Latelang Tsela ya Bogoši

“A ingwalêlê lengwalô la tše di ngwadilwexo mo lengwalong le . . . a bê nalô’, a le balê ka mehla ka moka ya bophelô bya xaxwe.”—Doiteronomio 17:​18, 19.

1. Mokriste a ka nyaka go swana le bomang?

GA SE gantši o ka ipapetšago le kgoši goba kgošigadi. Ke Mokriste ofe yo a botegago le morutwana wa Beibele yo a ka inaganago a dira dilo ka matla a bogoši go swana le Dikgoši tše di botegago Dafida, Josia, Hiskia goba Josafate? Lega go le bjalo, o ka dira bjalo gomme o swanetše gore o swane le bona bonyenyane ka selo se tee se se kgethegilego. Selo seo ke’ng? Gomme ke ka baka la’ng o swanetše go nyaka go swana le bona tabeng yeo?

2, 3. Ke’ng seo Jehofa a se bonego e sa le pele mabapi le kgoši yeo e lego motho, gomme kgoši yeo e be e tla dira’ng?

² Mehleng ya Moše, nako e telele pele ga ge Modimo a ka dumelela ba-Isiraele go ba le kgoši yeo e lego motho, O bone e sa le pele gore go tla ba le kganyogo ya go nyaka kgoši magareng ga batho ba Gagwe. Ka gona o ile a budulela Moše gore a akaretše ditaelo tše di nyalelanago le yona kgweranong ya Molao. Tše e be e le ditaelo tša bogoši.

³ Modimo o itše: “Mehleng ya xe O tlo ba O tsene naxeng ye Morêna Modimo wa xaxo a Xo faxo yôna . . . ’me wa re: Ke tlo ipeêla kxoši byalo ka dithšaba tše di ntikoloxilexo, xôna O ipeêlê kxoši ye Morêna Modimo wa xaxo a tl’o xo e kxêtha. . . . Xe a dutše sedulong sa boxoši bya xaxwe, a ingwalêlê lengwalô la tše di ngwadilwexo mo lengwalong le . . . a bê nalô’, a le balê ka mehla ka moka ya bophelô bya xaxwe, xore a ithutê xo boifa Morêna Modimo wa xaxwe, a hlôkômêlê tše di bolêlwaxo ke molaô woo le ditaêlô tšeo, a dirê ka tšôna.”—Doiteronomio 17:​14-19.

4. Ditaelo tša Modimo go dikgoši di be di akaretša’ng?

⁴ Ee, kgoši yeo Jehofa a bego a tla e kgetha bakeng sa barapedi ba gagwe e be e swanetše go itirela kopi ya motho ka noši ya mangwalo ao o ka a hwetšago ka Beibeleng ya gago. Gomme kgoši e be e swanetše go bala kopi yeo letšatši le letšatši, leboelela. Yeo e be e se tlwaetšo ya go tlwaetša mogopolo. E be e le thuto, gomme e be e e-na le morero o holago. Kgoši yeo e bego e tla kgahla Jehofa e be e swanetše go phegelela thuto e bjalo gore e godiše le go tšwela pele e e-na le boemo bjo bo nepagetšego bja pelo. Le gona e be e swanetše go ithuta mangwalo ao a buduletšwego e le gore e be kgoši e atlegilego le e nago le temogo.—2 Dikxoši 22:​8-13; Diema 1:​1-4.

Ithute Bo-ka Kgoši

5. Ke dikarolo dife tša Beibele tšeo Kgoši Dafida a bego a e-na le tšona bakeng sa go di ngwalolla le go di bala, gomme o ile a ikwa bjang ka se?

⁵ O nagana gore ke eng seo go bego go nyakega gore Dafida a se dire ge a be a e-ba kgoši ya Isiraele? Go ba gona, o be a tla swanelwa ke go dira kopi ya dipuku tša Pentateuch (Genesi, Ekisodo, Lefitiko, Numeri le Doiteronomio). Nagana ka maikwelo a tseneletšego ao Dafida a swanetšego go ba a bile le ona ka monaganong le pelong ka baka la go diriša mahlo le diatla tša gagwe go ngwalolla kopi ya Molao. Go bonala Moše gape a ile a ngwala puku ya Jobo gotee le Psalme 90 le 91. Na Dafida a ka ba a ile a ngwallola le tšona tše? Mohlomongwe. Le gona, a ka ba a be a e-na le dipuku tša Jošua, Baahlodi le Ruthe.  Ka gona o ka kgona go bona gore Kgoši Dafida a ka ba a bile le karolo e kgolo ya Beibele bakeng sa gore a e bale le go e nweletša kgopolong. Gomme o na le lebaka la go dumela gore o ile a dira sona seo, ka gobane ela hloko mantšu a gagwe ao a ilego a a bolela mabapi le Molao wa Modimo, ao ga bjale a hwetšwago go Psalme 19:​7-11.

6. Re ka kgodišega bjang gore Jesu ka go swana le rakgolokhukhu wa gagwe Dafida o be a e-na le kgahlego ka Mangwalo?

⁶ Dafida yo Mogoloe lego Jesu, Morwa wa Dafidao ile a latela tsela e swanago. E be e le mokgwa wa Jesu go ya sinagogeng ya gabo beke le beke. Moo o ile a kwa go balwa le go hlaloswa ga Mangwalo. Go feta moo, ka dinako tše dingwe Jesu ka boyena o be a balela Lentšu la Modimo godimo gomme a hlalosa seo le bego le se bolela. (Luka 4:​16-21) O ka kgona go lemoga gabonolo go tlwaelana ga gagwe le Mangwalo. E fo bala dipego tša Diebangedi, gomme o bone gore ke makga a mantši gakaakang ao Jesu a itšego “xo ngwadilwe xwa thwe” goba ditsela tše dingwe tšeo ka tšona a bego a bolela ka dikarolo tše itšego tša Mangwalo. Ka mohlala, Thutong ya gagwe ya Thabeng bjalo ka ge e begilwe ke Mateo, Jesu o ile a tsopola Mangwalong a Sehebere ka makga a 21.—Mateo 4:​4-10; 7:29; 11:​10; 21:​13; 26:​24, 31; Johane 6:​31, 45; 8:17.

7. Jesu o be a fapane bjang le baetapele ba bodumedi?

⁷ Jesu o ile a latela keletšo e lego go Psalme 1:​1-3 e rego: “Yo šexo ké monna eo a sa sepelexo à lailwe ke bakxôpô, . . . Sa xaxwe ya ba xo thabêla molaô wa Morêna, molaô woo a o akanya mosexare le bošexo . . . ’me tšohle tše a di diraxo di a lêtlêxa.” Se ke seo se bego se fapane gakaakang ka baetapele ba bodumedi ba mehleng ya gagwe, bao ba ‘dutšego sedulong sa Moše’ eupša ba sa šetše “molaô wa Morêna”!—Mateo 23:​2-4.

8. Ke ka baka la’ng baetapele ba bodumedi ba ba-Juda ba be ba sa holege ka go ithuta Beibele?

⁸ Lega go le bjalo, ba bangwe ba ka makatšwa ke karolo e nngwe e ka kwelwago thoko e le bjalo ka ge eka Jesu o be a sa kgothaletše go ithuta Beibele. Go Johane 5:​39, 40, re bala seo Jesu a ilego a se botša batho ba bangwe ba mehleng ya gagwe ge a be a re: “Latišang mangwalong, ka xobane lena Le re Le na le bophelô byo bo sa felexo ka ôna; xomme ké ôna-xê a a hlatsêlaxo Nna. Xomme xa Le rate xo tla xo Nna la ba le bophelô byo bo sa felexo.” Ka mantšu ao Jesu o be a sa kgothaletše batheetši ba gagwe ba ba-Juda gore ba se ithute Mangwalo. Go e na le moo, o be a pepentšha maaka a bona goba go se tsepame ga bona. Ba be ba lemogile gore Mangwalo a ka ba hlahla go ya bophelong bjo bo sa felego, eupša wona Mangwalo ao ba bego ba a fatolla nkabe a ile a ba lebiša go Mesia ka mo go swanago, e lego Jesu. Lega go le bjalo, ba ile ba gana go mo amogela. Go ithuta ga bona go be go sa hole selo ka gobane e be e se batho ba botegago, e le ba sa nyakego go rutega.—Doiteronomio 18:​15; Luka 11:​52; Johane 7:​47, 48.

9. Ke mohlala ofe wo baapostola le baporofeta ba mehleng ya pele ba ilego ba o bea?

⁹ Boemo bja barutiwa gotee le baapostola ba Jesu e be e le bjo bo fapanego gakaakang! Ba ithutile “Mangwalô a makxêthwa . . . a kxônaxo xo [ba] hlalefišetša pholoxô.” (2 Timotheo 3:​15) Tabeng ye ba be ba swana le baporofeta ba mehleng ya pele bao ba bego ba ‘nyaka le go latiša ka menagano.’ Baporofeta bao ga se ba ka ba fo lebelela nyakišišo yeo e le thuto ya nakwana, ya go tšea dikgwedi tše mmalwa goba ngwaga. Moapostola Petro o re “ba ile ba tšwela pele ba nyakišiša,” kudu-kudu ka Kriste le letago leo le bego le akaretšwa go phološeng ga gagwe batho. Lengwalong la gagwe la pele, Petro o ile a tsopola ka makga a 34 go tšwa dipukung tše lesome tša Beibele.1 Petro 1:​10, 11, bapiša le NW.

10. Ke ka baka la’ng yo mongwe le yo mongwe wa rena a swanetše go ba le kgahlego ka thuto ya Beibele?

¹⁰ Ka gona, go molaleng gore go ithuta ka kelohloko Lentšu la Modimo e be e le kabelo ya  bogoši bakeng sa dikgoši tša Isiraele ya bogologolo. Jesu o ile a latela tsela ye. Gomme go ithuta lona e be e le mošomo bakeng sa bao ba tlago go buša le Kriste e le dikgoši legodimong. (Luka 22:​28-30; Ba-Roma 8:​17; 2 Timotheo 2:​12; Kutollo 5:​10; 20:6) Tsela ye ya bogoši e bohlokwa ka mo go swanago go batho ka moka lehono bao ba lebeletšego pele bakeng sa ditšhegofatšo tša lefaseng ka tlase ga pušo ya Mmušo.—Mateo 25:​34, 46.

Mošomo Bakeng sa Dikgoši le Wena

11. (a) Ke kotsi efe e lego gona bakeng sa Bakriste mabapi le go ithuta? (b) Ke dipotšišo dife tšeo re tlago go ba re dira gabotse ka go ipotšiša tšona?

¹¹ Re ka bolela ka matla le ka potego gore Mokriste yo mongwe le yo mongwe wa therešo o swanetše go ba a dira tlhahlobo ya motho ka noši ya Beibele. Se ga se selo seo se nyakegago ge o thoma go ithuta Beibele le Dihlatse tša Jehofa. Yo mongwe le yo mongwe wa rena o swanetše go ikemišetša gore a pheme go swana le batho ba bangwe ba mehleng ya moapostola Paulo bao ka morago ga lebaka ba ilego ba thoma go hlokomologa thuto ya motho ka noši. Ba ile ba ithuta “ditaba tša mathômô a thutô ya Modimo” tše bjalo ka “tša mathômô a thutô ya Kriste.” Lega go le bjalo, ga se ba ka ba tšwela pele ba ithuta gomme ka go rialo ga se ba ka ba ‘iša pele ka tša phethego.’ (Ba-Hebere 5:​12–6:3) Re ka ipotšiša ka mo go swanetšego gore: ‘Ke ikwa bjang ka thuto ya motho ka noši ya Lentšu la Modimo, go sa šetšwe gore ke kopanetše le phuthego ya Bokriste ka nakwana goba ka nywaga-some? Paulo o ile a rapela gore Bakriste ba mehleng ya gagwe ba tšwele pele ba “tšwêlêla pele tsebong ya xo tseba Modimo.” Na ke bontšha gore ke na le kganyogo e swanago?’—Ba-Kolose 1:​9, 10.

12. Ke ka baka la’ng go tšwela pele o rata Lentšu la Modimo go le bohlokwa?

¹² Ntlha ya bohlokwa tabeng ya go ba le mekgwa e mebotse ya go ithuta ke gore o hlagolela go rata Lentšu la Modimo. Psalme 119:​14-16 e šupa go go lebeledišiša Lentšu la Modimo ka mehla ka tsela e nago le morero e le tsela yeo ka yona o ka le thabelago. Gape, seo ke sa therešo go sa šetšwe gore ke nako e kae o le Mokriste. Go gatelela seo, gopola mohlala wa Timotheo. Gaešita le ge mogolo yo yo e lego Mokriste a be a šetše a hlankela e le “mohlabani o botse wa Jesu Kriste,” Paulo o ile a mo kgothaletša gore a phegelele “xo ratha Lentšu la therešô à sa kxopamiše.” (2 Timotheo 2:​3, 15; 1 Timotheo 4:​15) Go molaleng gore ‘go phegelela’ go akaretša go ba le mekgwa e mebotse ya go ithuta.

13. (a) Ke bjang go ka dirwago nako e oketšegilego bakeng sa thuto ya Beibele? (b) Ke diphetogo dife tšeo o ka kgonago go di dira e le gore o be le nako e oketšegilego ya go ithuta?

¹³ Mogato wa go lebiša mekgweng e mebotse ya go ithuta ke go beela ka thoko nako ya thuto ya Beibele ka mehla. O be o šoma bjang ntlheng yeo? Go sa šetšwe gore karabo ya gago ya kgonthe ke efe, na o nagana gore o tla holega ka go fetša nako e oketšegilego thutong ya motho ka noši? O ka ipotšiša gore, ‘Nka rulaganya bjang nako bakeng sa seo?’ Go ba gona, ba bangwe ba okeditše nako ya bona ya thuto e holago ya Beibele ka go tsoga e sa le mesong kudu. Ba ka bala Beibele ka metsotso e 15 goba ba dira nyakišišo e itšego ya thuto ya motho ka noši. Se sengwe seo se ka kgonegago ke gore, go thwe’ng ka go dira diphetogo tše nyenyane lenaneong la gago la beke le beke? Ka mohlala, ge e ba e le mokgwa wa gago go bala kuranta mo e ka bago ka mehla goba o bogela ditaba tša mantšibua thelebišeneng, na go ka kgonega gore o tshediše go dira seo letšatši le tee feela bekeng? O ka diriša nako letšatšing leo bakeng sa thuto e oketšegilego ya Beibele. Ge e ba o ka neela metsotso e ka bago e 30 bakeng sa thuto ya motho ka noši legatong la nako ya go bogela ditaba ka letšatši le tee, o tla ba o okeditše nako ya go ithuta ka diiri tše 25 ka ngwaga. Nagana feela mehola ya diiri tše oketšegilego tše 25 bakeng sa go bala goba go ithuta Beibele! Tšhišinyo e nngwe še: Bekeng e latelago, hlahloba mediro ya gago mafelelong a letšatši le lengwe le le lengwe. Bona ge e ba o ka hwetša selo se sengwe seo se ka tlošwago goba sa fokotšwa bakeng sa go dumelela nako e oketšegilego ya go ithuta goba ya go bala Beibele.—Ba-Efeso 5:​15, 16.

14, 15. (a) Ke ka baka la’ng dipakane di le bohlokwa ge go tliwa tabeng ya thuto ya motho ka noši? (b) Ke dipakane dife tše di kgonegago tša mabapi le go bala Beibele?

¹⁴ Ke’ng seo se ka dirago gore go ithuta go be bonolo go wena, e be mo go ipiletšago kudu? Dipakane. Ke dipakane dife tše di šomago tša go  ithuta tšeo o ka di beago? Go ba bantši, pakane ya mathomo e kgahlišago ke ya gore ba bale Beibele ka moka ga yona. Mohlomongwe go fihla ga bjale o badile dikarolo tša Beibele ka makga a mmalwa gomme di ile tša go hola. Na ga bjale o ka se ikemišetše go bala Beibele ka moka ga yona? Go go thuša gore o kgone go bala Beibele ka moka ga yona, o ka thoma ka go bala Diebangedi tše nne, gomme wa latela ka pakane ya bobedi, e bjalo ka go bala Mangwalo ka moka a Bakriste a Segerika. Ka morago ga ge o kgotsofetše gomme o holegile, pakane ya gago e latelago e ka ba go bala ka mo go tšwelago pele dipuku tša Moše le dipuku tša histori go fihla ka Esitere. Ka go fihlelela seo, o tla bona gore go fetša Beibele ka moka ga yona ke selo sa kgonthe. Mosadi yo mongwe yo a bego a e-na le nywaga e ka bago 65 ge a be a e-ba Mokriste, o be a ngwala ka bokagareng bja letlakala la ka ntle la Beibele ya gagwe letšatši-kgwedi leo a thomilego go bala Beibele ka lona le letšatši leo a e feditšego ka lona. Ga bjale o e badile ka makga a mahlano! (Doiteronomio 32:​45-47) Le gona go e na le gore a e bale sekirining sa computer goba letlakaleng leo le gatišitšwego, o bala Beibele a e swere ka seatla.

¹⁵ Ba bangwe bao ba šetšego ba fihleletše pakane ya go bala Beibele ka moka ga yona ba gata megato e mengwe ya go dira gore thuto ya bona e tšwelago pele e be le mohola o oketšegilego le go ba e putsago. Tsela e nngwe ke go akaretša tsebišo e kgethilwego ya go ithuta pele ga ge ba bala puku e nngwe le e nngwe e latelago ya Beibele. Ka pukung ya ‘Mangwalo ka Moka a Buduletšwe ke Modimo Gomme a a Hola’ le Insight on the Scriptures, motho a ka hwetša tsebišo e kgahlišago mabapi le thulaganyo ya histori, mokgwa le mehola e hwetšagalago ya puku e nngwe le e nngwe ya Beibele. *

16. Ke mohlala ofe wa thuto ya Beibele wo re swanetšego go phema go o latela?

¹⁶ Nakong ya thuto ya gago, phema mokgwa wo o tlwaelegilego go ba bantši bao ba bitšwago gore ke diithuti tša Beibele. Ba tsepelela ka mo go tseneletšego go seka-sekeng ditemana bjalo ka ge eka Beibele e hlamilwe ke batho. Ba bangwe ba bona ba leka go abela sehlopha se ikemišeditšego sa babadi puku e nngwe le e nngwe go ba naganela morero goba pono e inaganetšwego ya seo mongwadi wa motho wa puku e nngwe le e nngwe a bego a se nagana. Mafelelo a tsela e bjalo ya batho ya go nagana e ka ba gore ba lebelela Beibele e le puku feela ya histori goba ba lebelele dipuku tša Beibele e le tše bonagatšago tsela ya go tšwetša pele bodumedi. Diithuti tše dingwe di nwelela kudu dithutong tša go ithuta mantšu, go swana le thutapopego ya dipuku tša Beibele. Di swarega kudu ka go ithuta mathomo a mantšu le go tsopola ditlhaloso tša Sehebere le tša Segerika go e na le go swarega ka go ithuta bohlokwa bja molaetša wa Modimo. Na o nagana gore ditsela tše bjalo di tla neelana ka tumelo e tseneletšego le e tutuetšago?—1 Ba-Thesalonika 2:13.

17. Ke ka baka la’ng re swanetše go lebelela Beibele e le yeo e nago le molaetša bakeng sa batho ka moka?

¹⁷ Na diphetho tšeo di fihlelelwago ke diithuti ke tše kwagalago? Na ke therešo gore puku e nngwe le e nngwe ya Beibele e na le ntlha e tee ya bohlokwa goba ntlha e tee feela e reretšwego babadi ba itšego ka mo go kgethegilego? (1 Ba-Korinthe 1:​19-21) Therešo ke gore dipuku tša Lentšu la Modimo di na le bohlokwa bja sa ruri bakeng sa batho ba nywaga ka moka le ditlogo. Gaešita le ge puku mathomong e be e ngwaletšwe motho o tee bjalo ka Timotheo goba Tito, goba sehlopha se itšego, mohlomongwe ba-Galatia goba ba-Filipi, ka moka ga rena re ka kgona e bile re swanetše go ithuta dipuku  tšeo. Ke tša bohlokwa bakeng sa yo mongwe le yo mongwe wa rena, gomme puku e itšego e ka ahla-ahla ditaba tše dintši gomme ya hola babadi ba bantši. Ee, molaetša wa Beibele ke wa lefase ka moka, e lego seo se re thušago go kwešiša lebaka leo ka lona e ilego ya fetolelwa ka maleme a batho go dikologa lefase.—Ba-Roma 15:4.

Go go Hola le go Hola ba Bangwe

18. O swanetše go naganišiša ka’ng ge o dutše o bala Lentšu la Modimo?

¹⁸ Ge o dutše o ithuta, o tla hwetša e le mo go holago kudu go nyaka kwešišo ya go kwešiša Beibele gotee le go leka go bona ditaba ka botlalo ka tsela yeo di tswalanago ka yona. (Diema 2:​3-5; 4:7) Seo Jehofa a se utollotšego ka Lentšu la gagwe se tswalana kgaufsi le morero wa gagwe. Ka gona ge o dutše o bala, tswalanya ditherešo le dikeletšo morerong woo wa Modimo. O ka naganišiša kamoo tiragalo, kgopolo goba boporofeta bo tswalanago ka gona le morero wa Jehofa. Ipotšiše gore: ‘Se se mpotša’ng ka Jehofa? Se tswalana bjang le morero wa Modimo o phethagatšwago ka Mmušo wa gagwe?’ O ka naganišiša gape gore: ‘Nka diriša bjang tsebišo ye? Na nka e diriša ge ke ruta goba ke eletša ba bangwe motheong wa Mangwalo?’—Jošua 1:8.

19. Ke mang yo a holegago ge o anegela ba bangwe ka seo o ithutilego sona? Hlalosa.

¹⁹ Go nagana ka batho ba bangwe ka lehlakoreng le lengwe le gona go a hola. Ge o dutše o bala le go ithuta Beibele, o tla ithuta dilo tše difsa gomme wa bona dilo ka sebopego se sefsa. Leka go akaretša dilo tšeo poledišanong e agago le ditho tša lapa la gago goba ba bangwe. Ge e ba o dira bjalo ka dinako tše di swanetšego ka tsela ya boikokobetšo, dipoledišano tše bjalo ka ntle le pelaelo e tla ba tše di putsago. Go laodiša ga gago ka tsela ya kgonthe le ka mafolofolo seo o ithutilego sona goba dibopego tšeo o di hweditšego di kgahliša go tla dira gore tsebišo yeo o e hweditšego e be yeo e kgahlišago kudu go ba bangwe. Go feta seo, e tla ba e holago go wena ka noši. Ka tsela efe? Ditsebi di boletše gore motho o tla dula a gopola ka selo seo a ithutilego sona goba a se badilego ka nako e telele ge e ba a re se sa dutše e le se sefsa ka mogopolong, a se diriša goba a se boeletša, go swana le go botša ba bangwe ka sona. *

20. Ke ka baka la’ng e le mo go holago go bala Beibele leboelela?

²⁰ Nako le nako ge o bala puku ya Beibele, ka ntle le pelaelo o tla ithuta tsebišo e mpsha. O tla kgahlišwa ke dikarolo tšeo nakong e fetilego di bego di sa go kgahliše gakaalo. O tla ba le kwešišo e mpsha ka tšona. Seo se tla gatelela gore go e na le go fo ba dipuku feela tša batho, dipuku tša Beibele ke mahumo ao a swanetšego bakeng sa thuto ya gago e boeletšwago le e go holago. Gopola kgoši e bjalo ka Dafida, o be a swanetše ‘go e bala mehla ka moka ya bophelo bja gagwe.’

21. Ke moputso ofe woo o ka o letelago ka go oketša thuto ya gago ya go ithuta Lentšu la Modimo?

²¹ Ee, bao ba tšeago nako bakeng sa thuto e tseneletšego ya go ithuta Beibele ba holega kudu. Ba hwetša mabenyabje a moya le temogo. Tswalano ya bona le Modimo e ba matla, ya kgaufsi-ufsi. Le gona ba fetoga thušo e holago ka mo go oketšegilego go ditho tša lapa, go bana babo rena le dikgaetšedi ka phuthegong ya Bokriste le go bao ba sa tlago go ba barapedi ba Jehofa.—Ba-Roma 10:​9-14; 1 Timotheo 4:16.

[Mengwalo ya ka tlase]

Na o a Gopola?

• Ke’ng seo dikgoši tša Isiraele di bego di swanetše go se dira?

• Jesu le baapostola ba beile mohlala ofe mabapi le thuto ya Beibele?

• Ke diphetogo dife tšeo o ka di dirago go oketša nako ya gago ya thuto ya motho ka noši?

• O swanetše go thoma thuto ya go ithuta Lentšu la Modimo ka boemo bofe bja kgopolo?

[Dipotšišo tša Thuto]

[Lepokisi go letlakala 15]

“Ka Diatleng tša Rena”

“Ge e ba re nyaka . . . tšhupane (concordance) ya go re šupetša ka Beibeleng, sedirišwa se sekaone kudu ke Internet. Eupša ge e ba re nyaka go bala Beibele, go ithuta yona, go nagana ka yona, go naganišiša ka yona, re swanetše go e swara ka diatleng tša rena, ka gobane ye ke yona tsela e tee feela ya go e tsenya ka menaganong le ka dipelong tša rena.”Gertrude Himmelfarb, moprofesara yo a rotšego modiro wa City University, New York.