Dipotšišo tše Tšwago go Babadi

Na go inwa ka mo go feletšego ka meetseng go a nyakega ge e ba motho a nyaka go kolobetšwa eupša a golofetše kudu goba a fokola kudu mmeleng, e lego tšeo di tla dirago gore go inwa go be thata?

Lentšu “kolobetša” ke phetolelo ya lediri la Segerika baʹpto, leo le bolelago ‘go ina.’ (Johane 13:​26) Ka Beibeleng, “go kolobetša” go swana le “go ina.” Mabapi le kolobetšo ya molaki wa mo-Ethiopia yo a kolobeditšwego ke Filipi, The Emphasised Bible, ka Rotherham, e re: “Ba theogetše meetseng e le ba babedi, Filipi gotee le molakigomme a mo ina.” (Ditiro 8:​38) Ka gona, motho yo a kolobetšwago ge e le gabotse o inwa ka meetseng.—Mateo 3:​16; Mareka 1:10.

Jesu o laetše barutiwa ba gagwe gore: “Ké xôna yang Le dirê dithšaba ka moka barutiwa ka xo ba kolobetša.” (Mateo 28:​19, 20) Ka baka la seo, Dihlatse tša Jehofa di kolobeletša ka matangwaneng, matsheng, dinokeng goba mafelong a mangwe mo go nago le meetse a lekanego bakeng sa go inwa ka mo go feletšego. Ka ge kolobetšo ya go inwa ka mo go feletšego ka meetseng e le senyakwa sa Mangwalo, batho ga ba na matla a go se akaretše motho yo mongwe kolobetšong. Ka gona, motho o swanetše go kolobetšwa gaešita le ge megato e sa tlwaelegago e nyakega ka baka la boemo bja gagwe. Ka mohlala, go kolobetša mo go direlwago ka pafong e kgolo e bile mo go holago bakeng sa batšofadi goba bao ka mo go kgethegilego ba fokolago mmeleng. Meetse a pompi a ka ruthetšwa, motho yo a yago kolobetšong a ka bewa ka go iketla ka meetseng, ka morago ga ge a tlwaelane le boemo bja wona, kolobetšo ya kgonthe e ka dirwa.

Gaešita le batho bao ba golofetšego kudu ba ile ba kolobetšwa. Ka mohlala, batho bao ba bego ba boilwe ka go segwa go phuleletša mogolo gomme ka baka la seo ba e-na le molete wa sa ruri mo mogolong, goba bao ba swanetšego go diriša thušo ya go hema ya maitirelo ba ile ba kolobetšwa ka go inwa. Go ba gona, bakeng sa dikolobetšo tše bjalo ka moka go tla nyakega gore go dirwe ditokišetšo ka mo go tseneletšego. E tla ba ga bohlale gore go be le mooki yo a tlwaeditšwego goba ngaka kgaufsi ge e ba e hwetšagala. Lega go le bjalo, mo e ka bago mabakeng ka moka, ge tlhokomelo e kgethegilego goba go gata megato ka temogo go latelwa, kolobetšo e ka dirwa. Ka gona, go swanetše go dirwe boiteko bjohle bjo kwagalago go kolobetša motho ka meetseng ge e ba ye e le kganyogo ya kgonthe ya motho gomme a rata go amogela dikotsi tšeo di akaretšwago.