“E-tlang Go Nna, . . . Gomme Ke Tla Le Lapološa”

“A re Direng Botse; re bo Direlê Batho Bohle”

GO BOLELA le go ruta ditaba tše dibotse tša Mmušo wa Modimo e be e le modiro wa Jesu o mogolo. (Mareka 1:​14; Luka 8:1) Ka ge balatedi ba Kriste ba kganyoga go mo ekiša, ba lebelela modiro wa go ruta molaetša wa Beibele ka Mmušo wa Modimo e le modiro o tlago pele bophelong. (Luka 6:​40) E tloga e le mo go thabišago e le ka kgonthe go Dihlatse tša Jehofa go bona kamoo molaetša wa Mmušo o tlišago tapološo ya ka mo go sa felego go bao ba o amogelagobjalo ka ge o dirile bjalo ge Jesu a be a le mo lefaseng.—Mateo 11:​28-30.

Ka ntle le go ruta Lentšu la Modimo, Jesu o dirile mediro e mengwe e mebotse e bjalo ka go fodiša balwetši le go fepa batho bao ba swerego ke tlala. (Mateo 14:​14-21) Ka mo go swanago, Dihlatse tša Jehofa di tlaleletša modiro wa tšona wa go ruta Beibele ka mediro yeo e thušago batho bao ba hlokago thušo. Ge e le gabotse, Mangwalo a hlamela Bakriste “medirô e botse ka moka” e bile a ba kgothaletša go ‘direla batho bohle botse.’—2 Timotheo 3:​16, 17, mongwalo o sekamego ke wa rena; Ba-Galatia 6:10.

“Bana Babo Rena ba Ile ba re Thuša”

Ka September 1999, Taiwan e ile ya hlaselwa ke tšhišinyego ya lefase e senyago. Dikgwedi tše sego kae ka morago, dipula tša mafula le maphoto di ile tša baka e nngwe ya dikotsi tša tlhago tše šoro kudu historing ya Venezuela. Morago bjale, mafula a matla a ile a hlasela naga ya Mozambique. Ditiragalong ka moka tše tharo, Dihlatse tša Jehofa di ile tša fihla lefelong la tiragalo kapejana le dijo, meetse, dihlare, diaparo, ditente le ditlabakelo tša go apea bakeng sa bahlaselwa. Baithapi bao ba nago le bokgoni bja tša kalafo ba ile ba hloma mafelo a go hlokomela balwetši a motšwa-o-swere gore ba oke bao ba gobetšego, gomme baithapi ba go aga ba ile ba aga magae a mafsa bakeng sa bao ba tlogetšwego ba se na magae.

Bahlaselwa ba ile ba kgongwa ke thušo yeo ba ilego ba e amogela ka nako ya gona. Malyori yoo legae la gagwe le ilego la gogolwa ke maphoto kua Venezuela o re: “Ge re be re le tlalelong o šoro, bana  babo rena ba ile ba re thuša.” Ka morago ga ge baithapi ba agetše lapa la gagwe ntlo e mpsha-mpsha, Malyori o ile a re: “Re ka se tsoge ra leboga Jehofa ka mo go lekanego bakeng sa sohle seo a re diretšego sona!” Gomme ge bahlaselwa ba mafula kua Mozambique ba be ba amogela dinotlelo tša bona tša magae a sa tšwago go agwa, sehlopha ka moka se ile sa thoma go opela kopelo ya Mmušo e rego “Jehofa ke Setšhabelo sa Rena.” *

Go thuša bao ba hlokago e be e le mo go lapološago le go baithapi ka mo go swanago. Marcelo yoo a ilego a šoma e le mooki kampeng ya bafaladi kua Mozambique o itše: “Ke ile ka ikwa ke thabetše go thuša bana babo rena ba, bao ba ilego ba tlaišega kudu ka mokgwa wo.” Huang e lego moithapi kua Taiwan o itše: “E bile lethabo le legolo go tšea karolo go abeng dijo le ditente go bana babo rena bao ba di hlokago. E be e le mo go matlafatšago tumelo.”

Lenaneo la Baithapi Leo le Šomago

Mošomo wa boithapi gape o tlišitše tapološo ya moya go bagolegwa ba masome a dikete lefaseng ka bophara. Bjang? Nywageng ya morago bjale, Dihlatse tša Jehofa di abile dipuku tša Beibele go batho ba ka godimo ga ba 30 000 bao ba golegilwego dikgolegong tše ka bago 4 000 kua United States e nnoši. Go oketša moo, fao go kgonegago Dihlatse ka botšona di ile tša etela dikgolego bakeng sa go ithuta Beibele le bagolegwa le go swara diboka tša Bokriste. Na bagolegwa ba a holega?

Bagolegwa ba bangwe bao ba ithutago Beibele ba thoma go aba dithuto tše di lapološago tša Lentšu la Modimo le bagolegwa-gotee le bona. E le mafelelo a se, dikgolegong tše dintši lefaseng ka bophara ga bjale go na le dihlopha tša bagolegwa bao ba rapelago Jehofa gotee. Mogolegwa yo mongwe kua Oregon, U.S.A., ka 2001o begile gore: “Sehlopha sa rena se a gola. Re na le bagoeledi ba Mmušo ba 7 gomme ba swara dithuto tša Beibele tše 38. Batho ba ka godimo ga ba 25 ba ba gona polelong ya phatlalatša le Thutong ya Morokami, gomme re bile ba 39 ka palo Segopotšong [sa lehu la Kriste]. Kgaufsinyane batho ba bangwe ba bararo ba tla kolobetšwa!”

Mehola le Mathabo

Bahlankedi ba kgolego ba lemogile gore lenaneo le la mošomo wa baithapi le a šoma. Seo se kgahlišago bahlankedi kudu ke mohola wa ka mo go sa felego wa lenaneo le la boithapi. Pego e nngwe e re: “Nywageng e lesome yeo lenaneo le le bego le dutše le šoma, ga go mogolegwa le o tee yo a lokolotšwego ka kgolegong gore e be yo mongwe wa Dihlatse tša Jehofa yo a ilego a boela kgolegonggo fapana le tekanyo ya ba 50-60 lekgolong ba dihlopha tše dingwe.” A tutueditšwe ke mafelelo ao a fihleletšwego ke baithapi ba Dihlatse, moruti wa kgolego kua Idaho o boletše lengwalong leo le yago ntlong-kgolo ya Dihlatse tša Jehofa gore: “Gaešita le ge ke sa dumelelane le dithuto tša lena tša bodumedi, ke kgahlišwa kudu ke mokgatlo wa lena.”

Go thuša bao ba lego kgolegong gape go itlhatsela e le mo go putsago bakeng sa baithapi. Ka morago ga go swara seboka le sehlopha sa bagolegwa bao ba ilego ba opela kopelo ya Mmušo ka lekga la mathomo, moithapi o ngwadile gore: “E be e le mo go kgothatšago go bona banna ba 28 ba opela gotee ditumišo go Jehofa. Gomme ba ile ba opelela godimo! Ke tokelo e kaakang go ba gona tiragalong e bjalo!” Moithapi yo a etetšego dikgolego tša Arizona o itše: “E bile tšhegofatšo gakaakang go tšea karolo modirong wo o kgethegilego!”

Baithapi ba Dihlatse lefaseng ka bophara ba dumelelana le Jesu yo a itšego: “Lešexo la monei le phala la monewa.” (Ditiro 20:​35) Gape ba kgonthišetša gore go latela keletšo ya Beibele ya go dira botse go batho ka moka ke mo go lapološago e le ka kgonthe.Diema 11:25.

[Mengwalo ya ka tlase]

[Seswantšho go letlakala 8]

Venezuela

[Seswantšho go letlakala 8]

Taiwan

[Seswantšho go letlakala 8]

Mozambique