Lesolo la go Hlakodiša ba Wetšwego ke Tlala le Tšwela Pele!

OKA botšiša gore, ‘Ke tlala ya mohuta mang?’ Ke tlala ya mabapi le dijo tša moya! Moporofeta wa bogologolo wa mo-Hebere o boletše e sa le pele ka tlala ye: “Tsebang-xê! Ó r’yalo Morêna Mong ’a bohle. Xo tla matšatši a ke tl’o xo romêla tlala mo faseng, e sexo tlala ya boxôbê, e sexo lenyôra la meetse; e tlo ba xo lla xo kwa Lentšu la Morêna.” (Amosi 8:​11) Bakeng sa go thuša go imolla tlala ya moya, ditho tše 48 tša sehlopha sa bo-112 sa Sekolo sa Beibele sa Watchtower sa Gilead, seo se lego Patterson, New York, di ya dinageng tše 19 tše di fapanego tšeo di lego dikontinenteng tše hlano le dihlakahlakeng tša lewatle.

Di ya di itlhamile, e sego ka nama ya kgonthe le mabele, eupša ka tsebo, phihlelo le tlwaetšo. Ka dikgwedi tše hlano di tsenela thuto ya Beibele e tseneletšego yeo e hlametšwego go matlafatša tumelo ya tšona bakeng sa tirelo ya boromiwa mašemong a šele. Ka March 9, 2002, ba 5 554 bao ba bilego gona bakeng sa lenaneo la go aloga ba ile ba theetša ka lethabo.

Stephen Lett, yo a hlankelago e le setho sa Sehlopha se Bušago sa Dihlatse tša Jehofa o ile a bula lenaneo ka mafolofolo. O ile a amogela baeng ba bantši bao ba bego ba etile go tšwa dikarolong tše di fapanego tša lefase ka tsela e kgethegilego. Ke moka o ile a diriša mantšu a Jesu a rego “Lena Le seetša sa lefase” modirong wa baromiwa ba nakong e tlago. (Mateo 5:​14) O ile a hlalosa gore: ‘Dikabelong tša lena le tla “bonega” dikarolong tše di fapa-fapanego tša mediro e kgahlišago ya Jehofa, la dira gore ba dipelo tše botegago ba kgone go bona botse bja Jehofa le merero ya gagwe.’ Ngwanabo rena Lett o ile a kgothaletša baromiwa go diriša seetša sa Lentšu la Modimo bakeng sa go pepentšha lefsifsi la dithuto tša maaka gomme ba nee tlhahlo bakeng sa bao ba tsomago therešo.

Boemo bja Kgopolo bjo bo Swanetšego bo Bohlokwa Bakeng sa Katlego

Ka morago ga mantšu a go bula a modula-setulo, Baltasar Perla e lego setho sa Komiti ya Lekala la United States o ile a nea polelo ya mathomo ya dihlogo tša tatelano tšeo di hlametšwego go thuša dialoga go ba baromiwa bao ba atlegilego. O ile a bolela ka sehlogo se se rego, “E-ba le Sebete le Matla Gomme o Gate Mogato.” (1 Koronika 28:​20, NW) Kgoši Salomo wa bogologolo o ile a hwetša kabelo e thata ya go dira selo seo a bego a sa ka a se dirago aga tempele kua Jerusalema. Salomo o ile a gata mogato, gomme ka thekgo ya Jehofa tempele e ile ya fela. A diriša thuto go sehlopha, Ngwanabo rena Perla o itše: ‘Le amogetše kabelo e mpsha ya go ba baromiwa, gomme le swanetše go ba le sebete le matla.’ Ka ntle le pelaelo barutwana ba hweditše khomotšo kgonthišetšong ya gore Jehofa a ka se ke a ba tlogela ge feela ba dula ba le kgaufsi le yena. Ngwanabo rena Perla o ile a kgoma batheetši ka go phetha ka seo a se bonego: ‘Le ka dira dilo tše dibotse kudu le le baromiwa. Baromiwa ba tlišeditše nna le lapa la gešo therešo!’

Polelo yeo e neilwego ke Samuel Herd e lego setho se sengwe sa Sehlopha se Bušago e be e na le sehlogo se se rego,  “Lebelela go Jehofa Bakeng sa Katlego.” Barutwana ba thoma modiro wa boromiwa, gomme katlego ya bona e ithekgile kudu ka tswalano ya bona le Jehofa. Ngwanabo rena Herd o ba kgothaditše ka gore: ‘Le hweditše tsebo e ntši ya Beibele ka dithuto tša lena Gilead. Le be le dutše le amogela ka lethabo. Eupša bjale bakeng sa katlego ya kgonthe, le tla swanelwa ke go thoma go aba seo le ithutilego sona.’ (Ditiro 20:​35) Baromiwa ba tla ba le dibaka tše dintši tša go dira se ge ba dutše ba ‘itšhollela’ ba bangwe.Ba-Filipi 2:17.

Ke keletšo efe ya go laelana yeo bahlahli ba bego ba e swaretše barutwana? Mark Noumair o be a theile sehlogo sa gagwe go Ruthe 3:​18, ‘Dula o Lebelele mo Taba e Išago Ntshe.’ Seboledi se diriša mohlala wa Naomi le Ruthe, se ile sa kgothaletša dialoga go ba le kholofelo e tletšego ditokišetšong tše mokgatlo wa Modimo wa lefaseng o di hlomilego le go hlompha taolo ya pušo ya Modimo. Ngwanabo rena Noumair o ile a kgoma dipelo tša barutwana ka gore: ‘Go ka ba le dinako tše dingwe tšeo o ka se kwešišego gore ke ka baka la’ng go dirilwe phetho yeo e go kgomago goba nako yeo o ka bago le maikwelo a matla a gore selo se itšego se swanetše go dirwa ka tsela e fapanego. O tla dira’ng? O tla ema gomme o itšeele diphetho goba o tla “dula,” o  botile tlhahlo ya Modimo, o kgodišegilego gore ka nako e swanetšego o tla tliša mafelelo a mabotse feela.’ (Ba-Roma 8:​28) Keletšo ya go ‘lebiša tlhokomelo go tšwetšeng pele dikgahlego tša Mmušo, go šetša seo mokgatlo wa Jehofa o se dirago go e na le go šetša dimelo,’ ka ntle le pelaelo e tla itlhatsela e na le mohola go baromiwa ba nakong e tlago dikabelong tša bona tša dinageng dišele.

Wallace Liverance yoo e bego e le moromiwa gomme yoo ga bjale a hlankelago e le mohlahli Gilead, o ile a nea polelo ya mafelelo tatelanong ya dipolelo tša mathomo. Sehlogo sa polelo ya gagwe se be se re, “Dulang le Tsepamišitše Kgopolo, Dulang Tirelong ya Modimo.” O ile a bontšha gore moporofeta Daniele o ile a kwešiša ka go bona go wa ga Babele le go tšwa go seo Jeremia a se boletšego e sa le pele gore khunologo ya ba-Isiraele bothopša e be e le kgaufsi. (Jeremia 25:​11; Daniele 9:2) Daniele o be a etše hloko tšhupa-mabaka ya Jehofa, gomme seo se ile sa mo thuša go dula a lebišitše tlhokomelo go go utollwa ga morero wa Modimo. Ka mo go fapanego, ba-Isiraele mehleng ya moporofeta Hagai ba itše: “Lebaka . . . xa le ešo la fihla.” (Hagai 1:2) Ba ile ba lahlegelwa ke pono ya mehla yeo ba bego ba phela go yona, eupša ba lebiša tlhokomelo go iketleng ga bona le go ikgotsofatša gomme ba tlogela mošomo woo ba bego ba lokolotšwe Babele gore ba o dire, wa go aga tempele lefsa. Ngwanabo rena Liverance o phethile ka gore: “Ka gona dulang le tsepeletše ka go dula le naganne ka morero wa Jehofa ka dinako ka moka.”

Mohlahli wa Gilead e lego Lawrence Bowen o ile a ba modula-setulo wa karolo e nago le sehlogo se se rego, “Jehofa o Šegofatša Bao ba Dirišago Lentšu le le Phelago.” (Ba-Hebere 4:​12) Karolo ye e be e le mabapi le diphihlelo tša tšhemong tša sehlopha, e gatelela kamoo Jehofa a šegofatšago bao ba dirišago Beibele ge ba bolela le go ruta. Modula-setulo o ile a bontšha gore Jesu Kriste o beetše badiredi ba Modimo ka moka mohlala o mobotse: ‘Jesu o be a ka bolela e le ka kgonthe gore seo a bego a se ruta se be se sa tšwe go yena, eupša o be a bolela Lentšu la Modimo.’ Ba dipelo tše botegago ba ile ba lemoga therešo gomme ba arabela go yona ka mo go swanetšego. (Johane 7:​16, 17) Selo se swanago ke sa therešo lehono.

Tlwaetšo ya Gilead e Hlamela Motho Bakeng sa Mediro ka Moka e Mebotse

Ka morago ga moo, ditho tša lapa la Bethele tša nako e telele e lego Richard Abrahamson le Patrick LaFranca ba ile ba boledišana le dialoga tše tshela tša Gilead tšeo ga bjale di hlankelago dibopegong tše di fapa-fapanego tša tirelo ya nako e tletšego. Dialoga tša sehlopha sa bo-112 di ile tša kgothatšega ka go kwa gore nywaga e mentši ka morago, bao ba tshela, go sa šetšwe kabelo ya bona ya gona bjale ba tšwela pele ba diriša tlwaetšo ya bona yeo ba e hweditšego Gilead mabapi le thuto ya Beibele, mešomo ya go dira nyakišišo le go phedišana le batho.

Theodore Jaracz e lego setho sa Sehlopha se Bušago o neile polelo ya motheo ya lenaneo. E be e e-na le sehlogo se se rego “Seo se Phethagatšwago ka go Kgotlelela Lehloyo la Sathane.” Dikgweding tše hlano tše di fetilego, barutwana ba be ba dula tikologong e lerato le ya pušo ya Modimo. Lega go le bjalo, bjalo ka ge go boletšwe dithutong tša bona tša ka klaseng, re phela lefaseng la lenaba. Batho ba Jehofa ba ka tlase ga tlhaselo lefaseng ka bophara. (Mateo 24:9) A diriša dipego tše mmalwa tša Beibele, Ngwanabo rena Jaracz o ile a bontšha gore ‘re bahlaselwa ba kgethegilego ba Diabolo. Re swanetše go matlafatša tswalano ya rena le Jehofa gomme re ikemišetše go lebeletšana le diteko.’ (Jobo 1:8; Daniele 6:4; Johane 15:​20; Kutollo 12:​12, 17) Ngwanabo rena Jaracz o phethile ka gore go sa šetšwe lehloyo leo le tšwelago pele malebana le batho ba Modimo, ‘ga go na lerumo leo le ruletšwego go lwa le rena leo le tlago go atlega, bjalo ka ge Jesaya 54:​17 e bolela. Jehofa o tla kgonthišetša gore re phološwa ka nako ya gagwe le ka tsela ya gagwe.’

Dialoga tša sehlopha sa bo-112 sa Gilead di ‘hlamilwe ka mo go feletšego,’ ka ntle le pelaelo di tla dira mo gontši go imolla tlala ya moya dinageng tšeo di tlago go hlankela go tšona. (2 Timotheo 3:​16, 17, bapiša le NW.) Re lebeletše pele ka phišego go kwa dipego tša mabapi le kamoo di neago molaetša o agago go batho ba dinageng tše.

[Lepokisi go letlakala 23]

DIPALO-PALO TŠA SEHLOPHA

Palo ya dinaga tše di emetšwego: 6

Palo ya dinaga tšeo ba abetšwego go tšona: 19

Palo ya barutwana: 48

Palo-gare ya nywaga: 33,2

Palo-gare ya nywaga therešong: 15,7

Palo-gare ya nywaga bodireding bja nako e tletšego: 12,2

[Seswantšho go letlakala 24]

Sehlopha se se Alogago sa bo-112 sa Sekolo sa Beibele sa Watchtower sa Gilead

Lelokelelong leo le lego ka mo tlase, methaladi e balwa go tloga ka pele go ya ka morago gomme maina a lokeleditšwe go tloga go le letshadi go ya go le letona mothalading o mongwe le o mongwe.

(1) Parotte, M.; Hooker, E.; Anaya, R.; Reynolds, J.; Gesualdi, K.; Gonzalez, J. (2) Robinson, C.; Phillips, B.; Maidment, K.; Moore, I.; Noakes, J.; Barnett, S. (3) Stires, T.; Palmer, B.; Yang, C.; Groothuis, S.; Groppe, T.; Bach, C. (4) Anaya, R.; Soukoreff, E.; Stewart, K.; Simozrag, N.; Simottel, C.; Bach, E. (5) Stewart, R.; Yang, H.; Gilfeather, A.; Harris, R.; Barnett, D.; Parotte, S. (6) Maidment, A.; Moore, J.; Groothuis, C.; Gilfeather, C.; Noakes, S.; Stires, T. (7) Gesualdi, D.; Groppe, T.; Soukoreff, B.; Palmer, G.; Phillips, N.; Simottel, J. (8) Harris, S.; Hooker, P.; Gonzalez, J.; Simozrag, D.; Reynolds, D.; Robinson, M.