Ithute Gomme o Rute ba Bangwe Boitshwaro bja Bokriste

“Byale wene, O rutaxo ba bangwê, O re’ng Ò sa ithute?”—BA-ROMA 2:21.

1, 2. Ke mabaka afe ao o nago le ona bakeng sa go nyaka go ithuta Beibele?

O NA le mabaka a mantši a go ithuta Lentšu la Modimo. O swanetše go ba o nyaka go tseba ditherešo ka gare ga lonamabapi le batho, ditiragalo, mafelo le dilo tše dingwe. O nyaka go tseba dithuto tša therešo, e lego tšeo di fapanego le diphošo tša bodumedi, tše bjalo ka Boraro botee goba mollo wa dihele. (Johane 8:​32) Le gona o swanetše go nyaka go tseba Jehofa gakaone e le gore o ka swana le yena kudu le go sepela pele ga gagwe ka mokgwa wa go loka.—1 Dikxoši 15:​4, 5.

² Lebaka leo le tswalanago le leo e lego la bohlokwa la go ithuta Lentšu la Modimo ke la gore o itlhamele go ruta ba bangwebaratiwa ba gago, bao o ba tlwaetšego gaešita le bao o sa ba tsebego. Go dira se ga se selo sa boikgethelo go Bakriste ba therešo. Jesu o boditše barutiwa ba gagwe gore: “Ké xôna yang Le dirê dithšaba ka moka barutiwa . . . le ka xo ba ruta xo boloka tšohle tše ke Le laetšexo tšôna.”—Mateo 28:​19, 20.

3, 4. Ke ka baka la’ng e le mo go hlomphegago go wena go ruta bjalo ka ge Jesu a laetše?

³ Go ithuta Beibele ka kganyogo  ya go nyaka go ruta ba bangwe ke selo se se hlomphegago gomme e ka ba mothopo wa kgotsofalo e swarelelago. Ke kgale go ruta e le modiro o hlomphegago. Encarta Encyclopedia e re: “Go ba-Juda, batho ba bantši ba bagolo ba be ba lebelela barutiši e le ditlhahlo tša go iša phološong gomme ba kgothaletša bana go hlompha barutiši ba bona kudu go feta batswadi ba bona.” Ke mo go retegago ka mo go kgethegilego go Bakriste gore ba ithute Beibele gomme ka morago ba rute ba bangwe.

⁴ “Batho ba bantši ba swaregile ka go ruta go feta modiro le ge e le ofe o mongwe. Mo e ka bago banna le basadi ba dimilione tše 48 lefaseng ka bophara ke barutiši.” (The World Book Encyclopedia) Morutiši o na le boikarabelo bja go ruta bana gomme a ka ba tutuetša ka nywaga e mentši e sa tlago. Mafelelo e ba a magolo kudu ge o e-kwa taelo ya Jesu ya gore o rute ba bangwe; thuto ya gago e tla kgoma bokamoso bja bona bja ka mo go sa felego. Moapostola Paulo o gateletše se ge a be a kgothaletša Timotheo gore: “Itôtê O lôtê le thutô. Xe O dira byalo O tlo iphološa, wa phološa le bao ba Xo kwaxo.” (1 Timotheo 4:​16, mongwalo o sekamego ke wa rena.) Ee, thuto ya gago e akaretša phološo.

5. Ke ka baka la’ng thuto yeo e rutwago ke Mokriste e le ya bohlokwa bjo bogolo?

⁵ Go ithuta gomme wa ruta ba bangwe go laetšwe le go laolwa ke Mothopo o phagamego kudu, Mmuši wa legohle. Seo ka bosona se dira gore modiro wo wa go ruta e be wa bohlokwa bjo bogolo go borutiši bja mohuta le ge e le ofe bjo bongwe, go sa šetšwe gore ke go ruta dithuto tša motheo, bokgoni bja mošomo goba gaešita le ditsebi tša tša kalafo. Go ruta mo go dirwago ke Mokriste go akaretša gore morutwana a ithute ka noši go ekiša Morwa wa Modimo, Kriste Jesu le go ruta ba bangwe go dira se se swanago.Johane 15:10.

Ke ka Baka La’ng o Swanetše go Ithuta?

6, 7. (a) Ke ka baka la’ng re swanetše go ithuta pele? (b) Ba-Juda ba lekgolong la pele la nywaga ba ile ba palelwa ka tsela efe e le barutiši?

⁶ Ke ka baka la’ng go bolelwa gore re swanetše go ithuta pele? Go ba gona, re ka se kgone go ruta ba bangwe ka mo go nepagetšego ge e ba re sa thoma pele ka go ithuta. Paulo o ile a gatelela ntlha ye ka polelo yeo e šišinyago kgopolo yeo e bego e le bohlokwa go ba-Juda morago kua eupša e le yeo e rwelego molaetša o bohlokwa bakeng sa Bakriste lehono. Paulo o ile a botšiša gore: “Bjale e a rutago ba bangwe, ga a ithute ka noši? O kwatšago gore go se ke gwa utswiwa, wa utswa? O bolelago o re go se ke gwa otswiwa, wa otswa? O selekwago ke diswantšho tša medimo, o mohlakodi wa ditempele? E o itumišago ka molao, wa goboša  Modimo ka go sela molao?”—Ba-Roma 2:​21-23, PK.

⁷ Ka go diriša dipotšišo tšeo di sa nyakego dikarabo, Paulo o ile a bolela ka dibe tše pedi tšeo Melao e Lesome e boletšego ka tšona ka go lebanya: O se ke wa utswa gomme o se ke wa otswa. (Ekisodo 20:​14, 15) Ba-Juda ba bangwe ba mehleng ya Paulo ba be ba ikgantšha ka gore ba na le Molao wa Modimo. Ba be ba ‘rutilwe molao, ba itira basepediši ba difofu, ba re ke dietša tša ba ba lego lefsifsing, ke barutiši ba e lego bana.’ (Ba-Roma 2:​17-20) Lega go le bjalo, ba bangwe e be e le baikaketši ka gobane ba be ba utswa goba ba dira bootswa ka sephiring. Seo se be se hlompholla Molao gotee le Mongwadi wa wona wa legodimong. O ka kgona go bona gore ka ntle le pelaelo ba be ba sa swanelege go ruta ba bangwe; ruri ba be ba tloga ba sa ithute.

8. Ba-Juda ba bangwe ba mehleng ya Paulo ba ka ba ba be ba ‘hlakola ditempele’ bjang?

⁸ Paulo o boletše ka go hlakola ditempele. Na ba-Juda ba bangwe ba be ba dira seo e le ka kgonthe? Ke’ng seo Paulo a bego a e-na le sona ka kgopolong? Ka kgonthe, ka baka la tsebišo e lekanetšego lengwalong le, re ka se kgodišege ge e le ka tsela yeo ba-Juda ba bangwe ba bego ba ‘hlakola ditempele.’ Pejana ga moo mokgomana wa motse wa Efeso o boletše gore badirišani ba Paulo e be e se ‘bahlakodi ba ditempele,’ e lego seo se šišinyago gore bonyenyane batho ba bangwe ba be ba nagana gore ba-Juda ba be ba sekametše go latofatšweng ka seo. (Ditiro 19:​29-37) Na bona ka noši ba be ba diriša goba ba bapatša dilo tše bohlokwa tšeo di bego di e-tšwa ditempeleng tša baheitene tšeo di bego di sentšwe ke bafenyi goba bafišegela-thoko ba bodumedi? Go ya ka Molao wa Modimo, gauta le silifera ya medimo ya diswantšho di be di swanetše go senywa, e sego gore di tšewe bakeng sa go dirišwa ke motho ka noši. (Doiteronomio 7:​25) * Ka gona Paulo a ka ba a be a bolela ka ba-Juda bao ba ilego ba nyatša taelo ya Modimo gomme ba diriša goba ba holega ka dilo tšeo di bego di e-tšwa ditempeleng tša baheitene.

9. Ke mediro efe yeo e bego e sepedišana le tempele ya Jerusalema yeo e bego e tla swana gabotse le go hlakola tempele?

⁹ Ka lehlakoreng le lengwe, Josephus o ile a bolela ka taba e nngwe ya dihlong yeo e ilego ya dirwa kua Roma ke ba-Juda ba bane, moo moetapele wa gona e bego e le morutiši wa Molao. Batho bao ba bane ba ile ba kgodiša mosadi wa mo-Roma, mohlanogi wa mo-Juda, gore a ba nee gauta le dilo tše dingwe tša bohlokwa e le moneelo ka tempeleng ya Jerusalema. Ge ba fetša go hwetša dilo tšeo go yena, ba ile ba dirišetša mahumo ao bakeng sa go ikholaka go rialo ba hlakola tempele. * Ba bangwe ba be ba hlakola tempele ya Modimo ka go neelana ka dihlabelo tša digole gomme ba kgothaletša kgwebo ya megabaru mabaleng a tempele, ba fetola tempele go ba “lexôlô la bahlakodi.”—Mateo 21:​12, 13; Maleaki 1:​12-14; 3:​8, 9.

Ruta Boitshwaro bja Bokriste

10. Ke ntlha efe yeo e sa swanelago go re lahlegela ya mantšu a Paulo a begilwego go Ba-Roma 2:​21-23?

¹⁰ Go sa šetšwe mediro le ge e le efe ya lekgolong la pele la nywaga yeo Paulo a bego a bolela ka yona yeo e bego e akaretša go utswa, bootswa le go hlakola tempele, a re se lahlegelweng ke ntlha ya mantšu a gagwe. O botšišitše gore: “Byale wene, O rutaxo ba bangwê, O re’ng O sa ithute?” Ke mo go lemogegago gore mehlala yeo Paulo a ilego a e rotoša e be e le mabapi le boitshwaro. Mo moapostola ga se a ka a lebiša tlhokomelo go dithuto tša Beibele goba histori. Go ithuta le go ruta ba bangwe mo Paulo a bego a bolela ka gona go be go le mabapi le boitshwaro bja Bokriste.

11. Ke ka baka la’ng o swanetše go ela hloko boitshwaro bja Bokriste ge o dutše o ithuta Lentšu la Modimo?

¹¹ Gore re diriše thuto ya Ba-Roma 2:​21-23 go bolela gore re ithute boitshwaro bja Bokriste go tšwa Lentšung la Modimo, re dira ka go dumelelana le seo re ithutago sona gomme re ruta ba bangwe go dira se se swanago. Ka gona, ge o dutše o ithuta Beibele, hlokomela dipontšho  tša ditekanyetšo tša Jehofa, e lego moo Bokriste bja therešo bo tšwago gona. Naganišiša ka keletšo le dithuto tšeo o di hwetšago ka Beibeleng. Gomme diriša seo o ithutago sona ka sebete. Gomme go dira bjalo ruri go nyaka sebete gotee le boikemišetšo. Go bonolo go batho ba sa phethagalago gore ba be le maitshwarelelo, mabaka ao ka ona boemo bo dumelago goba gaešita le go nyaka gore ba hlokomologe boitshwaro bja Bokriste maemong a itšego. Mohlomongwe ba-Juda bao Paulo a boletšego ka bona ba be ba e-na le mokgwa o bjalo wa go nea mabaka ka morero wa go lokafatša goba go aroša ba bangwe. Lega go le bjalo, mantšu a Paulo a bontšha gore boitshwaro bja Bokriste ga se bja swanela go bebofatšwa goba go se šetšwe go ya ka kgetho ya motho.

12. Ke bjang boitshwaro bjo bobotse goba bjo bobe bo bolelago se sengwe ka Jehofa Modimo, gomme ke ka baka la’ng e le mo go holago go dula re gopola ka ntlha ye?

¹² Moapostola o gateletše lebaka la bohlokwa bakeng sa go ithuta le go diriša boitshwaro bjo re bo hwetšago ka Beibeleng. Boitshwaro bjo bo sa lokago bja ba-Juda bo be bo bolela se sengwe go Jehofa: “O kxanthša Molaô, wa tla wa xoboša Modimo ka xo senya Molaô. . . . Ina la-ka le hlwa lè xoboxa ka bô-lena mo xo ba-ntlê.” (Ba-Roma 2:​23, 24) Ke therešo ka mo go swanago ga bjale gore ge e ba re hlokomologa boitshwaro bja Bokriste, re hlompholla Mothopo wa bjona. Ka mo go fapanego, ge e ba re swarelela ka go tia ditekanyetšong tša Modimo, di mo emela gabotse, tša mo godiša. (Jesaya 52:5; Hesekiele 36:​20) Go lemoga ga gago se go ka matlafatša boikemišetšo bja gago ge e ba o lebeletšana le diteko goba maemo ao go wona go hlokomologa boitshwaro bja Bokriste go ka bonalago go le bonolo kudu goba e le tsela e kaone ya go gata mogato. Go feta moo, mantšu a Paulo a re ruta selo se sengwe gape. Ka ntle le go lemoga gore boitshwaro bja gago bo bolela se sengwe ka Modimo, ge o dutše o ruta ba bangwe, ba thuše gore ba bone gore tsela yeo ba dirišago ditekanyetšo tša boitshwaro tšeo ba ithutago tšona e tla bolela se sengwe ka Jehofa. Ga e fo ba feela gore boitshwaro bja Bokriste bo tliša kgotsofalo gomme bo šireletša boemo bja maphelo bja motho. Gape bo bolela se sengwe go Yo a hlomilego le go kgothaletša boitshwaro bjoo.—Psalme 74:​10; Jakobo 3:17.

13. (a) Beibele e re thuša bjang ge e le mabapi le boitshwaro? (b) Nea kgwekgwe ya keletšo e lego go 1 Ba-Thesalonika 4:​3-7.

¹³ Boitshwaro bo kgoma le batho ba bangwe. O ka bona seo go tšwa mehlaleng e lego ka Lentšung la Modimo yeo e bontšhago bohlokwa bja go diriša ditekanyetšo tša Modimo tša boitshwaro le mafelelo a go di hlokomologa. (Genesi 39:​1-9, 21; Jošua 7:​1-25) Le gona o ka ba wa hwetša keletšo e lego molaleng mabapi le boitshwaro e bjalo ka ye: “Se Modimo a se rataxo ké kxêthêxô ya lena, xore Le ilê bootswa. Mang le mang e lexo wa lena a tsebê mosadi e lexo wa xaxwe ka mokxwa wa kxêthêxô le wa xo mo xodiša; A e se bê ka phišêxô le kxanyoxô bo-ka ba-ntlê ba ba sa tsebexo Modimo. Mo xo tše Le di diraxo xo se kê xwa ba xo jana le xo forana [“go se be le yo a yago ntlheng ya go gobatša le go šwahlela ditshwanelong tša ngwanabo tabeng ye,” NW]; . . . Xobane se Modimo a re bileditšexo sôna xa se dithšila, ké kxêthêxô.”—1 Ba-Thesalonika 4:​3-7.

14. Ke’ng seo o ka ipotšišago sona mabapi le keletšo e lego go 1 Ba-Thesalonika 4:​3-7?

¹⁴ Mo e ka bago motho le ge e le ofe a ka bona go tšwa temaneng ye gore boitshwaro bjo bo gobogilego bja botona le botshadi bo tshela molao wa boitshwaro bja Bokriste. Lega go le bjalo, o ka ba le kwešišo e fetago yeo ka lengwalo le. Ditemana tše dingwe di neelana ka ditsela bakeng sa thuto e bohlokwa le go naganišiša, e lego seo se feleletšago ka go di kwešiša. Ka mohlala, o ka nagana ka seo Paulo a bego a se bolela ka go bolela gore go dira bootswa go ka dira gore motho a fihle “ntlheng ya go gobatša le go šwahlela ditshwanelong tša ngwanabo tabeng ye.” Ke ditshwanelo dife tše di akareditšwego, gomme ke bjang kwešišo e kaone ya se e tlago go go nea tšhušumetšo e oketšegilego ya go kgomarela boitshwaro bja Bokriste? Mafelelo a nyakišišo e bjalo a ka go hlama bjang ka mo go oketšegilego go ruteng ba bangwe le go ba thuša gore ba godiše Modimo?

Ithute e le Gore o Kgone go Ruta

15. Ke didirišwa dife tšeo o ka di dirišago gore o ithute ka thuto ya motho ka noši?

¹⁵ Dihlatse tša Jehofa di na le didirišwa tšeo di di dirišago go nyakišiša dipotšišo goba ditaba tšeo di rotogago ge di dutše di ithuta goba di ruta ba bangwe. Sedirišwa se sengwe seo se hwetšagalago  ka maleme a mantši ke Watch Tower Publications Index. Ge e ba o e-na le yona, o ka e diriša go hwetša tsebišo yeo e lego dikgatišong tšeo di theilwego Beibeleng tša Dihlatse tša Jehofa. O ka nyakišiša ka dihlogo goba ka tlase ga lelokelelo ka temana ya Beibele. Sedirišwa se sengwe seo se hwetšagalago go Dihlatse tša Jehofa ka maleme a mantši a magolo ke Watchtower Library. Lenaneo le la computer le le lego go CD-ROM le na le kgoboketšo e kgolo ya dikgatišo ka sebopego sa elektroniki. Lenaneo la yona le dira gore motho a kgone go nyakišiša dihlogo tša mangwalo le kamoo a ahla-ahlilwego ka gona. Ge e ba o na le e nngwe ya didirišwa tše goba o na le tšona ka bobedi, di diriše ka mehla ge o dutše o ithuta Lentšu la Modimo e le gore o kgone go ruta ba bangwe.

16, 17. (a) O ka hwetša kae ditlhaloso tše di hlabišago seetša ka ditshwanelo tšeo di boletšwego go 1 Ba-Thesalonika 4:6? (b) Bootswa bo ka šwahlela ditshwanelo tša ba bangwe ka ditsela dife?

¹⁶ Anke re tšeeng mohlala o boletšwego ka mo godimo, 1 Ba-Thesalonika 4:​3-7. Go rotogile potšišo mabapi le ditshwanelo. Ditshwanelo tša mang? Gomme ditshwanelo tšeo di ka šwahlelwa bjang? O diriša didirišwa tša go ithuta tše go boletšwego ka tšona, ka ntle le pelaelo o ka hwetša ditlhaloso tše mmalwa tšeo di hlabišago seetša ka ditemana tše, gaešita le ka ditshwanelo tšeo Paulo a boletšego ka tšona. O ka bala ditlhaloso tše bjalo ka go Insight on the Scriptures, Bolumo 1, matlakala 863-4; O ka Hwetša Bjang Khutšo ya Kgonthe le Polokego?, letlakala 145; Morokami wa November 15, 1989, letlakala 31.

¹⁷ Ge o phegelela thuto, o tla bona gore dikgatišo tšeo di bontšha bjang go rereša ga mantšu a Paulo. Seotswa se dira sebe malebana le Modimo gomme se ipakela malwetši. (1 Ba-Korinthe 6:​18, 19; Ba-Hebere 13:4) Monna yo a dirago bootswa o šwahlela ditshwanelo tše di fapa-fapanego tša mosadi yo a otswago le yena. O mo amoga boemo bja gagwe bjo bo hlwekilego bja boitshwaro le letswalo le lebotse. Ge e ba a se a nyalwa, o šwahlela tshwanelo ya gagwe ya go tsena lenyalong e le kgarebe le tshwanelo ya monna wa gagwe wa ka moso yo a lebeletšego gore e be kgarebe. O kweša batswadi ba mosadi yoo bohloko le monna wa mosadi yoo ge e ba a nyetšwe. Monna yo a gobogilego boitshwarong o senya tshwanelo ya lapa la gagwe ka noši ya pego ya boitshwaro bjo bo hlwekilego. Ge e ba e le setho sa phuthego ya Bokriste, o e tlišetša kgobogo, a senya leina la yona le lebotse.—1 Ba-Korinthe 5:1.

18. O holega bjang ka thuto ya Beibele yeo e lego mabapi le boitshwaro bja Bokriste?

¹⁸ Na ditlhaloso tše bjalo mabapi le ditshwanelo ga di go thuše go kwešiša temana yeo ka mo go tseneletšego? Thuto ya mohuta woo ka ntle le pelaelo ke ya bohlokwa bjo bogolo. Ge o dutše o e phegelela, o a ithuta. Kwešišo ya gago ka go rereša le mafelelo a matla a molaetša wa Modimo di a gola. O matlafatša boikemišetšo bja gago bja go swarelela boitshwarong bja Bokriste go sa šetšwe teko yeo e ka tšwelelago. Gomme nagana kamoo o ka bago morutiši yo a atlegago ka gona! Ka mohlala, ge o dutše o ruta ba bangwe therešo ya Beibele, o ka bontšha tsela e feletšego ya go kwešiša 1 Ba-Thesalonika 4:​3-7, o oketša kwešišo ya bona le tebogo ya bona ya go leboga boitshwaro bja Bokriste. Ka go rialo, thuto ya gago e ka go thuša gomme ya thuša le ba bangwe ba bantši gore ba tumiše Modimo. Re bontšhitše mohlala o tee feela mo, wa lengwalo la Paulo le le yago go ba-Thesalonika. Go na le dibopego tše dingwe tše dintši tša boitshwaro bja Bokriste, mehlala le dintlha tše eletšago tša Beibele tše di swanago le wona, tšeo o ka ithutago tšona, wa di diriša le go di ruta ba bangwe.

19. Ke ka baka la’ng go le bohlokwa gore o kgomarele boitshwarong bja Bokriste?

¹⁹ Go ka se be le pelaelo mabapi le bohlale bja go kgomarela boitshwarong bja Bokriste. Jakobo 3:​17 e re “bohlale byo bo tšwaxo xodimo,” go Jehofa Modimo ka boyena, “sa pele mo xo byôna ké xo ila thšila.” Seo se bolela gabotse go latela ditekanyetšo tša Modimo tša boitshwaro. Ge e le  gabotse, Jehofa o nyaka gore bao ba mo emelago ka go ruta Beibele bona ka bobona e be mehlala e mebotse ya “go sekega.” (1 Timotheo 4:​12, PK) Tsela ya bophelo ya barutiwa ba pele ba bjalo ka Paulo le Timotheo e hlatsela gore ba be ba hlwekile; ba be ba ila boitshwaro bjo bo gobogilego, mo Paulo a ilego a ba a ngwala gore: “Xe e le bootswa, le dithšila ka moka, le mexabaru, tše byalo le xo bolêla di se kê tša bolêlwa mo xo lena; ké sôna se se swanetšexo bakxêthwa. Le tša dihlong di se kê tša ba xôna, le dipolêlô tša bošilo, le metlaê e sa lokaxo.”—Ba-Efeso 5:​3, 4.

20, 21. Ke ka baka la’ng o dumelelana le seo moapostola Johane a se ngwadilego, bjale ka ge se begilwe go 1 Johane 5:3?

²⁰ Gaešita le ge ditekanyetšo tša boitshwaro tšeo di lego ka Lentšung la Modimo e le tše kwalago le tše lebanyago, ga se morwalo o gatelelago. Se e bile selo se se lego molaleng go Johane, moapostola yo a phetšego nako e telele. Motheong wa seo a se bonego nywaga-someng ya bophelo, o be a tseba gore boitshwaro bja Bokriste bo be bo se kotsi. Ka mo go fapanego, bo itlhatsetše e le bjo bobotse, bjo bo holago le bjo bo putsago. Johane o ile a gatelela se ge a be a ngwala gore: “Xobane leratô la xo rata Modimo ké xe re e-ya ka melaô ya xaxwe; xomme melaô ya xaxwe xa se e thata.”—1 Johane 5:3.

²¹ Lega go le bjalo, ela hloko gore Johane ga se a bolela go kwa Modimo ka boitshwaro bja Bokriste e le tsela e kaone feela ka gobane bo re phološa mathateng le go ditla-morago tše kotsi tša go dira ka tsela e fapanego. O boletše gabotse pono e nepagetšego ya go kwa Modimo ka go kwešiša gore go kwa Modimo ka boitshwaro bja Bokriste ke pontšho ya go bontšha gore re rata Jehofa Modimo, e lego sebaka se sebotse sa go bontšha gore re a mo rata. Ka kgonthe, go ithuta goba go ruta ba bangwe gore ba rate Modimo go nyaka gore re amogele le go diriša ditekanyetšo tša gagwe tše phagamego. Ee, go bolela go ithuta le go ruta ba bangwe boitshwaro bja Bokriste.

[Mengwalo ya ka tlase]

Na o a Gopola?

• Ke ka baka la’ng re swanetše go ithuta pele re ruta ba bangwe?

• Boitshwaro bja rena bo bolela’ng ka Jehofa?

• Seotswa se ka ba se šwahlela ditshwanelo tša bomang?

• Maikemišetšo a gago ke afe mabapi le boitshwaro bja Bokriste?

[Dipotšišo tša Thuto]

[Seswantšho go letlakala 22]

“Melaô ya xaxwe xa se e thata”