Jehofa o Thakga Batho ba Gagwe ka Seetša
Jehofa o Thakga Batho ba Gagwe ka Seetša
“Tsoxa O [“mosadi,” NW] bônêxè, xobane seetša sa xaxo se e-tla, ’me letaxô la Morêna le hlaba xodimo xa xaxo.”—JESAYA 60:1.
1, 2. (a) Boemo bja batho ke bofe? (b) Ke bomang bao ba ikarabelago ka lefsifsi la batho?
“A MOLA re ka be re e-na le Jesaya goba Mokgethwa Paulo!” Seo e be e le sello se se nyamišago sa Mopresidente wa United States e lego Harry Truman morago kua ka bo-1940. Ke ka baka la’ng a ile a bolela mantšu ao? Ka gobane o ile a lemoga go nyakega ga baetapele ba nago le boitshwaro ba maemo a hlomphegago kudu lefaseng la mehleng ya gagwe. Batho ba be ba sa tšwa go feta mehleng ya lefsifsi ya lekgolo la bo-20 la nywaga, e lego ntwa ya bobedi ya lefase. Lega go le bjalo, gaešita le ge ntwa e be e fedile, lefase le be le se khutšong. Lefsifsi le ile la tšwela pele. Ruri, nywaga e 57 ka morago ga go fela ga ntwa yeo, lefase le sa dutše le le lefsifsing. Ge nkabe Mopresidente Truman a be a sa phela lehono, ga go na pelaelo gore o be a sa dutše a tla bona go nyakega ga baetapele ba nago le boitshwaro ba swanago le Jesaya goba moapostola Paulo.
2 Go sa šetšwe gore Mopresidente Truman o be a tseba goba o be a sa tsebe, moapostola Paulo o boletše ka lefsifsi leo le tlaišago batho, gomme o ile a lemoša malebana le lona mangwalong a gagwe. Ka mohlala, o lemošitše badumedi-gotee le yena gore: “Xobane thlabanô ya rena xa se ya xo lwa le madi le nama; re lwa le mebušô le ba matla le balaola-mafase ba lefsifsi; re lwa le meôya ya bobe e lexo sebakeng sa xodimo.” (Ba-Efeso 6:12, mongwalo o sekamego ke wa rena.) Ka mantšu a Paulo ga se a bontšha feela gore o be a lemogile lefsifsi la moya leo le bego le khupeditše lefase eupša gape le gore o be a tseba mothopo wa therešomeoya e matla ya matemona yeo e hlalositšwego e le “balaola-mafase.” Ka ge meoya e matla e ikarabela ka lefsifsi la lefase, ke’ng seo batho feela ba ka se dirago bakeng sa go e raka?
3. Go sa šetšwe maemo a lefsifsi a batho, ke’ng seo Jesaya a ilego a se bolela e sa le pele ka bao ba botegago?
3 Jesaya le yena o boletše ka lefsifsi leo le tlaišago batho. (Jesaya 8:22; 59:9) Lega go le bjalo, ge a lebelela pele mehleng ya rena, o ile a bolela e sa le pele ka tlase ga pudulelo gore gaešita le mehleng ye ya lefsifsi, Jehofa o tla phadimiša pono ya bao ba ratago seetša. Ee, gaešita le ge re se na Paulo le Jesaya ka nama, re na le mangwalo a bona a buduletšwego bakeng sa go re hlahla. Go bona gore yeo ke tšhegofatšo e kaakang bakeng sa bao ba ratago Jehofa, anke re eleng hloko mantšu a boporofeto a Jesaya ao a hwetšwago kgaolong ya bo-60 ya puku ya gagwe.
Mosadi wa Boporofeta o Hlabiša Seetša
4, 5. (a) Jehofa o laela mosadi gore a dire’ng, gomme o dira kholofetšo efe? (b) Ke taba efe e kgahlišago yeo e lego go Jesaya kgaolo 60?
4 Mantšu a mathomo a Jesaya 60 a lebišitšwe go mosadi yo a lego maemong a nyamišago kuduyo a lego lefsifsing, yo a robetšego a rapaletše fase. Gatee-tee, seetša se phuleletša lefsifsing, gomme Jehofa o goeletša ka gore: “Tsoxa O [“mosadi,” NW] bônêxè, xobane seetša sa xaxo se e-tla, ’me letaxô la Morêna le hlaba xodimo xa xaxo.” (Jesaya 60:1) Nako e tlile ya gore mosadi a eme gomme a bonagatše seetša sa Modimo, letago la gagwe. Ka baka la’ng? Re hwetša karabo temaneng e latelago: “Še-leo lefsifsi le khurumeditše lefase, boso bo thibile dithšabeng; xomme wene, s’etša se Xo hlabêlaxo ké Yêna Morêna; xo bônala letaxô la xaxwe xodimo xa xaxo.” (Jesaya 60:2) Ge mosadi a e-kwa taelo ya Jehofa, o kgonthišetšwa ka mafelelo a kgahlišago. Jehofa o re: “Ba-ntlê ba tlo tla seetšeng sa xaxo, le dikxoši di tlo tlêla ’etša sa masa a xaxo.”—Jesaya 60:3.
5 Mantšu a kgahlišago ditemaneng tše tše tharo ke matseno le kakaretšo ya seo se swerwego ke Jesaya kgaolo 60 ka moka ga yona. E bolela e sa le pele diphihlelo tša mosadi wa boporofeta gomme e hlalosa kamoo re ka dulago seetšeng sa Jehofa go sa šetšwe lefsifsi leo le lego bathong. Lega go le bjalo, ke’ng seo se bolelwago ke dika tša boporofeta tše di lego ditemaneng tše tše tharo tša matseno?
6. Mosadi wa Jesaya kgaolo 60 ke mang, gomme o emelwa ke bomang mo lefaseng?
6 Mosadi wa Jesaya 60:1-3 ke Tsione, e lego mokgatlo wa Jehofa wa legodimong wa dibopiwa tša moya. Lehono, Tsione e emelwa lefaseng ke mašaledi a “Isiraele ya Modimo,” e lego phuthego ya ditšhaba-tšhaba ya Bakriste ba tloditšwego ka moya bao ba nago le kholofelo ya go buša le Kriste legodimong. (Ba-Galatia 6:16, PK) Setšhaba se sa moya mafelelong se na le ditho tše 144 000, gomme phethagalo ya mehleng yeno ya Jesaya kgaolo 60 e theilwe go bao ba phelago mo lefaseng “mehleng ya bofêlô.” (2 Timotheo 3:1; Kutollo 14:1) Gape boporofeta bo na le mo gontši mo bo go bolelago ka bagwera ba Bakriste ba ba tloditšwego, e lego “lešaba le lexolo” la “dinku tše dingwê.”—Kutollo 7:9; Johane 10:16.
7. Boemo bja Tsione e be e le bofe ka 1918, gomme se se ile sa porofetwa bjang?
7 Na go bile le nako ya ge “Isiraele ya Modimo” e be e robetše lefsifsing, go etša ge go swantšheditšwe ke mosadi yoo wa boporofeta? Ee, se se diragetše nywaga e fetago e 80 e fetilego. Ntweng ya pele ya lefase, Bakriste ba tloditšwego ba ile ba katana ka thata gore ba boloke modiro wa go nea bohlatse o tšwela pele. Eupša ka 1918, ngwaga wa mafelelo wa ntwa, modiro o rulagantšwego wa boboledi o ile wa nyaka o kgaotšwa. Joseph F. Rutherford, yo a bego a okametše modiro wa boboledi wa lefaseng ka bophara, le Bakriste ba bangwe bao ba tumilego ba be ba ahloletšwe lebaka le letelele kgolegong ka baka la ditatofatšo tša maaka. Ka pukung ya Kutollo, Bakriste ba tloditšwego bao ka nako yeo ba bego ba le lefaseng ba be ba hlaloswa ka tsela ya boporofeta e le ditopo, ba rapaletše “mekxotheng ya motse o moxolo wo ba rexo kè Sodoma le Egipita.” (Kutollo 11:8) Yeo e be e tloga e le nako ya lefsifsi go Tsione, go etša ge e emelwa ke bana ba yona ba tloditšwego ba ba lego lefaseng!
8. Ke phetogo efe e kgolo yeo e diragetšego ka 1919, gomme ka mafelelo afe?
8 Lega go le bjalo, ngwaga wa 1919 o ile wa ba le phetogo e kgolo. Jehofa o ile a hlabišetša Tsione seetša! Baphologi ba Isiraele ya Modimo ba ile ba ema ka maoto e le gore ba bonagatše seetša sa Modimo, ba thomološa go tsebatša ditaba tše dibotse ka ntle le poifo. (Mateo 5:14-16) Ka go thušwa ke phišego e tsošološitšwego ya Bakriste ba, batho ba bangwe ba ile ba gogelwa seetšeng sa Jehofa. Sa pele, bao ba bego ba sa tšwa go tla ba ile ba tlotšwa e le ditho tše oketšegilego tša Isiraele ya Modimo. Go Jesaya 60:3 ba bitšwa dikgoši ka ge e tla ba baja-bohwa-gotee le Kriste Mmušong wa Modimo wa legodimong. (Kutollo 20:6) Ka morago, lešaba le legolo la dinku tše dingwe le ile la thoma go gogelwa seetšeng sa Jehofa. Tše ke “ditšhaba” tšeo go bolelwago ka tšona boporofeteng.
Bana ba Mosadi ba Boa Gae!
9, 10. (a) Ke’ng seo se kgahlišago seo mosadi a ilego a se bona, gomme se se be se swantšhetša’ng? (b) Tsione e be e na le lebaka lefe la go thaba?
9 Ga bjale, Jehofa o thoma go nea ditaba ka botlalo, taba yeo e hlalositšwego go Jesaya 60:1-3. O nea mosadi taelo e nngwe. Theetša seo a se bolelago: “Takataketša mahlô O xadiê!” Mosadi o kwa taelo, gomme seo a se bonago ke se se thabišago gakaakang! Bana ba gagwe ba boa gae. Lengwalo le tšwela pele gore: “Ka moka xa bôná ba a kxobokana, ba tla xo wene; barwa ba xaxo ba tla bá etšwa kxolê, barwedi ba xaxo ba kukilwe ka mabôxô.” (Jesaya 60:4) Go tsebatšwa ga Mmušo lefaseng ka bophara mo go thomilego ka 1919 go gogetše ba dikete ba bafsa tirelong ya Jehofa. Ba le bona ba fetogile “barwa” le “barwedi” ba Tsione, ditho tše di tloditšwego tša Isiraele ya Modimo. Ka gona, Jehofa o thakgile Tsione ka go tliša ba mafelelo ba ba 144 000 seetšeng.
10 Na o ka akanya lethabo la Tsione ge e thabela bana ba yona? Lega go le bjalo, Jehofa o nea Tsione mabaka a oketšegilego a go thaba. Re bala gore: “Byale O tlo taxa sefahloxô, pelo y’axo e tlo bina-bina, e tlo kxaroloxa xe menônô ya lewatlê è Xo tlêla, xe mahumô a dithšaba à e-tla xo wene.” (Jesaya 60:5) Ka go dumelelana le mantšu ao a boporofeta, ga e sa le go tloga ka bo-1930, Bakriste ba bantši ba ba nago le kholofelo ya go phela lefaseng ka mo go sa felego ba kgeregetše Tsione. Ba tšwile ‘lewatleng’ la batho bao ba arogilego go Modimo gomme ba emela mahumo a ditšhaba. Ke “matsaka a dithšaba ka moka.” (Hagai 2:7; Jesaya 57:20) Hlokomela gape gore yo mongwe le yo mongwe wa “matsaka a [a] ditšhaba” ga a hlankele Jehofa ka tsela ya gagwe. Aowa, ba tlaleletša botseng bja Tsione ka go tla go rapela le bana babo bona ba tloditšwego, ba ba “mohlape o tee” le bona ka tlase ga “modiši o tee.”—Johane 10:16.
Babapatši, Badiši le Bareki ba Boa Tsione
11, 12. Hlalosa mašaba ao a bonwego a e-ya ka thoko ya Tsione.
11 Mafelelo a kgoboketšo ye e boletšwego e sa le pele ke koketšego e makatšago palong ya bareti ba Jehofa. Se se boletšwe e sa le pele mantšung a latelago a boporofeta. Akanya o eme le mosadi wa boporofeta Thabeng ya Tsione. O lebelela ka bohlabela, gomme o bona’ng? “Makôkô a dikamêla a tlo Xo khurumetša, dikamêla tša lebelô tša kwa Midiane le tša Efa; ka moka xa bôná ba tla bà e-tšwa Saba, ba tliša thsipi e khwibidu le dibanô, ba tliša ’fokô le monate la thêtô ya Morêna.” (Jesaya 60:6) Mašaba a babapatši a hlahla mehlape ya ona ya dikamela a sepela ditseleng tše di yago Jerusalema. Ka baka leo, dikamela di bjalo ka mafula ao a apešitšego naga! Babapatši ba rwele dimpho tše bohlokwa, “thsipi e khwibidu le dibanô.” Gomme babapatši ba, ba tla seetšeng sa Modimo e le gore ba mo tumiše phatlalatša, ‘go tliša lefoko le monate la theto ya Jehofa.’
12 Babapatši ga ba sepele ba nnoši. Badiši le bona ba kgeregela Tsione. Boporofeta bo tšwela pele gore: “Mehlape yohle ya Kedara e tlo Xo phuthêxêla, dikxapa tša kwa Nebayothe di tlo Xo hlankêla.” (Jesaya 60:7a) Barui ba mehlape ba tla motseng o mokgethwa go tla go neela Jehofa tše kaone-kaone go tšwa mehlapeng ya bona. Ba bile ba ithapela go hlankela Tsione! Jehofa o amogela bašele ba bjang? Modimo ka boyena o a araba: “E tlo ba sedimo se se kxahlišaxo aletareng ya-ka; xomme ke tlo thakxa Ngwakô wa letaxô la-ka.” (Jesaya 60:7b) Jehofa ka botho o amogela dihlabelo le tirelo ya bašele ba. Go ba gona ga bona go thakga tempele ya gagwe.
13, 14. Ke’ng seo se bonwago se e-tšwa ka bodikela?
13 Bjale retolla hlogo ya gago gomme o lebelele ka thoko ya bodikela. O bona’ng? Lefelong leo le lego kgojana, go na le selo seo se bonagalago bjalo ka leru le lešweu leo le phatlaletšego sebakeng sa lewatleng. Jehofa o botšiša potšišo yeo e lego monaganong wa gago: “Ké bô-mang bála ba fofaxo bo-ka maru, byalo ka maeba xe a kxoroxêla dihlaxeng tša ôna?” (Jesaya 60:8) Jehofa o araba potšišo ya gagwe ka gore: “Dihlakehlake di ntebeletše. Ma-sela-watlê a kwa Tarasisi a etile pele, a tliša bana ba xaxo ba kxolê. Ba tliša thsipi-thsêhla ya bôná le thsipi e khwibidu; ba di tlišetša ’ina la Morêna Modimo wa xaxo, Yêna Mokxêthwa wa Isiraele, xobane ó Xo file letaxô.”—Jesaya 60:9.
14 Na o kgona go bona tiragalo ka leihlo la kgopolo? Kgojana go ya ka thoko ya bodikela leru lela le lešweu le batametše gomme ga bjale le bonagala bjalo ka marotho-rothwana. Le bonagala bjalo ka sehlopha sa dinonyana se thala maphoto. Eupša gape ge di dutše di batamela, o bona e le dikepe tše di nago le diseila tše di phurolotšwego gore di thibele phefo. Dikepe tše dintši kudu di sesa di lebile Jerusalema moo di swanago le maeba a mantši. Di e-tšwa maema-kepeng a kgole, dikepe di sesa ka lebelo le legolo, di tliša badumedi Jerusalema go tla go rapela Jehofa.
Mokgatlo wa Jehofa o a Gola
15. (a) Mantšu a Jesaya 60:4-9 a bolela e sa le pele ka koketšego efe? (b) Bakriste ba kgonthe ba bonagatša moya ofe?
15 A tlhaloso e kwagalago gakaakang yeo ditemana 4 go ya go 9 di e neago mabapi le koketšego ya lefase ka bophara yeo e diregilego ga e sa le go tloga ka 1919! Ke ka baka la’ng Jehofa a ile a šegofatša Tsione ka koketšego e bjalo? Ka gobane ga e sa le go tloga ka 1919, Isiraele ya Modimo ka go kwa e hlabišitše seetša sa Jehofa ka mehla. Ka gona, na o lemogile gore go ya ka temana 7, batho ba sa tšwago go fihla ‘ba tla aletareng [ya Modimo]’? Aletare ke moo dihlabelo di direlwago gona, gomme karolo ye ya boporofeta e re gopotša gore tirelo ya Jehofa e akaretša sehlabelo. Moapostola Paulo o ngwadile gore: “Ke a Le rapêla . . . tlišang mebele ya lena, e bê sedimo se se phelaxo, se sekxêthwa, sa xo kxahla Modimo; e bê xôna xo dirêla Modimo ka mo xo swanetšexo.” (Ba-Roma 12:1) Ka go dumelelana le mantšu a Paulo, Bakriste ba kgonthe ga ba kgotsofatšwe feela ke go ba gona ditirelong tša bodumedi gatee ka beke. Ba gafa nako ya bona, matla le mahumo a bona bakeng sa go godiša borapedi bjo bo sekilego. Na go ba gona ga barapedi ba bjalo ba ineetšego ga go thakge ngwako wa Jehofa? Boporofeta bja Jesaya bo itše ba tla o thakga. Le gona, re ka kgonthišega gore barapedi ba bjalo bao ba fišegago ke ba babotse mahlong a Jehofa.
16. Ke bomang bao ba neilego thušo modirong wa go aga lefsa mehleng ya bogologolo, gomme ke bomang bao ba dirilego bjalo mehleng ya lehono?
16 Ba ba sa tšwago go fihla ba nyaka go šoma. Boporofeta bo tšwela pele gore: “Merakô ya xaxo e axwa ke bana ba ba-ntlê; ’me dikxoši tša bôna di a Xo hlankêla.” (Jesaya 60:10) Phethagatšong ya mathomo ya mantšu a morago kua mehleng ya go boa bokgobeng Babele, dikgoši le ba bangwe bao ba tšwago ditšhabeng ge e le gabotse ba ile ba thuša ka go aga lefsa tempele le motse wa Jerusalema. (Esera 3:7; Nehemia 3:26) Phethagatšong ya mehleng yeno, lešaba le legolo le thekgile mašaledi a batlotšwa ka go aga borapedi bja therešo. Ba thušitše go aga diphuthego tša Bokriste gomme ka go rialo ba tiiša “merakô” ya mokgatlo wa Jehofa. Gape ba tšea karolo modirong wa kgonthe wa go agago agwa ga Diholo tša Mmušo, Diholo tša Kopano le meago ya Bethele. Ka ditsela tše ka moka, ba thekga bana babo bona ba tloditšwego go hlokomeleng dinyakwa tša mokgatlo o golago wa Jehofa!
17. Ke tsela efe e nngwe yeo Jehofa a thakgago batho ba gagwe ka yona?
17 Mantšu a mafelelo a Jesaya 60:10 ke ao a kgothatšago gakaakang! Jehofa o re: “Xobane ke Xo otlile mola kè befetšwe; byale se ke se rataxo ké xo Xo šokêlwa.” Ee, morago kua ka bo-1918/19, Jehofa o ile a otla batho ba gagwe. Eupša seo se fetile. Ga bjale ke nako ya gore Jehofa a bontšhe kgaugelo go bahlanka ba gagwe bao ba ineetšego le bagwera ba bona ba dinku tše dingwe. Bohlatse bja gore se se bjalo ke koketšego e kgolo kudu yeo a ba šegofaditšego ka yona, go le bjalo ka ge eka o a ‘ba thakga.’
18, 19. (a) Ke kholofetšo efe yeo Jehofa a e dirago mabapi le ba bafsa bao ba tlago mokgatlong wa gagwe? (b) Ditemana tše di šetšego tša Jesaya kgaolo 60 di re botša’ng?
18 Ngwaga le ngwaga, ba dikete tše makgolo ba oketšegilego ba “ba ntlê” ba kopanela le mokgatlo wa Jehofa, gomme tsela e tla dula e bulegile bakeng sa ba bantši bao ba oketšegilego go ba latela. Jehofa o re go Tsione: “Dikxôrô tša xaxo di tlo dula di ahlame; di ka se tswalêlwe mosexare le bošexo, xore xo wene xo tlišwê menônô ya dithšaba, le dikxoši tša tšôna di ôrôšwê xôna.” (Jesaya 60:11) Baganetši ba bangwe ba leka go tswalela “dikxôrô” tšeo, eupša re a tseba gore ba ka se atlege. Jehofa ka boyena o boletše gore ka tsela e itšego dikgoro di tla dula di bulegile. Koketšego e tla tšwela pele.
19 Go sa dutše go na le ditsela tše dingwe tšeo Jehofa a šegofaditšego batho ba gagwe, a ba dira ba babotse mehleng ye ya bofelo. Ditemana tše di šetšego tša Jesaya 60 di utolla ka tsela ya boporofeta gore ditsela tšeo ke dife.
Na o ka Hlalosa?
• “Mosadi” wa Modimo ke mang, gomme o emelwa ke bomang mo lefaseng?
• Ke neng moo bana ba Tsione ba bego ba rapaletše, gomme ke neng le gona ke bjang ba ilego ba “tsoxa”?
• A diriša maswao a fapanego, ke bjang Jehofa a ilego a bolela e sa le pele ka koketšego ya lehono ya baboledi ba Mmušo?
• Ke ka ditsela dife Jehofa a dirilego gore seetša sa gagwe se bonegele batho ba gagwe?
[Dipotšišo tša Thuto]
[Seswantšho go letlakala 10]
“Mosadi” wa Jehofa o laelwa gore a eme
[Seswantšho go letlakala 12]
Dikepe tše dintši di bonagala bjalo ka maeba sebaka-bakeng