Re Swanetše go Tseba Seo Modimo a Lego Sona

NA GA o thabišwe ke go bona leratadima leo le tletšego dinaledi bošegong bjoo go se nago maru? Na monkgo wa matšoba a mebala-bala ga se o kgahlišago? Na ga o thabele go theetša melodi ya dinonyana le modumo wa matlakala a gwašago ge moya o foka ka boiketlo? Gomme di-whale tše matla le dibopiwa tše dingwe tšeo di dulago ka lewatleng ke tše di kgahlišago gakaakang! Ke moka go na le batho bao ba nago le mpho ya letswalo le bjoko bjo bo raraganego ka mo go makatšago. O hlalosa bjang go ba gona ga dilo tše ka moka tše di kgahlišago tšeo di re dikologilego?

Ba bangwe ba dumela gore dilo tše ka moka di itiragaletše fela ka ntle le lebaka. Eupša ge e ba go le bjalo, ke ka baka la’ng batho ba dumela Modimo? Ke ka baka la’ng go tswakana ga go fo itiragalela ga dikhemikhale tše di fapa-fapanego go tšweletša dibopiwa tšeo di nago le senyakwa sa moya?

“Bodumedi ke bjo bo tsemilego medu tlhagong ya batho le bjo bo lego gona boemong bjo bongwe le bjo bongwe bja tša boiphedišo le setlogong sa thuto.” Polelo ye e akareditše nyakišišo yeo Moprofesara Alister Hardy a e boletšego ka pukung ya gagwe ya The Spiritual Nature of Man. Boitekelo bja morago bjale ka bjoko bo dirile gore bo-rathutamahlale ya tša di-neuron ba šišinye gore batho ba ka be ba ile ba “tsenywa ka mokgwa wa leabela” bokgoni bja go ba badumedi. Puku yeo e nago le sehlogo se se rego Is God the Only Reality? e re: “Go tsoma go tseba ka go diriša bodumedi . . . ke selo seo se tlwaelegilego setšong se sengwe le se sengwe le nywageng ka moka ga e sa le go tloga ge batho ba e-⁠ba gona.”

Ela hloko seo monna yo a bego a rutegile a ilego a phetha ka go se bolela nywageng e ka bago 2 000 e fetilego. O ngwadile gore: “Malapá ka moka a na le baaxi ba ôna; xomme Mo-axa-tšohle ké Modimo.” (Ba-Hebere 3:⁠4) Ge e le gabotse, temana ya mathomo ya Beibele e re: “Mathomong Modimo ó hlodile lexodimo le lefase.”—Genesi 1:⁠1.

Lega go le bjalo, Modimo ke mang? Batho ba na le dikarabo tše di fapa-fapanego tša potšišo ye. Ge a be a botšišwa gore Modimo ke mang, mofsa yo a lego mahlalagading wa mo-Japane yo a bitšwago Yoshi o arabile ka gore: “Ga ke kgodišege. Ke mo-Buddha, e bile ga se ya ba gabohlokwa go nna go tseba gore Modimo ke mang.” Lega go le bjalo, Yoshi o dumetše gore batho ba bantši ba amogela Buddha e le modimo. Nick yo e lego rakgwebo wa nywageng ya bo-60, o dumela go Modimo gomme o nagana ka yena e le  ra-matla-ohle. Ge a be a kgopelwa go hlalosa seo a se tsebago ka Modimo, Nick o ile a araba ka morago ga go khutša ka lebaka le le telele gore: “Yeo ke potšišo e thata kudu mogwera wa-ka. Seo nka se bolelago ke gore Modimo o gona.”

Batho ba bangwe ba “rapela le go hlankela dilo tšeo Modimo a di bopilego go e-⁠na le Mmopi ka boyena.” (Ba-Roma 1:​25, Today’s English Version) Batho ba dimilione ba rapela batho bao ba hwilego, ba dumela gore Modimo o kgole kudu go ka batamelwa. Bodumeding bja Hindu, go na le medimo le medimogadi e mentši. Medimo e fapa-fapanego e bjalo ka Zeus le Hermes, e be e rapelwa mehleng ya baapostola ba Jesu Kriste. (Ditiro 14:​11, 12) Dikereke tše dintši tša Bojakane di ruta gore Modimo ke Boraro botee, yo a nago le Modimo Tate, Modimo Morwa le Modimo Moya o Mokgethwa.

Ka kgonthe, Beibele e re: “Xò na le medimo e mentši le marêna a mantši.” Lega go le bjalo e oketša ka gore: “Wa rena Modimo ké o tee fêla, Yêna Tata wešo, Yêna thlaxô ya tšohle.” (1 Ba-Korinthe 8:​5, 6) Ee, go na le Modimo o tee fela wa therešo. Eupša ke mang? O bjang? Go bohlokwa go rena gore re tsebe dikarabo tša dipotšišo tše. Jesu ka boyena o ile a bolela le Yena thapelong gore: “Bophelô byo bo sa felexo ké xe ba Xo tseba, Wene Modimo-dimo Ò le nnoši. Ba tsebê le Moromiwa wa xaxo Jesu Kriste.” (Johane 17:⁠3) Go na le lebaka la go dumela gore katlego ya rena ya ka mo go sa felego e ithekgile ka go tseba therešo ka Modimo.

[Caption on page 3]

Ke eng seo se ikarabelago ka go ba gona ga tšona?

[Caption on page 3]

Whale: Courtesy of Tourism Queensland

 [Mothopo wa Seswantšho go letlakala 2]

COVER: Index Stock Photography © 2002