Go Diragetše’ng ka Mollo wa Dihele?

LENTŠU “hele” le tliša’ng ka kgopolong ya gago? Na o bona hele e le lefelo la kgonthe la mollo le tshebela, la tlhokofatšo ya ka mo go sa felego le tlalelo? Goba na mohlomongwe hele ke tlhaloso ya seswantšhetšo ya boemo?

Ka nywaga-kgolo, mollo wa dihele wa ditlaišo tše di hlokofatšago o be o dutše o naganwa ke baetapele ba bodumedi ba Bojakane e le pheletšo e kgonthišeditšwego bakeng sa badiradibe. Kgopolo ye e sa dutše e le yeo e tsebjago kudu gare ga dihlopha tše dingwe tše dintši tša bodumedi. U.S.News & World Report, e re: “Bokriste bo ka ba bo dirile hele lentšu leo le tsebjago kudu eupša thuto ya hele ga se yeo e sa akaretšwego go Bokriste. Tšhošetšo ya tefetšo e šoro ya bophelo ka morago ga lehu e na le yeo e swanago le yona mo e nyakilego go ba bodumeding bjo bongwe le bjo bongwe bjo bogolo lefaseng gotee le madumeding a manyenyane.” Ma-Hindu, ma-Buddha, Mamoseleme, ma-Jain le ma-Tao ba dumela mohuteng o itšego wa hele.

Lega go le bjalo, hele e na le seswantšho se sengwe kgopolong ya mehleng yeno. Makasine wo o sa tšwago go bolelwa o re: “Gaešita le ge mollo wa boikgopolelo o sa dutše o gogela badumedi, dikgopolo tša mehleng yeno tša tshenyego ya ka mo go sa felego e le kgolego ya bodula-noši yeo e sa thabišego ka mo go kgethegilego di thoma go tšwelela, di šišinya gore hele e ka fo ba e sa fiše gakaalo.”

Kuranta ya Jesuit La Civiltà Cattolica e itše: “Ke mo go arošago . . . go nagana gore Modimo, ka go diriša matemona o diriša ditlhokofatšo tše boifišago go swana le yeo ya mollo go bao ba ahlotšwego.” E okeditše ka gore: “Hele e gona, e sego e le lefelo eupša e le boemo, tsela ya motho yoo a tlaišwago ke bohloko bja go aroganywa le Modimo.” Mopapa John Paul II o boletše ka 1999 gore: “Go e na le go ba lefelo, hele e šupa boemo bja bao ka go rata le ka mo go sa felego ba ikaroganyago le Modimo, mothopo wa bophelo ka moka le lethabo.” O boletše mabapi le diswantšho tša hele e le lefelo la mollo gore: “Di bontšha tlalelo ye e feletšego le go hloka morero ga bophelo ka ntle le Modimo.” Ra-dihistori wa kereke Martin Marty o itše ge nkabe mopapa a hlalositše hele e le “dikgabo le diabolo yo a aperego dilo tše di hwibidu a swere foroko, batho ba be ba ka se e dumele.”

Diphetogo tše di swanago di a direga mekgatlong e mengwe ya bodumedi. Pego ya sehlopha sa tša thuto ya Kereke ya Engelane e itše: “Hele ga se tlhokofatšo ya ka mo go sa felego, eupša ke kgetho ya tsela ya bophelo ya ka mo go sa felego le yeo e sa fetošwego yeo e ganetšanago le Modimo ka mo go feletšego le tsela ya kgonthe moo e lego gore pheletšo e nnoši ke go se be gona ka mo go feletšego.”

Katikasema ya Kereke ya Episcopal ya United States e hlalosa hele e le “lehu la ka mo go sa felego ka baka la go gana ga rena Modimo.” U.S.News & World Report e re palo e oketšegago ya batho ba thekga kgopolo ya gore “mafelelo a bobe ke  phedišo, e sego tlaišego ya ka mo go sa felego. . . . [Ba] ganetša gore bao mafelelong ba ganago Modimo ba tla fo tlošwa gore ba se sa ba gona ‘mollong o fišago kudu’ wa hele.”

Gaešita le ge kgopolo ya mehleng yeno e le go ganetša kgopolo ya mollo le tshebela, ba bantši ba tšwela pele go dumela gore hele ke lefelo la kgonthe la tlhokofatšo. Albert Mohler wa Southern Baptist Theological Seminary kua Louisville, Kentucky U.S.A. o re: “Mangwalo a bolela ka mo go kwagalago ka hele e le lefelo la kgonthe la tlhokofatšo ya mollo.” Gomme pego ya The Nature of Hell, yeo e lokišeditšwego ke Evangelical Alliance Commission e re: “Hele ke phihlelo yeo o kgonago go e-kwa ya go ganwa le tlhokofatšo.” E oketša ka gore: “Go na le ditekanyo tša kotlo le tlaišego heleng tšeo di lego mabapi le bošoro bja dibe tšeo di dirilwego mo lefaseng.”

Gape, na hele ke lefelo la mollo wa tlhokofatšo ya ka mo go sa felego goba la phedišo? Goba e fo ba feela boemo bja go arogana le Modimo? Ge e le gabotse hele ke eng?

[Lepokisi/Diswantšho go letlakala 4]

Histori e Kopana ya Mollo wa Dihele

KE NENG moo batho bao ba ipitšago Bakriste ba ilego ba thoma go dumela go mollo wa dihele? Nako e telele ka morago ga mehla ya Jesu Kriste le baapostola ba gagwe. Encyclopædia Universalis ya se-Fora e re: “Apocalypse of Peter (lekgolong la bobedi la nywaga C.E.) e be e le puku ya mathomo [yeo go se nago kgonthe ya yona] ya Bokriste go hlalosa kotlo le ditlhokofatšo tša badiradibe heleng.”

Lega go le bjalo, gare ga Bo-tate ba Kereke ba pele go be go na le go se dumelelane ka hele. Justin Martyr, Clement wa Alexandria, Tertullian le Cyprian ba be ba dumela gore hele e be e le lefelo la mollo. Origen le ra-thutatumelo Gregory wa Nyssa ba rutile ka hele e le lefelo la go arogana le Modimola tlaišego ya moya. Ka lehlakoreng le lengwe, Augustine wa Hippo o be a dumela gore go tlaišega heleng e be e le ga moya le ga namapono yeo e ilego ya amogelwa. Moprofesara J.N.D. Kelly o ngwadile gore: “Lekgolong la bohlano la nywaga thuto e tiilego ya gore badiradibe ba ka se be le sebaka sa bobedi ka morago ga bophelo bjo le gore mollo wo o tlago go ba fediša le ka mohla o ka se ke wa tingwa e be e phatlaletše gohle.”

Lekgolong la bo-16 la nywaga, bampshafatši ba Protestanta ba bjalo ka Martin Luther le John Calvin ba ile ba kwešiša tlhokofatšo ya mollo wa hele e le tshwantšhetšo ya go fetša bosafelego o arogantšwe le Modimo. Lega go le bjalo, kgopolo ya hele e le lefelo la tlhokofatšo e ile ya boa nywaga-kgolong e mebedi e latetšego. Moruti wa Protestanta Jonathan Edwards o be a tšhoša ma-Amerika a lekgolong la bo-18 la nywaga a Koloning ka diswantšho tša kgonthe tša hele.

Lega go le bjalo, kapejana ka morago ga moo, dikgabo tša hele di ile tša thoma go fokola le go nyamelela. U.S.News & World Report e re: “Hele e nyakile go hwa lekgolong la bo-20 la nywaga.”

[Diswantšho]

Justin Martyr o be a dumela gore hele e be e le lefelo la mollo

Augustine wa Hippo o rutile gore go tlaišega heleng e be e le ga moya le ga nama