Dipotšišo tše Tšwago go Babadi

Ke maemong afe moo go swanetšego gore mosadi wa Mokriste a rwale hlogong ka mabaka a dilo tša moya?

Moapostola Paulo o ngwadile gore: “Mosadi mang le mang xe a rapêla, xoba xe a porofeta à apotše hlôxô ó nyatšiša hlôxô ya xaxwe.” Ka baka la’ng? Ka baka la molao wa motheo wa Modimo wa bohlogo wo o rego: “Hlôxô ya mosadi ké monna.” Go rapela goba go ruta ka phuthegong ya Bokriste gantši ke boikarabelo bja monna. Ka gona, ge mosadi wa Mokriste a swaragana le ditaba tšeo di amanago le ditaba tša borapedi tšeo gantši di tla dirwago ke monna wa gagwe goba ke monna yo a kolobeditšwego, o swanetše go rwala hlogong.—1 Ba-Korinthe 11:​3-10.

Maemo ao go ona mosadi wa Mokriste a swanetšego go rwala hlogong a ka tšwelela tswalanong ya gagwe ya lenyalo. Ka mohlala, ge lapa le bokana bakeng sa thuto ya Beibele goba bakeng sa dijo, gantši monna o etelela pele go le ruta le go le emela ka thapelo go Modimo. Lega go le bjalo, ge e ba e se modumedi, boikarabelo bjo e ka ba bja mosadi wa gagwe. Ka gona, ge a rapelela godimo bakeng sa gagwe le ba bangwe goba ge a swara thuto ya Beibele le bana ba gagwe monna wa gagwe a le gona, kgaetšedi wa Mokriste o rwala hlogong ka mo go swanetšego. Ge e ba monna wa gagwe a se gona, mosadi ga se a swanela go rwala hlogong, ka ge a dumeletšwe ke Modimo go ruta bana.—Diema 1:8; 6:20.

Lega go le bjalo, go thwe’ng ge e ba morwa yo monyenyane ka lapeng e le mohlanka yo a ineetšego, yo a kolobeditšwego  wa Jehofa Modimo? Ka ge morwa e le setho sa phuthego ya Bokriste, o swanetše go amogela tayo go tšwa go ditho tša phuthego tša banna. (1 Timotheo 2:​12) Ge e ba tatagwe e le modumedi, morwa o swanetše go rutwa ke yena. Lega go le bjalo, ge e ba tate a se gona, gona mma o swanetše go rwala hlogong ge e ba a swara thuto ya Beibele le morwa yo monyenyane yo a kolobeditšwego le bana ba bangwe. Gore o kgopela morwa wa gagwe yo a kolobeditšwego go rapela thutong e bjalo goba nakong ya dijo, ke yena a tlago go itirela phetho. A ka ikwa gore morwa ga se a tšwa a swanelega ka mo go lekanego gomme a ka kgetha go rapela ka boyena. Ge e ba a kgetha go rapela tiragalong e bjalo, o swanetše go rwala hlogong.

Ge ba tšea karolo medirong e itšego ya phuthego, basadi ba Bakriste ba ka swanela ke go rwala hlogong. Ka mohlala, sebokeng sa tirelo ya tšhemo sa gare ga beke go ka direga gore go be le dikgaetšedi tša Bakriste feela, go se na banna bao ba kolobeditšwego. Go ka ba le mabaka a mangwe ao go ka se bego le banna bao ba kolobeditšwego sebokeng sa phuthego. Ge e ba kgaetšedi a swanelwa ke go dira mediro e bjalo yeo gantši e dirwago ke ngwanabo rena sebokeng seo se rulagantšwego sa phuthego goba sebokeng sa tirelo ya tšhemo, o swanetše go rwala hlogong.

Na basadi ba Bakriste ba swanetše go rwala hlogong ge ba fetolela goba ba fetolela polelo ya diatla ya dipolelo tša Beibele goba ge ba bala phatlalatša dirapa ka gare ga thušo ya go ithuta Beibele yeo e dirišwago sebokeng sa phuthego? Aowa. Dikgaetšedi tše di dirago mediro ye ga di etelele pele goba go ruta. Ka mo go swanago, ga go nyakege gore dikgaetšedi di rwale hlogong ge di dira dipontšho, di anega phihlelo goba di nea dipolelo tša morutwana Sekolong sa Bodiredi sa Pušo ya Modimo.

Le ge go ruta ka phuthegong go swanetše go dirwa ke banna bao ba kolobeditšwego, banna gotee le basadi ba na le boikarabelo bja go bolela le go ruta ka ntle ga phuthego. (Mateo 24:​14; 28:​19, 20) Ka gona ge mosadi wa Mokriste a bolela le batho bao e sego Dihlatse ka Lentšu la Modimo go e na le motho yo motona yo e lego Hlatse ya Jehofa, ga go nyakege gore a rwale hlogong.

Lega go le bjalo, boemo ke bjo bo fapanego ge thuto ya Beibele ya ka mehla e rulagantšwego e swarelwa ka gae gomme motho yo motona yo a ineetšego le go kolobetšwa a le gona. Le ke lenaneo leo le rulagantšwego e sa le pele la go ruta moo motho yo a swarago thuto ge e le gabotse a etelelago pele. Ka tlase ga maemo a, thuto e fetoga tlaleletšo ya phuthego. Ge e ba mosadi yo a kolobeditšwego wa Hlatse a swara thuto e bjalo gomme motho yo motona yo e lego Hlatse e kolobeditšwego a le gona, o tla rwala hlogong ka mo go swanetšego. Lega go le bjalo, ngwanabo rena yo a ineetšego o swanetše go rapela. Kgaetšedi a ka se ke a rapela go na le ngwanabo rena yo a kolobeditšwego ka ntle le ge go na le mabaka a kgethegilego, a bjalo ka gore ngwanabo rena ga a sa na matla a mmele a go bolela.

Kgaetšedi wa Mokriste ka dinako tše dingwe a ka ya thutong ya Beibele le mogoeledi wa Mmušo e motona yo a sa kolobetšwago. Ge e ba a rata, a ka mo kgopela go swara thuto. Eupša bjalo ka ge e ka se be mo go swanetšego gore a emele kgaetšedi yo a kolobeditšwego go Jehofa ka thapelo, e tla ba mo go swanetšego gore kgaetšedi a rapele thutong. Ge a swara thuto le ge a rapela ka tlase ga maemo a, kgaetšedi o swanetše go rwala hlogong. Gaešita le ge mogoeledi yo motona a se a tšwa a kolobetšwa, batho ba ka ntle ba mo hlaola e le setho sa phuthego ka baka la modiro wa gagwe wa go bolela.

Moapostola Paulo o ngwadile gore: “Mosadi a a rwalê seká sa xo bušwa, ka ’baka la Barongwa.” Ee, dikgaetšedi tša Bakriste di na le tokelo ya go bea mehlala e mebotse bakeng sa barongwa ba dimilione bao ba tšwelago pele ka potego e sa kwanantšhego go ikokobeletša Jehofa. Ke mo go swanetšego gakaakang gore basadi bao ba boifago Modimo ba nee tlhokomelo e swanetšego gore ba rwale hlogong ge maemo a nyaka gore ba dire bjalo!

[Diswantšho go letlakala 26]

Go rwala hlogong ke leswao la tlhompho bakeng sa bohlogo