Bagoeledi Ba Mmušo Ba A Bega

Go Hwetša Therešo Lefelong Leo go sa Letelwago

KE THATO ya Modimo gore “batho bohle ba phološwê ba fihlêlê tsebô ya therešô.” (1 Timotheo 2:​3, 4) Bakeng sa go fihlelela seo, Dihlatse tša Jehofa di gatišitše le go aba dikopi tše dimilione tša Beibele le dithušo tša go ithuta Beibele. Ka dinako tše dingwe, dikgatišo tše di thušitše batho ba dipelo tše di botegago go ithuta therešo ka ditsela tšeo di sa letelwago kudu. Tabeng ye, bagoeledi ba Mmušo kua Freetown, Sierra Leone ba bega phihlelo e latelago.

Osman e be e le morwa wa bobedi ka lapeng la bana ba senyane. Ka ge a goletše ka lapeng la bodumedi, ka mehla o be a e-ya go rapela le tatagwe. Lega go le bjalo, Osman o be a tshwenyegile kudu ka seo bodumedi bja gagwe bo bego bo se ruta ka hele. O be a sa kgone go kwešiša gore ke bjang Modimo yo a nago le kgaugelo a ka tlaišago batho ba babe ka go ba fiša mollong. Ditlhaloso ka moka tšeo di ilego tša newa bakeng sa go thuša Osman go kwešiša thuto ya mollo wa dihele di ile tša palelwa ke go mo nea khutšo ya monagano.

Ka letšatši le lengwe ge Osman a be a e-na le nywaga e 20, o ile a bona puku e tala-lerata e khupeditšwe ganyenyane ke matlakala ka gare ga lefelo la go lahlela matlakala. Ka ge a be a rata dipuku, o ile a e topa, a e hlwekiša gomme a bona sehlogo se se regoTherešo ye Išago Bophelong bjo bo sa Felego. *

Osman o ile a ipotšiša gore ‘Ke therešo efe ye?’ Go nyaka ga gagwe go tseba go ile gwa oketšega, Osman o ile a ya le puku gae gomme gatee-tee a e bala ka moka ga yona. O be a thabile gakaakang go ithuta gore Modimo o na le leina la gagwe ka nošiJehofa! (Psalme 68:4) Osman gape o ile a ithuta gore seka sa Modimo se segolo ke lerato le gore gaešita le kgopolo ya go tlaiša batho lefelong la mollo ke selo seo se hlaswegago go Yena. (Jeremia 32:​35; 1 Johane 4:8) Sa mafelelo, Osman o ile a bala gore Jehofa kgaufsinyane o tla tliša lefase la paradeise leo go lona batho ba tla kgonago go phela ka mo go sa felego. (Psalme 37:​29; Kutollo 21:​3, 4) A therešo e kgahlišago gakaakang go tšwa go Modimo yo a nago le kgaugelo le yo lerato! Ka tebogo e tšwago pelong, Osman o ile a leboga Jehofa ka go mo dumelela go hwetša therešo lefelong leo go sa letelwago kudu.

Matšatši a sego kae ka morago, ka thušo ya bagwera ba bangwe, Osman o ile a hwetša Holo ya Mmušo ya Dihlatse tša Jehofa gomme a ba gona sebokeng ka lekga la mathomo. Ge a be a le moo, o ile a kgopela Hlatse go ithuta Beibele le yena. Go sa šetšwe kganetšo e šoro ya lapa, Osman o ile a tšwela pele go dira tšwelopele ya moya gomme o ile a kolobetšwa. (Mateo 10:​36) Lehono, o hlankela e le mogolo ka phuthegong. Ke mo go kgahlišago gakaakang gore tše ka moka di diregile ka ge a hweditše kgatišo ya Beibele lefelong la go lahlela matlakala!

[Mengwalo ya ka tlase]