele

[Seswantšho go letlakala 5]

Lentšu le le tšwago magodimong le itše: ‘Yo ke Morwa wa-ka’

[Seswantšho go letlakala 7]

Jesu o ile a rapela Modimo​—Motho yo a mo phagametšego

[Seswantšho go letlakala 7]

Jesu o ile a tsebatša leina la Modimo go ba bangwe

[Diswantšho go letlakala 7]

Re ka tseba Modimo gakaone