Dikopano tša Ditšhaba-tšhaba ka 2003

KA Mokibelo wa October 6, 2001, go ile gwa swarwa seboka sa ngwaga le ngwaga sa ditho tša Watch Tower Bible and Tract Society of Pennsylvania kua Jersey City, New Jersey, U.S.A. Ka morago ga seboka seo, lenaneo leo le kgethegilego le ile la thabelwa ke ditho gotee le baeng ba tšona. Letšatšing le le latelago, dibokeng tša tlaleletšo tšeo di bego di swaretšwe ditoropong tše nne tša kua Canada le United States, ditho tša Sehlopha se Bušago sa Dihlatse tša Jehofa di ile tša dira tsebišo e latelago ka morago ga polelo ya tšona ya go tswalela:

“Ge re dutše re lebeletše bokamosong, go bohlokwa kudu gore batho ba Modimo ka moka ba se ngale go bokana gotee. Moapostola Paulo o ile a kgothatša gore se, gotee le go kgothatšana, di swanetše go dirwa kudu ge re dutše re lebeletše go batamela ga letšatši le legolo leo le šiišago la Jehofa. (Ba-Hebere 10:​24, 25) Ka go dumelelana le taelo ye ya Mangwalo, re holofela go ba le dikopano tša selete dikarolong ka moka tša lefase ngwageng o tlago wa [2002]. Gomme ka ngwaga wa 2003, ge e ba e le thato ya Jehofa, go ka kgonega gore re sware dikopano tše di kgethegilego tša ditšhaba-tšhaba dikarolong tše itšego tša lefase. Ga bjale ke nako ya go dula re phakgame gomme re be šedi, re lemoga kamoo ditiragalo tša lefase di diregago ka gona.”

Go sa šetšwe go se tsepame le dikgoga-kgogano tše di mpefalago ge tshepedišo ye ya dilo e dutše e batamela mafelelong, modiro wa batho ba Modimo o swanetše go tšwela pele. Ditaba tše dibotse tša Mmušo go akaretša le molaetša wa temošo wa Beibele, di swanetše go bolelwa ditšhabeng ka moka, melokong ka moka, malemeng ka moka le go batho ka moka, ba kgothaletšwe gore ba ‘boife Modimo gomme ba mo rete, ka gobane nako ya kahlolo ya gagwe e batamela go feta le ge e le neng pele.’ (Kutollo 14:​6, 7) Ka gona, go ithekgile ka thato ya Tatago rena wa legodimong le go thabela ga gagwe seo, go rulaganywa dikopano tša ditšhaba-tšhaba dikarolong tše di fapa-fapanego tša lefase bakeng sa ngwaga wa 2003.

Sa pele, dipokano tše bjalo di rulagantšwe ka mo go sa kgonthišetšwago ditoropong tše sego kae kua Amerika Leboa gomme kapejana ka morago ga moo kua Yuropa. Moragonyana ka 2003, go tla dirwa ditokišetšo bakeng sa dihlopha tša baemedi gore di ye ditoropong tše sego kae tša kua Asia; gomme go batamela mafelelong a ngwaga, dihlopha tše oketšegilego di tla ya Afrika, Amerika Borwa le tikologong ya Pacific. Makala a itšego a tla kgopelwa go romela palo e lekanyeditšwego ya baemedi mafelong a itšego a kopano, ka gona go ka se kgonege gore yo mongwe le yo mongwe a newe taletšo ya go ba gona. Lega go le bjalo, e tla ba mo go kgothatšago gore re be le baemedi ba lekanetšego ba emelago dinaga tše di fapa-fapanego lefelong le lengwe le le lengwe.

Go se go ye kae diphuthego tša Dihlatse tša Jehofa di tla amogela tsebišo e lego mabapi le dipokano tše. Tsebišo mabapi le matšatši-kgwedi a nepagetšego le metse e nepagetšego yeo go yona baemedi ba laleditšwego ba tla kgonago go ba go tšona e tla newa ke makala ao ba lego ka tlase ga ona. Ka gona, go kgopelwa gore mo nakong ye o se ke wa ngwala goba wa dira dinyakišišo mabapi le taba ye.

Bao mafelelong ba tlago go kgethwa go ba baemedi e tla ba feela Dihlatse tše di ineetšego le go kolobetšwa tšeo e tlago go ba mehlala e mebotse gomme tša bontšha go kgomega ga borwarre go bana babo bona ba lefelong leo. Ka lehlakoreng le lengwe, bana babo rena bao ba tla ba le dibaka tše dibotse tša go katološa go amogela baeng ga kgonthe mo go bontšhago lerato. (Ba-Hebere 13:​1, 2) Se se tla feleletša ka ‘go kgothatšana.’ (Ba-Roma 1:​11, 12, bapiša le NW.) Ditaba tše di oketšegilego mabapi le dithulaganyo tše di tla tsebišwa ke makala ao a laleditšwego go romela baemedi nageng goba dinageng tše itšego.

Dikopano tša selete tša matšatši a mararo bakeng sa ngwaga wa 2003 di tla rulaganywa dinageng tše dintši ka mo go tlwaelegilego. Ka go bokana gotee, ka moka re tla ba le sebaka sa ‘go theetša, go ithuta le go kgothatšwa.’ (Doiteronomio 31:​12; 1 Ba-Korinthe 14:​31) Se se tla nea batho ba Modimo ka moka sebaka sa go ‘leka gomme ba bone gore Jehofa o lokile.’ (Psalme 34:8) Dikopanong ka moka tša ditšhaba-tšhaba, gotee le dikopanong tše dintši tša selete, go tla ba le baromiwa, bao ba bangwe ba bona ba tlago go tšea karolo lenaneong.

Ngwageng wo, re tla thabela Dikopano tša Selete tša “Bagoeledi ba Mmušo ba Fišegago,” tšeo di tla re tutueletšago go nea bohlatse bjo bogolo. Ge re dutše re dira se, ka ntle le pelaelo go fagahla ga rena go tla gola bakeng sa seo Jehofa a re swaretšego sona ngwageng o tlago. Se se tla re thuša gore ‘re be šedi, re phakgame gomme re be ba itokišeditšego’ mabapi le dinako tše tše thata le tša bohlokwa bjo bogolo.—Mateo 24:​42-44.