‘O Mosadi wa Sethakga’

Mantšu a a theto a be a lebišitšwe go mosadi yo mofsa wa Moaba. E be e le mohlologadi yo a bego a bitšwa Ruthe, ngwetši ya mosadi wa mo-Isiraele e lego Naomi. Ge a be a dula Isiraele nywaga e ka bago 3000 e fetilego, ge baahlodi ba be ba buša, Ruthe o ile a ba le leina le lebotse. (Ruthe 3:​11) O ile a hwetša bjang botumo bjo? Ke bomang bao ba ka holwago ke mohlala wa gagwe?

E be e se motho yo a jago “bušwa bya bobodu,” Ruthe o be a šoma diiri tše telele e bile a šoma ka thata a budutša ka mašemong, mafolofolo a gagwe a ile a dira gore a hwetše theto. Gaešita le ge a be a kgopelwa gore a se ke a šoma ka thata, o ile a tšwela pele a šoma ka thata, a dira bjalo go feta kamoo go letetšwego ka gona. Se segolo kudu, o ile a swanela tlhaloso ya Beibele ya mosadi yo a retegago, wa sethakga le yo a šomago ka thata.—Diema 31:​10-31; Ruthe 2:​7, 15-17.

E be e le dika tša moya tša Rutheboikokobetšo bja gagwe, boemo bja gagwe bja kgopolo bja go ineela le lerato la gagwe leo le sa kwanantšhegotšeo e bego e le mabaka a magolo a botumo bja gagwe bja phatlalatša bjo a bo thabetšego. A tlogela batswadi ba gagwe le naga ya gabo, ka kholofelo e nyenyane ya go hwetša tšhireletšego yeo lenyalo le ka e tlišago, o ile a kgomarela Naomi. Ka nako e swanago, Ruthe o ile a bontšha kganyogo ya go hlankela Jehofa, Modimo wa mmatswala’gwe. Ge e gatelela mohola wa gagwe, pego ya Mangwalo e re o be a le ‘kaone go Naomi go feta barwa ba šupago.’Ruthe 1:​16, 17; 2:​11, 12; 4:​15, bapiša le NW.

Gaešita le ge pego ya Ruthe ya bothakga e be e le e retegago, selo sa bohlokwa kudu e be e le kahlolo e botse ya Modimo ka dika tša gagwe le go mo putsa ka tokelo ya go ba makgolokhukhu wa Jesu Kriste. (Mateo 1:5; 1 Petro 3:4) Ruthe ke mohlala o mobotse gakaakang e sego feela go basadi ba Bakriste eupša gape le go bohle bao ba ipolelago gore ba rapela Jehofa!