Ge e le Gabotse Hele ke Eng?

GO SA šetšwe gore lentšu “hele” le tliša seswantšho sa mohuta ofe ka kgopolong ya gago, ka kakaretšo batho ba nagana ka hele e le lefelo la kotlo bakeng sa sebe. Mabapi le sebe le mafelelo a sona, Beibele e re: “Byalo ka xe sebe sè tsene lefaseng ka motho o tee, ’me lehu la tsêna ka sebe, lehu le aparetše batho bohle ka xe ba dirile dibe bohle.” (Ba-Roma 5:​12) Mangwalo gape a re: “Moputsô wa sebe ké lehu.” (Ba-Roma 6:​23) Ka ge kotlo ya sebe e le lehu, potšišo ya bohlokwa bakeng sa go kwešiša seo se bolelwago ke hele e le ka kgonthe ke e rego: Go direga’ng ka rena ge re e-hwa?

Na bophelo bja mohuta o itšego, ka sebopego se itšego bo tšwela pele ka morago ga lehu? Hele ke eng, le gona go ya batho ba mohuta ofe fao? Na go na le kholofelo le ge e le efe ka bao ba lego heleng? Beibele e nea dikarabo tša therešo le tšeo di kgotsofatšago tša dipotšišo tše.

Na go na le Bophelo ka Morago ga Lehu?

Na go na le selo se itšego ka gare ga rena se bjalo ka moya (soul) goba moya (spirit), seo se phologago lehu la mmele? Ela hloko kamoo motho wa pele Adama a ilego a ba le bophelo ka gona. Beibele e re: “Morêna Modimo a na a bopa motho, [ka] lerole la mmu; mo dinkong tša xaxwe a budulêla môya wa bophelô.” (Genesi 2:7) Gaešita le ge go hema go ile gwa boloka bophelo bja gagwe, go tsenya “môya wa bophelô” ka dinkong tša gagwe go be go akaretša mo gontši kudu go feta go fo budulela moya maswafong a gagwe. Go be go bolela gore Modimo o tsentše tlhase ya bophelo mmeleng wo o sa phelego wa Adama“môya wa xo phela,” wo o šomago go dibopiwa tša lefaseng ka moka. (Genesi 6:​17; 7:​22) Beibele e šupa go matla a phedišago e le “môya [“spirit,” NW].” (Jakobo 2:​26) Moya woo o ka swantšhwa le matla a mohlagase ao a šomago motšheneng goba sedirišweng se sengwe bakeng sa go dira gore se kgone go šoma mošomo wa sona. Go etša ge matla a mohlagase a ka se tsoge a ba le dibopego tša sedirišwa seo a se neago matla, matla a bophelo ga a be le dika le ge e le dife tša dibopiwa tšeo a di phedišago. Ga a na semelo e bile ga a na bokgoni bja go nagana.

Go direga’ng ka moya (spirit) ge motho a e-hwa? Psalme 146:4 e re: “Môya (spirit) wa motho o a tloxa, ’me yêna o boêla mmung wa xaxwe; mohla woo ké mo xo fêlaxo maanô a motho.” Ge motho a e-hwa, moya wa gagwe wo o se nago dika tša motho ga o tšwele pele o phela lefelong le lengwe e le sebopiwa sa moya. O “boêla xo Modimo E a o neilexo motho.” (Mmoledi 12:7) Se se bolela gore kholofelo le ge e le efe ya bophelo bja nakong e tlago bakeng sa motho yoo ga bjale e ithekgile ka mo go feletšego ka Modimo.

Bo-radifilosofi ba Gerika ya bogologolo e lego Socrates le Plato ba be ba dumela gore moya wo  o lego ka gare ga motho o phologa lehu gomme le ka mohla ga o hwe. Beibele e ruta’ng ka moya (soul)? Genesi 2:7 e re Adama “a ba môya o phelaxo.” Ga se a ka a amogela moya; e be e le moyamotho ka boyena. Mangwalo a bolela ka moya o šoma, o kganyoga dijo, o thopša, o sa robale le tše dingwe. (Lefitiko 23:​30; Doiteronomio 12:​20; 24:7; Psalme 119:​28) Ee, motho ka boyena ke moya. Ge motho a e-hwa, moya woo o a hwa.—Hesekiele 18:4.

Ka gona, boemo bja bahu ke bofe? Ge a be a tsebatša kahlolo go Adama, Jehofa o itše: “O lerole; ’me sa xaxo ké xo boêla leroleng.” (Genesi 3:​19) Adama o be a le kae pele ga ge Modimo a mmopa leroleng la lefase gomme a mo nea bophelo? Ka go rialo, o be a se gona! Ge a e-hwa, Adama o ile a boela boemong bjoo bja go se be gona ka mo go feletšego. Boemo bja bahu bo hlalositšwe ka mo go kwagalago go Mmoledi 9:​5, 10 moo re balago gore: “ ’Me xo bahu xa xo se se tsebyaxo, . . . bo-dula-bahu mo O yaxo xôna, xa xo na modirô, xa xo na kxopolô, xa xo tsebô le bohlale.” Go ya ka Mangwalo, lehu ke boemo bja go se be gona. Bahu ga ba bone selo, ga ba na maikwelo le dikgopolo.

Na ke Tlaišego ya ka mo go sa Felego Goba Lebitla le le Tlwaelegilego?

Ka ge bahu ba sa kwe selo, hele e ka se be lefelo la mollo la tlaišego moo ba babe ba tlaišegago ka morago ga lehu. Ka gona, hele ke eng? Go hlahloba seo se diragetšego go Jesu ka morago ga ge a hwile go thuša go araba potšišo yeo. Mongwadi wa Beibele Luka o laodiša gore: “[Jesu] a ka se kê a leswa à le kwa bo-dula-bahu [“heleng,” King James Version], mmele wa xaxwe xa wa ka wa bôna xo bôla.” * (Ditiro 2:​31) Hele yeo gaešita le Jesu a ilego go yona e be e le kae? Moapostola Paulo o ngwadile gore: “Taba-kxolo ye ke Le neilexo yôna, . . . Kriste ó hwile ka ’baka la dibe tša rena ka mo mangwalô a bolêlaxo. O fihlilwe, a tsoxa ka letšatši la boraro ka mo mangwalô a bolêlaxo.” (1 Ba-Korinthe 15:​3, 4) Ka gona Jesu o be a le heleng, lebitleng, eupša ga se a tlogelwa fao ka gobane o ile a tsošwa.

Ela hloko gape taba ya monna wa moloki Jobo, yo a ilego a tlaišega kudu. A kganyoga go phologa boemong bja gagwe bja go tlaišega, o ile a kgopela gore: “Ke mang a tlago go mpha se, gore o tle o ntšhireletše diheleng [Sheol], gomme o nkute go fihlela bogale bja gago bo feta?” * (Jobo 14:​13, Douay Version) Ke mo go sa kwagalego gakaakang go nagana gore Jobo o be a kganyoga go ya lefelong la mollo o fišago bakeng sa tšhireletšego! Go Jobo “hele” e be e le feela lebitla, moo tlaišego ya gagwe e bego e tla fela. Ka gona hele ya Beibele ke lebitla le le tlwaelegilego la batho moo batho ba ba lokilego le ba babe ba yago gona.

Na Mollo wa Dihele o Fediša Tšohle?

Na e ka ba e le gore mollo wa hele ke sešupo sa go fediša dilo tšohle goba phedišo e tseneletšego? Go dira phapano magareng ga Hades goba hele, Mangwalo a re: “Lehu le bo-dula-bahu tša lahlêlwa bodibeng bya mollô.” ‘Bodiba’ bjo go  bolelwago ka bjona mo ke bja seswantšhetšo, ka ge lehu le hele (Hades) tšeo di lahlelwago go bjona di ka se kgone go fsa. “[Bodiba bja mollo] ke lôna lehu la bobedi”lehu leo go lona go se nago kholofelo ya go boela bophelong.—Kutollo 20:14.

Bodiba bja mollo bo na le tlhaloso e swanago le ya “moleté wa mollô [“Gehenna,” NW]” woo Jesu a boletšego ka wona. (Mateo 5:​22; Mareka 9:​47, 48) Gehenna e tšwelela ka makga a 12 ka Mangwalong a Bakriste a Segerika, gomme e šupa go moedi wa Hinomo, ka ntle ga merako ya Jerusalema. Ge Jesu a be a le lefaseng, moedi wo o be o dirišetšwa go lahlela ditšhila, “moo ditopo tša disenyi, ditopo tša diphoofolo le moo mohuta o mongwe le o mongwe wa ditšhila o bego o lahlelwa gona.” (Smith’s Dictionary of the Bible) Mello e be e dula e tuka ka go tšhela sebabole bakeng sa go fiša ditšhila. Jesu o dirišitše moedi woo e le leswao le le swanetšego la phedišo ya ka mo go sa felego.

Ka ge Gehenna e swantšhetša phedišo ya ka mo go sa felego, bodiba bja mollo le bjona bo swantšhetša phedišo ya ka mo go sa felego. Lehu le Hades di “lahlêlwa” gona e le gore di tla fedišwa ge batho ba lokolotšwe sebeng le kahlolong ya lehu. Badiradibe ba ka boomo le bao ba sa sokologego le bona ba tla ba le “kabêlô” ya bona bodibeng bjoo. (Kutollo 21:8) Le bona ba tla fedišwa ka mo go sa felego. Ka lehlakoreng le lengwe, bao ba lego ka kgopolong ya Modimo e lego bao ba lego helenglebitla le le tlwaelegilego la bathoba na le bokamoso bjo bo kgahlišago.

Hele e Ntšhwa Dikagare!

Kutollo 20:​13 e re: “Xomme lewatlê la nthša bahu ba lôna; le lehu, le bo-dula-bahu tša nthša bahu ba xo tšôna.” Ee, hele ya Beibele e tla ntšhwa dikagare. Bjalo ka ge Jesu a holofeditše, “xo tla lebaka leo bohle ba lexo mabitleng ba tl’o xo kwa Lentšu la [Jesu] ka lôna.” (Johane 5:​28, 29) Gaešita le ge gona bjale go se na mo ba lego gona ka sebopego le ge e le sefe, bahu ba dimilione bao ba lego ka kgopolong ya Jehofa Modimo ba tla tsošwa, goba ba tla bušetšwa bophelong, lefaseng la paradeise e tsošološitšwego.—Luka 23:​43; Ditiro 24:15.

Lefaseng le lefsa la Modimo, batho bao ba tsošitšwego bao ba dumelelanago le melao ya gagwe ya go loka go ka se hlwe go sa nyakega gore ba hwe gape. (Jesaya 25:8) Jehofa “ó tlo phomola mexôkxô ka moka mahlong a bôná; le lehu le ka se hlwê le e-ba xôna; le xe e le manyami le dillô le bohloko, di ka se hlwê di e-ba xôna.” Ge e le gabotse, “tša pele di [tla be di] fetile.” (Kutollo 21:4) A tebelelo e thabišago gakaakang yeo e boloketšwego bao ba lego heleng“mabitleng”! Tšhegofatšo ye ka kgonthe ke lebaka le legolo la gore re be le tsebo e oketšegilego ka Jehofa Modimo le Morwa wa gagwe Jesu Kriste.—Johane 17:3.

[Mengwalo ya ka tlase]

[Seswantšho go letlakala 5]

Jobo o ile a rapelela go hwetša tšhireletšego heleng

[Seswantšho go letlakala 6]

Mollo wa Gehenna​—leswao la phedišo ya ka mo go sa felego

[Seswantšho go letlakala 7]

‘Bao ba lego mabitleng a kgopotšo ba tla tšwa’