Go Sepela Ditseleng tša Jehofa go Tliša Meputso e Humilego

NA O kile wa sepela dithabeng? Ge e ba o kile wa sepela dithabeng, o swanetše go ba o ile wa ikwa eka o godimo ga tlhaka ya lefase. E be e le mo go thabišago gakaakang go hema moya o hlabolago, go bonela kgole le go monya botse bja tlhago! Mohlomongwe dipelaelo tša ka mehla morago kua gae di ile tša bonagala e se tša bohlokwa kudu.

Bakeng sa batho ba bantši maeto a bjalo a kgahlišago ke a sego kae feela le ao a tlago ka sewelo, eupša ge e ba o le Mokriste yo a ineetšego, o ka ba o be o dutše o sepela lefelong la dithaba ka nako e teleleka kgopolo ya moya. Ka go swana le mopsalme wa bogologolo, ka ntle le pelaelo o kile wa rapela ka gore: “Morêna, ntsebišê ditsela tša xaxo, O nthutê mebila ya xaxo.” (Psalme 25:4) Na o gopola tsela yeo o ilego wa ikwa ka yona ge o thoma go ya thabeng ya ntlo ya Jehofa gomme o thoma go sepela mafelong a phagamego? (Mika 4:2; Habakuku 3:​19) Ga go pelaelo gore kapejana o ile wa lemoga gore go sepela go bapa le ditsela tše tše phagamego tša borapedi bjo bo sekilego go go tlišeditše tšhireletšego le lethabo. O ile wa thoma go ikwa ka tsela yeo mopsalme a ilego a ikwa ka yona: “Sethšaba se tsebaxo mexobêlô ya thlalalô ké sa lehlôxônôlô; ké sa bao ba ba sepelaxo seetšeng sa ’fahloxô sa xaxo Morêna.”—Psalme 89:15.

Lega go le bjalo, ka dinako tše dingwe batho bao ba sepelago mafelong a dithaba ba swanetše go lwa le meboto e metelele le yeo e theogago. Maoto a bona a tla thoma go ba bohloko gomme ba lapa. Le rena re ka lebeletšana le mathata tirelong ya rena go Modimo. Morago bjale, megato ya rena e ka ba e ile ya ba e lapišago. Ke bjang re ka tsošološago matla a rena le lethabo? Mogato wa pele ke go lemoga bophagamo bja ditsela tša Jehofa.

Melao e Phagamego ya Jehofa

Ditsela tša Jehofa di ‘godimo kgole le ditsela tša batho’ gomme borapedi bja gagwe bo ‘thekgilwe ka go tia godimo ga dithaba gomme bo beilwe godimo ga meboto.’ (Jesaya 55:9; Mika 4:1) Bohlale bja Jehofa ke “bohlale byo bo tšwaxo xodimo.” (Jakobo 3:​17) Melao ya gagwe e phagametše melao e mengwe ka moka. Ka mohlala, ka nako ya ge ba-Kanana ba be ba dira bošoro ka go dira dihlabelo ka bana, Jehofa o ile a nea ba-Isiraele melao yeo e bego e phagame ya boitshwaro gomme e hlaolwa ka kgaugelo. O ba boditše gore: “O se kê wa beba sefahloxô sa mmôtlana, xoba wa boifa sefahloxô sa e moxolo . . . Moeng e a diiletšexo xo lena a dulê xo lena byalo ka motho wa xeno e a tswaletšwexo xaê. O mo ratê ka mokxwa wo O ithataxo ka wôna.”—Lefitiko 19:​15, 34.

 Nywaga-kgolo e 15 ka morago, Jesu o ile a nea mehlala e oketšegilego ya ‘molao o tagišitšwego’ wa Jehofa. (Jesaya 42:​21, PK) Thutong ya gagwe ya Thabeng, o boditše barutiwa ba gagwe gore: “Ratang manaba a lena; ba ba Le roxaxo Le ba šexofatše; ba ba Le hlôyaxo Le ba setše; ba ba Le pharaxo le ba Le hlômaraxo Le ba rapêlêlê. Ké xôna xe Le tlo ba bana ba Tata-weno wa maxodimong.” (Mateo 5:​44, 45) O ile a oketša ka gore: “Tšohle tše Le rataxo xore batho ba Le dirêlê tšôna, le lena Le ba dirêlê tšôna-tšeo; xobane Molaô o r’yalo, le bôná baporofeta.”Mateo 7:12.

Melao ye e phagamego e kgoma dipelo tša batho bao ba arabelago, ka go ba tutueletša go ekiša Modimo yoo ba mo rapelago. (Ba-Efeso 5:1; 1 Ba-Thesalonika 2:​13) Nagana ka go fetoga moo go ilego gwa direga tabeng ya Paulo. Ge re thoma go kwa ka yena, “ó be a dumêla xo bolawa xa Stefano” le go “šuhla phuthêxô.” Nywaga e sego kae ka morago, o be a dirišana le Bakriste ba kua Thesalonika ka bonolo bjo bjalo ka “bya mma xo bana xe a amuša ngwana wa xaxwe.” Thuto ya Modimo e ile ya fetola Paulo go tloga go go ba motlaiši go ya go go ba Mokriste yo a hlokomelago. (Ditiro 8:​1, 3; 1 Ba-Thesalonika 2:7) O be a tloga a leboga e le ka kgonthe gore botho bja gagwe bo tutueditšwe ke dithuto tša Kriste. (1 Timotheo 1:​12, 13) Tebogo e swanago e ka re thuša bjang gore re tšwele pele re sepela go bapa le ditsela tše phagamego tša Modimo?

Go Sepela ka Tebogo

Banamedi ba dithaba ba thabišwa ke diponagalo tše di kgahlišago kudu tšeo naga ya godimo e nago le tšona. Ba ithuta gape le go thabela dilo tše dinyenyane tsejaneng ya maoto, tše bjalo ka lefsika leo le sa tlwaelegago, letšoba le lebotse goba go selaganya ga phoofolo ya lešoka. Moyeng, re swanetše go phafogela meputsoe megolo le e menyenyaneyeo e tlišwago ke go sepela le Modimo. Go phafoga mo go ka re dira gore re sepele ka matla ao a tsošološitšwego le go fetolela mosepelo wa go hlotša go ya mosepelong wo o tletšego mafolofolo. Re tla boeletša mantšu a Dafida a rego: “A nke O nkwišê botho bya xaxo è sa le bosasa; xobane ke botile Wene. Nthutê tsela ye nkaxo e swara, xobane môya wa-ka o lelaletše Wene.”—Psalme 143:8.

Mary, yo a sepetšego ka nywaga e mentši ditseleng tša Jehofa o re: “Ge ke lebelela tlholo ya Jehofa, ga ke bone feela polane e raraganego eupša ke bona botho bjo lerato bja Modimo. E ka ba e le phoofolo, nonyana goba khunkhwane e nngwe le e nngwe e na le dibopego tšeo di e hlaolago, tšeo di kgahlišago kudu. Lethabo le le swanago le tšwa ditherešong tša moya tšeo di ilego tša kwagala kudu go theoša le nywaga.”

Re ka godiša bjang tebogo ya rena? Ka boripana, ka go se tšee dilo tšeo Jehofa a re direlago tšona gabohwefo. Paulo o ngwadile gore: “Le se kxaotše xo rapêla. Mo xo tšohle Le leboxe.”—1 Ba-Thesalonika 5:​17, 18; Psalme 119:62.

Thuto ya motho ka noši e re thuša go hlagolela moya wa go leboga. Paulo o kgothaleditše Bakriste ba Kolose gore: “Swarang tsela Lè le ba xaxwe [Kriste Jesu], . . . ba ba tiilexo tumelong . . . ba xo mo leboxa ka botlalô.” (Ba-Kolose 2:​6, 7) Go bala Beibele le go naganišiša ka seo re se badilego go tiiša tumelo ya rena le go re batametša kgaufsi le Mongwadi wa Beibele. Matlakaleng a yona ka moka go na le mahumo ao a ka re tutueletšago go “leboxa ka botlalô.”

Go hlankela Jehofa gotee le bana babo rena go dira gore tsela e be bonolo kudu. Mopsalme o ipoletše ka gore: “Ke kwana le bohle ba Xo boifaxo.” (Psalme 119:​63) Tše dingwe tša dinako tša rena tša lethabo re di fetša dikopanong tša Bokriste goba ka dinako tše dingwe re e-na le bana babo rena. Re lemoga gore lapa la rena la bohlokwa kudu la Bokriste lefaseng ka bophara le gona ka baka la Jehofa le ditsela tša gagwe tše phagamego.Psalme 144:​15b.

 Ka ntle le tebogo, go ikwa re na le boikarabelo go tla re tiiša gore re tšwele pele ditseleng tše phagamego tša Jehofa.

Go Sepela ka Boikarabelo

Banamedi ba dithaba bao ba ikwago ba na le boikarabelo ba lemoga senyakwa sa go sepela ka kelohloko e le gore ba pheme go timela goba go arogela kgaufsi kudu le magaga a kotsi. Bjalo ka batho bao ba nago le tokologo ya boikgethelo, Jehofa o re dumelela tekanyo e leka-lekanego ya tokologo le boikgethelo. Eupša tokologo e bjalo e nyaka gore re ikwe re na le boikarabelo ge re dutše re phethagatša ditlamo tša rena tša Bokriste.

Ka mohlala, Jehofa o bota gore bahlanka ba gagwe ba tla phethagatša ditlamo tša bona ka go ikarabela. Ga a bolele gore ke matla a makaakang goba gore ke nako e kaakang tšeo re swanetšego go di fetša medirong ya Bokriste goba gore re swanetše go neelana ka bokae go tša ditšhelete goba ka ditsela tše dingwe. Ka mo go fapanego, mantšu a Paulo go ba-Korinthe a sa dutše a šoma le go rena ka moka: “E mongwê le e mongwê a nthšê ka mo a kwanexo le pelo ya xaxwe.”2 Ba-Korinthe 9:7; Ba-Hebere 13:​15, 16.

Go nea ga Mokriste yo a nago le boikarabelo go akaretša go abelana ditaba tše botse le ba bangwe. Re bontšha gape gore re na le boikarabelo ka go ntšha meneelo bakeng sa modiro wa Mmušo wa lefase ka bophara. Gerhardt, e lego mogolo, o hlalosa gore yena le mosadi wa gagwe ba okeditše meneelo ya bona kudu ka morago ga go etela kopano ya kua Yuropa Bohlabela. O re: “Re ile ra bona gore bana babo rena moo ba na le mo go nyenyane dilong tše di bonagalago; lega go le bjalo ba thabela dipuku tša rena tša Beibele kudu, ka gona re ile ra dira phetho ya gore re nyaka go nea thekgo e kgolo kamoo re ka kgonago ka gona go bana babo rena bao ba hlokago dinageng tše dingwe.”

Go Godiša Kgotlelelo ya Rena

Go sepela dithabeng go nyaka kgotlelelo. Banamedi ba dithaba ba itšhidulla nako le nako ge ba kgona gomme ba bantši ba a sepela-sepela bakeng sa go itokišeletša go sepela maeto a matelele. Ka mo go swanago, Paulo o ile a kgothaletša gore re dule re swaregile ka mediro ya pušo ya Modimo e le gore re kgone go ipoloka re tiile moyeng. Paulo o itše bao ba ratago go swara ka “tsela ye e loketšexo ba Morêna” gomme “ba-fiwa-matla” ba swanetše “xo enywa dienywa ka medirô e botse yohle.”—Ba-Kolose 1:​10, 11.

Tutuetšo e tlaleletša go go kgotlelela ga banamedi ba dithaba. Bjang? Ka go boloka menagano ya bona e tsepamišitšwe selong seo se bonagalago gabotse, se bjalo ka thaba yeo e lego kgole, go na le mafelelo ao a tutuetšago. Ge monamedi wa thaba a fihla mafelong ao a a lemogago tseleng, a ka kgona go bapiša tšwelopele ya gagwe le pakane ya gagwe ya motheo. Ge a lebelela morago bokgoleng bjo a šetšego a bo sepetše, o ikwa a kgotsofetše.

Ka mo go swanago, kholofelo ya rena ya bophelo bjo bo sa felego e a re thuša le go re tutuetša. (Ba-Roma 12:​12) Go sa dutše go le bjalo, ge re dutše re sepela ditseleng tša Jehofa, re hwetša kgotsofalo ka go bea dipakane tša Bokriste le go di fihlelela. Re ikwa re thabile gakaakang ge re lebelela morago nywageng e mentši ya tirelo e botegago goba ge re lemoga diphetogo tšeo re di dirilego semelong sa rena!Psalme 16:11.

Bakeng sa go sepela leeto le letelele le go seketša matla, basepedi ba sepela ka go iketla. Ka mo go swanago, mokgwa o mobotse woo o akaretšago go ya dibokeng ka mehla le tirelong ya tšhemo o tla re boloka re sepela ka go tsepama bakeng sa go fihlelela pakane ya rena. Ka gona, Paulo o kgothaditše Bakriste-gotee le yena ka gore: “Re išê pele ka yôna tsela e tee, rè le batee kxopolong.”—Ba-Filipi 3:16.

Ke therešo gore ga re sepele re nnoši ditseleng tša Jehofa. Paulo o ngwadile gore: “A re hlôkômêlaneng seng sa rena, re išanê leratong le medirong e botse.” (Ba-Hebere 10:​24) Bogwera bjo bobotse bja moya bo tla dira gore go be bonolo go swarelela mosepelong ge re dutše re sepela le badumedi-gotee le rena.—Diema 13:20.

Sa mafelelo le sa bohlokwa kudu, le ka mohla ga se ra swanela go lebala matla ao Jehofa a re neago ona. Bao matla a bona a lego thatong ya Jehofa “bà n’e matla, ba ekeletšwa matla.” (Psalme 84:​5, 7) Le ge ka dinako tše dingwe re swanetše go lebeletšana le maemo a thata, ka thušo ya Jehofa re ka a fenya.