Rapela Modimo “ka Môya”

“Modimo Le ka mmapetša le mang? A ka swanthšwa ka eng?”—JESAYA 40:18.

MOHLOMONGWE o kgodišegile e le ka kgonthe gore go diriša diswantšho go a amogelega go rapeleng Modimo. O ka nagana gore se se go batametša kgaufsi le Mokwi wa thapelo, yo a sa bonagalego gomme go bonala a se na dika tša batho le gona e le wa boikgopolelo.

Eupša na re lokologile ka mo go feletšego go ikgethela mokgwa wa rena ka noši wa go batamela Modimo? Na ga se ya swanela go ba Modimo ka boyena yo a bago le matla a mafelelo a taolo ka seo se amogelegago le seo se sa amogelegego? Jesu o ile a hlalosa pono ya Modimo ka taba ye ge a be a re: “Tsela ké Nna, le therešô le bophelô. Xa xo e a tlaxo xo Tate xe e se ka Nna.” (Johane 14:6) Mantšu ao a nnoši a ganetša go dirišwa ga diswantšho goba dilo le ge e le dife tše kgethwa.

Ee, go na le mohuta o itšego wa borapedi bjoo Jehofa Modimo a bo amogelago. Gomme ke bofe? Lebakeng le lengwe Jesu o ile a hlalosa gore: “Xo tla lebaka, le byale ké lôna, leo barapedi ba makxonthe ba tl’o xo rapêla Tate ka Môya le ka therešô. Le xòna Tate ó nyaka ba ba Mo rapêlaxo ka mokxwa woo. Modimo ké Môya; xomme ba ba Mo rapêlaxo ba tlo Mo rapêla ka môya le ka xo rereša.”—Johane 4:​23, 24.

Na Modimo yo e lego “môya,” a ka emelwa ke seswantšho? Aowa. Go sa šetšwe gore seswantšho e ka ba e le se sebotse gakaakang, se ka se ke sa lekana le letago la Modimo. Ka gona seswantšho sa Modimo le ka mohla se ka se tsoge se mo emetše e le ka kgonthe. (Ba-Roma 1:​22, 23) Na motho o tla be ‘a rapela ka go rereša’ ge e ba a batamela Modimo ka go diriša seswantšho seo se dirilwego ke motho?

 Thuto e Lego Molaleng ya Beibele

Molao wa Modimo o ganetša go dirišwa ga diswantšho e le dilo tša borapedi. Molao wa bobedi wa Melao e Lesome o itše: “O se ke wa itirêla modimo wa xo betlwa, le xe e le seswanthšô se sengwê sa tše di lexo kwa lexodimong, le xe e le sa tše di lexo mono lefaseng, le sa tše di lexo meetseng ka tlase xa lefase. O se ke wa di khunamêla; O se kê wa di dirêla.” (Ekisodo 20:​4, 5) Mangwalo a buduletšwego a Bakriste le wona a laela gore: “Tšhabang tirelo ya medimo ya diswantšho.”—1 Ba-Korinthe 10:​14, PK.

Ka kgonthe, ba bantši ba bolela gore go diriša ga bona diswantšho borapeding ga se borapedi bja medimo ya diswantšho. Ka mohlala, Bakriste ba Orthodox gantši ba gana gore ge e le gabotse ba rapela diswantšho tšeo ba di inamelago, ba di khunamelago le go di rapela. Moruti wa Orthodox o ngwadile gore: “Re a di hlompha ka gobane ke dilo tše kgethwa, le ka gobane re hlompha seo Diswantšho di se bolelago.”

Lega go le bjalo, potšišo e sa le e rego: Na Modimo o amogela go dirišwa ga diswantšho le ka morero wa seo se bitšwago gore ke tlhompho e sa lebanyago? Ga go na mo Beibele e dumelelago mokgwa o bjalo. Ge ba-Isiraele ba be ba dira seswantšho sa namane, ba be ba bolela gore e be e le ka morero wa go hlompha Jehofa, o ile a ba bontšha go se nyatša ga gagwe, a bolela gore ba hlanogile.—Ekisodo 32:​4-7.

Kotsi e Utegilego

Go diriša diswantšho borapeding ke mokgwa o kotsi. Go ka goketša batho gabonolo gore ba rapele selo seo go e na le go rapela Modimo yoo selo seo se swanetšego go mo emela. Ka mantšu  a mangwe, seswantšho se fetoga selo se bohlokwa bakeng sa borapedi bja medimo ya diswantšho.

Seo se ile sa direga ka dilo tše mmalwa mehleng ya ba-Isiraele. Ka mohlala, Moše o ile a dira noga ya koporo nakong ya ge go be go Hudugwa Egipita. Mathomong, noga e bego e le godimo ga kota e telele e be e emela go fodišwa ga batho. Bao ba bego ba otlwa ka go longwa ke noga ba be ba ka lebelela noga ya koporo gomme ba amogela thušo ya Modimo. Eupša ka morago ga gore batho ba fihle Nageng ya Kholofetšo, go bonala ba ile ba fetoša kota ye ya seswantšhetšo go ba modingwana wa seswantšho, bjalo ka ge eka noga ya koporo ka boyona e be e na le matla a go fodiša. Ba ile ba e thuntšhetša diorelo gomme ba ba ba e rea leina la Nehušitane.—Numeri 21:​8, 9; 2 Dikxoši 18:4.

Le gona ba-Isiraele ba ile ba leka go diriša areka ya kgwerano e le pheko malebana le manaba a bona, mo go ilego gwa feleletša ka masetlapelo. (1 Samuele 4:​3, 4; 5:​11) Gomme mehleng ya Jeremia, badudi ba Jerusalema ba be ba na le taba le tempele kudu go feta kamoo ba bego ba dira ka gona ka Modimo yo a bego a rapelwa moo.—Jeremia 7:​12-15.

Tshekamelo ya go rapela dilo go e na le Modimo e sa dutše e aparetše kudu. Monyakišiši Vitalij Ivanovich Petrenko o itše: “Seswantšho . . . se fetoga selo seo se rapelwago le se se lego kotsi sa borapedi bja medimo ya diswantšho . . . Motho o swanetše go dumela gore ye ke kgopolo yeo ka kgonthe e lego ya boheitene ye e tlišitšwego borapeding bja diswantšho ka ditumelo tše di tumilego.” Ka mo go swanago, moperisita wa Greek Orthodox e lego Demetrios Constantelos o bolela ka pukung ya gagwe ya Understanding the Greek Orthodox Church gore: “Go a kgonega gore Mokriste a dire seswantšho selo seo a se rapelago.”

 Taba ya gore diswantšho e fo ba dithušo feela tša borapedi bjo bo lekaneditšwego e belaetša kudu. Ka baka la’ng? Go ba gona, na ga se therešo gore diswantšho tše itšego tša Maria goba tša “bakgethwa” di ka lebelelwa e le tšeo di swanelwago ke boineelo bjo bogolo gomme ya ba tše holago go feta diswantšho tše dingwe tšeo di emelago batho ba swanago bao e lego kgale ba hwile? Ka mohlala, seswantšho se sengwe seo se emelago Maria kua Tínos, Gerika, se na le bafišegedi ba sona ba ma-Orthodox bao ba se latelago, ka ge ba ganetšana le bafišegedi ba swanago ba seswantšho seo se emelago Maria kua Soumela, leboa la Gerika. Sehlopha se sengwe le se sengwe se dumela gore seswantšho sa sona ke se se phagamego, se dira mehlolo e makatšago ka go fetišiša go feta se sengwe, gaešita le ge bobedi bja tšona di emela motho yo a swanago yo e lego kgale a hwile. Ka gona, ka mediro batho ba bea matla a kgonthe diswantšhong tše itšego gomme ba di rapela.

Go Rapela “Bakgethwa” Goba Maria?

Lega go le bjalo, go thwe’ng ka go hlompha batho ba bjalo ka Maria goba “bakgethwa”? Ge Jesu a be a arabela tekong e tšwago go Sathane, o ile a šupa go Doiteronomio 6:​13 gomme a re: “O khunamêlê Morena Modimo wa xaxo, O dirêlê Yêna à nnoši!” (Mateo 4:​10) Ka morago o itše barapedi ba therešo ba tla rapela “Tate,” e sego motho yo mongwe. (Johane 4:​23) A lemoga se, morongwa o ile a kgalemela moapostola Johane ge a be a leka go mo rapela, ka go bolela gore: “Hlê lesa xo r’yalo. . . . Khunamêla Modimo.”—Kutollo 22:9.

Na ke mo go swanetšego go rapela mmago Jesu wa lefaseng, Maria goba “bakgethwa” ba itšego, re ba kgopela gore ba re boelanye le Modimo? Karabo ya Beibele e lebanyago ke e rego: “Mmoêlanyi wa xo boêlanya Modimo le batho ké Yêna o tee yó, Yêna motho Jesu Kriste.”—1 Timotheo 2:5.

Šireletša Tswalano ya Gago le Modimo

Ka ge go dirišwa ga diswantšho borapeding go ganetšwa ke thuto ya Beibele e kwagalago gabotse, go ka se thuše batho go hwetša kamogelo ya Modimo le go hwetša phološo. Ka mo go fapanego, Jesu o itše bophelo bjo bo sa felego bo ithekgile ka go tseba Modimo a nnoši wa therešo, go tlwaelana le semelo sa gagwe seo se sa bapišwego le selo gotee le merero le ditirišano tša gagwe le batho. (Johane 17:3) Diswantšho tšeo di sa bonego, di sa kwego goba di sa bolelego ga di thuše motho go tseba Modimo le go mo rapela ka mo go swanetšego. (Psalme 115:​4-8) Thuto ya bohlokwa ka go fetišiša e hwetšwa feela ka go ithuta Lentšu la Modimo, Beibele.

Ka ntle le go se be ga bjona le mohola, borapedi bja diswantšho bo ka tliša kotsi moyeng. Se se bjalo bjang? Sa pele-pele, bo ka thuba tswalano ya motho le Jehofa. Modimo o ile a bolela e sa le pele ka Isiraele yeo e bego e “mo xalefiša ka tše [“medimo e,” PK] šele” gore: ‘Ke tla ba utela sefahlego.’ (Doiteronomio 32:​16, 20) Gore ba tsošološe tswalano ya bona le Modimo go be go tla bolela gore ba ‘hlaswe medimo ya bona [“ya diswantšho,” PK].’—Jesaya 31:​6, 7.

Ka gona, keletšo ye ya Mangwalo ke e swanetšego gakaakang: “Bana ba-ka! Phafoxêlang medimo e šele [“medimo ya diswantšho” NW].”—1 Johane 5:21.

Ba Thušitšwe go Rapela “ka Môya”

Olivera e be e le setho seo se ineetšego sa Kereke ya Orthodox kua Albania. Ge naga e be e thibela bodumedi ka 1967, Olivera o ile a tšwela pele le mekgwa ya gagwe ya borapedi ka sephiring. O ile a diriša karolo e kgolo ya tšhelete ya gagwe e nyenyane ya phentšhene go reka diswantšho tša gauta le tša silifera, seorelo le dikerese. O ile a dula a utile dilo tše malaong a gagwe gomme gantši a robala setulong seo se bego se le kgaufsi ka poifo ya gore di ka bonwa goba tša utswiwa. Ge a be a etelwa ke Dihlatse tša Jehofa mathomong a bo-1990, Olivera o ile a lemoga kgopolo ya moswana-noši ya therešo ya Beibele molaetšeng wa bona. O ile a bona seo Beibele e se bolelago mabapi le borapedi bja therešo gore ke bja “moya,” gomme o ile a ithuta ka tsela yeo Modimo a ikwago ka gona ka go dirišwa ga diswantšho. (Johane 4:​24) Hlatse yeo e bego e ithuta Beibele le yena e ile ya lemoga gore palo ya diswantšho tša mo Olivera a dulago gona e thoma go fokotšega nako le nako ge a mo etela. Mafelelong, go be go se sa na selo. Ka morago ga kolobetšo ya gagwe, Olivera o boletše gore: “Go e na le diswantšho tše di se nago mohola, lehono ke na le moya o mokgethwa wa Jehofa. Ke thaba gakaakang gore nka ba le moya o mokgethwa wa Jehofa ka ntle le go diriša diswantšho.”

Athena, yo a tšwago sehlakahlakeng sa Lesbos kua Gerika, e be e le setho se mafolofolo kudu sa Kereke ya Orthodox. E be e le setho sa sehlopha sa mmino gomme o be a latela setšo sa bodumedi ka potego, go akaretša le go diriša diswantšho. Dihlatse tša Jehofa di ile tša thuša Athena go lemoga gore ga se dilo ka moka tšeo a ilego a di rutwa tšeo di bego di dumelelana le Beibele. Tše di be di akaretša go dirišwa ga diswantšho le difapano borapeding. Athena o ile a gapeletša gore a itirele nyakišišo ya gagwe ka noši mabapi le mathomo a dilo tše tša bodumedi. Ka morago ga go dira nyakišišo e tseneletšego ka dipukung tše mmalwa tša tšhupetšo, o be a kgodišegile gore modu wa dilo tšeo e be e se wa Bokriste. Kganyogo ya gagwe ya go rapela Modimo “ka moya” e ile ya mo dira gore a lahle diswantšho tša gagwe, go sa šetšwe gore di be di bitša tšhelete e kae. Lega go le bjalo, Athena o be a thabetše go lahlegelwa le ge e le gofe e le gore a rapele Modimo ka tsela e hlwekilego moyeng le ka tsela e amogelegago.—Ditiro 19:​19.

[Lepokisi/Seswantšho go letlakala 7]

Na Diswantšho e fo ba Modiro wa Bokgabo?

Nywageng ya morago bjale, go be go dutše go kgoboketšwa diswantšho tša Orthodox go dikologa lefase. Gantši bakgoboketši ba lebelela diswantšho e se dilo tše kgethwa tša borapedi, eupša e le modiro wa bokgabo wo o bonagatšago setšo sa Byzantine. Ga se mo go sa tlwaelegago go hwetša diswantšho tše bjalo tša bodumedi di kgabišitše ngwako goba ofisi ya motho yo a ipolelago gore ke yena moila-Modimo.

Lega go le bjalo, Bakriste ba kgonthe ga ba lebale morero wa motheo wa seswantšho. Ke selo sa borapedi. Gaešita le ge Bakriste ba sa lwantšhane le tshwanelo ya ba bangwe ya go ba le diswantšho, bona ka bobona ga ba na diswantšho dithotong tša bona, gaešita le go ba le tšona e le dilo tša mokgobokanyi. Se se dumelelana le molao wa motheo wo o lego go Doiteronomio 7:​26: “Makxapa [“diswantšho tša borapedi,” The Jerusalem Bible] ao O se kê wa a tliša nywakong ya xaxo, xore O se tlo dirwa se-xafiwa-moka byalo ka tšôna. O di hlaswê, O di nyaletšê ruri, ka xobane ké di-xafiwa-moka.”

[Seswantšho go letlakala 7]

Modimo ga se a ka a dumelela go dirišwa ga diswantšho borapeding

[Seswantšho go letlakala 8]

Tsebo e tšwago ka Beibeleng e re thuša gore re rapele Modimo ka moya