‘Ba Sobelela Tlase’

“Ba ribexetšwa ke mafula, ba sobêla wa matlapa madibeng.”

KA MANTŠU ao, Moše le ba-Isiraele ba ile ba goba megobo ya go lokollwa ga bona go phatša Lewatleng le Lehwibidu le go fedišwa ga lenaba la bona leo le phegelelago la mo-EgipitaFarao le madira a gagwe a tša bohlabani.—Ekisodo 15:​4, 5.

Go yo mongwe le yo mongwe yo a bonego tiragalo yeo e makatšago, thuto e be e le molaleng. Ga go na motho yo a ka hlohlago goba a gana go dumelelana le bolaodi bja Jehofa ka katlego gomme a phela. Lega go le bjalo, mo e ka bago dikgwedi tše sego kae ka morago, ba-Isiraele bao ba tumilegoKora, Dathane, Abirama le bathekgi ba bangwe ba 250ba ile ba hlohla phatlalatša bolaodi bjo bo neilwego ke Modimo bja Moše le Arone.—Numeri 16:​1-3.

Ka taelo ya Jehofa, Moše o ile a lemoša ba-Isiraele gore ba široge mešašeng ya marabele. Dathane le Abirama, ba thekgilwe ke ditho tša malapa a bona, ba ile ba gana ka lenyatšo go fetola boemo bja bona bja kgopolo. Ka gona, Moše o ile a tsebatša gore Jehofa ka tsela ya Gagwe o tla dira gore go be molaleng go batho gore banna ba ba “nyaditše Morêna.” Ka nako yeo, Jehofa o ile a bula lefase ka tlase ga maoto a bona. “Ba kodumêla bo-dula-bahu bà sa phela, le dilô tsa bôná ka moka; lefase la ba fihla.” Go thwe’ng ka Kora le marabele a mangwe? “Xe e le banna bála ba makxolo a mabedi a naxo le masome a mahlano ba ba bexo ba swere diôrêlô, xo tšwile mollô xo Morêna wa ba fiša.”—Numeri 16:​23-35; 26:10.

Farao le madira a gagwe gotee le marabele ao a kua lešokeng, ka moka ba ile ba fedišwa ka gobane ba ile ba palelwa ke go amogela bolaodi bja Jehofa le go kgahlegela ga gagwe merero ya batho ba gagwe. Ka gona, ke mo go akgofilego gore bohle bao ba tla hwetšago tšhireletšego ya Jehofa mehleng ye e hlobaetšago ba ithute ka Jehofa le go mo kwa e le “Yo-xodimo-dimo” le “Yo-matla-ohle.” Ka go dira bjalo, ba ka kgodišega ka mo go feletšego ka mantšu a Jehofa a rego: “Le xe hleng xa xaxo xo ka wa ba sekete, ba dikete tše lesome ba wa ’hlakoreng la xaxo la le letona, di ka se kê tša Xo fihlêla. O tlo fo di boxa ka mahlô, wa bôna bakxopô xe ba lefeletšwa. Ké ka xobane sethšabêlô sa-ka è le Wene Morêna, O ipeetše Yo-xodimo-dimo a ba sebô sa xaxo.”—Psalme 91:​1, 7-9.