Hwetša Lethabo go Lokeng ga Jehofa

“Mo-phêxêlêla-tokô-le-leratô ó hwetša bophelô le tokô le thêtô.”—DIEMA 21:21.

1. Ke ditsela dife tša batho lehono tšeo di lebišitšego mafelelong a nyamišago?

“XO NA le tsela, ye batho ba rexo ké tsela, anthe e wetša ditseleng tša lehu.” (Diema 16:​25) Seema se sa Beibele se hlalosa ka mo go nepagetšego gakaakang ditsela tša batho ba bantši lehono! Ka kakaretšo, batho ba kgomegile feela ka go dira seo se lokilego go ya ka bona, ba hlokomologa gaešita le dinyakwa tša motheo kudu tša ba bangwe. (Diema 21:2) Ba ipolela gore ba hlompha melao le ditekanyetšo tša naga eupša ba tsoma go hwetša ditsela tšeo ka tšona ba ka phemago dithibelo tša molao ka ntle le go o tshela ka sebaka se sengwe le se sengwe. Se se feleletša ka setšhaba seo se aroganego le seo se gakanegilego.—2 Timotheo 3:​1-5.

2. Ke eng seo se nyakegago ka mo go akgofilego bakeng sa go hola batho?

² E le gore re holegele bakeng sa khutšo le tšhireletšego ya batho ka mokare nyaka ka mo go akgofilego molao goba tekanyetšo ya toka le yeo e lokilego, yeo batho ka moka ba ratago go e amogela le go e-kwa. Ka mo go lego molaleng, ga go na molao goba tekanyetšo yeo e hlomilwego ke motho le ge e le ofe yeo e ka fihlelelago senyakwa seo go sa šetšwe gore motho yoo o bohlale goba o botega gakaakang. (Jeremia 10:​23; Ba-Roma 3:​10, 23) Ge e ba tekanyetšo e bjalo e le gona, e ka hwetšwa kae e bile e tla ba bjang? Mohlomongwe potšišo e bohlokwa kudu ke gore, Ge e ba tekanyetšo e bjalo e le gona, na o tla e dumela ka ntle le go e ganetša?

Go Hwetša Tekanyetšo e Lokilego

3. Ke mang yo a swanelegago kudu ke go nea tekanyetšo yeo e amogelegago le yeo e holago batho ka moka, gomme ka baka la’ng?

³ E le go hwetša tekanyetšo yeo e amogelegago le e holago motho yo mongwe le yo mongwe, re tla swanelwa ke go ya go motho yo mongwe yo a sa lekanyetšwego ke morafo, setlogo le mellwane ya bopolitiki le yo a sa šitišwego ke go bonela kgaufsi le mefokolo ya batho. Ka ntle le pelaelo, yo a swanelegago ka mo go kgethegilego  ke Mmopi ra-matla-ohle, Jehofa Modimo, yo a tsebatšago gore: “Bo-ka maxodimo à le kwa xodimo kxolê le lefase, le ditsela tša-ka di xodimo kxolê le ditsela tša lena; le kêlêlô tša-ka di xodimo kxolê le tša lena.” (Jesaya 55:9) Go oketša moo, Beibele e hlalosa Jehofa e le “Modimo wa therešô, Mo-ila-bokxôpô, Moloki, Yêna Mosiami.” (Doiteronomio 32:4) Ka Beibeleng ka moka, re hwetša polelwana e rego “Morêna ó lokile.” (Ekisodo 9:​27; 2 Koronika 12:​6, PK; Psalme 11:7; 129:4; Dillo tša Jeremia 1:​18, PK; Kutollo 19:2) Ee, re ka lebelela go Jehofa bakeng sa tekanyetšo e botse kudu ka gobane o a botega, o na le toka e bile o lokile.

4. Polelwana ‘go loka’ e bolela’ng?

⁴ Ke therešo gore polelwana “go loka” ga se yeo e ratwago lehono. Ge e le gabotse, batho ba bantši ba na le pono e fošagetšego le ya go nyatša go loka, ba go swantšha le go ba yo a nago le moya wa go itira moloki goba modumedi yo a ineetšego wa moikaketši. Lega go le bjalo, kwešišo ya Beibele ya “go loka” e akaretša kgopolo ya go ba yo a nago le toka, go loka, bolo; go hloka molato, go hloka sebe; go dumelelana le melao ya motheo ya Modimo goba ditekanyetšo tšeo di amogelegago tša boitshwaro; go dira dilo ka mo go nepagetšego goba ka toka. Na o ka se thabele molao goba tekanyetšo yeo e nago le dika tše bjalo tše dibotse?

5. Hlalosa seka sa go loka bjalo ka ge se bontšhitšwe ka Beibeleng.

⁵ Encyclopaedia Judaica e bolela mabapi le seka sa go loka gore: “Go loka ga se feela taba ya boikgopolelo eupša ge e le gabotse go theilwe go go dira toka le seo se lokilego ditswalanong ka moka.” Ka mohlala, go loka ga Modimo ga se feela selo sa ka gare goba seka seo motho a nago le sona, bjalo ka bokgethwa goba go sekega ga gagwe. Ka mo go fapanego, ke pontšho ya semelo sa gagwe ka ditsela tšeo di lokilego le tša toka. Go ka bolelwa gore ka gobane Jehofa e le yo mokgethwa le yo a sekilego, selo se sengwe le se sengwe seo a se dirago le seo se tšwago go yena se lokile. Bjalo ka ge Beibele e bolela, “Morêna mo tseleng tša xaxwe tšohle ó a loka, ké yo botho mo ’tirong tša xaxwe tšohle.”Psalme 145:17.

6. Ke’ng seo Paulo a ilego a se bolela ka ba-Juda ba itšego bao ba sa dumelego ba mehleng ya gagwe, gomme ka baka la’ng?

⁶ Moapostola Paulo o ile a gatelela ntlha ye lengwalong la gagwe le le yago go Bakriste kua Roma. O ngwadile mabapi le ba-Juda ba itšego bao ba sa dumelego gore: “Ba xanne xo bušwa ke tokô ya Modimo, ka xe tokô yeo ya Modimo bà sa e tsebe, ka xo rata xo ipeêla tokô ya bôná ka nnoši.” (Ba-Roma 10:3) Ke ka baka la’ng Paulo a ile a bolela ka batho ba bjalo e le ‘bao ba sa tsebego toko ya Modimo’? Na ba be ba sa hlahlwa ka Molao, e lego ditekanyetšo tša go loka tša Modimo? Ka kgonthe ba be ba hlahlilwe ka wona. Lega go le bjalo, bontši bja bona ba ile ba lebelela go loka e le feela bokwala bja motho ka noši, moo go swanetšego go fihlelelwa ka go kwa melao ya bodumedi ka thata le ka kelohloko, go e na le go go lebelela e le tekanyetšo ya go ba hlahla ditirišanong tša bona le magagabo bona. Go etša baetapele ba bodumedi ba mehleng ya Jesu, ba ile ba se kwešiše seo se bolelwago e le ka kgonthe ke toka le go loka.Mateo 23:​23-28.

7. Go loka ga Jehofa go bontšhwa bjang?

⁷ Ka mo go fapanego kudu, go loka ga Jehofa go bontšhwa e bile go bonwa gabotse ditirišanong tša gagwe ka moka. Gaešita le ge go loka ga gagwe go nyaka gore a se ke a fo hlokomologa dibe tša barobi ba ka boomo ba molao, seo ga se mo dire Modimo yo a se nago maikwelo le yo a nyakago dilo ka šiši, yo a boifšago le yo a sa swanelwago go batamelwa. Ka mo go fapanego, ditiro tša gagwe tša go loka di neile motheo woo go ona batho ba ka mmatamelago gomme ba bolokwa mafelelong a šoro a sebe. Ka gona, ke mo go swanetšego e le ka kgonthe gore Jehofa o hlaloswa e le “Modimo wa tokô, Mophološi.”—Jesaya 45:21.

Go Loka le Phološo

8, 9. Ke ka ditsela dife Molao o bontšhago go loka ga Modimo?

⁸ Bakeng sa go kwešiša tswalano magareng ga go loka ga Modimo le tiro ya gagwe e lerato ya phološo, ela hloko Molao woo a o neilego setšhaba sa Isiraele ka Moše. Ga go na pelaelo gore Molao o be o lokile. Mantšung a gagwe a go laela,  Moše o ile a gopotša ba-Isiraele gore: “Ké sefe sethšaba se sekaakaa, se se naxo le melaô le mekxwa e lokilexo ya etša molaô wó nna ke o beaxo pele xa lena lehono?” (Doiteronomio 4:8) Nywaga-kgolo ka morago, Kgoši Dafida wa Isiraele o itše: “Dikahlolô tša Morêna ké therešô, [ka moka di itlhatsetše e le tša go loka, NW].”Psalme 19:9.

⁹ A diriša Molao, Jehofa o ile a dira gore ditekanyetšo tša gagwe tša se se lokilego le se se fošagetšego e be tše di kwagalago. Molao o ile wa bolela ka botlalo kamoo ba-Isiraele ba bego ba swanetše go itshwara ka gona e sego feela ditabeng tša bodumedi eupša gape le ditirišanong tša kgwebo, ditswalanong tša lenyalo, dijo le mekgwa ya bohlweki gotee le diphethong tša boahlodi. Molao gape o be o na le dithibelo malebana le bao ba tshelago molao, gaešita le go diriša kahlolo ya lehu mabakeng a mangwe. * Eupša na dinyakwa tša Modimo tša go loka bjalo ka ge di bontšhitšwe Molaong ke morwalo o boima le o lapišago bathong, wo o ba amogago tokologo ya bona le lethabo, bjalo ka ge batho ba bantši lehono ba bolela?

10. Bao ba ratago Jehofa ba ile ba ikwa bjang ka melao ya gagwe?

¹⁰ Bao ba ratago Jehofa ba hweditše lethabo le legolo melaong ya gagwe ya go loka le ditaelo. Ka mohlala, Kgoši Dafida ga se a dumela feela diphetho tša Jehofa tša kahlolo e le tša therešo le tša go loka bjalo ka ge re bone, eupša gape o ile a e rata ka go tšwa pelong le go e leboga. O ngwadile mabapi le melao le dikahlolo tša Jehofa gore: “[Di] kxanyoxêxa xo fetiša dixauta, le bontši bya xauta ye e taxilexo; [di] bose xo fetiša ’nose le todi ya tšôna. Molata wa xaxo [di] a mo laya; ’me ka xo hlôkômêla [tšona] ó bôna moputsô-moxolo.”—Psalme 19:​7, 10, 11.

11. Ke bjang Molao o ilego wa ipontšha e le “moetetši wa xo re iša xo Kriste”?

¹¹ Nywaga-kgolo ka morago, Paulo o ile a bolela ka mohola o mogolo kudu wa Molao. Lengwalong la gagwe leo le yago go ba-Galatia o ngwadile gore: “Molaô ya ba moetetši wa xo re iša xo Kriste, xore re tlê re lokafatšwê ka tumêlô.” (Ba-Galatia 3:​24) Mehleng ya Paulo, moetetši (morutiši go ya ka Kingdom Interlinear) e be e le mohlanka goba lekgoba ka lapeng le legolo. E be e le mošomo wa gagwe go šireletša bana le go ba felegetša sekolong. Ka mo go swanago, Molao o ile wa šireletša ba-Isiraele mekgweng e gobogilego ya boitshwaro le ya bodumedi ya ditšhaba tšeo di ba dikologilego. (Doiteronomio 18:​9-13; Ba-Galatia 3:​23) Go oketša moo, Molao o ile wa dira gore ba-Isiraele ba lemoge boemo bja bona bja sebe le go nyaka ga bona tebalelo le phološo. (Ba-Galatia 3:​19) Ditokišetšo tša sehlabelo di ile tša šupa go nyakega ga sehlabelo sa topollo le go nea sebopego sa boporofeta seo ka sona Mesia wa kgonthe a ka hlaolwago. (Ba-Hebere 10:​1, 11, 12) Ka gona, le ge Jehofa a ile a bontšha go loka ga gagwe ka Molao, o dirile bjalo a naganne ka katlego le phološo ya ka mo go sa felego ya batho.

Bao ba Lebelelwago ke Modimo e le Baloki

12. Ke eng seo ba-Isiraele ba ka bago ba ile ba se hwetša ka go kwa Molao ka kelohloko?

¹² Ka ge Molao woo o neilwego ke Jehofa o be o lokile ka ditsela ka moka, ka go o kwa ba-Isiraele nkabe ba ile ba ba le boemo bja go loka pele  ga Modimo. Moše o ile a gopotša ba-Isiraele ge ba be ba le kgaufsi le go tsena Nageng ya Kholofetšo gore: “E tlo ba xôna xo loka xa rena, xe re hlôkômêla ditaêlô tseo ka moka ra dira ka tšôna pele xa Morêna Modimo wa rena ka mo a re laetšexo ka xôna.” (Doiteronomio 6:​25) Go oketša moo, Jehofa o holofeditše gore: “Hlôkômêlang melaô ya-ka le ditaêlô tša-ka, tše e rexo xe motho a dira ka mo di bolêlaxo, a phela ka tšôna. Ké Nna Morêna.”—Lefitiko 18:5; Ba-Roma 10:5.

13. Na Jehofa o be a se na toka ge a be a kgopela batho ba gagwe go boloka Molao wa go loka? Hlalosa.

¹³ Ka manyami, e le setšhaba ba-Isiraele ba ile ba palelwa ke ‘go dira ka ditaelo ka moka pele ga Jehofa’ gomme ka go rialo ba lahlegelwa ke ditšhegofatšo tšeo di holofeditšwego. Ba ile ba palelwa ke go latela ditaelo tša Modimo ka moka ka gobane Molao wa Modimo e be e le o phethagetšego eupša bona ba be ba sa phethagala. Na se se bolela gore Modimo ga a na toka goba ga se a loka? Ruri ga go bjalo. Paulo o ngwadile gore: “Byale re tlo re’ng? A ke xo re mo xo Modimo xo na le xo se loke?Xa xo byalo.” (Ba-Roma 9:​14) Therešo ke gore pele ga ge Molao o ka newa le ka morago ga ge o neilwe, batho ba ile ba lebelelwa ke Modimo ba lokile gaešita le ge ba be ba sa phethagala gomme ba na le sebe. Lelokelelo la batho ba bjalo bao ba boifago Modimo le akaretša Noage, Aborahama, Jobo, Rahaba le Daniele. (Genesi 7:1; 15:6; Jobo 1:1; Hesekiele 14:​14; Jakobo 2:​25) Ka gona, potšišo ke gore: Ke motheong ofe moo batho ba bego ba lebelelwa ke Modimo e le baloki?

14. Ke eng seo Beibele e se bolelago ge e bolela ka batho e le bao ba ‘lokilego’?

¹⁴ Ge Beibele e bolela ka batho e le bao ba “lokilego,” ga e bolele ka go hloka sebe goba go phethagala. Go e na le moo, e bolela go phethagatša boikarabelo bja motho pele ga Modimo le batho. Ka mohlala, Noage o ile a bitšwa “monna wa xo loka” gomme a “se na bosodi mo xo ba mehleng ya xaxwe” ka gobane o ile “a dira tšôna-tšeo tšohle, a di dira ka mo Modimo a mo laetšexo ka xôna.” (Genesi 6:​9, 22; Maleaki 3:​18) Sakaria le Elisabetha e lego batswadi ba Johane Mokolobetši, “ba be ba lokile pele xa Modimo ka babedi, bà e-ya ka ditaêlô ka moka tša Morêna bà se na bosodi.” (Luka 1:6) Tona ya madira ya Motaliana yeo e bego e se mo-Isiraele yo leina la gagwe e bego e le Koronelio, o ile a hlaloswa e le “monna wa xo loka le xo boifa Modimo.”Ditiro 10:22.

15. Go loka go tswalana kgaufsi le eng?

¹⁵ Go oketša moo, go loka bathong go tswalana kudu le seo se lego ka pelong ya mothotumelo ya motho ka go leboga le lerato la go rata Jehofa le dikholofetšo tša gagwegomme e sego feela go dira ga motho seo Modimo a se nyakago.  Mangwalo a re Aborahama o ile “a dumêla Morêna; ’me Morêna a mmalêla tumêlô yeo a re ké xôna xo loka.” (Genesi 15:6) Aborahama o be a se na tumelo feela go go beng gona ga Modimo eupša gape o be a e-na le tumelo kholofetšong ya gagwe mabapi le “peu.” (Genesi 3:​15; 12:2; 15:5; 22:​18) Motheong wa tumelo e bjalo yeo e latelwago ke mediro yeo e dumelelanago le tumelo, Jehofa o ile a dirišana le Aborahama le babotegi ba bangwe le go ba šegofatša gaešita le ge ba be ba sa phethagala.—Psalme 36:​10; Ba-Roma 4:​20-22.

16. Tumelo topollong e feleleditše ka eng?

¹⁶ Mafelelong, go loka ga batho go ithekgile ka tumelo sehlabelong sa topollo sa Jesu Kriste. Paulo o ngwadile ka Bakriste ba lekgolong la pele la nywaga gore: “Xe ba lokafala, ké xo fo fiwa ka kxauxêlô ya xaxwe [Modimo] bà lopolotšwe ke Jesu Kriste.” (Ba-Roma 3:​24) Paulo moo o be a bolela ka bao ba bego ba kgethilwe go ba maja-bohwa gotee le Kriste Mmušong wa legodimong. Eupša sehlabelo sa Jesu sa topollo gape se buletše ba bangwe ba dimilione sebaka sa go hwetša boemo bja go loka pele ga Modimo. Moapostola Johane o ile a bona ponong “lešaba le lexolo la batho ba xo sexo motho e a kxônaxo xo ba bala, . . . bà eme pele xa sedulô sa boxoši sa Kwana, bà apere ’kobô tše dithšweu.” Dikobo tše ditšhweu di swantšhetša go hlweka ga bona le go loka pele ga Modimo ka gobane “ba hlatswitše mašela a bôná ba a taxafatša mading a Kwana.”—Kutollo 7:​9, 14.

Thabela go Loka ga Jehofa

17. Ke megato efe yeo re swanetšego go e gata ge re phegelela go loka?

¹⁷ Le ge Jehofa ka lerato a neile Morwa wa gagwe Jesu Kriste e le yoo ka yena batho ba hwetšago boemo bja go loka pele ga gagwe, mafelelo a go ba yo a lokilego ga se ao a itlelago feela. Motho o swanetše go bontšha tumelo topollong, a dumelelanye bophelo bja gagwe le thato ya Modimo, a ineele go Jehofa gomme a bo bontšhe ka kolobetšo ya meetseng. Ke moka, motho o swanetše go tšwela pele a phegelela go loka gotee le dika tše dingwe tša moya. Timotheo e lego Mokriste yo a kolobeditšwego yo a bileditšwego legodimong, o ile a kgothatšwa ke Paulo gore: “O phêxêlêlê tokô, le borapedi, le tumêlô le leratô, le kxôtlêlêlô, le bonôlô.” (1 Timotheo 6:​11; 2 Timotheo 2:​22) Jesu gape o ile a gatelela go nyakega ga maiteko a tšwelago pele ge a be a re: ‘Tšwelang pele le tsoma mmušo pele le go loka ga gagwe.’ Re ka šoma ka thata kudu bakeng sa go tsoma ditšhegofatšo tša Mmušo wa Modimo, eupša na re šoma ka thata ka mo go swanago go phegelela ditsela tša go loka tša Jehofa?—Mateo 6:33.

18. (a) Ke ka baka la’ng go se bonolo go phegelela go loka? (b) Re ka ithuta’ng mohlaleng wa Lota?

¹⁸ Go ba gona, ga go bonolo go phegelela go loka. Se ke ka gobane ka moka ga rena ga se ra phethagala gomme tshekamelo ya rena ya tlhago ke ya go se loke. (Jesaya 64:6) Go feta moo, re dikologilwe ke batho bao ba se nago taba le ditsela tša Jehofa tša go loka. Maemo a rena a swana kudu le a Lota, yo a ilego a dula motseng wo o tumilego ka bokgopo wa Sodoma. Moapostola Petro o ile a hlalosa lebaka leo ka lona Jehofa a bonego e le mo go swanetšego go lopolla Lota phedišong yeo e bego e e-tla. Petro o itše: “Xobane motho eo wa moloki ó lle pelo mola a axile le bôná, a hlwa à bôná à e-kwa xe ba senya molaô ka mediro ya bôná.” (2 Petro 2:​7, 8) Ka gona, yo mongwe le yo mongwe wa rena o dira gabotse go ipotšiša gore: ‘Na ke dumelela ka pelong mekgwa e gobogilego yeo re e bonago go re dikologa? Na ke hwetša boithabišo bjo bo tumilego eupša e le bjo bošoro e le feela bjo bo se nago tatso? Goba na ke ikwa ke tlaišega go etša ge Lota a ile a tlaišwa ke ditiro tše bjalo tša go se loke?’

19. Ke ditšhegofatšo dife tšeo re ka bago le tšona ge e ba re hwetša lethabo go lokeng ga Modimo?

¹⁹ Mehleng ye e kotsi le yeo e belaetšago, go thabela go loka ga Jehofa ke mothopo wa polokego le tšhireletšo. Potšišong e rego: “Mo Ngwakong wa xaxo xo ka dula mang? Thabeng e kxêthwa ya xaxo xo ka axa mang?” Kgoši Dafida o ile a araba ka gore: “Ké yo a swerexo tsela ya bothakxa, a dira tša xo loka.” (Psalme 15:​1, 2) Ka go phegelela le go thabišwa ke go loka ga Modimo, re ka boloka tswalano e botse le yena gomme ra tšwela pele re thabela go amogelwa ke yena le ditšhegofatšo. Ka gona, bophelo bja rena ke bophelo bja kgotsofalo, bja boitlhompho le bja khutšo ya monagano. Lentšu la Modimo le re: “Mo-phêxêlêla-tokô-le-leratô ó hwetša bophelô le tokô le thêtô.” (Diema 21:​21) Go oketša moo, go leka sohle seo re ka se kgonago bakeng sa go dira toka le seo se lokilego ditirong tša rena ka moka go bolela ditswalano tša motho ka noši tša lethabo le boemo bjo bo kaonefaditšwego bja bopheloboitshwarong le moyeng. Mopsalme o itše: “Ba lehlôxônôlô ké baloti ba molaô, ba xo dira tokô mehla yohle.”Psalme 106:3.

[Mengwalo ya ka tlase]

Na o ka Hlalosa?

• Go loka ke eng?

• Phološo e tswalana bjang le go loka ga Modimo?

• Ke motheong ofe moo Modimo a lebelelago batho e le baloki?

• Re ka hwetša bjang lethabo go lokeng ga Jehofa?

[Dipotšišo tša Thuto]

[Caption on page 15]

Kgoši Dafida o ile a bontšha go rata melao ya Modimo ka go tšwa pelong

[Caption on page 16]

Noage, Aborahama, Sakaria le Elisabetha le Koronelio ba ile ba balelwa go loka ke Modimo. Na o tseba lebaka?