Na o Kwešiša Lerato la Modimo?

NAKONG e nngwe monna yo a bitšwago Jobo o ile a hlalosa boemo bja go se phethagale ga motho ka mantšu a: “Motho e a belexwexo ke mosadi, matšatši a xaxwe xa se a makae, ’me ó hoše tapišexo. Ó hloxa byalo ka letšoba, a bê a hlohlorêxê; ó feta byalo ka moriti, xa a tie.” (Jobo 14:​1, 2) Bophelo bjoo Jobo a bego a bo phela ka nako yeo, bo be bo tletše ka tlaišego le manyami. Na o kile wa ikwa ka tsela yeo?

Lega go le bjalo, go sa šetšwe mathata ka moka ao re ka lebeletšanago le ona, go na le kholofelo e tiilego, yeo e theilwego kgaugelong le leratong la Modimo. Sa pele, Tatago rena wa legodimong yo a nago le kgaugelo o neile sehlabelo sa topollo go lopolla batho boemong bja bona bja sebe. Go ya ka Johane 3:​16, 17, Jesu Kriste o itše: “Xobane Modimo ó ratile lefase [batho] xakaakaa, a bá a le nea Morwa wa xaxwe e a tswetšwexo à nnoši, xore mang le mang e a mo dumetšexo a se kê a lahlêxa, a bê le bophelô byo bo sa felexo. Xobane Modimo, Morwa wa xaxwe [Jesu] xa a ka a mo romêla lefaseng xore a le ahlolê; ó mo romile xore lefase le phološwê ke Yêna.”

Le gona ela hloko boemo bja kgopolo bjo botho bja Modimo bjo a bo bontšhitšego go rena batho ba sa phethagalago. Moapostola Paulo o boletše gore: “Ké Yêna a dirilexo xore meloko ka moka ya batho e tšwê mading a o tee, e ênêlê lefase lohle; a e beêla mabaka, le mellwanê, le maaxô; A re ba nyakê Modimo, ba Mo kwê xe a le xôna, ba Mo hwetšê, xobane xa a kxolê, ó kxaufsi le e mongwê le e mongwê wa ba re lexo fá.” (Ditiro 17:​26, 27) Leka go nagana gore seo se bolela’ng go rena! Gaešita le ge re le batho ba sa phethagalago, re sa dutše re ka thabela tswalano ya motho ka noši le Mmopi wa rena yo lerato, Jehofa Modimo.

Ka gona, re ka lebeletšana le bokamoso ka kgodišego, re tseba gore Modimo o na le taba le rena gomme o dirile ditokišetšo tšeo di tlago go re hola ka mo go sa felego. (1 Petro 5:7; 2 Petro 3:​13) Ka gona, ka kgonthe re na le mabaka ka moka a go ithuta ka mo go oketšegilego ka Modimo wa rena yo lerato ka go ithuta Lentšu la gagwe Beibele.