Go Hlwekišwa re le Batho ba Mediro e Mebotse
Go Hlwekišwa re le Batho ba Mediro e Mebotse
“A re hlapeng re tšwê thšila tšohle tša nama le tša môya, re phêthê kxêthêxô ya rena rè boifa Modimo.”—2 BA-KORINTHE 7:1.
1. Ke eng seo Jehofa a se nyakago go bao ba mo rapelago?
“THABENG ya Morêna xo tlo namêla mang? Ké mang wa xo tlo êma felô xokxêthwa?” Kgoši Dafida wa Isiraele ya bogologolo o ile a rotoša potšišo yeo e šišinyago kgopolo mabapi le borapedi bjo bo amogelegago go Jehofa. Ke moka o ile a nea karabo: “Ké wa diatla tše di se naxo bosodi, wa pelo-thsekexi, wa pelo e sa dumexo tša lefêla, a sa enexo maaká.” (Psalme 24:3, 4) E le gore motho a amogelege go Jehofa, yo e lego mothofatšo wa bokgethwa, o swanetše go hlweka le go ba yo mokgethwa. Pejana Jehofa o ile a gopotša phuthego ya Isiraele gore: “Ikxetheng, Le bê ba bakxêthwa, xobane Nna ke e mokxêthwa.”—Lefitiko 11:44, 45; 19:2.
2. Paulo le Jakobo ba ile ba gatelela bjang bohlokwa bja bohlweki borapeding bja therešo?
2 Nywaga-kgolo ka morago moapostola Paulo o ile a ngwalela Bakriste-gotee motseng o gobogilego boitshwarong wa Korinthe gore: “Xe re holofedišitšwe dilô tšeo, xôna a re hlapeng re tšwê thšila tšohle tša nama le tša môya, re phêthê kxêthêxô ya rena rè boifa Modimo.” (2 Ba-Korinthe 7:1) Se gape se bontšha ntlha ya gore go ba le tswalano le Modimo le go amogela ditšhegofatšo tša gagwe tšeo di holofeditšwego, motho o swanetše go ba yo a hlwekilego le yo a lokologilego ditšhileng tša mmele le tša moya le kgobogong. Ka mo go swanago, ge a ngwala ka borapedi bjo bo amogelegago go Modimo, morutiwa Jakobo o itše: “Borapedi byo Modimo Tata-wešo a bônaxo bò se na thšila le senyalô, ké xo hlôla dišuana le bahlôlôxadi mahlokong a bôná, le xo itôta xore lefase le se Xo thšilafatšê.”—Jakobo 1:27.
3. Ke eng seo re swanetšego go tshwenyega kudu ka sona e le gore borapedi bja rena bo amogelege go Modimo?
3 Ka ge go ba yo a hlwekilego, yo mokgethwa le yo a sa šilafatšwago e le dikarolo tše bohlokwa borapeding bja therešo, motho le ge e le ofe yo a nyakago go amogelwa ke Modimo o swanetše go kgomega e le ka kgonthe ka go fihlelela dinyakwa tše. Lega go le bjalo, ka ge batho lehono ba e-na le ditekanyetšo le dikgopolo tšeo di fapanego ka bohlweki, re swanetše go kwešiša le go dumelelana le seo Jehofa a se bonago e le seo se hlwekilego le seo se amogelegago. Re swanetše go tseba seo Modimo a se nyakago go barapedi ba gagwe tabeng ye le seo a se dirilego go ba thuša go dula ba hlwekile le go ba bao ba amogelegago go yena.—Psalme 119:9; Daniele 12:10.
Go Hlweka Bakeng sa Borapedi bja Therešo
4. Hlalosa kgopolo ya Beibele ya bohlweki.
4 Go batho ba bantši, go hlweka go bolela feela go se be le ditšhila. Lega go le bjalo, ka Beibeleng kgopolo ya go ba yo a hlwekilego e bontšhwa ke mantšu a mmalwa a Sehebere le a Segerika ao a hlalosago bohlweki e sego feela ka kgopolo ya nama eupša gantši ka kgopolo ya boitshwaro le ya moya. Ka gona, saeklopedia e nngwe ya Beibele e re: “ ‘Go hlweka’ le ‘go se hlweke’ ke dipolelwana tšeo di tswalanago ka sewelo le ditaba feela tša maphelo, eupša di tswalana kudu le ditaba tša bodumedi. Go ya ka tlhaloso ye molao wa motheo wa ‘go hlweka’ o akaretša mo e ka bago sebopego se sengwe le se sengwe sa bophelo.”
5. Ke go fihla bokgoleng bofe moo Molao wa Moše o ilego wa laola bohlweki bophelong bja ba-Isiraele?
5 Ka kgonthe, Molao wa Moše o be o akaretša melao le dithibelo tše di šomago sebopegong se sengwe le se sengwe sa bophelo bja mo-Isiraele, o bolela ka go lebanya seo se bego se hlwekile le seo se amogelegago le seo se bego se se bjalo. Ka mohlala, go Lefitiko dikgaolo 11 go ya go 15 re hwetša ditaelo ka botlalo tšeo di lego mabapi le go hlweka le go se hlweke. Diphoofolo tše itšego di be di sa hlweka, gomme ba-Isiraele ba be ba sa swanela go di ja. Go belega go be go tla dira gore mosadi a tšhilafale ka lebaka le itšego leo le beilwego. Malwetši a itšego a letlalo, lephera ka mo go kgethegilego le go ediša ga ditho tša pelego ka mo go swanago go be go tla dira gore motho a se ke a hlweka. Molao gape o boletše ka go lebanya seo se swanetšego go dirwa maemong ao a akaretšago go se hlweke. Ka mohlala, go Numeri 5:2 re bala gore: “Botša Ba-Isiraele O re: Ba nthšê ba lephêra ka moka mo mešašeng, le bohle ba ba edišaxo, le bohle ba ba thšilafetšexo ka setoto.”
6. Melao ya bohlweki e be e neilwe ka morero ofe?
6 Ka ntle le pelaelo, melao ye le e mengwe yeo e tšwago go Jehofa e be e na le dikgopolo tša kalafo le tša tsela yeo mmele o šomago ka yona nako e telele pele ga ge dingaka di ka tseba ka tšona gomme batho ba ile ba holega ge ba be ba di latela. Lega go le bjalo, melao ye e be e sa newa feela e le keletšo ya maphelo goba e le feela ditlhahlo tša tša kalafo. E be e le karolo ya borapedi bja therešo. Therešo ya gore melao ye e be e akaretša maphelo a batho a letšatši le letšatšigo ja, go belega, ditswalano tša manyalo le tše dingwee fo gatelela ntlha ya gore bjalo ka Modimo wa bona, Jehofa o be a na le tshwanelo ya go ba kgethela seo se bego se swanetše le seo se bego se sa swanela dibopegong ka moka tša maphelo a bona, ao a bego a ineetše ka mo go feletšego go Jehofa.—Doiteronomio 7:6; Psalme 135:4.
7. Setšhaba sa Isiraele se be se tla amogela tšhegofatšo efe ge e ba se be se ka boloka Molao?
7 Kgwerano ya Molao gape e ile ya šireletša ba-Isiraele mekgweng e šilafatšago ya ditšhaba tšeo di bego di ba dikologile. Ka go boloka Molao ka potego, go akaretša le dinyakwa tša go dula ba hlwekile mahlong a Jehofa, ba-Isiraele ba be ba tla amogelega go hlankela Modimo wa bona le go amogela ditšhegofatšo tša gagwe. Mabapi le se, Jehofa o boditše setšhaba gore: “Xe Le tlo theetša ruri se ke se bolêlaxo, la hlôkômêla kxwêranô ya-ka, ké mo Le tl’o xo ba baruiwa ba-ka mo dithšabeng ka moka; ka xobane lefase ka moka ké la-ka. Xomme lena Le tlo ba sethšaba sa-ka sa bô-mphamodimo, sethšaba se sekxêthwa.”—Ekisodo 19:5, 6; Doiteronomio 26:19.
8. Ke ka baka la’ng Bakriste lehono ba swanetše go ela hloko seo se bolelwago ka Molaong mabapi le bohlweki?
8 Ka ge Jehofa a ile a akaretša ditaba tše bjalo Molaong bakeng sa go hlahla ba-Isiraele kamoo ba ka bago ba ba hlwekilego, ba bakgethwa le bao ba amogelegago go yena, na ga se mo go swanelago go Bakriste lehono go ela hloko kamoo ba phethago dinyakwa tše? Gaešita le ge Bakriste ba se ka tlase ga Molao, ba swanetše go dula ba gopola gore bjalo ka ge Paulo a hlalositše, dilo ka moka tšeo di lego Molaong “ké meriti fêla ya tše di tl’o xo tla; mmele wôna ké wa Kriste.” (Ba-Kolose 2:17; Ba-Hebere 10:1) Ge e ba Jehofa Modimo, yo a rego “Ga k’ešo ka fetoga,” a lebelelwa e le yo a hlwekilego le yo a sa šilafatšwago bjalo ka ge e le sebopego sa bohlokwa borapeding bja therešo nakong yeo, rena lehono re swanetše go ela hloko taba ya go ba bao ba hlwekilego mmeleng, boitshwarong le moyeng ge e ba re nyaka kamogelo ya gagwe le tšhegofatšo.—Maleaki 3:6; Ba-Roma 15:4; 1 Ba-Korinthe 10:11, 31.
Bohlweki bja Mmele bo a re Hlaola
9, 10. (a) Ke ka baka la’ng go hlweka mmeleng go le bohlokwa bakeng sa Mokriste? (b) Ke dipolelo dife tšeo gantši di bolelwago mabapi le dikopano tša Dihlatse tša Jehofa?
9 Na bohlweki bja mmele e sa dutše e le karolo ya bohlokwa ya borapedi bja therešo? Le ge bohlweki bja mmele bo nnoši bo sa dire motho gore e be morapedi wa kgonthe wa Modimo, ka ntle le pelaelo ke mo go swanelago gore morapedi wa therešo a hlweke mmeleng ka mo a ka kgonago ka gona. Kudu-kudu mehleng ya rena ge batho ba bantši ba lebiša tlhokomelo e nyenyane go go ipoloka ba hlwekile, go boloka diaparo tša bona goba ditikologo tša bona di hlwekile, bao ba dirago bjalo gantši ba lemogwa ke batho bao ba ba dikologilego. Se se ka tliša mafelelo a mabotse, bjalo ka ge Paulo a boditše Bakriste ba Korinthe gore: “Re r’yalo rè sa kxopiše motho le ka selô se tee, xore bohlanka bya rena bo se bê le bosodi. Dilong ka moka re re re bônalê rè le bahlanka ba Modimo.”—2 Ba-Korinthe 6:3, 4.
10 Dihlatse tša Jehofa di ile tša retwa leboelela ke bahlankedi ba mmušo ka baka la boitshwaro le mekgwa ya tšona e hlwekilego, ya go ba le thulaganyo le e hlomphegago e bonwago ka mo go kgethegilego dikopanong tša tšona tše dikgolo. Ka mohlala, kuranta ya La Stampa e boletše mabapi le kopano yeo e bego e swaretšwe profenseng ya Savona, Italy gore: “Selo seo se bonagalago kapejana ge motho a sepela mabaleng ke bohlweki le go ba le thulaganyo ga batho bao ba a dirišago.” Ka morago ga kopano ya Dihlatse kua lepatlelong la São Paulo, Brazil, mohlankedi wa lepatlelo o ile a botša mohlokomedi wa sehlopha sa gagwe sa bao ba hlwekišago gore: “Go tloga ga bjale go ya pele re nyaka gore lepatlelo le hlwekišwe ka mokgwa woo Dihlatse tša Jehofa di le hlwekišitšego ka gona.” Mohlankedi yo mongwe lepatlelong lona leo o itše: “Ge Dihlatse tša Jehofa di nyaka go hira lepatlelo, re tshwenyega feela ka matšatši ao di tlago go ba le kopano. Ga go na selo se sengwe seo se re tshwenyago.”
11, 12. (a) Ke molao ofe wa motheo wa Beibele wo re swanetšego go dula re o gopola mabapi le bohlweki bja motho ka noši? (b) Ke dipotšišo dife tšeo di ka botšišwago mabapi le mekgwa ya rena ka noši le tsela ya bophelo?
11 Ge e ba bohlweki le go ba le thulaganyo mafelong a rena a borapedi e ka ba mothopo wa tumišo go Modimo yo re mo rapelago, ka ntle le pelaelo go bontšha dika tše maphelong a rena ke ga bohlokwa ka mo go swanago. Lega go le bjalo, ge re le ka magaeng a rena, re ka nagana gore re na le tshwanelo ya go iketla gomme re dire dilo ka mo re ratago. Ka ntle le pelaelo re na le tokologo ya go kgetha seo re naganago gore se swanetše e bile ke seo se ipiletšago tabeng ya moaparo le go itokiša! Lega go le bjalo, go fihla bokgoleng bjo itšego, tokologo ye ka moka ke ya nakwana. Gopola gore Paulo ge a be a ahla-ahla kgetho ya motho ya go ja dijo tše itšego o ile a lemoša Bakriste-gotee le yena gore: “Fêla, Le bônê xore xe Le dira ka mokxwa woo, e se bê xo kxopiša bafokodi.” Ke moka o ile a bolela molao wa motheo o bohlokwa: “Ke dumeletšwe dilô tšohle; fêla, xa se xore ka moka di a hola. Ke dumeletšwe dilô tšohle; fêla, xa se xore ka moka di a axiša.” (1 Ba-Korinthe 8:9; 10:23) Keletšo ya Paulo e šoma bjang go rena tabeng ya bohlweki?
12 Ke mo go kwagalago gore batho ba swanetše go letela gore modiredi wa Modimo e be yo a hlwekilego le yo a nago le thulaganyo tseleng ya gagwe ya bophelo. Ka gona, re swanetše go kgodišega gore ponagalo ya magae a rena le go a dikologa ga e fapane le seo re ipolelago gore re sona, badiredi ba Lentšu la Modimo. Ke bohlatse bja mohuta ofe bjo magae a rena a bo neago ka rena le ka ditumelo tša rena? Na a bontšha gore re hlologela e le ka kgonthe go phela lefaseng le lefsa la go loka leo le hlwekilego le le nago le thulaganyo, leo re kgothaletšago ba bangwe ka matla go tla go phela go lona? (2 Petro 3:13) Ka mo go swanago, ponagalo ya rena ya motho ka nošigo sa šetšwe gore ke nakong ya boiketlo goba bodiredinge ka tlaleletša goba ya fokotša go ipiletša ga molaetša wo re o bolelago. Ka mohlala, ela hloko mantšu a a mmegi wa kuranta kua Mexico: “Ke therešo gore go na le bafsa ba bantši gare ga Dihlatse tša Jehofa, gomme seo se ipiletšago ke mekgwa ya bona ya go kota meriri, bohlweki le go apara ka mokgwa o nepagetšego.” Go thabiša gakaakang go ba le bafsa ba bjalo gare ga rena!
13. Re ka dira’ng go kgonthišetša gore dibopego ka moka tša maphelo a rena a letšatši le letšatši ke tše hlwekilego le tšeo di rulagantšwego?
13 Go ba gona, go kgonthišetša gore mebele ya rena, ditlabakelo tša rena le magae a rena di dula di hlwekile e bile di rulagantšwe gabotse ga go bonolo. Seo se nyakegago ga se didirišwa tšeo di bitšago kudu, eupša go nyakega go rulaganya gabotse le maiteko a ka mehla. Go swanetše go beelwe nako ka thoko bakeng sa go hlwekiša mebele ya rena, diaparo tša rena, magae a rena, dikoloi tša rena le tše dingwe. Go swarega bodireding, go ba gona dibokeng le thuto ya motho ka nošigo tlaleletša go go hlokomela ditlamo tše dingwe bophelong bja letšatši le letšatšiga go re dire gore re se ke ra akaretšwa go senyakwa sa go dula re hlwekile e bile re amogelega mahlong a Modimo le a batho. Molao wa motheo o tlwaelegilego wa gore “tšohle di na le mohla wa tšôna” ka mo go swanago o a šoma karolong ye ya maphelo a rena.—Mmoledi 3:1.
Pelo Yeo e sa Šilafatšwago
14. Ke ka baka la’ng go ka bolelwa gore go hlweka boitshwarong le moyeng go bohlokwa kudu go feta go hlweka mmeleng?
14 Bjale ka ge go le bohlokwa go lebiša tlhokomelo go bohlweki bja mmele, go sa le bohlokwa kudu go kgomega ka bohlweki bja boitshwaro le bja moya. Re fihlelela phetho ye ka go gopola gore setšhaba sa Isiraele se ile sa ganwa ke Jehofa, e sego ka gobane se be se sa hlweka mmeleng, eupša ka gobane se ile sa goboga boitshwarong le moyeng. Ka moporofeta Jesaya, Jehofa o ile a se botša gore ka baka la go ba ga sona “sethšaba sa dibe! Sethšaba sa molato o moxolo,” dihlabelo tša sona, go bina ga sona go balama ga kgwedi le sabatha, ee, gaešita le dithapelo tša sona di fetogile morwalo go yena. Se be se swanetše go dira’ng bakeng sa go amogelwa ke Modimo gape? Jehofa o itše: “Hlapang, Le tšwê dithšila; medirô ya lena e mebe Le e tlošê pele xa-ka, bobe Le bo lahlê.”—Jesaya 1:4, 11-16.
15, 16. Ke eng seo Jesu a itšego se šilafatša motho, gomme re ka holwa bjang ke mantšu a Jesu?
15 Bakeng sa go kwešiša ka mo go tšwelago pele bohlokwa bja go hlweka boitshwarong le moyeng, ela hloka seo Jesu a se boletšego ge Bafarisei le bamangwalo ba be ba bolela gore barutiwa ba gagwe ba be ba sa hlweka ka gobane ba sa hlapa matsogo a bona pele ba e-ja. Jesu o ile a rarolla taba ka go bolela gore: “Motho xa a thšilafale ka se se tsênaxo ka xanong; ó thšilafala ka se se tšwaxo ka molomo.” Ke moka Jesu o ile a hlalosa gore: “Xe e le tše di tšwaxo ka molomo di botoxa pelong; ’me ké tšôna di thšilafatšaxo motho. Xobane mo pelong ké mo xo tšwaxo dikxopolô tše mpe, le dipolaô, le dithlalô, le maotswa, le bohodu, le bohlatse bya maaká, le maroxa. Ké tšôna tšeo di thšilafatšaxo motho. Xo ja ka diatla tše di sa hlapiwaxo xa xo thšilafatše motho.”—Mateo 15:11, 18-20.
16 Re ka ithuta’ng mantšung a Jesu? Jesu o be a šupa gore ditiro tše kgopo tša boitshwaro bjo bo gobogilego le tša go se hlweke, di etwa pele ke ditshekamelo tše kgopo tša boitshwaro bjo bo gobogilego le tše sa hlwekago ka pelong. Bjalo ka ge morutiwa Jakobo a boletše, “mang le mang e a lekwaxo, ó xokwa à xôxwa ke tumô ya xaxwe.” (Jakobo 1:14, 15) Ka gona, ge e ba re sa nyake go dira dibe tše dikgolo tšeo Jesu a di hlalositšego, re swanetše go tumola ka mo go feletšego le go boloka dipelo tša rena gore di se be le tshekamelo le ge e le efe malebana le dilo tše bjalo. Se se bolela gore re swanetše go ela hloko seo re se balago, seo re se bogelago le seo re se theetšago. Lehono, diintaseteri tša boithabišo le tša papatšo di tšweletša medumo e mentši e sa felego le diswantšho tšeo di kgotsofatšago dikganyogo tša nama ya sebe, ka gobane di re di na le tokologo ya go bolela le ya go ngwala. Re swanetše go ikemišetša gore re se ke ra dumelela dikgopolo le ge e le dife tše bjalo di mela ka dipelong tša rena. Ntlha ya bohlokwa ke gore e le gore re thabiše Modimo le go amogelwa ke yena, ka mehla re swanetše go dula re phafogile e le gore re boloke pelo e hlwekilego le e sa šilafatšwago.—Diema 4:23.
Go Hlwekišetšwa Mediro e Mebotse
17. Ke ka baka la’ng Jehofa a tlišitše batho ba gagwe boemong bjo bo hlwekilego?
17 E tloga e le tšhegofatšo le tšhireletšo gore ka thušo ya Jehofa, re ka thabela boemo bjo bo hlwekilego pele ga gagwe. (2 Ba-Korinthe 6:14-18) Lega go le bjalo, gape re kwešiša gore Jehofa o tlišitše batho ba gagwe boemong bjo bo hlwekilego ka morero o itšego. Paulo o boditše Tito gore Kriste Jesu “ké Yêna a ikxafilexo ka ’baka la rena, xore a re lopollê bokxopong ka moka, a ithuêlê sethšaba sa dirôtô medirong e botse.” (Tito 2:14) Re le batho bao ba hlwekišitšwego, re swanetše go fišegela mediro efe?
18. Re ka bontšha bjang gore re fišegela mediro e mebotse?
18 Selo sa pele le sa bohlokwa kudu, ke gore re swanetše go ineela go tsebatšeng phatlalatša ditaba tše dibotse tša Mmušo wa Modimo. (Mateo 24:14) Ka go rialo, re nea batho kae le kae kholofelo ya go phela ka mo go sa felego lefaseng leo le tla bego le se na tšhilafalo ya mohuta le ge e le ofe. (2 Petro 3:13) Mediro ya rena e mebotse gape e akaretša go bontšha dienywa tša moya wa Modimo maphelong a rena a letšatši le letšatši, ka go rialo re tumiša Tatago rena wa legodimong. (Ba-Galatia 5:22, 23; 1 Petro 2:12) Gape ga re lebale bao ba sego therešong bao ba ka hlaselwago ke dikotsi tša tlhago goba masetla-pelo a welago batho. Re dula re gopola keletšo ya Paulo e rego: “Byale xe re sa na le lebaka, a re direng botse; re bo dirêlê batho bohle, xa-xolo re bo dirêlê batho ba-bô-rena ba tumêlô.” (Ba-Galatia 6:10) Ditirelo tše bjalo ka moka, tšeo di dirwago ka pelo e hlwekilego le ka maikemišetšo a mabotse, ke tšeo di kgahlišago Modimo kudu.—1 Timotheo 1:5.
19. Ke ditšhegofatšo dife tšeo di re letetšego ge e ba re tšwela pele go boloka boemo bjo bo phagamego bja bohlwekimmeleng, boitshwarong le moyeng?
19 Ka ge re le bahlanka ba Yo Godimo-dimo, re ela hloko mantšu a Paulo a rego: “Ke a Le rapêla ka xo bôna mabobo a Modimo, ke re: Tlišang mebele ya lena, e bê sedimo se se phelaxo, se sekxêthwa, sa xo kxahla Modimo; e bê xôna xo dirêla Modimo ka mo xo swanetšexo.” (Ba-Roma 12:1) Anke re tšweleng pele go leboga tokelo ya go ba bao ba hlwekišitšwego ke Jehofa le go dira sohle seo re ka se kgonago go boloka boemo bjo bo phagamego bja go hlweka mmeleng, boitshwarong le moyeng. Go dira bjalo go ka se re tlišetše feela go itlhompha le kgotsofalo gona bjale eupša gape go tla re tlišetša le tebelelo ya go bona “dilo tša pele”tshepedišo ya gona bjale e kgopo le e šilafetšegodi feta ge Modimo ‘a dira dilo ka moka tše mpsha.’—Kutollo 21:4, 5.
Na o a Gopola?
• Ke ka baka la’ng ba-Isiraele ba be ba neilwe melao e mentši ka bohlweki?
• Ke bjang bohlweki bja mmele bo tlaleletšago go go ipiletša ga molaetša woo re o bolelago?
• Ke ka baka la’ng bohlweki bja moya bo le bohlokwa kudu go feta bohlweki bja mmele?
• Re ka bontšha bjang gore re “dirôtô medirong e botse”?
[Dipotšišo tša Thuto]
[Diswantšho go letlakala 21]
Go hlweka mmeleng go tlaleletša go go ipiletša ga molaetša wo re o bolelago
[Seswantšho go letlakala 22]
Jesu o ile a lemoša gore dikgopolo tše kgopo di lebiša ditirong tše kgopo
[Diswantšho go letlakala 23]
E le batho bao ba hlwekišitšwego, Dihlatse tša Jehofa di fišegela mediro e mebotse