Pono ya Gago ke Efe ka Lehu?

LEHU le na le mafelelo a nolago moko go rena ge re dutše re dira mediro ya rena ya letšatši le letšatši, go sa šetšwe gore re phetše gabotse mmeleng goba re humile gakaakang. Lehu le ka re wela nakong e tlago ge re tshela mmila goba re patlame malaong. Masetla-pelo a swanago le ditlhaselo tša botšhošetši tša September 11, 2001, kua New York City le Washington, D.C., a re dira gore re lemoge gore ‘lenaba la bofelo,’ e lego lehu, le tšea maphelo a batho ba tšwago maemong ka moka a leago le ba dihlopha tša nywaga ka moka, ka dinako tše dingwe le tšea ba dikete ka metsotswana feela.—1 Ba-Korinthe 15:26.

Lega go le bjalo, lehu le bonagala le tanya šedi ya batho. Ga go na selo seo se bonalago se dira gore batho ba reke kuranta goba seo se gogelago batho go bogela ditaba thelebišeneng go feta dipego tša lehu, kudu-kudu lehu la batho ba bantši maemong a boifišago. Ga go bonale batho ba lapišwa ke dipego tša lehu, go sa šetšwe gore ke lehu leo le bakilwego ke ntwa, dikotsi tša tlhago, bosenyi goba bolwetši. Go tshwenyega mo mo go feteletšego ka lehu go bontšhwa ka tsela e makatšago kudu ka maikwelo a lego molaleng a bontšhwago mahung a batho ba maemo le ba tumilego.

Go arabela ga batho mo go sa swanego ka lehu ga go ganege. Lehu le tšwela pele go tanya šedi ya batholehu la ba bangwe. Lega go le bjalo, ge ba lebeletšane le lehu la bona ka noši, ba boifa kudu go nagana ka lona. Lehu la rena ke taba e nngwe yeo bontši bja rena re sa nyakego go nagana ka yona.

Na o Makatšwa ke Lehu?

Kgopolo ya go nagana ka lehu la rena ka noši ka mehla ga e thabiše gomme e tla dula e le bjalo. Ke ka baka la’ng seo se le bjalo? Ke ka gobane Modimo o bjetše ka go rena kganyogo e tseneletšego ya go nyaka go phela ka mo go sa felego. Mmoledi 3:​11 (PK) e re: “Bosafelego o bo beile dipelong tša bona.” Ka gona, go ba ga kgonthe ga lehu go bakile ntwa ya ka gare bathong, kgohlano e tšwelago pele. Gore ba lebeletšane ka katlego le ntwa ye ya ka gare le gore ba kgotsofatše kganyogo ya tlhago ya go rata go tšwela pele ba phela, batho ba hlamile ditumelo tša mehuta ka moka, go tloga ka thuto ya go se hwe ga moya go ya go tumelo ya go tswalwa gape ka mmele o mongwe.

Ka gona, lehu ke tiragalo e tshwenyago, gomme poifo ya go boifa lehu e gohle. Ka gona, ga se ra swanela go makatšwa ke gore lekoko la batho ka kakaretšo le hwetša lehu e le tebelelo e boifišago. Ka gobane lehu le pepentšha mafelelo a go se be le mohola a bophelo bjo bo ineetšego go phegelela mahumo le go laola ba bangwe.

Na re Arolwa ke Lehu?

Mehleng e fetilego, motho yo a bego a babja kudu goba yo a bego a gobetše kudu gantši o be a dumelelwa gore a hwele tikologong yeo a  tlwaelanego le yona le yeo a e ratago ya legae la gagwe. Gantši go be go le bjalo mehleng ya Beibele, gomme go sa le bjalo ditšong tše dingwe. (Genesi 49:​1, 2, 33) Mabakeng a bjalo, lapa le a kgobokana, gomme bana ba a akaretšwa poledišanong. Se se nea setho se sengwe le se sengwe sa lapa maikwelo a gore ga se kwe bohloko se le noši gomme se nea khomotšo ya gore le abelana boikarabelo le gore manyami a kwewa ke bohle.

Se ke seo se fapanego kudu le seo se diregago lekokong leo go lona go boledišana ka lehu e lego seila, go tšewago e le maikwelo a sa lokago, leo gape go lona bana ba sa akaretšwego ka baka la kgopolo ya gore e tla ba ‘go ba imetša’. Matšatši a, go hwa go fapane ka ditsela tše dintši, gomme gantši ke mo go lešago bodutu kudu. Gaešita le ge ba bantši ba ka nyaka go hwela ka gae, ba hlokometšwe ka khutšo le ka lerato ke ba lapa, go ba bantši therešo ye yeo go lego thata go e amogela ke gore ba hwela sepetlele, gantši ba le noši gomme ba le bohlokong, ba kgokagantšwe le ditlabakelo tšeo di boifišago tša thekinolotši ya maemo a godimo. Ka lehlakoreng le lengwe, ba dimilione ba hwa go sa tsebjee le bahlaselwa ba polao ya molokwana-rite, tlala, AIDS, ntwa ya selegae goba bodiidi bjo bo feteletšego.

Taba Yeo e Swanetšego go Naganišišwa

Beibele ga e ganetše taba ya go naganišiša ka lehu. Ge e le gabotse, Mmoledi 7:2 e re botša gore: “Xo ya lapeng la monyanya, xo phalwa ke xo ya lapeng la dillô; le šupa boyô bya batho ka moka.” Ge re lebeletšane le go ba ga kgonthe ga lehu, re ka tlogela dilo tšeo re tshwenyegago ka tšona ka mehla goba mediro ya rena ya ka mehla gomme ra lebiša šedi go beng ga bophelo bjo bokopana. Se se ka re thuša gore re phele maphelo a rena ka tsela e nago le morero kudu go e na le go fo phela maphelo a se nago morero.

Pono ya gago ke efe ka lehu? Na o hlahlobile maikwelo a gago, ditumelo, dikholofelo le dilo tšeo o di boifago mabapi le mafelelo a bophelo bja gago?

Sebopego sa bophelo gotee le sebopego sa lehu di ka godimo ga bokgoni bja motho go di hlalosa le go di kwešiša. Motho feela yo e lego mothopo o ka botwago tabeng ye ke Mmopi wa rena. Go yena go na le “mothôpô wa bophelô,” gomme “ké Mo-nthša-lehung.” (Psalme 36:9; 68:​20) Gaešita le ge go ka bonala go makatša, go hlahloba ditumelo tše di tumilego mabapi le lehu ka thušo ya Lentšu la Modimo go tla itlhatsela e le mo go homotšago e bile e le mo go lapološago. Go tla utolla gore lehu ge e le gabotse ga se mafelelo a dilo ka moka.

[Ntlhakgolo go letlakala 4]

Kgonagalo ya go hwa e re thuša go phela maphelo a rena ka tsela e nago le morero kudu