Nako ya go Utolla Sephiri

Go boloka ditaba tše itšego e le sephiri go ka bolela phapano magareng ga khutšo le ngangišano. Eupša na go na le nako ya go utolla sephiri? Ela hloko seo moporofeta Amosi a se bolelago mabapi le Modimo wa gagwe: “Morêna Mong ’a bohle a ka se kê a dira selô, baboni bahlanka ba xaxwe à sešo a ba botša thopa y’axwe.” (Amosi 3:7) Go tšwa mantšung a, re ka ithuta selo se itšego ka sephiri. Jehofa a ka boloka dilo tše itšego e le sephiri ka lebaka le itšego la nako gomme mafelelong a di utollela batho ba itšego. Re ka ekiša Jehofa bjang tabeng ye?

Ka dinako tše dingwe, badiši bao ba kgethilwego ka phuthegong ya Bokriste ba hwetša e le mo go holago go boloka ditaba tše itšego di sa utollwa. (Ditiro 20:​28) Ka mohlala, ba naganne ka go holega ga phuthego, ba ka phetha ka go boloka ditokišetšo tše dingwe goba diphetogo tša boikarabelo bja phuthego e le sephiri go fihlela ka nako e itšego.

Lega go le bjalo, boemong bjo bo bjalo ke ga bohlokwa go dira gore e be mo go kwagalago go bao ba akaretšwago gore ke neng le gona ke ka mokgwa ofe taba e tlago go utollwa. Go tseba gore ke neng taba e tlago go utollwa phatlalatša go ka ba thuša go boloka sephiri.—Diema 25:9.