Okeletša Boineelo go Modimo Kgotlelelong ya Gago
Okeletša Boineelo go Modimo Kgotlelelong ya Gago
“Byale a nke Le phêxêleleng ruri xore tumêlô ya lena e tšweletšê . . . kxôtlêlêlô; kxôtlêlêlô e tšweletšê borapedi [“boineelo go Modimo,” NW].”—2 PETRO 1:5, 6.
1, 2. (a) Ke kgolo ya mohuta ofe yeo e letetšwego ngwaneng? (b) Kgolo ya moya e bohlokwa gakaaka’ng?
GO GOLA ke selo sa bohlokwa go ngwana, eupša ga se feela go gola mmeleng moo go nyakegago. Go letetšwe gore go be le kgolo ya monagano le ya maikwelo. Ge nako e tšwela pele, ngwana o tla tlogela mekgwa ya bjana gomme a gola gore e be monna goba mosadi yo a ipheditšego. Moapostola Paulo o be a bolela ka se ge a be a ngwala gore: “Mola kè sa le ngwana, ke be ke bolêla bo-ka ngwana, kè be ke hlaoloxanya bo-ka ngwana, kè eleletša bo-ka ngwana. Byale kè le monna, tša byana ke di fedišitše.”—1 Ba-Korinthe 13:11.
2 Mantšu a Paulo a bolela ntlha ya bohlokwa mabapi le kgolo ya moya. Bakriste ba swanetše go bontšha tšwelopele ya go tloga go beng bana moyeng go ya go beng “ba godilego ka mo go feletšego matleng a kwešišo.” (1 Ba-Korinthe 14:20, NW) Ba swanetše go katana gomme ba tsome go fihlelela “boxolwane bya xo lekanêla botlalô bya Kriste.” Ke moka e ka se sa hlwa e e-ba “bana, batho ba xo fo xapa-xapiwa le xo tšewa-tšewa ke phefô e nngwê le e nngwê ya thutô.”—Ba-Efeso 4:13, 14.
3, 4. (a) Re swanetše go dira’ng gore re gole ka mo go feletšego moyeng? (b) Ke dika dife tša go boifa Modimo tšeo re swanetšego go di bontšha, gomme di bohlokwa gakaaka’ng?
3 Re ka ba bjang bao ba godilego ka mo go feletšego moyeng? Gaešita le ge go gola mmeleng go tšwela pele ka tsela e nyakilego e itlela feela ka tlase ga maemo a tlwaelegilego, go gola moyeng go nyaka maiteko a naganišišitšwego. Go thoma ka go monya tsebo e nepagetšego ya Lentšu la Modimo le go dira ka go dumelelana le seo re ithutago sona. (Ba-Hebere 5:14; 2 Petro 1:3) Ka lehlakoreng le lengwe, se se re kgoniša go bonagatša dika tšeo di kgahlišago Modimo. Ka go swana le go gola mmeleng gotee le dibopego tše dingwe tšeo di sepedišanago le gona, gantši seka se se tee sa go boifa Modimo se gola sammaletee le dika tše dingwe. Moapostola Petro o ngwadile gore: “A nke Le phêxêleleng ruri xore tumêlô ya lena e tšweletšê bokwala; bokwala bo tšweletšê tsebô; Tsebô e tšweletšê boithswarô; boithswarô bo tšweletšê kxôtlêlêlô; kxôtlêlêlô e tšweletšê borapedi [“boineelo go Modimo,” NW]; Borapedi bo tšweletšê leratanô; leratanô le tšweletšê lôna leratô-ratô.”—2 Petro 1:5-7.
4 Seka se sengwe le se sengwe seo Petro a se lokeleditšego se bohlokwa, gomme ga go na le se tee seo se ka tlošwago. O oketša ka gore: “Xe dilô tše dì ata, xôna Le ka se dule fêla Lè hlôka dienywa tše di išaxo tsebong ya xo tseba Mong wa rena Jesu Kriste.” (2 Petro 1:8) Anke re lebeledišišeng go go nyakega ga gore re okeletše boineelo go Modimo kgotlelelong ya rena.
Go Nyakega ga go Kgotlelela
5. Ke ka baka la’ng re nyaka kgotlelelo?
5 Petro gotee le Paulo ba kgokaganya boineelo go Modimo le kgotlelelo. (1 Timotheo 6:11) Go ba le kgotlelelo go bolela se se fetago go fo kgotlelela ka tlase ga maemo a thata le go ema o tiile. Go akaretša go se fele pelo, go ba le sebete le go tia, go se lahlegelwe ke kholofelo ge re lebeletšane le diteko, mapheko goba tlaišo. Ka ge re le batho bao ba phelago ka “borapedi [“boineelo go Modimo,” NW] ka Kriste Jesu;” re letetše gore re tlaišwe. (2 Timotheo 3:12) Re swanetše go kgotlelela ge e ba re tla hlatsela go rata ga rena Jehofa gomme re godiše dika tšeo di nyakegago bakeng sa phološo. (Ba-Roma 5:3-5; 2 Timotheo 4:7, 8; Jakobo 1:3, 4, 12) Ka ntle le kgotlelelo, re ka se hwetše bophelo bjo bo sa felego.—Ba-Roma 2:6, 7; Ba-Hebere 10:36.
6. Go kgotlelela go fihla bofelong go bolela go dira’ng?
6 Go sa šetšwe gore re thoma gabotse gakaakang, seo se lego bohlokwa kudu mafelelong ke go ba ga rena le kgotlelelo. Jesu o itše: “E a tl’o xo tiišetša xo fihla bofelong, ké yêna a tl’o xo phološwa.” (Mateo 24:13) Ee, re swanetše go kgotlelela go fihla bofelong, e ka ba e le gore e tla ba go fihla bofelong bja bophelo bja rena bja gona bjale goba bofelong bja tshepedišo ye e kgopo ya dilo. Boemong le ge e le bofe, re swanetše go boloka go botegela ga rena Modimo. Lega go le bjalo, ge e ba re sa okeletše boineelo go Modimo kgotlelelong ya rena, re ka se kgone go kgahliša Jehofa gomme re ka se hwetše bophelo bjo bo sa felego. Eupša boineelo go Modimo ke’ng?
Seo Boineelo go Modimo bo se Bolelago
7. Boineelo go Modimo ke eng, gomme bo re tutueletša go dira’ng?
7 Boineelo go Modimo ke tlhompho ya motho ka noši, borapedi le tirelo go Jehofa Modimo e le mafelelo a go botegela bogoši bja gagwe bja legohleng ka go se kwanantšhe. Gore re bontšhe boineelo go Modimo mabapi le Jehofa, re swanetše go ba le tsebo e nepagetšego ka yena le ka ditsela tša gagwe. Re swanetše go nyaka go tseba Modimo ka boyena, re mo tsebe kgaufsi-ufsi. Se se tla re šušumeletša gore re be le maikwelo a kgaufsi le yena, e lego ao a bonagatšwago ke mediro le tsela ya rena ya bophelo. Re swanetše go kganyoga go swana kudu le Jehofa ka mo go ka kgonegagogo ekiša ditsela tša gagwe le go bonagatša dika tša gagwe le semelo. (Ba-Efeso 5:1) Ka kgonthe, boineelo go Modimo bo re tutueletša go nyaka go kgahliša Modimo dilong ka moka tšeo re di dirago.—1 Ba-Korinthe 10:31.
8. Ke ka tsela efe boineelo go Modimo le boineelo bjo bo feletšego e lego monwana le lenala?
8 Gore re bontšhe boineelo bja kgonthe go Modimo, re swanetše go rapela Jehofa ka mo go feletšego, re se ke ra dumelela selo le ge e le sefe go tšea sebaka sa gagwe ka dipelong tša rena. E le Mmopi wa rena, o na le tshwanelo ya go nyaka boineelo bjo bo feletšego go rena. (Doiteronomio 4:24; Jesaya 42:8) Lega go le bjalo, Jehofa ga a re gapeletše gore re mo rapele. O kganyoga boineelo bja rena bja go tšwa pelong. Ke lerato la rena la go rata Modimo leo le theilwego tsebong e nepagetšego ya go mo tseba, leo le re šušumeletšago go hlwekiša maphelo a rena le go bontšha boineelo ka mo go feletšego go yena le go phela ka go dumelelana le bjona.
Aga Tswalano le Modimo
9, 10. Re ka aga bjang le go kgomarela tswalano ya kgaufsi le Modimo?
9 Ka morago ga go bontšha boineelo bja rena go Modimo gomme ra kolobetšwa, re sa dutše re swanetše ke go aga tswalano ya kgaufsi-ufsi ya ka mo go sa felego le yena. Ka gona kganyogo ya rena ya go dira se le go hlankela Jehofa ka potego di re šušumeletša go tšwela pele re ithuta Lentšu la gagwe le go naganišiša ka lona. Ge re dutše re dumelela moya wa Modimo go tutuetša menagano le dipelo tša rena, lerato la rena la go rata Jehofa le a gola. Tswalano ya rena le yena e tšwela pele go ba selo sa bohlokwa kudu maphelong a rena. Re lebelela Jehofa e le Mogwera wa rena wa potego gomme re nyaka go mo kgahliša ka dinako tšohle. (1 Johane 5:3) Lethabo la rena tswalanong ya rena e kgahlišago le Modimo le a gola, gomme re thabišwa ke gore o re ruta ka tsela ya lerato gomme o a re phošolla mo go nyakegago.—Doiteronomio 8:5.
10 Ge e ba re ka se gate megato ya go tiiša tswalano ya rena e bohlokwa le Jehofa ka go se kgaotše, e ka hwa. Ge e ba seo se diregile, e ka se be molato wa Modimo, ka gobane “ó kxaufsi le e mongwê le e mongwê wa ba re lexo fá.” (Ditiro 17:27) Re thaba kudu gakaakang gore Jehofa ga se a dira gore go be thata go mmatamela! (1 Johane 5:14, 15) Go ba gona, re swanetše go katanela go kgomarela tswalano ya kgaufsi ya motho ka noši le Jehofa. Lega go le bjalo, o re thuša gore re mmatamele kgaufsi ka go re nea ditokišetšo ka moka tšeo re di hlokago go aga le go kgomarela boineelo go Modimo. (Jakobo 4:8) Re ka diriša bjang ka mo go tletšego ditokišetšo tše tše lerato?
Dulang le Matlafetše Moyeng
11. Dipontšho tše dingwe tša boineelo bja rena go Modimo ke dife?
11 Lerato la rena leo le tsemilego medu la go rata Modimo le tla re tutueletša go bontšha bogolo bja boineelo bja rena go Modimo, ka go dumelelana le keletšo ya Paulo e rego: “Se O swanetšexo xo se phêxêlêla ké xore Modimo a bônê Ò le mmotexi, Ò le modiri e a se naxo bosodi, e a tsebaxo xo ratha Lentšu la therešô à sa kxopamiše.” (2 Timotheo 2:15) Gore re dire se go nyakega gore re kgomarele mokgwa o mobotse wa go ithuta Beibele ka mehla, go ba gona dibokeng le go tšea karolo bodireding bja tšhemo. Le gona re ka dula re le kgaufsi le Jehofa ka go “se kxaotše xo rapêla.” (1 Ba-Thesalonika 5:17) Ye ke mediro ya bohlokwa ya boineelo bja rena go Modimo. Go se šetše le ge e le ofe wa mediro ye go ka baka bolwetši bja moya gomme gwa re dira gore re hlaselwe ga bonolo ke maano a Sathane.—1 Petro 5:8.
12. Re ka lebeletšana bjang ka katlego le diteko?
12 Go dula re matlafetše moyeng le go ba mafolofolo le gona go re thuša go lebeletšana le diteko tše dintši tšeo di re welago. Diteko di ka tšwa methopong yeo e ka tlogago e re leka kudu. Go ka ba thata kudu go kgotlelela go se be le taba, kganetšo le tlaišo ge e ba di tšwelela ka ditho tša kgaufsi tša lapa, ba leloko goba baagišani. Dikgateletšo tša bohwirihwiri tša go kwanantšha melao ya motheo ya rena ya Bokriste di ka tšwelela mešomong ya rena goba sekolong. Go fela matla, bolwetši le kgateletšego di ka re fokodiša mmeleng gomme tša dira gore go be thata ka mo go oketšegilego go lebeletšana le diteko tša tumelo. Eupša re ka lebeletšana ka katlego le diteko ka moka ge e ba re kgotlelela ‘go swara ka tsela e kgethwa ya boineelo go Modimo, re le ba go letela le go phafogela go tla ga letšatši leo la Jehofa.’ (2 Petro 3:11, 12, bapiša le NW.) Gomme re ka kgomarela lethabo la rena ka go dira bjalo, re kgodišegile ka tšhegofatšo ya Modimo.—Diema 10:22.
13. Re swanetše go dira’ng ge e ba re tla dula re bontšha boineelo go Modimo?
13 Gaešita le ge Sathane a hlasela bao ba bontšhago boineelo go Modimo, ga se ra swanela go boifa. Ka baka la’ng? Ka gobane “Modimo, ba ba mmoifaxo ó ba hlakodiša melekong.” (2 Petro 2:9) Gore re kgotlelele meleko le go hwetša tlhakodišo e bjalo, re swanetše “xo lahla xo nyatša Modimo, xo lahla dikxanyoxô tša lefase; xore mehleng yeno re phelê rè eletšexile, rè loka, rè na le borapedi [“boineelo go Modimo,” NW]. (Tito 2:12) Re le Bakriste, re swanetše go ba ba ba hlokomelago e le gore bofokodi le ge e le bofe bjo bo akaretšago dikganyogo tša nama le mediro ya tšona bo se ke bja šwahlela boineelo bja rena go Modimo gomme bja bo senya. Ga bjale anke re eleng hloko tše dingwe tša ditšhošetšo tše.
Hlokomela Ditšhošetšo tša go Tšhošetša Boineelo go Modimo
14. Re swanetše go gopola’ng ge e ba re gokeletšwa ke molaba wa dilo tše di bonagalago?
14 Dilo tše di bonagalago ke molaba go ba bantši. Re ka ba ra iphora, ‘ra nagana gore boineelo go Modimo ke bja go inyakela leruo.’ Ka go rialo, re ka hlohleletšega go diriša gampe potego yeo e bontšhwago ke badumedi-gotee le rena. (1 Timotheo 6:5, bapiša le NW.) Re ka ba ra phetha ka mo go fošagetšego gore ke selo se sebotse go gatelela Mokriste yo a atlegilego gore a re adime tšhelete yeo re tlago go palelwa ke go e buša. (Psalme 37:21) Eupša ke boineelo go Modimo, e sego go ba le dilo tše di bonagalago, moo go ‘nago le kholofedišo ya bophelo bjono le ya bjo bo sa tlogo tla.’ (1 Timotheo 4:8) Ka ge ‘re sa tla le selo mola re e-tla lefaseng, le go tloga re ka se tloge le selo,’ a re ikemišetšeng ka mo go oketšegilego go phegelela ‘boineelo go Modimo le go kgolwa ke tše re nago le tšona’ gomme re itumelele go ‘kgotsofatšwa ke dijo le diaparo.’—1 Timotheo 6:6-11, bapiša le NW.
15. Ke’ng seo re ka se dirago ge e ba go phegelela maipshino go bea boemo bja rena bja boineelo go Modimo kotsing?
15 Go phegelela maipshino go ka tšea sebaka sa boineelo go Modimo. Na e ka ba e le gore re swanetše go dira diphetogo tše di nyakegago tabeng ye? Therešong, mehola e mengwe e hwetšwa ka boitlwaetšo bja mmele le boithabišo. Lega go le bjalo, meputso e bjalo ke e menyenyane ge e bapišwa le bophelo bjo bo sa felego. (1 Johane 2:25) Lehono ba bantši ke “baikxanthši ba xo iphsina ba lahlile Modimo. Xe O ba bôna, O tlo re ba n’e borapedi [“boineelo go Modimo”, NW],” gomme re swanetše go phema batho ba bjalo. (2 Timotheo 3:4, 5) Bao ba gatelelago boineelo go Modimo ba ‘a ithuela, ba thea motheo wa mehla e tlo go tla gore ba fihlele bjo e lego bophelo bja ruri.’—1 Timotheo 6:19.
16. Ke dikganyogo dife tša sebe tšeo di paledišago ba bangwe go phela ka dinyakwa tša go loka tša Modimo, gomme re ka fenya bjang dikganyogo tše?
16 Dino-tagi le go dirišwa gampe ga dihlare-tagi, boitshwaro bjo bo gobogilego le dikganyogo tša sebe di ka senya boineelo bja rena go Modimo. Go ineela dilong tše go ka re thibela go phela ka dinyakwa tša Modimo tša go loka. (1 Ba-Korinthe 6:9, 10; 2 Ba-Korinthe 7:1) Gaešita le Paulo o ile a swanela go kgotlelela ntwa e tšwelago pele le nama ya sebe. (Ba-Roma 7:21-25) Go nyakega go gata megato e tiilego ya go tloša dikganyogo tše mpe. Gare ga dilo tše dingwe, re swanetše go ikemišetša go dula re hlwekile boitshwarong. Paulo o re botša gore: “Bolayang . . . tše dithong tša lena e lexo tša lefase, e lexo bootswa, le dithšila, le tumô, le kxanyoxô e mpe, le mexabaru e lexo xo dirêla modimo o šele.” (Ba-Kolose 3:5) Go bolaya ditho tša mebele ya rena tabeng ya dilo tše bjalo tša sebe go nyaka boikemišetšo e le gore re di tloše. Thapelo ya go tšwa pelong ya go rapelela thušo ya Modimo e tla re thuša go lahla dikganyogo tše mpe gomme ra phegelela go loka le boineelo go Modimo gare ga tshepedišo ye ya gona bjale e kgopo ya dilo.
17. Re swanetše go lebelela tayo bjang?
17 Go fela matla go ka fokodiša kgotlelelo ya rena gomme gwa ba le mafelelo a kotsi boineelong bja rena go Modimo. Bahlanka ba bantši ba Jehofa ba bile le phihlelo ya go felelwa ke matla. (Numeri 11:11-15; Esera 4:4; Jona 4:3) Go fela matla go ka ba le mafelelo a senyago go rena ge e ba ka mo go kgethegilego go sepedišana le go ba le sekgopi ka gobane re ikwa re fošeditšwe goba re kgalemilwe o šoro goba go laiwa. Lega go le bjalo, kgalemelo le tayo ke bohlatse bja go ba le taba ga Modimo le go kgomega ka lerato. (Ba-Hebere 12:5-7, 10, 11) Tayo e swanetše go lebelelwa e sego feela e le kotlo eupša e le mokgwa wa go re tlwaetša tseleng ya go loka. Ge e ba re ikokobeditše, re tla leboga keletšo kudu le go e amogela, re lemoga gore “thsôlô le keletšô ke tsela ya bophelô.” (Diema 6:23) Se se ka re thuša gore re dire tšwelopele e botse ya moya go phegeleleng boineelo go Modimo.
18. Re na le boikarabelo bofe ge go tliwa tabeng ya go kgopišwa ke ba bangwe?
18 Go se kwešišane le go kgopišwa ke batho ba bangwe e ka ba tlhohlo boineelong bja rena go Modimo. Dilo tše di ka baka pelaelo goba go šušumeletša ba bangwe go gata mogato wo e sego wa bohlale wa go ipea lekatana go bana babo bona le dikgaetšedi ba moya. (Diema 18:1) Eupša re swanetše go gopola gore go boloka sekgopi goba go ba le maikwelo a bonaba go ba bangwe go ka ba le mafelelo a kotsi tswalanong ya rena le Jehofa. (Lefitiko 19:18) Ge e le gabotse, “e a sa ratexo ngwan’abô yo a mmônaxo, a a ka kxôna xo rata Modimo yo a sa mmonexo?” (1 Johane 4:20) Thutong ya gagwe ya Thabeng, Jesu o ile a gatelela go nyakega ga go gata megato ya kapejana go lokiša diphapano. O ile a botša batheetši ba gagwe gore: “Ké xôna, xe O tliša neô ya xaxo aletareng, ’me Ò le xôna-fao wa êlêlwa, xore ngwan’eno ó na le taba le wêna, xôna tloxêla neô ya xaxo moo aletareng, O thômê xo y’o boêlana le ngwan’eno, O tseb’o tliša neô ya xaxo.” (Mateo 5:23, 24) Go kgopela tshwarelo go ka thuša go fodiša ntho yeo e bakilwego ke mantšu goba ditiro tše sego botho. Kgobalo e dirilwego tswalanong e ka fodišwa gomme ditswalano tšeo di nago le khutšo tša bušetšwa sekeng ge e ba re kgopela tebalelo gomme re amogela gore re ile ra swaragana le ditaba ka tsela e sa swanelago. Jesu o ile a neelana gape ka keletšo e nngwe ya go rarolla mathata. (Mateo 18:15-17) Re thaba gakaakang ge maiteko a go lokiša mathata a atlega!—Ba-Roma 12:18; Ba-Efeso 4:26, 27.
Latelang Mohlala wa Jesu
19. Ke ka baka la’ng e le ga bohlokwa gakaakaa go ekiša mohlala wa Jesu?
19 Ka ntle le pelaelo diteko di tla re wela, eupša ga se tša swanela go re fapoša lebelong la bophelo bjo bo sa felego. Gopola gore Jehofa a ka re phološa ditekong. Ge re dutše re ‘apola tše di re imelago tšohle’ gomme ‘re kgotlelela tlhabanong ye re lego mo go yona,’ a re ‘išeng mahlo go Mo-eta-pele le Mophethi wa tumelo, Jesu.’ (Ba-Hebere 12:1-3) Go hlahlobišiša mohlala wa Jesu le go katanela go mo ekiša ka mantšu le ka mediro go tla re thuša go hlagolela boineelo go Modimo gomme ra bo bontšha ka tekanyo e kgolo.
20. Ke meputso efe e tšwelelago ka go phegelela kgotlelelo le boineelo go Modimo?
20 Kgotlelelo le boineelo go Modimo ke monwana le lenala go thuša gore phološo ya rena e be e kgonthišeditšwego. Ka go bontšha dika tše tše dibotse, re ka tšwela pele ka potego tirelong ya rena e kgethwa go Modimo. Gaešita le ka tlase ga teko, re tla hlalala ge re thabela maikwelo a lerato le tšhegofatšo ya Jehofa ka gobane re kgotleletše gomme re bontšha boineelo go Modimo. (Jakobo 5:11) Go feta moo, Jesu ka boyena o re kgonthišetša gore: “ ’Me bophelô bya lena Le tlo bo rua ka kxotlêlêlô.”—Luka 21:19.
O tla Araba Bjang?
• Ke ka baka la’ng kgotlelelo e le bohlokwa?
• Boineelo go Modimo ke’ng, gomme bo bontšhwa bjang?
• Re ka aga bjang le go kgomarela tswalano ya kgaufsi le Modimo?
• Ditšhošetšo tše dingwe boineelong bja rena go Modimo ke dife, gomme re ka di phema bjang?
[Dipotšišo tša Thuto]
[Diswantšho go letlakala 12, 13]
Boineelo go Modimo bo bonagatšwa ka ditsela tše dintši
[Diswantšho go letlakala 14]
Hlokomela ditšhošetšo tša go tšhošetša boineelo bja gago go Modimo