Mathata a Batho a Kgaufsi le go Fela!

“THUŠO ya batho e na le mohola o lekanyeditšwego ge e ba e sa hlame karolo ya sebopego se se phatlaletšego le sebopego sa dipolitiki seo se ikemišeditšego go rarolla dibaki tša motheo tša ntwa. Phihlelo e bontšhitše leboelela gore thušo ya batho e nnoši e ka se kgone go rarolla mathata ao sebopego sa ona e lego sa bopolitiki ka tekanyo e kgolo.”—The State of the World’s Refugees 2000.

Go sa šetšwe thušo e kgolo ya batho, mathata a batho a gola ka go se fetoge. Go na le kgonagalo efe ya gore go na le tharollo ya ka mo go sa felego ya bopolitiki? Ka kgonthe, ke e nyenyane kudu. Eupša ke kae gape moo re ka lebelelago gona? Ka taba e nago le morero, moapostola Paulo mathomong a lengwalo la gagwe leo le yago go Bakriste ba kua Efeso o hlalosa kamoo Modimo a tlago go fediša mathata a batho. E bile o hlalosa sedirišwa seo Modimo a tlago go se diriša bakeng sa go dira semmoleledi yo a tla rarollago sebaki sa motheo sa mathata ka moka ao a re tlaišago lehono. Ke ka baka la’ng o sa ahla-ahle seo Paulo a se bolelago? Taba e hwetšwa go Ba-Efeso 1:​3-10.

‘Go Kopanyetša Dilo ka Moka Mmogo go Kriste’

Moapostola o re, morero wa Modimo ke seo a se bitšago “modiro o laoletšwego [goba go laolwa ga ditaba] phethego ya mabaka.” Se se bolela’ng? Se bolela gore go na le nako yeo Modimo a e beilego ya ge a tla dira bjalo ka ge eka o “kopanyetša dilo ka moka mmogo hlogong e tee mo go Kriste, tše di lego legodimong le tše di lego lefaseng mo go yena.” (Ba-Efeso 1:​10, PK) Ee, Modimo o šetše a thomile go diriša thulaganyo ya go tliša dilo ka moka tša legodimong le tša lefaseng gore di dumelelane ka tlase ga taolo ya gagwe ka go lebanya. Se se kgahlišago, mabapi le lentšu leo le fetoletšwego mo e le “go kopanyetša dilo,” seithuti sa Beibele J. H. Thayer se bolela gore: “[Modimo] o ikgobokeletša . . . dilo ka moka le batho (go fihla ga bjale ba arogantšwego ke sebe) boemong bja mohlakanelwa bja bogwera ka Kriste.”

Seo se šupa go go nyakega ga gore Modimo a dire se a nagana gore ke bjang go se kwane go ilego gwa tšwelela mathomong. Mathomong  a histori ya batho, batswadi ba rena ba mathomo e lego Adama le Efa ba ile ba latela Sathane Diabolo go rabeleng malebana le Modimo. Ba be ba nyaka tokologo ka sebopego sa go ba le tshwanelo ya go ikgethela seo se lokilego le se sebe. (Genesi 3:​1-5) Ka go dumelelana le toka ya Modimo, ba ile ba rakwa lapeng la Modimo gomme ba lahlegelwa ke bogwera bja bona le yena. Ba ile ba wetša batho ka gare ga go se phethagale ka mafelelo a šoro ka moka ao re lebeletšanago le ona lehono.—Ba-Roma 5:12.

Tumelelo ya Nakwana ya Bobe

Ba bangwe ba ka botšiša gore, ‘Ke ka baka la’ng Modimo a ile a ba dumelela go dira seo?’ ‘Ke ka baka la’ng a ile a se ke a fo diriša matla a gagwe a phagamego gomme a gapeletša thato ya gagwe, ka gona a thibela bohloko ka moka le tlaišego yeo re lebeletšanago le yona gona bjale?’ E ka ba ga tlhago go nagana bjalo. Eupša ke eng seo go dirišwa ga matla ao a magolo go bego go tla se hlatsela e le ka kgonthe? Na o kganyoga goba go thabela motho yo mongwe le yo mongwe yoo ka pontšho ya mathomo ya borabele a fo go šwalalanya kganetšo ka moka ka gobane a na le matla a go dira bjalo? Ruri ga go bjalo.

Marabele ao ga se a ka a hlohla matla a Modimo ra-matla-ohle e le ka kgonthe. A ile a hlohla ka mo go kgethegilego tshwanelo le go swanelega ga tsela ya gagwe ya go buša. E le go rarolla gatee ya ba moka dikgang tše tšeo di rotošitšwego, Jehofa o dumeletše dibopiwa tša gagwe go ipuša ka ntle le taolo ya gagwe ka go lebanya ka nako e lekanyeditšwego. (Mmoledi 3:1; Luka 21:​24) Ge nako yeo e fedile, o tla tsena ditaba gare ka go diriša lefsa taolo e feletšego ya lefase. Ka nako yeo e tla ba mo go kwagalago gabotse gore tsela ya gagwe ya go buša ke tsela e nnoši yeo e kgonthišetšago khutšo ya ka mo go sa felego, lethabo le katlego go badudi ba lefase. Ke moka baganetši ka moka ba lefase ba tla tlošwa ka mo go sa felego.—Psalme 72:​12-14; Daniele 2:44.

“Mola Lefase lè Sešo la Thêwa”

Ke kgale Jehofa a rerile go dira se ka moka. Paulo o bolela gore “mola lefase lè sešo la thêwa.” (Ba-Efeso 1:4) Yeo e be e se nako ya pele ga tlholo ya lefase goba go bopša ga Adama le Efa. Lefase leo e be e le le “botse kudu,” gomme borabele bo be bo sa tšwa bo e ba gona. (Genesi 1:​31) Ka gona, ke “lefase” lefe leo moapostola Paulo a bego a bolela ka lona? Ke lefase la bana ba Adama le Efalefase la batho ba sebe, leo le sa phethagalago la batho bao ba nago le tebelelo ya go lopollwa. Pele ga ge bana le ge e le bafe ba ka belegwa, Jehofa o be a šetše a tseba gore o be a tla swaragana bjang le ditaba bakeng sa go imolla bana ba Adama bao ba ka phološwago.—Ba-Roma 8:20.

Go ba gona, se ga se bolele gore Mmuši wa legohle o swanetše go swaragana le ditaba kamoo batho ba tla dirago ka gona. Ba lemoga gore boemo bja tšhoganetšo bo ka tšwelela, batho ba rulaganya ditsela tše di fapa-fapanego bakeng sa go lebeletšana le boemo. Aowa, Modimo ra-matla-ohle o fo bolela morero wa gagwe gomme a o phetha. Lega go le bjalo, Paulo o hlalosa tsela yeo ka yona Jehofa a phethilego go rarolla ditaba e le gore a tliše kimollo ya ka mo go sa felego bathong. Megato yeo e be e le efe?

Ke Mang yo a tla Tlišago Kimollo?

Paulo o hlalosa gore barutiwa ba Kriste bao ba tloditšwego ka moya ba na le tema e kgethegilego go lokišeng tshenyo yeo e bakilwego ke sebe sa Adama. Paulo o re Jehofa ‘o re kgethile mo go Kriste,’ gore re buše le Jesu Mmušong wa legodimong. Ge a hlalosa se go tšwela pele, Paulo o re Jehofa “ó re hlaoletše xo ba bana ba xaxwe ka Jesu Kriste.” (Ba-Efeso 1:​4, 5) Go ba gona, Jehofa ga se a ba kgetha goba go ba hlaola e sa le pele e le motho ka o tee ka o tee. Lega go le bjalo, o ile a hlaola e sa le pele sehlopha sa batho ba botegago le bao ba ineetšego bao ba tla tšeago karolo le Kriste go lokišeng tshenyo yeo Sathane Diabolo gotee le Adama le Efa ba e tlišeditšego lapa la motho.Luka 12:​32; Ba-Hebere 2:​14-18.

A selo se se makatšago gakaakang! Tlhohlong ya gagwe ya mathomong malebana le bogoši bja Modimo, Sathane o be a šupa gore tlholo ya Modimo ya batho e be e na le phošogore ge ba le ka tlase ga kgateletšego e kgolo goba  kgoketšo, ka moka ga bona ba tla rabela malebana le pušo ya Modimo. (Jobo 1:​7-12; 2:​2-5) Pontšhong e kgolo ya “letaxô la kxauxêlô ya xaxwe,” Jehofa Modimo ge nako e dutše e e-ya o bontšhitše go bota ga gagwe tlholo ya gagwe ya lefaseng ka go thwala ba bangwe lapeng la Adama la sebe gore e be bana ba gagwe ba moya. Bao ba lego sehlopheng se se senyenyane ba tla hlankela legodimong. Ka morero ofe?—Ba-Efeso 1:​3-6; Johane 14:​2, 3; 1 Ba-Thesalonika 4:​15-17; 1 Petro 1:​3, 4.

Moapostola Paulo o re barwa ba bao ba thwetšwego ba Modimo ba fetogile “baji ba bohwa ba Modimo, ba xo ja bohwa le Kriste” Mmušong wa legodimong. (Ba-Roma 8:​14-17) E le dikgoši le baperisita, ba tla tšea karolo go lokolleng lapa la batho bohlokong le tlaišegong yeo le lebeletšanego le yona ga bjale. (Kutollo 5:​10) Ke therešo gore “dibopya ka moka le tšôna di sa fêxêlwa, le tšôna di sa šôkwa.” Lega go le bjalo, kgaufsinyane barwa ba ba Modimo bao ba kgethilwego ka mo go kgethegilego ba tla latela Jesu Kriste go gateng mogato, gomme batho ka moka bao ba kwago ba “tlo hunollwa bohlankeng bya thsenyêxô, [ba] be le tokoloxô ya xe bana ba Modimo bà e-ya letaxong” gape.—Ba-Roma 8:​18-22.

“Topollô ka Madi a Xaxwe”

Tše ka moka e bile tše di kgonegago ka pontšho yeo e swanetšego go ba e le e kgahlišago kudu le e phagamego ya kgaugelo e sa swanelago ya Modimo lefaseng le la batho bao ba ka phološwagosehlabelo sa topollo sa Jesu Kriste. Paulo o ngwadile gore: “[ Jesu Kriste] Yo re bonexo ka Yêna topollô ka madi a xaxwe, yôna tebalêlô ya dikaroxô ka lehumô la kxauxêlô ya xaxwe.”—Ba-Efeso 1:7.

Jesu Kriste ke sedirišwa se segolo go phethagatšeng morero wa Modimo. (Ba-Hebere 2:​10) Sehlabelo sa gagwe sa topollo se nea lebaka la motheo la gore Jehofa a thwale ba bangwe ba bana ba Adama go ya lapeng la gagwe la legodimong le go imolla batho mafelelong a sebe sa Adama, ka ntle le go tšeela fase go kgodišega ka melao ya Gagwe le melao ya gagwe ya motheo. (Mateo 20:​28; 1 Timotheo 2:6) Jehofa o dirile dilo ka tsela yeo e thekgago go loka ga gagwe le go kgotsofatša dinyakwa tša toka e phethagetšego.—Ba-Roma 3:​22-26.

‘Sephiri se Sekgethwa’ sa Modimo

Ka nywaga e dikete, Modimo ga se a ka a utolla ka go lebanya gore o tla phethagatša morero wa gagwe bjang bakeng sa lefase. Lekgolong la pele la nywaga C.E., o ile a “tsebiša [Bakriste] sephiri [“se sekgethwa,” NW] sa thatô ya xaxwe.” (Ba-Efeso 1:9) Paulo gotee le Bakriste-gotee le yena ba tloditšwego ba ile ba kwešiša gabotse tema e kgolo yeo e abetšwego Jesu Kriste go phethagatšeng morero wa Modimo. Ba ile ba thoma le go kwešiša tema ya bona e kgethegilego e le maja-bohwa gotee le Kriste Mmušong wa legodimong. (Ba-Efeso 3:​5, 6, 8-11) Ee, pušo ya Mmušo ka diatleng tša Jesu Kriste le babuši-gotee le yena ke sedirišwa seo Modimo a tlago go se diriša bakeng sa go tliša khutšo ya ka mo go sa felego e sego feela magodimong eupša gape le lefaseng. (Mateo 6:​9, 10) Ka yona pušo ye, Jehofa o tla tsošološa lefase le go ba boemong bjo mathomong a bego a bo reretše lona.—Jesaya 45:​18; 65:​21-23; Ditiro 3:21.

O beile nako bakeng sa kgato ya go lebanya ya go fediša kgatelelo ka moka lefaseng le go hloka toka mo go lego gona bokamosong bjo bo lego kgaufsi. Eupša ge e le gabotse Jehofa o thomile mogato wa tsošološo ka Pentekoste ya 33 C.E. Bjang? Ka go thoma ka nako yeo go bokanya ‘dilo tša legodimong,’ bao ba tlago go buša  le Kriste magodimong. Ba ba be ba akaretša Bakriste ba Efeso. (Ba-Efeso 2:​4-7) Morago bjale mehleng ya rena, Jehofa o be a dutše a kgoboketša ‘dilo tša lefaseng.’ (Ba-Efeso 1:​10) Ka lesolo la go ruta la lefaseng ka bophara, o tsebatša go ditšhaba ka moka ditaba tše dibotse tša mabapi le pušo ya Mmušo wa gagwe ka diatleng tša Jesu Kriste. Bao ba arabelago e bile ba kgobokeletšwa lefelong la tšhireletšego ya moya le phodišo gona bjale. (Johane 10:​16) Kgaufsinyane lefaseng leo le hlwekišitšwego la paradeise, ba tla ba le tokologo e feletšego go go hloka toka le tlaišego ka moka.—2 Petro 3:​13; Kutollo 11:18.

“Tšwelopele e kgolo” e šetše e dirilwe ke maiteko a batho bakeng sa go thuša batho bao ba gateletšegilego. (The State of the World’s Children 2000) Lega go le bjalo, mogato wa tšwelopele e kgolo e tla ba go tsena ditaba gare mo go bonagalago ga Kriste Jesu le babuši-gotee le yena pušong ya Mmušo wa legodimong. Ba tla rarolla ka mo go feletšego dibaki ka moka tša phapano le bobe bjo bongwe ka moka bjo bo re tlaišago. Ba tla fediša mathata a batho ka moka.—Kutollo 21:​1-4.

[Diswantšho go letlakala 4]

Ditiro tša thušo ya batho ga se tša rarolla mathata a batho

[Seswantšho go letlakala 6]

Sehlabelo sa topollo sa Kriste se neile batho kimollo sebeng sa Adama

[Seswantšho go letlakala 7]

Go a kgonega go hwetša tšhireletšego ya moya le phodišo ya moya lehono

[Diswantšho go letlakala 7]

Kgaufsinyane, ka Mmušo wa Mesia kimollo e feletšego mathateng a batho e tla tla