Boiteko bjo Matla​—Jehofa o bo Šegofatša Neng?

“NTESÊ ke sepelê xobane mahuba a a hlatloxa.”

“Nka se kê ka Xo lesa, xe e se xe O nthšexofatša.”

“Leina la xaxo O mang?”

“Ké nna Jakobo.”

“Leina la xaxo O ka se hlwê O bitšwa Jakobo; leina la xaxo ké Isiraele (Mo-katana-le-Modimo) xobane O katane le Modimo ’me wa fenya.”—Genesi 32:​27-​29.

Pontšho e makatšago ya mafolofolo a ra-mabelo ye e dirilwego ke Jakobo wa nywaga e 97 e bile mafelelo a poledišano yeo e kgahlišago. Le ge Beibele e sa mo hlalose e le ra-mabelo, o ile a katana bošego ka moka le morongwa. Ke ka baka la’ng? Jakobo o be a tshwenyegile ka mo go tseneletšego ka kholofetšo ya Jehofa go rakgolo-khukhu wa gagwekarolo ya bohwa bja gagwe.

Nywaga e mentši pejana mogolo wa Jakobo e lego Esau o ile a mo rekišetša tshwanelo ya go ba leitšibolo ka sebjana sa dinawa. Bjale Jakobo o kwa gore Esau o batamela ka ponagalo ya go tšhošetša a na le banna ba 400. A tšhogile ka mo go kwagalago, Jakobo o nyaka gore Jehofa a mo kgonthišetše ka kholofetšo ya gagwe ya gore lapa la gagwe le tla atlega lefaseng la ka mošola wa Noka ya Jorodane. Ka go dumelelana le thapelo ya gagwe, Jakobo o gata mogato wa makgaola kgang. O romela dimpho tše dikgolo go Esau yo a batamelago. Gape o gata le megato ya tšhireletšo, a arola batho ba gagwe ka dihlopha tše pedi le go tshedišetša basadi ba gagwe le bana letšibogong la noka ya Jaboko. Ka boiteko bjo matla le megokgo, Jakobo bjale o phegelela ka mo go tšwelago pele go katana le morongwa bošego ka moka go fihlela Jakobo “a lla a mo rapela.”—Hosea 12:5; Genesi 32:​1-​32.

Nagana ka mohlala wa pejana, Ragele, mosadi wa Jakobo wa bobedi le yoo a bego a mo rata kudu. Ragele o tseba gabotse ka kholofetšo ya Jehofa ya go šegofatša Jakobo. Mogola’gwe e lego Lea, mosadi wa Jakobo wa pele, o šegofaditšwe ka barwa ba bane mola Ragele e dutše e le moopa. (Genesi 29:​31-​35) Go e na le go ikwela bohloko, o tšwela pele go kgopela Jehofa ka thapelo le go gata mogato ka go dumelelana le dithapelo tša gagwe. Go etša ge makgolo-khukhu wa gagwe Sara a ile a dira go Hagara, Ragele o tliša molata wa gagwe wa mosadi Bilha gomme o mo nea Jakobo bjalo ka mosadi wa bobedi, gore go etša ge Ragele a bolela, ‘a  mmelegele bana.’ * Bilha a belegela Jakobo barwa ba babedi, e lego Dan le Nafutali. Nakong ya go belegwa ga Nafutali Ragele o bolela tekanyo ya boiteko bja maikwelo a gagwe ge a re: “Ke katane le moxol’wake ka bá ka fenya.” Ragele o šegofatšwa gape ka barwa ba babedi bao ba belegwego ke yena ka noši, Josefa le Benyamini.—Genesi 30:​1-8; 35:24.

Ke ka baka la’ng Jehofa a ile a šegofatša maiteko a mmele le a maikwelo a Jakobo le Ragele? Ba ile ba boloka thato ya Jehofa e le e tlago pele maphelong a bona le go tšea bohwa bja bona e le bja bohlokwa. Ba ile ba rapelela ditšhegofatšo tša gagwe ka phišego maphelong a bona le go gata mogato o swanetšego ka go dumelelana le thato ya Modimo le dikgopelo tša bona.

Bjalo ka Jakobo le Ragele, ba bantši lehono ba ka hlatsela taba ya gore go nyakega boiteko bjo mafolofolo bakeng sa go hwetša tšhegofatšo ya Jehofa. Gantši maiteko a bona a sepedišana le megokgo, go nyama le kgakanego. Mma yo mongwe wa Mokriste e lego Elizabeth, o gopola boiteko bjo matla bjo a ilego a bo dira bakeng sa go thomiša go ba gona ka mehla dibokeng tša Bokriste ka morago ga nako e telele a sa be gona. E be e le tlhohlo go yena go ya dibokeng ka ge a be a na le bašemanyana ba bahlano, monna yo a sa dumelego gomme a otlela sebaka sa dikhilomithara tše 30 go ya Holong ya Mmušo ya kgaufsi. “Go leka go ba gona dibokeng ka mehla go be go nyaka boitayo kudu, e lego seo ke bego ke tseba gore e tla ba sa mohola go nna le go barwa ba-ka. Go ba thušitše go bona gore se ke selo seo se swanelwago ke go phegelelwa.” Jehofa o ile a šegofatša maiteko a gagwe. Go barwa ba gagwe ba bararo bao ba lego mafolofolo ka phuthegong ya Bokriste, ba babedi ba bodireding bja nako e tletšego. O ile a bolela se ge a be a thabišwa ke tšwelopele ya bona: “Ba mphadile kgole ka go gola moyeng.” A tšhegofatšo e kaakang bakeng sa boiteko bja gagwe bjo matla!

Boiteko bjo Matla bjo Jehofa a bo Šegofatšago

Go dira boiteko bjo matla le go šoma ka thata go tloga go na le meputso ya gona. Ge re dira boiteko bjo bo oketšegilego mošomong goba kabelong, ke moo re hwetšago kgotsofalo e oketšegilego. Ke kamoo Jehofa a re dirilego ka gona. Kgoši Salomo o ngwadile gore: “Ké neô ya Modimo, xe motho a e-ja, a e-nwa, ’me a bôna tše di botse ka ’tapišô tš’axwe tšohle.” (Mmoledi 3:​13; 5:​18, 19) Lega go le bjalo, gore re hwetše tšhegofatšo e tšwago go Modimo re swanetše go kgonthišetša gore maiteko a rena a hlahlwa ka tsela e swanetšego. Ka mohlala, na ke mo go kwagalago go letela tšhegofatšo ya Jehofa ge e ba re phela bophelo bjo bo sa etišego dilo tša moya pele? Na Mokriste yo a ineetšego a ka holofela go amogelwa ke Jehofa ge e ba a amogela mošomo wa boiphedišo goba go hlatlošetšwa maemong a phagamego ao a tla dirago gore ka mehla a lahlegelwe ke bogwera bjo bo agago tumelo le tlhahlo yeo e hwetšwago dibokeng tša Bokriste?—Ba-Hebere 10:​23-​25.

Go šoma ka thata bophelo ka moka bakeng sa go phegelela mošomo wa boiphedišo goba katlego ya dilo tše di bonagalago ga go bolele gore motho o tla “bôna tše di botse” ge e ba seo se dirwa gomme go hlokomologwa dilo tša moya. Jesu o ile a bolela ka ditla-morago tša boiteko bjo bo fošagetšego seswantšhong sa gagwe sa mobjadi. Mabapi le peu ‘e bjetšwego meetlweng,’ Jesu o hlalositše gore “ké e a kwaxo Lentšu, ’me la bipya ke dipelaêlô tša bophelô byono le bofora bya lehumô, yêna a opafala.” (Mateo 13:​22) Paulo le yena o ile a lemoša ka molaba o swanago gomme  a oketša ka gore bao ba phegelelago bophelo bja dilo tše di bonagalago “ba wêla melekong le mereong; ba ya le dikxanyoxô tše ntši tša bošilo tše di xobošaxo motho tša mo senya, tša mo tekesetša thsenyexong le tahlexong.” Tharollo ke eng bakeng sa tsela e bjalo ya bophelo e senyago moyeng? Paulo o ile a tšwela pele gore: ‘Tšhaba dilo tšeo gomme o se holofele lehumo la go tla le go tloga; o holofele Modimo e a phelago, e a re fago tšohle gore di re thabiše.’—1 Timotheo 6:​9, 11, 17.

Go sa šetšwe gore re na le nywaga e mekae goba re hlanketše Jehofa sebaka se se kaakang, ka moka ga rena re ka holwa ke go ekiša boiteko bjo matla bjo bo ilego bja bontšhwa ke Jakobo le Ragele. Go tsomeng ga bona kamogelo ya Modimo, ga se ba ka ba lebala bohwa bja bona, go sa šetšwe gore maemo a bona a ka be a bile a tšhošago goba a ferekanyago gakaakang. Lehono, dikgateletšo le mathata ao re lebeletšanago le ona e ka ba a tšhošago ka mo go swanago, a ferekanyago goba gaešita le go ba ao a gateletšago. Teko ke ya go tlogela go katana gomme wa ba mohlaselwa yo mongwe wa tlhaselo ya Sathane. A ka diriša tsela le ge e le efe yeo e lego matleng a gagwe, e ka ba yeo e akaretšago boithabišo goba boitapološo, dipapadi goba ditloša-bodutu, mešomo ya boiphedišo goba katlego ya dilo tše di bonagalago bakeng sa go fihlelela merero ya gagwe. Gantši go holofetšwa dilo tše di kganyogegago eupša ga se gantši di hwetšwago. Bontši bja bao ba hlalefetšwago goba ba goketšwago go phegelela dilo tše bjalo gantši ba feleletša ba nyamile. Bjalo ka Jakobo le Ragele ba bogologolo, a re hlagoleleng moya wa mokatani wa kgonthe gomme re fenye maano a Sathane.

Ga go seo se ka thabišago Diabolo go feta ge a ka re bona re ineela go fenyweng, re ikwa gore ‘boemo ke bja go hlobogwa. Ga go selo seo se ka dirwago. Go leka ga go thuše ka selo.’ Lega go le bjalo, ke ga bohlokwa kudu go rena ka moka go itiša malebana le go ba le boemo bja kgopolo bja go ineela, re nagana gore ‘ga go na yo a nthatago’ le gore ‘Jehofa o ntebetše.’ Go ineela dikgopolong tše bjalo ke go ipolaya. Na e ka ba e le go bontšha gore re phuthile diatla tša rena gomme ga re sa tšwela pele re katana go fihlela re hwetša tšhegofatšo? Gopola, Jehofa o šegofatša boiteko bja rena bjo matla.

Tšwela Pele go Katanela Ditšhegofatšo tša Jehofa

Bophelo bja rena bja moya bjo bobotse bo ithekgile kudu ka go kwešiša ditherešo tše pedi tša motheo ka maphelo a rena re le bahlanka ba Jehofa. (1) Ga go le o tee yo a kgonago go laola mathata, malwetši goba maemo a thata bophelong, le gore (2) Jehofa o theetša dillo tša bao ba mo kgopelago thušo le tšhegofatšo e le ka kgonthe.Ekisodo 3:​7-10; Jakobo 4:​8, 10; 1 Petro 5:​8, 9.

Go sa šetšwe gore maemo a gago ke a thata goba o ka ba o ikwa o hlaelelwa gakaakang, o se ke wa ineela ‘sebeng se se raretšago gabonolo.’ (Ba-Hebere 12:1, bapiša le NW.) Tšwela pele go katana go fihlela o šegofatšwa. Bontšha go se fele pelo, o gopola Jakobo wa motšofadi yo a ilego a katana bošego ka moka bakeng sa go šegofatšwa. Go etša mobjadi yo a bjalago nakong ya seruthwane gomme a letela puno, nyaka tšhegofatšo ya Jehofa ka go se fele pelo modirong wa gago wa moya, go sa šetšwe gore o nagana gore modiro wa gago ke o lekanyeditšwego gakaakang. (Jakobo 5:​7, 8) Gomme dula o gopola mantšu a mopsalme a rego: “Ba xo byala ka mexôkxô ba tlo buna ka mekxolokwane.” (Psalme 126:5; Ba-Galatia 6:9) Ema o tiile gomme o dule o le gare ga bao ba katanago.

[Mengwalo ya ka tlase]