Potego e Hlahla Baloki

BEIBELE e re: “Motho e a belexwexo ke mosadi, matšatši a xaxwe xa se a makae, ’me ó hoše tapišexo.” (Jobo 14:1) Bohloko le tlaišego di bonala e le dilo tše di tlwaelegilego bophelong bja batho. Ka baka la seo, gaešita le bophelo bja letšatši le letšatši bo ka tlala ka dipelaelo le khuduego! Ke eng seo se tlago go re hlahla ka katlego nakong ya maemo a lekago le go re thuša go boloka boemo bjo bo lokilego le Modimo?

Ela hloko mohlala wa monna yo a bego a humile Jobo, yo a phetšego nywaga e ka bago 3 500 e fetilego lefelong leo ga bjale e lego Arabia. A masetla-pelo a makaakang ao Sathane a ilego a a tlišetša monna yo yo a boifago Modimo! O ile a lahlegelwa ke diruiwa tša gagwe gomme a loba bana ba gagwe ba rategago ka lehu. Kapejana ka morago ga moo, Sathane o ile a hlasela Jobo ka dišo tše di hlohlonago go tloga hlogong go ya leotong. (Jobo, dikgaolo 1, 2) Jobo o be a sa tsebe gore ke ka baka la’ng dilo tše mpe di be di mo diragalela. Lega go le bjalo, “[Jobo] xa a ka a senya ka molomo wa xaxwe.” (Jobo 2:​10) O itše: “Nka se ke ka tloša potego ya-ka go nna, go fihlela ge ke e-hwa.” (Jobo 27:5, NW) Ee, potego ya Jobo e ile ya mo hlahla ditekong tša gagwe.

Potego e hlaloswa e le go hlweka boitshwarong goba phethego boitshwarong gomme e akaretša go hloka bosodi pele ga mahlo a Modimo. Lega go le bjalo, ga e bolele go phethagala ga polelo le mediro ya batho bao ba sa phethagalago, bao ba ka se kgonego go dumelelana ka mo go feletšego le ditekanyetšo tša Modimo. Go e na le moo, potego ya batho e bolela boineelo bja pelo ka moka goba boineelo bja pelo e feletšego go Jehofa le go thato ya gagwe le morero wa gagwe. Boineelo bjo bjalo go Modimo bo hlahla bao ba lokilego ka tlase ga maemo ka moka le ka dinako ka moka. Karolo ya pele ya kgaolo ya bo-11 ya puku ya Beibele ya Diema e bontšha kamoo potego ya rena e ka re hlahlago ka gona dibopegong tše mmalwa tša bophelo le go re kgonthišetša ka ditšhegofatšo tšeo di tlago go latela. Ka gona, ka go bontšha kgahlego e tseneletšego, anke re hlahlobeng seo se ngwadilwego fao.

Potego e Lebiša go Beng yo a Botegago Ditirišanong tša Kgwebo

Ge a be a gatelela molao wa motheo wa mabapi le go botega, a diriša mantšu a go reta go e na le mantšu a molao, Kgoši Salomo wa Isiraele ya bogologolo o re: “Kêlô ya xo fora Morêna ó a e hlaswa; ó thabêla moêlêlô wo o lekanexo.” (Diema 11:1) Le ke lekga la mathomo go a mane ka pukung ya Diema moo dikala goba  boima bo dirišwago go bontšha gore Jehofa o kganyoga gore barapedi ba gagwe ba botege ditirišanong tša bona tša kgwebo.Diema 16:​11; 20:​10, 23.

Go atlega ga bao ba dirišago kelo ya boforagoba go se botegee ka ba mo go kganyogegago. Eupša na re tla nyaka go tlogela ditekanyetšo tša Modimo tša botse le bobe e le ka kgonthe ka go akaretšwa mekgweng ya go se botege ya kgwebo? E sego ge e ba re hlahlwa ke potego. Re phema go se botege ka baka la gore meelo yohle ya boima e lego kelo e nepagetšego e bontšhago go botega, e thabiša Jehofa.

“Bohlale bo na le Moipoetši”

Kgoši Salomo o tšwela pele ka gore: “Na boikgogomošo bo tšweletše? Go tla latela tša dihlong; eupša bohlale bo na le bao ba ipoetšago.” (Diema 11:2, NW) Boikgogomošogo sa šetšwe gore bo itšweletša e le boikgantšho, go se kwe goba lehufabo tliša manyami. Ka lehlakoreng le lengwe, go lemoga diphošo tša rena ka boikokobetšo ke tsela e bohlale. Mehlala ya Mangwalo e hlalosa therešo ya seema se gabotse gakaakang!

Mo-Lefi yo a nago le lehufa e lego Kora, o ile a etelela sehlopha sa marabele pele malebana le bolaodi bja bahlanka ba ba kgethilwego ke Jehofa e lego Moše le Arone. Mafelelo a tiro yeo ya boikgogomošo e ile ya ba afe? ‘Lefase le ile la ahlama la metša’ ba bangwe ba marabele, mola ba bangwe, go akaretša le Kora, ba ile ba fišwa ka mollo. (Numeri 16:​1-3, 16-35; 26:​10; Doiteronomio 11:6) A mahlabiša-dihlong a makaakang! Le gona ela hloko Usa, yoo ka boikgogomošo a ilego a otlolla letsogo gomme a swara areka ya kgwerano go ithibela gore e se ke ya wa. O ile a bolawa le semeetseng. (2 Samuele 6:​3-8) Go bohlokwa gakaakang gore re pheme boikgogomošo!

Motho yo a ikokobeditšego ga a ke a lewa ke dihlong gaešita le ge a foša. Gaešita le ge Jobo e be e le mohlala ka ditsela tše ntši, o be a sa phethega. Diteko tša gagwe di utollotše bofokodi bjo bogolo dikgopolong tše dingwe tša gagwe. E le ge a itefeletša malebana le balatofatši ba gagwe, Jobo o ile a se be le teka-tekano ka tsela e itšego. O ile a ba a bontšha gore o be a lokile kudu go feta Modimo. (Jobo 35:​2, 3) Jehofa o ile a phošolla bjang kgopolo ya Jobo?

Jehofa o ile a bolela ka lefase, lewatle, magodimo a tletšego dinaledi, tše dingwe tša diphoofolo le dimakatšo tše dingwe tša tlholo, ge a be a nea Jobo thuto ka bonyenyane bja motho ge bo bapetšwa le bogolo bja Modimo. (Jobo, dikgaolo 38-41) Polelong ya gagwe ga go na moo Jehofa a ilego a bolela lebaka leo ka lona Jobo a bego a tlaišega. Go be go sa hlokege gore a dire bjalo. Jobo o be a ikokobeditše. O ile a lemoga ka boikokobetšo phapano e kgolo magareng ga gagwe le Modimo, magareng ga go se phethagale ga gagwe le mafokodi a gagwe ka noši le go loka ga Jehofa le matla a gagwe. O itše: “Ke a inyatša, ke a ithsôla kè le lerole le molôra.” (Jobo 42:6) Potego ya Jobo e ile ya mo dira gore a amogele tayo kapejana. Go thwe’ng ka rena? Re hlahlwa ke potego, na re tla amogela tayo kapejana goba phošollo ge e nyakega?

Moše le yena o be a ikokobeditše. Ge a be a lapišwa ke go rarolla mathata a ba bangwe, ratswal’gwe e lego Jethero o ile a mo nea tharollo e šomago: Abelana boikarabelo le banna ba bangwe ba swanelegago. Ka go lemoga mafokodi  a gagwe ka noši, Moše ka bohlale o ile a amogela tšhišinyo. (Ekisodo 18:​17-26; Numeri 12:3) Monna yo a ikokobeditšego ga a dika-dike go abela ba bangwe bolaodi, goba a tšhaba gore yena ka noši ka tsela e itšego o lahlegelwa ke bolaodi ka go abelana maikarabelo a swanetšego le banna ba bangwe bao ba swanelegago. (Numeri 11:​16, 17, 26-29) Go e na le moo, o fišegela go ba thuša gore ba tšwele pele moyeng. (1 Timotheo 4:​15) Na seo ga se sa swanela go ba sa therešo le ka rena?

‘Tsela ya e a se Nago Bosodi e Lokile’

Ge Salomo a be a lemoga gore ga se ka mehla potego e šireletšago moloki kotsing goba masetla-pelong o ile a bolela gore: “Baloki ba etetšwa ke tokô [“potego,” NW] ya bôná; bahlanoxi ba senywa ke maaká a bôná.” (Diema 11:3) Ka ntle le pelaelo potego e hlahla moloki gore a dire seo se nepagetšego mahlong a Modimo, gaešita le ka tlase ga maemo a thata, gomme mafelelong ya mo tlišetša mehola. Jobo o ile a gana go lahla potego ya gagwe, gomme Jehofa o ile “a šexofatša Jobo ka tše di tlilexo byale; tša fetiša tša mola pele.” (Jobo 42:​12) Baradia ba ka nagana gore ba a ikaonefatša ka go gobatša motho yo mongwe gomme ba ka bonala ba atlega ka nakwana. Eupša go se go ye kae boradia bja bona bo tla ba fediša.

Kgoši e bohlale e re: “Mahumô xa’ phediše mohla wa boxale; lehung xo hlakodiša boló.” (Diema 11:4) Ke ga bošilo gakaakang go šoma ka thata bakeng sa go hwetša dilo tše di bonagalago eupša ra palelwa ke go dira nako bakeng sa thuto ya motho ka noši, thapelo, go kopanela diboka le tirelo ya tšhemomediro yeo e godišago lerato la rena la go rata Modimo le go matlafatša boineelo bja rena go yena! Ga go na tekanyo ya lehumo yeo e tlago go re phološa masetla-pelong a magolo ao a tlago. (Mateo 24:​21) Ke feela go loka ga baloki mo go tla phološago. (Kutollo 7:​9, 14) Ka gona, re ba bohlale ka go ela hloko kgopelo ye ya Tsefanya: “Lè sešo la fihlêlwa ke letšatši la kxalefô ya Morêna. Nyakang Morêna, lena babôtla bohle ba lefase, lena Le yaxo ka molaô w’axwe. Tsomang tokô, Le tsomê boikokobetšô.” (Tsefanya 2:​2, 3) Ga bjale, a re ikemišetšeng go ‘loba Morena ka lehumo la rena.’Diema 3:9.

A gatelela ka mo go oketšegilego bohlokwa bja go phegelela toko, Salomo o fapanya mafelelo a moloki le a yo kgopo, ka go bolela gore: “Boló bya moloki [“e a se nago bosodi,” PK] bo tla mo thulêla tsela; e mobe ó kxopya ke bobe bya xaxwe. Moloki ó phedišwa ke boló bya xaxwe; bahlanoxi ba tlo tanywa ke tše ba bexo ba di duma. Motho mobe mohla’lehu e ba xo hlôbôxa; xo senyêxa pôtô ya dihlôlá. Moloki ó nthšiwa tlalelong; e mobe ó tsêna xo yôna.” (Diema 11:​5-8) Motho e a se nago bosodi ditseleng tša gagwe ga a we goba a tanywa ditirišanong tša gagwe. Tsela ya gagwe e lokile. Mafelelong, baloki ba phološwa tlaišegong. Ba babe ba ka bonala ba le matla, eupša ga ba letelwa ke phološo e bjalo.

“Motse ó Thabêla Mahlatse”

Potego ya baloki le bobe bja ba badira-dibe le tšona di kgoma batho ba bangwe. Kgoši ya Isiraele e re: “Sehlôlá se senya sa xasô ka molomo; moloki ó pholoxa ka se a se tsebaxo.” (Diema 11:9) Ke mang a ka ganago gore go thomeletša, lesebo le kotsi, polelo e sa lokago le mehlamo ya go se re selo di gobatša ba bangwe? Ka lehlakoreng le lengwe, polelo ya moloki e sekile, ke e naganišišitšwego gabotse le e naganelago. O šireletšwa ke tsebo ka gobane potego ya gagwe e mo hlama ka bohlatse bjo bo nyakegago go bontšha gore balatofatši ba gagwe ba na le maaka.

Kgoši e tšwela pele ka gore: “Motse ó thabêla mahlatse a baloki; o xoloka xe babe ba lôba.” (Diema 11:​10) Ka kakaretšo baloki ba a ratega,  gomme ba dira gore baagišani ba bona ba ikwe ba hlalalaba thabile. Ruri ga go le o tee yo a ratago ‘ba babe.’ Ge bakgopo ba e-hwa, ga se gantši batho ka kakaretšo ba ba llela. Ka ntle le pelaelo go ka se be le manyami ge Jehofa ‘a fediša ba babe nageng, bakgelogi ba rakwa mo go yona.’ (Diema 2:​21, 22) Go e na le moo, go tla ba le lethabo ka gobane ba ka se sa ba gona le ka mohla. Eupša go thwe’ng ka rena? Re dira gabotse ge re ela hloko ge e ba tsela yeo re itshwarago ka yona e okeletša lethabong la ba bangwe.

‘Motse o a Gola’

Ge a dira phapano ka mo go oketšegilego ya baloki le bakgopo setšhabeng, Salomo o re: “Motse o xola ka dithšexofatšô tša baloki; o thubya ke melomo ya ba babe.”Diema 11:11.

Batho ba motse bao ba latelago tsela ya go loka ba kgothaletša khutšo le bophelo bjo bobotse gomme ba agiša ba bangwe setšhabeng. Ka gona, motse o a golao ba le tšwelopele. Bao ba bolelago dipolelo tša go thomeletša, tše gobatšago le dilo tše fošagetšego ba baka go se dudišege, go hloka lethabo, go se be le botee le mathata. Se ke sa therešo kudu ge e ba batho bao e le balaodi. Motse o bjalo o ba le tlhaka-tlhakano, kgobogo le go phuhlama ga boitshwaro goba ga tša ditšhelete.

Molao wa motheo wo o boletšwego go Diema 11:​11 o šoma ka go lekana go batho ba Jehofa ge ba dutše ba kopana gotee diphuthegong tša bona tšeo di swanago le motse. Phuthegong yeo go yona batho ba moyabaloki bao ba hlahlwago ke potegobao ba nago le tutuetšo, ke sehlopha se thabilego, se mafolofolo le batho ba nago le mohola bao ba godišago Modimo. Jehofa o šegofatša phuthego, gomme e tšwela pele moyeng. Ka dinako tše dingwe, ba sego kae bao ba ka belaelago gomme ba se kgotsofale, bao ba ntšhago diphošo gomme ba bolela gampe ka tsela yeo dilo di dirwago ka yona, ba swana le “modu wo o xalakaxo” wo o ka phatlalalago gomme wa galakiša ba bangwe bao mathomong ba bego ba sa kgomege. (Ba-Hebere 12:​15) Ba bjalo gantši ba nyaka bolaodi bjo bo oketšegilego le maemo. Ba tsoša mabarebare a gore go na le go hloka toka, kgethollo ya morafe ka phuthegong goba go bagolo, goba dilo tše swanago le tšeo. Ruri, melomo ya bona e ka baka karogano ka phuthegong. Na ga se ra swanela go ithiba ditsebe dipolelong tša bona gomme re lwele go ba batho ba moya bao ba tšwetšago pele khutšo le kwano ka phuthegong?

Salomo ge a tšwela pele o re: “Mo-nyatša-wa-xabô xa a na moxopolô; monna wa kêlêllô ó a ikhomolêla. Mo-byala-dithsêlê ó senya ditaba; mmotexi ó tseba dithopa.”—Diema 11:​12, 13.

Motho yo a hlaelelwago ke kahlolo e botse, goba yo ‘a se nago mogopolo’ o baka tshenyo e kgolo gakaakang! O tšwela pele ka dipolelo tša gagwe tše sa laolegego go fihlela a thomeletša goba go nyefola. Bagolo ba kgethilwego ba swanetše go akgofela go fediša tutuetšo e bjalo e sa lokago. Ka go se swane le ‘wa go se be le mogopolo,’ monna wa temogo o tseba gore ke neng mo a swanetšego go homola. Go e na le gore a ntšhe khupamarama, o bipa taba. A tseba gore leleme leo le sa dišwego le ka baka bothata bjo bogolo, motho yo a nago le temogo ke “mmotexi.” O botegela badumedi-gotee le yena ka go se kwanantšhe gomme ga a utolle ditaba tša sephiri tšeo di ka ba gobatšago. Batho ba bjalo bao ba bolokago potego ke tšhegofatšo gakaakang ka phuthegong!

Go re thuša go sepela tseleng ya baloki, Jehofa o re nea kabo e kgolo ya dijo tša moya tšeo di lokišeditšwego ka tlase ga tlhahlo ya  “molaki e a bôtêxaxo yo bohlale.” (Mateo 24:​45) Le gona, re hwetša thušo e ntši ya motho ka noši ka bagolo ba Bakriste ka diphuthegong tša rena tše swanago le motse. (Ba-Efeso 4:​11-13) Ka kgonthe re leboga dilo tše, ka gobane “sethšaba xo nôtlêxa se-hlôka-mohlahli; leaxô le tla ka xo ata baeletši.” (Diema 11:​14) Go sa šetšwe seo se ka diregago, a re ikemišetšeng ka go tia ‘go sepela potegong ya rena.’—Psalme 26:1, bapiša le NW.

[Ntlhakgolo go letlakala 26]

Ke ga bošilo gakaakang go šomela mehola ya dilo tše di bonagalago ka thata eupša ra hlokomologa mediro ya pušo ya Modimo!

[Diswantšho go letlakala 24]

Jobo o ile a hlahlwa ke potego ya gagwe, gomme Jehofa o ile a mo šegofatša

[Seswantšho go letlakala 25]

Usa o ile a hwa ka baka la boikgogomošo bja gagwe