Tetragrammaton ka go Septuagint

LEINA la Modimo, Jehofa, le emelwa ke Tetragrammaton, e lego ditlhaka tše nne tša Sehebere יהוה (YHWH). Ke kgale go dumelwa gore Tetragrammaton ga se ya ka ya tšwelela ka dikoping tša Septuagint. Ka gona, go ile gwa ganetšwa gore ge bangwadi ba Mangwalo a Bakriste a Segerika ba be ba tsopola go tšwa Mangwalong a Sehebere, ba ka ba ba se ba diriša leina la Modimo mongwalong wa bona.

Tatelano ya dikutollo tšeo di dirilwego nywageng e fetilego e lekgolo goba go feta moo di utollotše gore leina la Modimo le a tšwelela ka go Septuagint. Mothopo o mongwe o re: “Kganyogo ya go boloka ka go nepa leina le lekgethwa la Modimo e be e le e kgolo kudu mo e lego gore ba-Juda ba setlogo sa Gerika, ge ba be ba fetolela Beibele ya Sehebere go ya Segerikeng ba ile ba ngwalolla ditlhaka tša Tetragrammaton mongwalong wa Segerika.”

Karolo ya phaphirase e bontšhitšwego ka go le letshadi ke e nngwe ya mehlala e mmalwa ye e sa lego gona. E hweditšwe Oxyrhynchus, Egipita, gomme e na le nomoro ya 3522, karolo ye ke ya morago kua lekgolong la pele la nywaga C.E. * E ela disenthimithara tše 7 ka tše 10.5 gomme e na le temana ya Jobo 42:​11, 12. Tetragrammaton, e lego ka lešakaneng mo seswantšhong, e tšwelela ditemaneng tša kgale tša Sehebere. *

Ka gona, na leina la Modimo le ile la tšwelela dikoping tša pele tša Mangwalo a Bakriste a Segerika? Seithuti George Howard se re: “Ka ge Tetragrammaton e be e sa dutše e ngwadilwe ka dikoping tša Beibele ya Segerika [Septuagint] yeo e bego e dirile Mangwalo a kereke ya mehleng ya pele, ke mo go kwagalago go dumela gore bangwadi ba Testamente e Mpsha, ge ba be ba tsopola go tšwa Mangwalong, ba ile ba boloka Tetragrammaton ka mongwalong wa Beibele.” Go bonagala gore kapejana ka morago ga moo bangwalolodi ba ile ba ngwala maina Kyʹri·os (Morena) le The·osʹ (Modimo) sebakeng sa leina la Modimo.

[Mengwalo ya ka tlase]

[Mothopo wa Seswantšho go letlakala 30]

Courtesy of the Egypt Exploration Society